Luk 20

Uvaʼs iyojt tibʼ quBʼaal Jesuus tuchʼ inqʼa fariseeo tiʼ u tiqleʼm

Tio 21.23-27; Kuxh 11.27-33

1Paquletz ibʼan t-val u qʼij, nikich itxhus Jesuus inqʼa bʼaʼnla txhaq yol xoʼl mam xaol tu nimla tuulbʼal u tostiuxh, tul aqʼbʼ jolol inqʼa iqʼesal u tenam. Aʼe inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel, atz tuchʼ jolt inqʼa iqʼesal u tenam. 2Tul ech motx tal s-eche: —Al s-qe ¿tal qat tzajk vaviqleʼm aaʼn?, tul nik abʼan inqʼa kam inqʼae. Atz ¿jaʼl qat alon see uvaʼ, aʼ vet axh, iqʼesal?, tul nik abʼan inqʼa kam inqʼae, —xeʼtaq te Jesuus.

3Yaʼne ech tal Jesuus s-eche: —Ape. Toqatetz vabʼi val u yol sete s-bʼaxa. Tzaqʼbʼetaqetza: 4¿Jaʼl aqʼon tiqleʼm naq u Xhun tiʼ taqʼax kuʼ inqʼa xaol xeʼ aʼ, nik enatxheʼ? ¿Maq quBʼaal Tiuxh uvaʼ tu amlikaʼ? Pet ¿maq naq inqʼa xaol? —xeʼt Jesuus.

5Yaʼne motx iyol vet inqʼa iqʼesal u tenam inqʼa yol s-vatzaq. Tul ech motx tal s-eche: —Oq toq qaleʼ uvaʼ: «QuBʼaal Tiuxh, uvaʼ tu amlikaʼ, aqʼon tiqleʼm naq u Xhun,» tul: «¿Keʼchetz yeʼ eqejt naq bʼa?» toq tal naq s-qe. 6Pet oq ech toq qal s-eche: «Naqe inqʼa xaol aqʼon tiqleʼm Xhun,» toq qaleʼ, tul toq motx ikʼoni oʼ u tenam s-sivan. Tan qʼexsan tetz viyolbʼal quBʼaal Tiuxh Xhun vatz inqʼa xaol, —xeʼt inqʼa iqʼesal s-vatzaq.

7Echetz motx tal vet s-eche: —Yeʼ qootzaqle jaʼlebʼ kuxh aqʼon tiqleʼm Xhun tiʼ taqʼax kuʼ inqʼa xaol xeʼ aʼ, —xeʼtaq kuxh veteʼ.

8Tul ech tal Jesuus s-eche: —Aʼatetz koq in laʼ alon sete jaʼl nik aqʼon viqleʼm tiʼ inqʼa nik inbʼaneʼ, —xeʼt Jesuus te inqʼa iqʼesal.

Uvaʼs txumbʼalimal ibʼant quBʼaal Jesuus eela inqʼa iqʼesal u tenam tuchʼ inqʼa yaabʼla aqʼonvil

Tio 21.33-44; Kuxh 12.1-11

9Yaʼne txumbʼalimal talt Jesuus vaʼt u txhusbʼal xoʼl inqʼa xaol. Tul ech tal Jesuus s-eche: —Atich val u vinaq, bʼaal txʼavaʼ, itxhik uuva t-vitxʼavaʼ. Tul taqʼ ka inqʼa itxhiko ilixoq te jolol inqʼa kʼamol txʼavaʼ. Tul bʼen vet u vinaq t-invaʼt tenam. Poro sibʼal qʼij tatinich vet u vinaq t-invaʼt u tenam.

10Opoonetz vet viqʼiil iqʼanbʼ ivatz inqʼa uuva, tul itxhaq vet tzaan u bʼaal txʼavaʼ val u taqʼonvil tiʼ ijaqax ivatz inqʼa itxhiko te inqʼa kʼamol txʼavaʼ tiʼ taqʼt bʼen tanul ivatz u txhiko tiʼ ikʼamax u txʼavaʼ. Poro tiletz vet inqʼa kʼamol txʼavaʼ taqʼbʼ u aqʼonvil, tul aʼl motx iqʼostaʼ. Tul tira yeʼl uuva aqʼax bʼen s-tiʼ.

11Yaʼne itxhaq vet bʼen u bʼaal txʼavaʼ vaʼt taqʼonvil. Tul echat kuxh ibʼan inqʼa kʼamol txʼavaʼe te u aqʼonvil. Tan motx iqʼosa, atz aʼl ichʼixvisaleʼ. Tul tira yeʼl uuva aqʼax bʼen s-tiʼ.

12Yaʼne itxhaq txha bʼen u bʼaal txʼavaʼ vitoxv taqʼonvil. Tul aʼl takʼonsal u aqʼonvil. Atz tukimich ibʼen u aqʼonvil tiʼeʼl tal uvaʼ txhikich inqʼa uuva.

13Yaʼne ech titzʼa vet u bʼaal txʼavaʼ s-eche: «¿Kametz toq inbʼan veteʼ? ¡Aa! Aʼ toq inbʼane uvaʼ, aʼ vet vinkʼaol toq intxhaq bʼen, uvaʼ kamxh in s-tiʼ. Toqetz til vete inqʼa kʼamol txʼavaʼ vinkʼaol, tul kamaletz toq qeexoq vet vinkʼaol taʼn,» xeʼt titzʼat u bʼaal txʼavaʼ.

14Tiletz vet inqʼa kʼamol txʼavaʼ tul vikʼaol u bʼaal txʼavaʼ, tul ech motx tal vet s-vatzaq s-eche: «¡Aʼetz naqe uvaʼe, toq etzan ka inqʼa kam s-kaqaayil! Pet ¡etulvaq! Tul ¡quyatzʼvaq el naq! Tul ¡qetz vet inqʼa kamaq tetz naq s-kaqaayil toq ibʼaneʼ!» xeʼt inqʼa kʼamol txʼavaʼ.

15Yaʼne tukimich tel vet el vikʼaol u bʼaal txʼavaʼ taʼn inqʼa kʼamol txʼavaʼ. Tul een ex iyatzʼvat el tiʼeʼl tal uvaʼ txhikich inqʼa uuva.

Poro ¿kametz vet laʼ ul ibʼan u bʼaal txʼavaʼ te inqʼa kʼamol txʼavaʼ nik enatxheʼ? 16Aʼetz laʼ ul ibʼan vet u bʼaal txʼavaʼ uvaʼ laʼ ul iyatzʼeʼl inqʼa kʼamol txʼavaʼ. Tul aʼ laʼ taqʼvat vet tilix viuuva te jolt kʼamol txʼavaʼ, —xeʼt Jesuus xoʼl inqʼa xaol.

Tabʼietz vet inqʼa iqʼesal u yol uvaʼ tal Jesuus, tul ech motx tal s-eche: —¡Yeʼl paqul laʼ ibʼan uvaʼ nik aaleʼ! —xeʼt inqʼa iqʼesal.

17Yaʼne isaqi Jesuus ivatz inqʼa iqʼesal. Tul ech tal Jesuus s-xoʼl s-eche: —Yeʼetzebʼ nik ibʼen u yol sete uvaʼ tzʼibʼamal ka uvaʼ ech nik tal s-eche:

«U Sivan uvaʼ ixvamal

taʼn inqʼa bʼitol otzotz,

aʼ vete uvaʼ qat kaj vet

tixojbʼal

vibʼoʼqʼ u otzotz

s-jetxhel jaʼ,»

chich u yol.#Saalmo 118.22

18Jaʼletz invaʼq uvaʼ laʼ ul jaʼpoq tiibʼa u Sivan uvaʼa, tul laʼ kuxh ul ipaxi ok tibʼ s-tiʼ. Atz jaʼl invaʼq uvaʼ laʼ kaj jaqʼ u Sivan uvaʼa, tul tira laʼ patxhʼqʼ taʼn u Sivan, —xeʼt Jesuus.{*}#20.18 ¿Kam nik elkaʼpun u yol tiʼ —...jaʼl uvaʼ laʼ ul jaʼpoq tiibʼa u Sivan, —nik tal quBʼaal Jesuus? Aʼetz nik ibʼan eela tuchʼ invaʼq u xaol uvaʼ nik itxʼet toq tiʼ invaʼq sivan, tul nik joqel ipal tiibʼa u sivan. Tul bʼeenoxh qat el vet u xaol taʼn. Tul aʼat nik elkaʼp tiʼ inqʼa xaol uvaʼ yeʼ nik iqejeʼ oq uvaʼ, aʼ quBʼaal Jesuus u Kriisto. Tan yeʼ nik til ibʼant quBʼaal Jesuus kam uvaʼ atoʼk tiviʼ inqʼa xaol laʼ ul ibʼan u Kriisto. Echetz s-tiʼile bʼeenoxh laʼ el vet inqʼa xaol taʼn u kʼaxbʼichil, tan yeʼ nik motx iqej u tiqleʼm quBʼaal Jesuus. Aʼetz inqʼae: —Nik kuxh itxʼet toq tiʼ u Sivan, —nik tal u versiikulo uvaʼa. Tul nik tal u yol inpaqte tiʼ vipaxit ok tibʼ u xaol tiʼ u sivan. Tan aʼetz nik elkaʼpun tiʼ bʼen tilt u xaol u kʼaxbʼichil tiʼ yeʼ iqejt Jesuus. Tul nik tal u versiikulo inpaqte tiʼ ikaj u xaol jaqʼ u sivan. Tan aʼetz nik elkaʼpun tiʼ taqʼax kuʼ yol tinuqul s-tiʼ, tiʼ yeʼ iqejtaʼ oq uvaʼ aʼ quBʼaal Jesuus u Kriisto. Tul aʼetz uvaʼe nik elkaʼp u yol tiʼ —...ipatxhʼqʼ taʼn u Sivan, —chiche. Tan aʼ vet u kʼaxkʼo nik itxʼebʼon s-tiʼ taʼn quBʼaal Jesuus.

Uvaʼs tabʼil val u yol te quBʼaal Jesuus tiʼ itxhojt inqʼa xaol tatineʼ

Tio 21.45-46; 22.15-22; Kuxh 12.12-17

19Tabʼietz vet inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel uvaʼ, aʼxh nikich motx talax taʼn u yol uvaʼ txumbʼalimal talt Jesuus, tul yekich motx itxhok vet txumbʼal tiʼ itxeyp Jesuus. Poro yeʼxh Jesuus motx itxeya, tan xoʼvaq te inqʼa xaol, tiʼ uvaʼ kam laʼich ibʼan inqʼa xaol s-te.

20Pet aʼl motx itxhok txumbʼal tiʼ tel Jesuus t-bʼey. Tul txhaqax vet bʼen jolol inqʼa eesan yol taʼn tiʼ tabʼil yol te Jesuus. Tan aʼichaq kuxh isaʼ tabʼileʼ tal laʼich ikʼk Jesuus tuchʼ viyol. Echetz laʼich toksal Jesuuse tiqʼabʼ u mam iqʼesal uvaʼ atich tiqleʼm t-Rooma. Tul josqʼilaq kuxh ul ijotxhʼil itziʼ Jesuus. Pet yeʼ nikich motx ikʼutxh txha kam inqʼa atich t-taanima tiʼ Jesuus.

Yaʼne motx tabʼi vet kaʼl inqʼa yol te Jesuus. 21Tul ech motx tal te Jesuus s-eche: —Txhusul qetz, qootzaqle uvaʼ, aʼxh nik aal vinuqul; atz aʼxh, nik atxhus u jik. Tan yeʼl nim yeʼl txhʼoj savatz. Pet aʼxh nik atxhus vinuqul tiʼ kam laʼ qulbʼe qatin vatz quBʼaal Tiuxh. 22¿Nik kol ikuy u qubʼekʼbʼal uvaʼ laʼ qutxhoj qatin te Seesar, u mam iqʼesal uvaʼ tu Rooma? Pet ¿maq yeʼle? —xeʼtaq te Jesuus.

23Poro yekich bʼen te Jesuus kame vitxumbʼal inqʼa vinaq motx itxhok tiʼ teesal Jesuus t-bʼey tiʼ kam uvaʼ motx tabʼi te Jesuus.{*}#20.23 ¿Kam txumbʼalil itxhok inqʼa vinaq tuchʼ u yol uvaʼ motx tabʼi te quBʼaal Jesuus? Aʼ txumbʼal itxhoka, aʼe, uvaʼ oq laʼich itzaqʼbʼe quBʼaal Jesuus u yol, tiʼ uvaʼ yeʼ laʼ utxhi laʼ itxhoj inqʼa tij imam Israeel u tatin te Seesar, u mam iqʼesal tu Rooma, tul aʼ viyol, atz vibʼekʼbʼal inqʼa aj Rooma laʼich teesa quBʼaal Jesuus iqʼij. Tul laʼichetz xotxhox vet quBʼaal Jesuus vatz u aqʼol kuʼ yol tinuqul tetz Rooma; aʼe Poonsio Pilaato. Atz oq laʼich itzaqʼbʼe quBʼaal Jesuus u yol, tiʼ uvaʼ bʼaʼn laʼ itxhoj inqʼa tij imam Israeel u tatin te Seesar, u mam iqʼesal tu Rooma, tul aʼ viyol, atz vibʼekʼbʼal quBʼaal Tiuxh uvaʼ tal te Moisees, laʼich teesa quBʼaal Jesuus iqʼij vatz inqʼa iqʼesal uqʼeʼybʼal xoʼl inqʼa tij imam Israeel. Tul laʼichetz xotxhox vet quBʼaal Jesuus vatz inqʼa aqʼol kuʼ yol tinuqul tetz inqʼa tij imam Israeel. Echetz kʼuxh: —Laʼi, —chaqich quBʼaal Jesuus, atz kʼuxh: —Yeʼle, —chaqich quBʼaal Jesuus, tan tetxhal kuxh laʼich xotxhox quBʼaal Jesuus taʼn inqʼa vinaq tiʼ vipalsan yolil quBʼaal Jesuus s-vatz.

24Tul ech tal Jesuus s-eche: —Aqʼtaq tzaan vaʼq u puaq, u denaario. Tul toq vileʼ. ¿Jaʼletz ivatzibʼale uvaʼ atoʼk tiʼ u puaq? Atz ¿jaʼletz ibʼije uvaʼ atoʼk s-tiʼ? —xeʼt Jesuus.

Yaʼne ech tal inqʼa vinaq te Jesuus s-eche: —Ivatzibʼal naqe Seesar, atz ibʼij naqe uvaʼ atoʼk s-tiʼ, —xeʼtaq te Jesuus.

25Yaʼne ech tal Jesuus s-eche: —Ape. Aqʼvaq te Seesar jatvaʼl u puaq nik ijaqeʼ. Tul aqʼvaq te quBʼaal Tiuxh jatvaʼl uvaʼ nik ijaq quBʼaal Tiuxh, —xeʼt Jesuus.

26Tul mij vaʼtoʼq yol motx talaq veteʼ. Tan tira yeʼaq oleʼv tiʼ teesal Jesuus t-bʼey vatz inqʼa xaol. Echetz kaayaqich kuxh vet taanima inqʼa motx txhokon txumbʼal tiʼ teesal Jesuus t-bʼey.

Uvaʼs itzaqʼbʼet quBʼaal Jesuus kaʼl inqʼa saduseeo tiʼ talax u itzʼeʼvchil inpaqte

Tio 22.23-33; Kuxh 12.18-27

27Yaʼne ul kaʼl inqʼa xaol, uvaʼ saduseeoich ibʼij u tuqʼeʼybʼal, inqʼa yeʼ nikich qeon titzʼeʼv inqʼa kamnaʼq inpaqte. Tul echaq tal te Jesuus s-eche: 28—Txhusul qetz, ech val u yol itzʼibʼa ka Moisees s-eche: «Oq laʼ kam invaʼq u vinaq, uvaʼ yeʼnaq nitxaʼinoq, tul laʼ kaj u tixqel, laʼetz isaʼa uvaʼ antxh u itzʼina laʼ iqʼon tixqel u atzika. Tul aʼetz vet u itzʼina laʼ nitxaʼin tuchʼ u ixoq. Tul aʼetz vibʼij u atzika laʼ ok tiʼ u neʼ. Echetz yeʼ laʼ isotz talaxe vibʼij u atzika,» xeʼt ka Moisees.#Deuteronoomio 25.5-10

29Qaletz kuxh s-tiʼ, oq eche at juqvaʼl vinaq uvaʼ titzʼin tibʼ. Laʼetz tzʼalon u bʼaxa vinaq, tul yeʼ laʼ nitxaʼin tuchʼ u tixqel. Tul laʼ kam veteʼ. 30Yaʼne aʼetz vet vikaʼv vinaq, uvaʼ antxh itzʼina, laʼ iqʼon u ixoq. Tul echat kuxh laʼ ibʼane, tan yeʼ laʼ nitxaʼin tuchʼ u ixoq. Tul laʼ kami. 31Atz echat kuxh laʼ ibʼan vitoxv itzʼinae, tetxhal tiqʼot u ixoq s-juqvaʼl. Tul tira yeʼl invaʼq inqʼa vinaq laʼ nitxaʼin tuchʼ u ixoq. Tul laʼ motx kam veteʼ. 32Atz laʼat kam vet u ixoq. 33¿Jabʼisteetz vet inqʼa vinaq s-te s-juqvaʼl laʼ alax sitzumel u ixoq oq uvaʼ laʼ itzʼeʼv inqʼa vinaq inpaqte? —xeʼt inqʼa saduseeo.

34Yaʼne ech tal Jesuus s-eche: —Inqʼa xaol, inqʼa itzʼlel tintanul inqʼa yaʼbʼ s-txheel, tan nik motx itzʼaloneʼ. Atz at inqʼa nik taqʼ ivatz iyol tiʼ itzʼaloneʼ. 35Pet yeʼl vet tzʼaloʼm, atz yeʼl vet txhejchil laʼ ibʼana uvaʼs laʼ motx titzʼeʼv vet inqʼa kamnaʼq. Jabʼil inqʼa uvaʼ ikʼulelxh veteʼ uvaʼ laʼ bʼen til u qʼij saq kʼatz quBʼaal Tiuxh tintanul inqʼa yaʼbʼ uvaʼ tuleʼ. 36Tul yeʼ vet laʼ motx kami. Pet ech vet laʼ tatin, eche inqʼa iaanxel quBʼaal; tan yeʼl vet iyaʼebʼal imotxebʼal u qʼij isaq laʼ ibʼana. Tan aʼetz uvaʼs laʼ titzʼeʼvaqe, tul tzitzi laʼ ikʼutxhvat uvaʼ kʼaol imeʼal quBʼaal Tiuxh.

37Echetze u yol tiʼ u titzʼeʼv inqʼa kamnaʼq, tan antxh Moisees tzʼibʼan ka u yol uvaʼs iyolon quBʼaal Tiuxh te Moisees xoʼl u vatom chʼiʼx. Tan ech nik tal u yol s-eche: «Ine u Tiuxh uvaʼ nikich inatxhkʼuula Avraʼaam, atz uvaʼ nikich inatxhkʼuula Isaak, atz uvaʼ nikich inatxhkʼuula Jakoov,» chich u yol. Tan itzʼlel Avraʼaam, Isaak, Jakoov vatz quBʼaal Tiuxh kʼuxh kamnaʼql sevatz.#Eeksodo 3.6 38Echetz jit aʼ, inqʼa kamnaʼq, nik natxhkʼuulan u quBʼaal Tiuxh, pet aʼ, inqʼa itzʼlele, nik natxhkʼuulan quBʼaal Tiuxh. Tan jankʼal s-kaqaayil itzʼlel vatz quBʼaal Tiuxh, —xeʼt Jesuus te inqʼa saduseeo.

39Yaʼne ech tal jolol inqʼa nikich txhusun ibʼekʼbʼal inqʼa tij imam Israeel s-eche: —¡Txhusul, antxhte u yol uvaʼ nik aaleʼ! —xeʼtaq te Jesuus.

40Tul yeʼxhabʼil vet invaʼq txhej itial tiʼ tabʼil invaʼtoʼq yol te Jesuus tiʼ teesal Jesuus t-bʼey.

Uvaʼs talt quBʼaal Jesuus uvaʼ, aʼ Daviid alon ka inuqul inqʼa yol tiʼ quBʼaal Jesuus

Tio 22.41-46; Kuxh 12.35-37

41Yaʼne ech tal Jesuus s-eche: —¿Keʼch nik etaltaʼ uvaʼ tij imam kuxh Daviid naq u Kriisto?{*}#20.41 ¿Kam s-tiʼil tal quBʼaal Jesuus te inqʼa iqʼesal uqʼeʼybʼal uvaʼ?: —¿Keʼch nik etaltaʼ uvaʼ tij imam kuxh Daviid naq u Kriisto? —xeʼt quBʼaal Jesuus s-te. Taletz quBʼaal Jesuus s-eche, tan vatz inqʼa tij imam Israeel, tan yiqxh vaʼl kuxh sulaʼ xaol u tij imam Daviid, u Kriisto, laʼich ul ibʼan vatz txʼavaʼ nikich motx taleʼ. Tan yeʼ nikich motx ibʼen s-te u tiqleʼm u Kriisto. Pet u Kriisto taʼn quBʼaal Tiuxh, tan Tiuxhiche. Tan een elnaʼqich tzaan kʼatz quBʼaal Tiuxh, echetz telaʼpune u yol tal quBʼaal Jesuus. Atz echetz s-tiʼile ‹iKʼaol Tiuxh,› chichich eʼl u Kriisto, tan vaʼlich kuxh tatin tuchʼ Tiuxh viBʼaal. 42Tan antxh Daviid tzʼibʼan ka val u yol tu Saalmo tiʼ u Kriisto uvaʼ ech nik tal s-eche:

«Ech tal u quBʼaal Tiuxh

te vinBʼaal s-eche:

–Kuʼen sinkʼatza t-vinsebʼal,

43tan tetxhal toq vaqʼka

inqʼa nik txhiʼkʼuulan axh

s-eche tzeqʼbʼal avoq,

–chich quBʼaal Tiuxh

te vinBʼaal,»

xeʼt itzʼibʼat ka Daviid.#Saalmo 110.1{*}#20.43 Saqivaq u noota tu uʼ Tio. Tul laʼ el etxumbʼal s-te. Tio 22.44.

44Oqetz: «InBʼaal,» chich Daviid tiʼ naq u Kriisto, ¿keʼchetz nik etalt naq bʼa uvaʼ tij imam kuxh Daviid naq? —xeʼt Jesuus.{*}#20.44 ¿Kam s-tiʼil tal Daviid, u mam iqʼesal, ‹inBʼaal› tiʼ u Kriisto? Aʼ nik taleʼ uvaʼ at tiqleʼm u Kriisto laʼ ibʼan vatz Daviid. Echetz vatz Daviid, tan jit vaʼl koq kuxh sulaʼ xaol u tij imam Daviid laʼich tul vatz txʼavaʼ. Pet yeʼ bʼen te inqʼa iqʼesal uqʼeʼybʼal, tiʼ uvaʼ tan, aʼ nikich motx itxʼebʼ uvaʼ, aʼ viqʼesalil laʼich ul ibʼan Kriisto vatz txʼavaʼ. Tul aʼ motx tale uvaʼ palnaʼqich viqʼesalil laʼich ibʼan u Kriisto viʼ viqʼesalil uvaʼ ibʼan Daviid.

Uvaʼs talt quBʼaal Jesuus yol tiʼ inqʼa nikich txhusun ibʼekʼbʼal inqʼa tij imam Israeel

Tio 23.1-36; Kuxh 12.38-40; Luk 11.37-54

45Yaʼne tal Jesuus invaʼt u yol te inqʼa nikich itxhus tibʼ s-kʼatza. Tul motx tabʼi u tenam kam uvaʼ tal Jesuus. Tul ech tal Jesuus s-eche: 46—Noqxh etil etibʼ. Tul yeʼ laʼ ebʼan etetz, eche uvaʼ nik ibʼan inqʼa nik txhusun inqʼa qubʼekʼbʼal, oʼ, inqʼa tij imam Israeel. Tan aʼaq kuxh isaʼ tok iqʼij tuchʼ inqʼa iqinkin txhas toksaʼm. Tul chiibʼiyaqxhtuʼ uvaʼ nik taqʼax bʼaʼnil ikʼuul taʼn inqʼa xaol t-kʼayibʼal. Tul chiibʼiyaqxhtuʼ uvaʼ, aʼ nik kʼuqeʼvk t-inqʼa bʼaxa xhiila tuulbʼal inqʼa kʼulbʼal ibʼ. Atz chiibʼiyaqxh, tiʼ uvaʼ aʼaq bʼaxa xhiila tuulbʼal inqʼa txʼaʼoʼm. 47Tul telabʼalxh telqʼal totzotz tzaqatz txakay ixoq tiʼ itzuqbʼetaq tibʼ. Tan bʼan vatz kuxh nik motx ibʼan tuchʼ inqʼa tatineʼ. Maʼtetz isubʼt inqʼa txakay ixoq, tul sibʼ txhan kuxh vet tuul vinatxhax Tiuxh nik motx ibʼan tiʼ isotzsal ikʼuul inqʼa xaol. Tiʼetz uvaʼ ech nik motx ibʼane, tul mam kʼaxkʼo laʼ motx ul s-tiibʼa, —xeʼt Jesuus tiʼ inqʼa nikich txhusun ibʼekʼbʼal inqʼa tij imam Israeel.

Currently Selected:

Luk 20: ixlC

Highlight

Copy