Luk 17
17
Uvaʼs itxhusun quBʼaal Jesuus tiʼ yeʼ ibʼanax u paʼv
Tio 18.6-7, 21-22; Kuxh 9.42
1Yaʼne ech tal Jesuus te inqʼa nikich itxhus tibʼ s-kʼatza s-eche: —Nik val sete uvaʼ at laʼ etxhbʼul ikuʼ inqʼa niman vetz tu paʼv tiʼ invaʼq kam. Poro ¡txumlebʼalxh ivatz u xaol uvaʼ laʼ etxhbʼun ikuʼ vaʼq inqʼa niman vetz tu paʼv, tan mam kʼaxkʼo laʼ ul s-tiibʼa! 2Tan aʼl yeʼxh jankʼale u kʼaxkʼo laʼ tila uvaʼ laʼ qitzix ok vaʼq sivan tetz cheʼbʼal tiqul uvaʼ oqxh talale, tul tzum laʼ ipal vet kuʼ jaqʼ u mam aʼ s-tuchʼ, viʼ u mam kʼaxkʼo uvaʼ laʼ ul s-tiibʼa tiʼ vitxhokt txumbʼal tiʼ tetxhbʼul ikuʼ inqʼa niman vetz t-paʼv, inqʼa nik tel ikaʼkabʼin ikʼuul s-viʼ.{*}#17.2 ¿Kam nik elaʼpun u yol tiʼ viqitzix ok vaʼq sivan tetz cheʼbʼal tiqul u xaol, tul tzum laʼ ipalsal vet kuʼ jaqʼ u mam aʼ s-tuchʼ? Aʼ nik tal quBʼaal Jesuus uvaʼ mam kʼaxkʼo laʼ til u xaol uvaʼ laʼ etxhbʼun ikuʼ invaʼq niman tetz Jesuus tu paʼv. Tan yeʼxh jankʼal kʼaxkʼoe ipal kuʼ u xaol jaqʼ u mam aʼ tuchʼ u sivan tetz cheʼbʼal. Pet aʼl pal iviʼ u kʼaxkʼo laʼ til u xaol tiʼ teesat vimol t-bʼey viʼ uvaʼ laʼ palsal kuʼ jaqʼ u mam aʼ.
3Echetz xeevaqxh etibʼ jununil ex tiʼ etatin vatz quBʼaal Tiuxh. Tan oq laʼ ibʼan invaʼq vemol s-niman vetz vaʼq yeʼbʼaʼn sete, tul aʼl laʼ etal inuqul s-te, tiʼ uvaʼ yeʼ laʼ ibʼan veteʼ. Oqetz laʼ ijaq ikuya sete, tul laʼetz ekuy ipaʼv.
4Atz kʼuxh juqpaqul laʼ ibʼan u yeʼbʼaʼn sete tuulbʼal invaʼl qʼij, tul laʼ ekuy ipaʼv. Atzoq juqpaqul laʼ ul ijaq ikuya sete tuulbʼal vaʼl qʼij, tul ech laʼ tal sete s-eche: «Kuyxh inpaʼv,» oq chaqe; tul laʼ ekuya, —xeʼt Jesuus.
Uvaʼs tabʼit tel inqʼa apoostol kʼuqlebʼal ikʼuul te quBʼaal Jesuus
5Yaʼne ech tal inqʼa iapoostol Jesuus s-te s-eche: —Jesuus, lotxh oʼ tiʼ qukʼuqbʼat tel qukʼuul tiʼ quBʼaal Tiuxh, —xeʼtaqe.
6Tul ech tal quBʼaal Jesuus s-eche: —Kʼuxh yeʼxh jankʼal kʼuqlebʼ ekʼuul tiʼ quBʼaal Tiuxh, tan laʼ utxhi uvaʼ ech laʼ etal te invaʼq nimla tzeʼ sikoomoro s-eche: «Elen el tzitza, tul een bʼenk axh xeʼ u maar,» chaq ex s-te; tul tetxhal laʼ iqej ex tzeʼ u sikoomoro. Ech ebʼan tiʼ echʼij tiʼ vekʼuqbʼat ekʼuul tiʼ quBʼaal Tiuxh, eche vaʼq u unutzʼ tiiyail tzeʼ u mostaasa uvaʼ qʼoon kuxh nik ichʼijeʼ, tul tetxhal ibʼen s-nimla tzeʼ.
Uvaʼs itxhusun quBʼaal Jesuus tiʼ kam txumbʼal laʼ ikʼutxh inqʼa niman tetz tiʼ inimal quBʼaal Tiuxh
7Nik val sete kam laʼ ebʼan tiʼ inimal u quBʼaal Tiuxh. Echetze uvaʼ: At koq invaʼq etaqʼonvil uvaʼ, aʼ laʼ ibʼan u kojoʼm t-vitz, atz maq etavan laʼ ixee tiʼ ikʼoatxhineʼ. Laʼetz ul vet t-vitz, tul bʼane: «Avukuul. Tul oken vet viʼ meexha, tul txʼaʼon,» chaq koq ex s-te. 8Yeʼle. Pet aʼl ech toq etal s-te s-eche: «Quxh bʼan tutxh intxʼix tetz kuʼebʼal qʼij. Tul laʼ ul aaqʼ s-ve. Laʼ naletz txʼaʼon in, atz laʼ ukʼ in aʼ, yaʼne laʼ txʼaʼon vet axh, atz laʼ ukʼ axh aʼ,» toq etaleʼ. 9Tan bʼane saʼ koq etaqʼ taʼntiuxh te vetaqʼonvil, tiʼ uvaʼ qat ibʼan kam uvaʼ qat ebʼekʼ s-te.
10Echatetz kuxh ex, eche u aqʼonvil laʼ ebʼan vatz u quBʼaal Tiuxh. Tan maʼtetz ebʼant jankʼal uvaʼ nik isaʼ quBʼaal Tiuxh sete, tul echetz laʼ etal vet s-eche: «Oʼ kuxh vaʼl taqʼonvil quBʼaal Tiuxh tiʼ ibʼanax u taqʼon. Jit ikʼulel laʼ oksal quqʼij. Tan taʼn kuxh qat qubʼan kam uvaʼ qat taqʼ quBʼaal Tiuxh qiqatzi,» chaq ex, —xeʼt Jesuus te inqʼa apoostol.
Uvaʼs ibʼant quBʼaal Jesuus bʼaʼn laval inqʼa vinaq uvaʼ qʼajchil nikich bʼanon vitxhiʼoʼl
11Aalichetz ibʼen Jesuus tu tenam Jerusaleen, atz aʼxh taqʼbʼ vet Jesuus timotxtebʼal ka tuulbʼal Galileea. Tul toqnaʼqich okoq vet bʼen Jesuus tuulbʼal Samaaria. 12Bʼiitichetz taqʼbʼ Jesuus t-val u tal tenam, tul eluʼl laval inqʼa vinaq vatz Jesuus, inqʼa qʼajchil nikich ibʼan vitxhiʼoʼl. Tul niim motx txakeʼvik tzaan tiʼ talax te Jesuus.{*}#17.12 ¿Kam s-tiʼil niim motx txakeʼvik tzaan tiʼ talax te quBʼaal Jesuus? Tan xaomla yaabʼil kuxh u yaabʼil uvaʼ nikich bʼanon inqʼa vinaq. Ech s-tiʼile nikich tal inqʼa ibʼekʼbʼal inqʼa tij imam Israeel uvaʼ yeʼ laʼ utxh tatin vaʼq yaabʼ uvaʼ qʼajchil nikich ibʼan vitxhiʼoʼl xoʼl inqʼa xaol; pet een laʼ atink tziʼ eʼl tenam. Jitichetz kuxh taʼne, pet yeʼ laʼ utxhi laʼich ikan vaʼq xaol uvaʼ bʼaʼn ikʼuʼl iqʼabʼ inqʼa yaabʼ inqʼae. Kʼuxhetz ech nik tale u bʼekʼbʼal, poro yeʼ nikich inima quBʼaal Jesuus. Tan ikan quBʼaal Jesuus inqʼa yaabʼ tiʼ ibʼanax bʼaʼn tu yaabʼil. Tul yekich ibʼan bʼaʼn inqʼa yaabʼ, poro yeʼl u yaabʼil ok ka tiʼ quBʼaal Jesuus. Tul nikichetz tul vet iviʼ inqʼa iqʼesal uqʼeʼybʼal tiʼ quBʼaal Jesuus, tan yeʼ nikich inima quBʼaal Jesuus inqʼa ibʼekʼabʼal tiʼ yeʼ ikanax inqʼa yaabʼ inqʼae. 13Yaʼne motx sichʼin tzaan. Tul ech motx tal s-eche: —¡Jesuus, quQʼesal, oybʼa quvatz! —xeʼtaq te Jesuus.
14Tul isaqi Jesuus. Tul ech tal Jesuus s-eche: —Bʼenoq ex. Tul bʼenoq ekʼutxh etibʼ vatz inqʼa oksan yol vatz Tiuxh, —xeʼt Jesuus.
Tul ikʼuqbʼa inqʼa vinaq ikʼuul tiʼ viyol Jesuus. Tul nal kuxh motx tokaq vet bʼen tiʼ bʼey. Yaʼnaqetz aalichaq ibʼen veteʼ, tul motx ibʼanaq vet bʼaʼn tiʼ bʼey.{*}#17.14 Aʼ nik tal quBʼaal Jesuus uvaʼ tetxhal laʼich inima inqʼa vinaq, inqʼa qʼajchil nikich ibʼan vitxhiʼoʼl, inqʼa bʼekʼbʼal tetz txʼajo ibʼ vatz Tiuxh. Tan bʼaxa tzij nikich ex ikʼutxh tibʼ invaʼq xaol vatz inqʼa oksan yol vatz Tiuxh tu tenam. Nikichetz til vet inqʼa oksan yol oq uvaʼ bʼaʼn vet u yaabʼ, tul nikich tal vet el viʼ jankʼal inqʼa xaol uvaʼ bʼaʼn vet u xaol uvaʼ qʼajchil nikich ibʼan vitxhiʼoʼl. Yaʼne nikich ibʼen vet u xaol tiʼ taqʼax oya tu tenam Jerusaleen vatz quBʼaal Tiuxh tiʼ vibʼant bʼaʼn tu yaabʼil. Tul at xaol nikich xaon kaʼoxvaʼl qʼij, atz maq oʼvaʼl qʼij tiʼ taqʼbʼ tu tenam Jerusaleen.
15Tiletz vet vaʼl u vinaq uvaʼ bʼaʼnich vet vitxhiʼoʼl, tul yeʼ taqla qʼaʼv vet inpaqte. Tul sichʼiʼmxh nikich ibʼan vet t-chiibʼichil tiʼ toksal iqʼij quBʼaal Tiuxh, uvaʼs iqʼaʼveʼ. 16Yaʼne ijoqbʼa tibʼ vatz Jesuus. Tul taqʼ taʼntiuxh te Jesuus. Tul aj Samaariaich u vinaq.
17Yaʼne ech tal Jesuus s-eche: —Lavalene inqʼa vinaq uvaʼ qat ibʼan bʼaʼn. ¿Qatxhetz bʼelvate? 18¿Yeʼxhabʼiletzxh vaʼq inqʼa tij imam Israeel qat ul oksan iqʼij quBʼaal Tiuxh? Tan taʼnxh naq vatziʼ jit tij imam Israeel qat qʼaʼvi, —xeʼt Jesuus.
19Tul ech tal Jesuus te u vinaq s-eche: —Txakpen. Tul quxh veteʼ. Tan, tiʼ uvaʼ kʼuqlelxh akʼuul s-viʼ, tul qat abʼan bʼaʼn, —xeʼt Jesuus.
Uvaʼs tabʼil te quBʼaal Jesuus tiʼ vibʼant quBʼaal Tiuxh iqʼesalil
Tio 24.23-28, 36-41
20Paquletz uvaʼ tabʼi inqʼa fariseeo uvaʼ jatu laʼich ibʼan quBʼaal Tiuxh iqʼesalil vatz u txʼavaʼ.
Tul ech tal Jesuus s-eche: —Jit mam koq kuxh yol laʼ utxhi uvaʼs laʼ ibʼant quBʼaal Tiuxh iqʼesalil. 21Tan yeʼxhabʼil invaʼq xaol ech laʼ alon s-eche: «Il quBʼaal Tiuxh kʼuqlel tikʼuqeʼvbʼal tzitza tiʼ ibʼanax iqʼesalil,» chaq koq. Atz: «Il quBʼaal Tiuxh kʼuqlel tikʼuqeʼvbʼal tzitzi tiʼ ibʼanax iqʼesalil,» chaqat koq eʼli, eche uvaʼ nik etitzʼa. Tan il vet quBʼaal Tiuxh nik ibʼan iqʼesalil t-taanima inqʼa xaol s-txheel, —xeʼt Jesuus te inqʼa fariseeo.
22Yaʼne ech tal Jesuus te inqʼa nikich itxhus tibʼ s-kʼatza s-eche: —Bʼantan topoon invaʼl qʼij uvaʼ laʼ etatxhva vet vatin sekʼatza, ech vete tatin invaʼq mam iqʼesal xoʼl xaol, in, u Kʼaola uvaʼ qat bʼen s-alam aanima. Poro yeʼletz laʼ utxh veteʼ, tan maʼt inbʼen veteʼ. 23Echetz at xaol, ech toq alon sete s-eche: «Il u Kriisto, ile uy tzitza,» toq taleʼ. Atzoq ech laʼ tal inqʼa xaol sete s-eche: «Il u Kriisto uy tzitzi,» chaq eʼl ex. Poro yeʼl ex laʼ bʼen ex, tan jit nuq koq uvaʼ laʼ alax sete. Atz yeʼl ex laʼ txhʼuyeʼv ex s-tiʼ.
24Tan mam yol laʼ ibʼana uvaʼs laʼ vul inpaqte, in, u Kʼaola uvaʼ qat bʼen s-alam aanima. Tan jankʼal xaol s-kaqaayil laʼ ilon u vulebʼal, eche nik tilix itxiqun u vatz amlikaʼ s-kaqaayil taʼn vilitzʼkabʼin u kotzʼinebʼ. [Echetz laʼ ibʼane tu qʼij uvaʼs laʼ vul inpaqte.]
25Pet aloq bʼeeno kuxh toq inbʼutxhux s-bʼaxa. Tan yeʼxhkam intxaʼk te inqʼa xaol toq ibʼaneʼ. 26Tan kamxh yeʼ nikich titzʼat inqʼa xaol viyol quBʼaal Tiuxh uvaʼs atich Noee vatz u txʼavaʼ, tul echatxh yeʼ laʼ inimate inqʼa xaol viyolbʼal quBʼaal Tiuxh uvaʼs laʼ vul inpaqte, in, u Kʼaola uvaʼ qat bʼen s-alam aanima. 27Tan tuulbʼalich inqʼa qʼij uvaʼs yeʼnaqich uloq u mam jabʼal, tul nikich motx itxʼaʼon inqʼa xaol; atz nikich motx tukʼ aʼ. Atz at xaol uvaʼ tzʼaloʼm nikich titzʼa. Tul at xaol tzʼaloʼm nikich motx ibʼaneʼ. Tan yeʼ nikich motx titzʼa tatin vatz quBʼaal Tiuxh.
Pet opoonetz vet val u qʼij, tul pal vet ok Noee tuul u vaarko. Yaʼne ul vet u mam jabʼal. Tul tira motx sotz vet inqʼa tenam s-kaqaayil.
28Atz echatxh laʼ ibʼan u vulebʼal inpaqte, eche uvaʼ ibʼan tuulbʼal inqʼa qʼij uvaʼs atich Loot tzitza vatz txʼavaʼ. Tan nikich motx itxʼaʼon inqʼa xaol. Atz nikich motx tukʼ aʼ. Atz at inqʼa loqʼoʼm nikich ibʼaneʼ. Atz at inqʼa kʼaʼy nikich motx ibʼaneʼ. Tul at inqʼa txhikoʼm nikich motx ibʼaneʼ. Atz at inqʼa otzotz nikich taqʼ jaʼ. 29Tuulbʼaletz u qʼij uvaʼs il kuxh Loot nikich teleʼl tu tenam Sodooma, tul qʼolomaan ikuʼl xamal t-amlikaʼ uvaʼ, eche ikuʼ jabʼal ibʼana. Tul tira sotzeʼl inqʼa xaol s-kaqaayil tu Sodooma.
30Echatetzxh laʼ ibʼane uvaʼs laʼ inkʼutxht vibʼ tu qʼij uvaʼs laʼ vul inpaqte, in, u Kʼaola uvaʼ bʼen s-alam aanima. 31Tuulbʼal u qʼij uvaʼe, tan jaʼl ex, uvaʼ een at jaʼp ex viʼ etotzotz, tul jitoq laʼ paloʼk ex tetotzotz tiʼ tiqʼol eluʼl invaʼq kam etetz. Pet nalxh laʼ etzʼeq etibʼ. Atz jaʼl ex, uvaʼ een ex t-vitz, tul yeʼl vet ex laʼ qʼaʼv ex tetotzotz. 32Tul ulsavaq sekʼuul kame uvaʼ ibʼan u tixqel Loot tiʼ titzʼat ka inqʼa kam tetz.#Jeenesis 19.26
33Atz jaʼl ex, uvaʼ ey kuxh etaanima tiʼ ekolt u qʼij esaq tuchʼ inqʼa kamaq etetz vatz u kʼaxkʼo tiʼ yeʼ etalt etibʼ s-niman vetz, tul aʼetz exe, uvaʼ laʼ tzʼeqon u qʼij esaq uvaʼ yeʼl iyaʼebʼal imotxebʼal. Pet jaʼletz ex, uvaʼ jit ey kuxh etaanima tiʼ ekolt u qʼij esaq, kʼuxh laʼ yatzʼax ex tiʼ innimaleʼ, tul aʼetz exe, uvaʼ laʼ kolon u qʼij esaq uvaʼ yeʼl iyaʼebʼal imotxebʼal.
34Pet nik val sete: Tuulbʼal uvaʼs laʼ vul inpaqte, tan kaʼvaʼl xaol vaty viʼ vaʼl txʼatxh tuubʼal vaʼl aqʼbʼal. Tul vaʼl laʼ bʼeni, tiʼ uvaʼ niman vetz; atz vaʼt laʼ kai, tiʼ uvaʼ tan, jit nima vetz. 35Atz kaʼvaʼl ixoq uvaʼ tzum nik icheʼen vatz kaʼ: Vaʼl laʼ bʼeni, tiʼ uvaʼ niman vetz; atz vaʼt laʼ kai, tiʼ uvaʼ tan, jit niman vetz. 36[Atz kaʼvaʼl vinaq sebʼt taqʼonv t-vitz: Vaʼl laʼ bʼeni, tiʼ uvaʼ niman vetz; atz vaʼt laʼ kai, tiʼ uvaʼ tan, jit niman vetz,] —xeʼt Jesuus te inqʼa nikich itxhus tibʼ s-kʼatza.
37Yaʼne ech motx tal te Jesuus s-eche: —QuBʼaal, ¿taletz toq ibʼanvat inqʼa nik aaleʼ? —xeʼtaqe.
Tul ech tal Jesuus s-eche: —Abʼimal val u yol etaʼn uvaʼ ech nik tal s-eche: «Tal uvaʼ atil vet invaʼq kamnaʼq txoo, tul tzitzi nik imolvat vet tibʼ inqʼa quʼs,» chiche. Echatetz kuxh laʼ ibʼene sete tiʼ u vulebʼal inpaqte, —xeʼt Jesuus te inqʼa nikich itxhus tibʼ s-kʼatza.{*}#17.37 U yol uvaʼ nik tal quBʼaal Jesuus tzitza, tan bʼensabʼ kuxh yol te inqʼa xaol ibʼan quBʼaal Jesuus. Tul kaʼvalen nik elkaʼpun. U bʼaxa, tan aʼ nik elkaʼpun uvaʼ mam yol laʼ ibʼana uvaʼs laʼ tul quBʼaal Jesuus inpaqte, eche tilix imolt tibʼ inqʼa quʼs. Tan tal uvaʼ nik imolvat vet tibʼ inqʼa quʼs, tul veqlel veteʼ uvaʼ vaʼq kamnaʼq txoo at tzitzi. Echetz u tulebʼal quBʼaal Jesuuse laʼ ibʼana, tan veqlel vet vatz inqʼa xaol, inqʼa niman tetz Jesuus. Vikaʼv, tan aʼ nik elkaʼpun uvaʼ tal kuxh al xaol tuulbʼal u vatz txʼavaʼ uvaʼ yeʼ nik qeon quBʼaal Tiuxh, tul tira kamnaʼql vatz quBʼaal Tiuxh, eche vaʼq kamnaʼq txoo uvaʼ nik imol tibʼ quʼs s-tiʼ. Tul tzitzi laʼ ulk u kʼaxbʼichil s-tiibʼa.
Currently Selected:
Luk 17: ixlC
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
