Luk 16

Uvaʼs txumbʼalimal ibʼant quBʼaal Jesuus eela inqʼa fariseeo, tuchʼ val u aqʼonvil uvaʼ jitxh kʼuqlebʼ kʼuul

1Tul ech jolt u yol tal Jesuus te inqʼa nikich itxhus tibʼ s-kʼatza s-eche: —Atich val u vinaq uvaʼ txʼiolich iqʼij. Tul atich vaʼl vinaq, ilolich kamaq tetz. Exetz xotxhoxoq u vinaq, u ilol kam etz, tiʼ uvaʼ tan, nikich kuxh itxhok teesal el kam tetz u txʼiol iqʼij.

2Yaʼne isaʼ vet u txʼiol iqʼij u ilol kamaq etz. Tul ech tal s-te s-eche: «At vaʼl yol nik vabʼi seʼe tiʼ val u kantxhaq nik abʼaneʼ. Pet taʼn kuxh nik val see uvaʼ junun aqʼt vet ukuʼl tatxhul kam inqʼa iqatzimal aaʼn. Tan txheel toq eloq vet axh,» xeʼt u txʼiol iqʼij.

3Tul ech titzʼa vet u ilol kamaq etz s-eche: «Toqetz eesaloq vet in tiʼ u vaqʼon taʼn naq u bʼaal vaqʼon. Yeʼletz vet vaqʼon toq ibʼaneʼ. Tul ¿kam toq inbʼan veteʼ? Tan yeʼl inyakʼil tiʼ ikʼotox jul. Atz oq laʼ kuxh xaon vet in tiʼ tabʼil inpuaq s-oy, tul chʼixvebʼal kuxh in. 4Aa. Vootzaqle kam toq inbʼan veteʼ. Kʼuxhetz toq eloq in tiʼ u vaqʼon, poro ate toq kʼulun in, kʼuxh maʼt veesal vet tu aqʼon taʼn vinqʼesal,» xeʼt titzʼat u ilol kam etz.

5Tul junun motx isaʼt vet u ilol kam etz inqʼa xaol, inqʼa ataqich itxʼoq xeʼ u bʼaal taqʼon. Tul ech tal te vibʼaxa s-eche: «¿Jatvaʼl atxʼoq at xeʼ u bʼaal vaqʼon?» xeʼte.

6Tul ech tal u aj txʼoq s-eche: «Oʼkʼalal (100) toneel aseeite,» xeʼt u aj txʼoq.{*}#16.6 Eche uvaʼ s-naʼya, tan txhʼoj telich u toneel. Tan vajxaqilich kuxh galoon tuul invaʼl toneel. Echetz vaʼlich mil tuchʼ vajxaqil sieen (1,800) galoon u aseeite uvaʼ nik tal tiʼ u oʼ kʼalal (100) toneel aseeite oliivo.

Yaʼne ech tal u ilol kam etz s-eche: «¡Nal kuxh axh! Quxh bʼan vaʼt tuʼal vatxʼoq, tul lavat kuxh toxkʼal (50) toneel toq qaqʼ kuʼ s-tuul. Tan taʼn vet uvaʼe toq atxhoje,» xeʼte.

7Yaʼne ech tal u ilol tetz kam etz te invaʼt u aj txʼoq s-eche: «¿Keʼch axh? ¿Jatvaʼl atxʼoq at xeʼ u bʼaal vaqʼon?» xeʼte.

Tul ech tal u aj txʼoq s-eche: «Oʼkʼalal (100) kintaal triigo intxʼoq,» xeʼte.

Yaʼne ech tal u ilol kam etz s-eche: «¡Nal kuxh axh! Mutxʼul (80) kuxh vet kintaal atzʼibʼa. Tan taʼn vet uvaʼe toq atxhoje,» xeʼte.

8Tiletz vet u bʼaal aqʼon vitxumbʼal u ilol kam etz tiʼ vikolt tibʼ, atz tiʼ kam uvaʼ laʼ saʼon s-te s-jatu, tul ech tal u bʼaal aqʼon s-tiʼ s-eche: «¡Kame txa! Sibʼ bʼak kuxh itxumbʼal u ilol tetz vaqʼon,» xeʼt u txʼiol iqʼij tiʼ u ilol kam etz uvaʼ subʼunal kuxhtuʼ.

Echetz nik valte sete uvaʼ palnaʼq vitxumbʼal inqʼa xaol uvaʼ yeʼ ootzaqin tetz quBʼaal Tiuxh, inqʼa itzʼlel tintanul inqʼa yaʼbʼ s-txheel, tiʼ ibʼant eela iyol tuchʼ inqʼa xaol tiʼ itxhej kam tetz. Pet koq inqʼa ootzaqin tetz quBʼaal Tiuxh, tan aʼl yeʼ nik motx itxʼolt ibʼanbʼet inqʼa kam etz tiʼ telaʼp tibʼaʼnil vatz quBʼaal Tiuxh.

9Pet toq val sete: Bʼanbʼevaq inqʼa txʼijbʼal eqʼij, inqʼa tetz vatz txʼavaʼ, tiʼ ilotxhox inqʼa xaol, atz tiʼ toksat tibʼ tiqʼabʼ quBʼaal Tiuxh. Echetz kʼuxh laʼ motx vet u txʼijbʼal eqʼij vatz u txʼavaʼ, tan yeʼxhkam laʼ etitzʼa s-tiʼ. Tan aʼ vet laʼ kʼuluxik ex tu atibʼal uvaʼ yeʼl iyaʼebʼal imotxebʼal kʼatz quBʼaal Tiuxh.

10Echetz jaʼl uvaʼ jikxh laʼ ibʼan tuchʼ bʼiil u kam uvaʼ laʼ aqʼax s-te, tul jiketzxhte laʼ ibʼana kʼuxh niim vet uvaʼ laʼ aqʼax s-te. Pet jaʼl uvaʼ jit aʼ u jik laʼ ibʼan tuchʼ bʼiil u kam uvaʼ laʼ aqʼax s-te, tul jitatetz jike laʼ ibʼana kʼuxh niim vet uvaʼ laʼ aqʼax s-te. 11Tan oq jitxh ex kʼuqlebʼ kʼuul tiʼ inqʼa kam tzitza vatz txʼavaʼ, tul aʼetz koq laʼ ikʼuqbʼavat quBʼaal Tiuxh ikʼuul setiʼ, tiʼ inqʼa jikla txhaq kam tu amlikaʼ. 12Oqetz jitxh ex kʼuqlebʼ kʼuul tiʼ tilix inqʼa kam uvaʼ nik taqʼ quBʼaal Tiuxh sete tzitza vatz txʼavaʼ, tul jitatetzxh ex kʼuqlebʼ kʼuule tiʼ etilt inqʼa kam uvaʼ laʼ taqʼ quBʼaal Tiuxh sete tu amlikaʼ.

13Echetz yeʼ laʼ utxhi uvaʼ kaʼvaʼlen laʼ aqʼonvik invaʼq u aqʼonvil. Tan laʼ koq utxhi uvaʼ laʼ isaʼ invaʼl, tul laʼ tixva txha invaʼte. Atz laʼ koq chiibʼ txhan tiʼ invaʼl, tul laʼ teesa txha iqʼij invaʼte. Echetz vetatine tuchʼ quBʼaal Tiuxh, tan laʼ koq utxhi uvaʼ laʼ bʼen ekʼuul tiʼ quBʼaal Tiuxh, tul laʼ bʼen txhan ekʼuul tiʼ u txʼijbʼal qʼij vatz txʼavaʼ, —xeʼt Jesuus.

14Tabʼietz inqʼa fariseeo jankʼal inqʼa yol uvaʼ tal Jesuus, tul aʼl kuxh motx itzeʼlel Jesuus taʼn. Tan sibʼichaqxh ijiqʼal tiʼ puaq.

15Yaʼne ech tal Jesuus te inqʼa fariseeo s-eche: —Junt kuxh nik motx etaqʼ bʼen etibʼ s-bʼaʼn vatz inqʼa xaol. Poro tootzaq quBʼaal Tiuxh vetaanima. Tan mam yol u txʼijbʼal qʼij vatz inqʼa xaol. Pet vatz quBʼaal Tiuxh, tan txoqebʼal kʼuul vitxumbʼal u xaol.

Uvaʼs talt quBʼaal Jesuus uvaʼ at tokebʼal inqʼa ibʼekʼbʼal quBʼaal Tiuxh

16Aʼetz nik ul yaʼk inqʼa yol uvaʼ itzʼibʼa ka Moisees tuchʼ inqʼa yol uvaʼ itzʼibʼa ka inqʼa qʼexsanich tetz viyol quBʼaal Tiuxh, kʼatz Xhun, u aqʼol kuʼ xaol xeʼ aʼ. Petetz vet s-txheel, tan xeʼtiy vet in tiʼ ipaxsal vaʼt txumbʼal tiʼ ibʼant quBʼaal Tiuxh iqʼesalil t-taanima inqʼa xaol. Tul mamala xaol nik motx iyaʼlu vet tibʼ tiʼ ibʼant quBʼaal Tiuxh iqʼesalil s-kʼatza.#Luk 5.33-39; 7.28-35 17Kʼuxhetz jit eela inqʼa yol uvaʼ nik val tuchʼ inqʼa nik tal inqʼa iqʼesal uqʼeʼybʼal, poro tetxhalxh laʼ elaʼp inqʼa yol inqʼa nik valeʼ. Echetz nik valte sete uvaʼ kʼuxh kamxh laʼ pal vatz u txʼavaʼ, atz vatz u amlikaʼ, tan mij invaʼtoʼq inqʼa yol uvaʼ tzʼibʼamal ka taʼn Moisees yeʼ koq laʼ elaʼpun.

Uvaʼs itxhusun quBʼaal Jesuus, tiʼ uvaʼ yeʼ laʼ isaʼa laʼ ituki bʼen inqʼa vinaq tixqel

Tio 19.1-12; Kuxh 10.1-12

18Jaʼl u vinaq uvaʼ laʼ tukin el tixqel, tul laʼ ikʼul tibʼ tuchʼ vaʼt ixoq, yansa ibʼetz vete nik ibʼaneʼ. Atz oq laʼ ikʼul vet tibʼ vaʼt vinaq tuchʼ u ixoq, uvaʼ qat tukil tzaan taʼn itzumel, tul yansa ibʼetz vete laʼ ibʼan u vinaq. Pet ex inqʼa fariseeo, tan yeʼ nik motx enima.{*}#16.18 ¿Kam s-tiʼil yeʼ kuxh taqla tal quBʼaal Jesuus u yol tiʼ vitukit el vaʼq vinaq u tixqel uvaʼ nik tal tu versiikulo vajxaqlaval? Aʼ s-tiʼil, uvaʼ nik ikʼutxh quBʼaal Jesuus te inqʼa iqʼesal uqʼeʼybʼal uvaʼ at vaʼl u bʼekʼbʼal yeʼ nik inima. Tul jit txhan kuxh vaʼl yeʼ nikich motx inima, pet kʼutxhbʼal kuxh tetz s-vatz tiʼ ibʼen s-te. Tan nikich ikuy inqʼa iqʼesal uqʼeʼybʼal tutxh u jatxo ibʼ, tan kʼuxh bʼiil kuxh laʼich yan invaʼq u ixoq vatz vitzumel, tul yek nikich ituki el. Poro jitetz ech uvaʼe nik isaʼ quBʼaal Tiuxh. Xaʼtetze tal quBʼaal Jesuus te inqʼa fariseeo.

Uvaʼs txumbʼalimal itxhusun quBʼaal Jesuus tiʼ Laasaro, atz tiʼ val u txʼiol iqʼij

19Toqetz val vaʼt u yol sete: Atich val u vinaq uvaʼ txʼiolich iqʼij, tul bʼaʼnla txhaqxh oksaʼm nikich toksa uvaʼ qʼeq kaqko ikaʼyeʼ, eche tetz mam iqʼesal. Tul aʼxh u bʼaʼnla liino nikich toksa. Tul jun kuxh qʼij nikich imolt inqʼa imol tiʼ ibʼant inimla qʼij tuchʼ bʼaʼnla txʼix. Tul mam yol tatinich veteʼ.

20Atichetz invaʼt u vinaq uvaʼ tira meebʼaʼichxhtuʼ uvaʼ Laasaroich ibʼij. Tul tira motxnaʼqich eluʼl chin tiʼ itxhiʼoʼl. Atz xoklich kuxh bʼen tziʼ ijubʼal u txʼiol iqʼij. Tul nikich kuxh ijoy itxʼix. 21Atz nikich tatxhva tetxhbʼul bʼeeq tzaqatz juyaq txʼix uvaʼ nikich isilp kuʼl jaqʼ imeexha u txʼiol iqʼij. Pet yeʼ nikich taqʼax s-te. Tul aʼl nikich ilesut txʼiʼ inqʼa chin uvaʼ atich s-tiʼ.

22Opoonetz vet vaʼl qʼij, tul kam vet Laasaro. Tul ul eloq vet Laasaro taʼn inqʼa aanxel. Tul yekich vet Laasaro tu bʼaʼnla atibʼal tal uvaʼ atil Avraʼaam, u kʼuy qumam, oʼ inqʼa tij imam Israeel.

Yaʼne kamat vet u txʼiol iqʼij. Tul ex muqtxʼoq vet vitxhiʼoʼl. 23Tul yekich vet tu tatibʼal inqʼa kamnaʼq tal uvaʼ nik motx txʼebʼonk tiʼ taqʼax kuʼ yol tinuqul s-tiʼ taʼn quBʼaal Tiuxh. Poro bʼeeno nikich ikʼaxbʼisal veteʼ. Saqinetz vet opoon u txʼiol iqʼij tu bʼaʼnla atibʼal tal uvaʼ atich Avraʼaam tuchʼ Laasaro.

24Yaʼne sichʼin opoon u txʼiol iqʼij te Avraʼaam. Tul ech tal s-eche: «Kʼuy inmam Avraʼaam, oybʼa invatz. Txhaq tzaan Laasaro. Tul laʼ takʼsa tzaan Laasaro viʼ iqʼabʼ xeʼ aʼ, tiʼ takʼsal inbʼeeq intziʼ tul laʼ loʼbʼix u vaqʼ. Tan mam kʼaxkʼo nik palk in tzitza tu xamal,» xeʼt u txʼiol iqʼij.

25Yaʼne ech tal Avraʼaam te u txʼiol iqʼij s-eche: «Inkʼaol, ulsa sakʼuul uvaʼ tira tibʼaʼnil qat palk axh tu qʼij asaq vatz u txʼavaʼ. Pet ech koq Laasaroe, tan txumlebʼalichxh tatin Laasaro tu qʼij isaq vatz u txʼavaʼ. Pet iletz vet Laasaro at tu mam bʼaʼnil tzitza. Aʼetz vet axh, nik apal tu mam txumlebʼal. 26Tul tira yeʼ laʼ utxh vet qukʼult qibʼ paqte, tan il vet val u mam jul at kuʼ s-quxoʼl savuchʼ. Echetz jitoq laʼ utxh vet avul tzitza, tul jitoq laʼ utxh qopoon tal uvaʼ atil axh,» xeʼt tzaan Avraʼaam te u txʼiol iqʼij.

27Yaʼne ech tal u txʼiol iqʼij s-eche: «Ape. Oq yeʼ laʼ isaʼa laʼ ul Laasaro sinkʼatza, tul bʼan bʼaʼnil, kʼuy inmam Avraʼaam. Tul txhaq bʼen Laasaro t-totzotz inbʼaal. 28Tul bʼen tal Laasaro te inqʼa vitzʼin uvaʼ yeʼ koq laʼ motx ul tu mam kʼaxkʼo uvaʼ atil in tzitza. Tan oʼvaʼt tel vitzʼin at ka,» xeʼt opoon u txʼiol iqʼij te Avraʼaam.

29Yaʼne ech tal Avraʼaam s-eche: «Poro il inqʼa yol uvaʼ itzʼibʼa ka Moisees nik talax viʼ inqʼa eetzʼin. Atz ilat inqʼa yol nik talax s-viʼ, inqʼa tzʼibʼamal ka taʼn inqʼa qʼexsanich tetz viyol quBʼaal Tiuxh. Pet taʼn kuxh laʼ ibʼana uvaʼ laʼ iqej inqʼa eetzʼin inqʼa nik talaxeʼ,» xeʼt Avraʼaam te u txʼiol iqʼij.

30Yaʼne ech tal u txʼiol iqʼij te Avraʼaam s-eche: «Kʼuy inmam Avraʼaam, yeʼ laʼ motx iqeje inqʼa vitzʼin. Pet toqetz motx iqej veteʼe, oq vaʼq vet kamnaʼq bʼen alon s-te. Tul toqetz motx titzʼa vet tibʼe t-inqʼa ipaʼv,» xeʼt u txʼiol iqʼij.

31Yaʼne ech tal Avraʼaam s-eche: «Yeʼle. Oqetz yeʼ nik iqej inqʼa eetzʼin inqʼa yol uvaʼ itzʼibʼa ka Moisees, atz inqʼa yol uvaʼ tzʼibʼamal ka taʼn jolt inqʼa qʼexsanich tetz viyol quBʼaal Tiuxh, tul aʼetz koq txhan vet laʼ motx iqej invaʼq uvaʼ laʼ el bʼen xoʼl inqʼa kamnaʼq,» xeʼt Avraʼaam te u txʼiol iqʼij, —xeʼt Jesuus te inqʼa fariseeo.{*}#16.31 Jankʼalxh inqʼa yol uvaʼ nik tal quBʼaal Jesuus tzitza, tan txumbʼalimal nik talt quBʼaal Jesuus tiʼ Laasaro tuchʼ u txʼiol iqʼij. Tul at tokebʼal junun inqʼa yol uvaʼ nik tal quBʼaal Jesuus tiʼ inqʼa vinaq inqʼae. U txʼiol iqʼij, tan aʼ nik ibʼan eela tuchʼ inqʼa iqʼesal uqʼeʼybʼal. Tan eenaqich kuxh taanima tiʼ ijiqʼbʼal u vatz txʼavaʼ. Tul aʼ kuxh inqʼa tetz nikich motx itxhokeʼ. Pet yeʼl bʼeeq inqʼa tenam nikich motx toksa tiviʼ tiʼ ilotxhoxeʼ. Petetz Laasaro, tan aʼ nik ibʼan eela tuchʼ jankʼal inqʼa xaol, inqʼa tij imam Israeel, inqʼa yeʼlich tiqleʼm xoʼl inqʼa imol. Tan bʼeeno kuxh nikich motx ikʼaxbʼ inqʼa xaol inqʼae taʼn inqʼa fariseeo. Echetz aʼ nikich isaʼ quBʼaal Jesuus toksal inqʼa iqʼesal uqʼeʼybʼal t-bʼey tiʼ ijikbʼixsat inqʼa itxumbʼal, atz tiʼ iqejt inqʼa bʼekʼbʼal, eche uvaʼ nik isaʼ quBʼaal Tiuxh s-te.

Currently Selected:

Luk 16: ixlC

Highlight

Copy