Lúkà 24

Yèésù dzí ti náàŋírĩ-òkú ŋa wá náyé

(Màtéwò 28:1-8; Mákò 16:1-8; Yòhánà 20:1-10)

1Tsí ó ɖi ńlɛ̀ má‐ɛ̀, náàwúrɔ̀ kùtùkùtù, tsí ɔnɔbɛ̃̀ɛ̃ ŋa#á ǹɖe, tsí kɛ́ àɖɛ̃́ rṹrũ̀ fĩ́rĩ́fĩ́rĩ́ yèé à kpaɖí si ŋa#á, tsí à dzì nɔ́ɔ̀nà-érì#ɛ́ ní àŋa kó lɔ káà ń kpã́ fú òkú-Yèésù#ɛ́. 2Kíbí à tó ńbɛ̀#ɛ́, à rí ní òkúta lákṹ yèé à ń ɖí arũ-ifò#ɛ́ si#ɛ́, kò wà ńǹɖì‐ɛ̀ ró. À ríi si nákpálà-kã̀ si. 3Kíbí à rí bɛ́ɛ̀#ɛ́, à wɔ̀ ńnɔ́-ifò#ɛ́ lɔ, tsí à kò rí òkú-Yèésù Ɔlá-wa bɛ̀ ró. 4Tsí à kí dzã̀maa si, à kò ma ìsérè mɛ̀ɛ́ ká tse ró. Ńbɛ̀ gbòkã́ gé#ɛ́, ɔ̀nyà méèdzì kã̀ŋa wáa ɖóro ńwádzú-ŋa, tsí ìwɔ̀ra-ŋa wà kɔ nyɛ̀nyɛ̀nyɛ̀. 5Tsí dzidzi mú ŋa, tsí à mú odzú bɔlɛ̀, tsí ɛnɛ ŋa#á wà bèrè ŋá ní: Kí tse tsí à wà wo ɔ̀nyà-àwáàyɛ̀ náàŋírĩ-òkú ŋa ná? 6Ó ɖi, kò wà ńbí ró. Ó sɛ̃̀ dzí ti náàŋírĩ-òkú ŋa wá náyé.

Tsí à wà bèrè ŋá ró ní: À kò tédzú afɔ̀ yèé ó fɔ̀ fú ŋa ńǹwèrè yèé ó wà nérè-Gàlìlé si#ɛ́ niì? 7Ó ti wí fú ŋa ní ó wà ní ká sɔ́ òŋu, Ɛnɛ yèé ɔ̀nyà bí#ɛ́† fú ɔ̀nyà-íbàɖí ŋa, tsí ká kã òŋu si ńǹtá-egi-ìɖáàgàlàdzà† títí òŋu kó kú, tsí nɔ́dzɔ́-ɛ̀kɛ́ɛta‐ɛ̀, òŋu kó sɛ̃̀ dzí ti náàŋírĩ-òkú ŋa wá náyé.

8Kíbí à wí fú ŋa bɛ́ɛ̀#ɛ́, à tédzú afɔ̀-Yèésù#ɛ́ gbòkã́, 9tsí à ǹɖe, tsí lɔ ńlé káà fɔ afɔ̀#ɛ́ fú adzítsɛ́-Yèésù† máàwɔɔ̀kã̀ yèé bɔ̀ si ŋa#á, tsí à fɔ̀ɔ́ fú ɛnɛ-àtíbɔ̀ ŋa gbo kpó. 10Màríyà† ti ìlú-Màɖàlá òŋu Dzɔ̀wánà má nára-Màríyà ìnà-Yàkúbù òŋu ɔnɔbɛ̃̀ɛ̃-àtíbɔ̀ yèé wà bá ŋa#á ní lɔ bɛ́ɛ̀#ɛ́. Àŋa ní kpérí kpó, tsí káà fɔ afɔ̀#ɛ́ fú adzítsɛ́-Yèésù† ŋa#á. 11Kíbí adzítsɛ́ ŋa#á gbɔ́ afɔ̀#ɛ́, à kò ń kpe afɔ̀-kã̀ kpókpó, tsí à kò karalé si ńǹtá-ŋa.

12Ó ɖi, Òkúta òŋu ǹɖe nɛ́sɛ̀ nɛ́sɛ̀, tsí yáré lɔ nérì#ɛ́. Tsí kíbí ó tó#ɛ́, ó balɛ̀, tsí kpalɛwo inɔ́-ifò#ɛ́ rere, tsí ɔ̀dzá yèé à ń wé òkú#ɛ́ gé ní ó rí#ɛ́. Tsí kíbí ó rí bɛ́ɛ̀#ɛ́, ó kpa kpòlóó, tsí sɛ̃̀ dzì nɔ́ɔ̀nà-ilé.

Yèésù mú ara‐ɛ̀ ŋa ɔmatsɛ́‐ɛ̀ méèdzì kã̀ŋa nɔ́ɔ̀nà

(Mákò 16:12-13)

13Nɔ́dzɔ́ nyɛ̀ŋɛ̀ ké#ɛ́, ɔ̀nyà méèdzì kã̀ŋa náàŋírĩ-atɛ̀náànyì-Yèésù ŋa#á ǹɖe, tsí làkóò ńǹlú-kã̀. À náa kpe ìlú#ɛ́ ní Èmàwú, tsí dzídzɛ̃̀‐ɛ̀ òŋu Yèrúsàlɛ́mì gbo wà kíbí ìtsɛ́kòlò máàwɔɔ̀kã̀ bɛ́ gé ni. 14Kíbí à làkóò#ɛ́, à wà kpɛ̀rɔ́-iŋɛ́ yèé tse ŋa kpó#ɛ́. 15Ńǹwèrè yèé à wà kpɛ̀rɔ́#ɛ́ làkóò bɛ́ɛ̀#ɛ́, Yèésù òŋu ká‐ɛ̀ lɔ káà bá ŋa, tsí rɛ̃̀ bá ŋa làkóò. 16À wà ríi, ó ɖi, à kò nyáa màá. Ó wà kíbí iŋɛ́-kã̀ sirì bo odzú-ŋa si bɛ́ ni. 17Tsí Yèésù wà bèrè ŋá ní: Afɔ̀ mɛ̀ɛ́ à wà fɔ̀ làkóò ná?

Tsí à nyí ɖóro, tsí bí ò rí ŋa, ìwànwà-ŋa gìɖì tse ànyínɔ́ si góró. 18Tsí ɔ̀nyà-kã̀ náàŋírĩ-àŋa méèdzì#ɛ́, ɛnɛ yèé à náa kpè ní Kèlèwókpà#á tsí arũ, tsí wà dzɔ́ŋù fúu ní: Kpɔ̀ɔ́ dza! Òŋu níìkã̀ gé ní dzɔnɛ́ bɔ̀ ńYèrúsàlɛ́mì#ɛ́, tsí kò gbɔ́ iŋɛ́ yèé ŋa wà tse nára-ɔdzɔ́ yèé ŋa#á.

19Tsí Yèésù wà bèrè ŋá ní: Kí ná?

Tsí à wà dzɔ́ŋù fúu ní: Iŋɛ́ yèé ŋa bá Yèésù ti Nàsàrɛ́tì#ɛ́ ni. Ó ɖi, agbáfɔ̀-Ɔ̀ɖáyé fɔ̀†-kã̀ ní ó dzɛ́#ɛ́, tsí ó tse iŋɛ́-ikpá lákṹ lákṹ ŋa, tsí ó fɔ afɔ̀ ŋa gbo òŋu ikpá nódzú-Ɔ̀ɖáyé, tsí èrò gbɔ́, èrò mà. 20Tsí onùgbó-atsɛbɔ-Ɔ̀ɖáyé†-àŋa ŋa òŋu onùgbó-ìlú-àŋa ŋa, à múu bɔwɔ́-àkpɛ̀dzɔ́ ŋa, tsí à ɖáàbi fúu, tsí sɔ́ɔ fú ikú, tsí kã̀ã́ si ńǹtá-egi-ìɖáàgàlàdzà†. 21Ó ɖi, àŋa òŋu, àŋa módzú si nɔ́ɔ̀nà si kpó ní òŋu ní nákó wáa gba ɔma-Ìsàràyɛ́lì† ŋa dzɔ̀ɔ́#ɛ́. Èkéèdzì#ɛ́, ó ɖi ɔdzɔ́ mɛ́ɛta nɔ́mbɛ́ báàyí ní iŋɛ́ ŋa#á kpó tse bɛ́ɛ̀#ɛ́. 22Tsí yèé yɔ#ɛ́, ɔnɔbɛ̃̀ɛ̃ kã̀ŋa yèé wà nɛ́gbɛ́-àŋa#á wáa wíìnyɛ̀ kã̀ŋa fú àŋa. Afɔ̀#ɛ́ mu àŋa. Òŋu ní wà dzɛ́ ní: Nɔ́mbɛ́ náàwúrɔ̀#ɛ́, à ti ɖádzá lɔ néèkpò#ɛ́, 23tsí à kò rí òkú-Yèésù ró. Tsí à sɛ̃̀ bɔ̀ wá, tsí wáa rɔ́ fú àŋa ní: Ɔ̀ɖáyé nya adzítsɛ́-ɔ̀rɔ̃† ŋa ɖíre fú àŋa, tsí adzítsɛ́ ŋa#á rɔ́ fú àŋa ní Yèésù ti dzí ti náàŋírĩ-òkú ŋa wá náyé. 24Kíbí ɔnɔbɛ̃̀ɛ̃ ŋa#á wí bɛ́ɛ̀#ɛ́, enìkéèdzì-àŋa kã̀ŋa ǹɖe, tsí lɔ néèkpò#ɛ́, tsí àŋa gbo, à rí iŋɛ́ ŋa#á kíbí ɔnɔbɛ̃̀ɛ̃ ŋa#á fɔ̀ɔ́ tútútú#ɛ́. Ó ɖi, Yèésù gé ní à kò rí bɛ̀#ɛ́.

25Tsí Yèésù wà fɔ̀ fú ŋa ní: Ɔ̀nyà nákpo ŋa! Afɔ̀ kpó yèé agbáfɔ̀-Ɔ̀ɖáyé fɔ̀ ŋa ti fɔ̀ si#ɛ́ fee, kí tse tsí à kò yáa gbàá gbɔ́ ná? 26Ó ɖi, ó wà ní Kírísítò Agbanɛlà#á kó réré bɛ́ɛ̀ tã́ná Ɔ̀ɖáyé kó mú iyì bɔwɔ́‐ɛ̀ nɔ̀!

27Tsí Yèésù nyàkpì‐ɛ̀ fú ŋa ní à ti kɔ afɔ̀ ti nára-òŋu si ńǸwé-Ɔ̀ɖáyé†#ɛ́ kpó si. Tsí ó kpé òkpì-afɔ̀#ɛ́ nyínyà fú ŋa títí ti ńǹwé-Mɔ̀ɔ́sè† wáa lɔ ńǹtá-ìwé-agbáfɔ̀-Ɔ̀ɖáyé fɔ̀ ŋa kpó.

28Ńǹwèrè yèé à wà nɔ́ɔ̀nà si làkóò#ɛ́, à káà tó sɔ́má-ìlú#ɛ́, tsí Yèésù tse kíbí ɛnɛ́ yèé fɔ̀ ní ó làkóò ńwádzú bɛ́ ró yí. 29Tsí à wà tsìkálɛ̀ fúu ní: Kó kí ńɖi-àŋa sũ̀. Ó ɖi, alɛ́lɛ́ lɛ́, tsí òkùkù gbo bòkó kù ná.

Tsí ó dzɛ́, tsí lɔ káà gbé ńɖi-ŋa. 30Tsí ó lɔ nóòkpì-dzídzɛ bá ŋa, tsí ó kɛ́ kpɔ̃́nɔ́, tsí ɖɔ́kpɛ́ fú Ɔ̀ɖáyé, tsí bùú bɔwɔ́-ŋa. 31Kíbí ó bu kpɔ̃́nɔ́#ɛ́ bɔwɔ́-ŋa gé#ɛ́, odzú-ŋa má kpó ŋàà ńǹɖì-bɛ̀, tsí à ríi mà ní Yèésù ni. Tsí gbòkã́#á, ó nɔ̀ nódzú-ŋa bɛ̀. 32Tsí à nyí, tsí wà wí fú ara-ŋa ní: Kíbí ó wà wíìnyɛ̀ fú àŋa bàa nɔ́ɔ̀nà, tsí wà nyàkpì-Ìwé-Ɔ̀ɖáyé† fú àŋa#á, afɔ̀#ɛ́ wà tɛ́ àŋa náyè.

33Tsí à ǹɖe nɛ́sɛ̀ nɛ́sɛ̀ gbòkã́, tsí sɛ̃̀ wáa lɔ ńYèrúsàlɛ́mì. Kíbí à tó ńYèrúsàlɛ́mì#ɛ́, à rí adzítsɛ́ máàwɔɔ̀kã̀ ŋa#á, tsí à kpérí si òŋu ɛnɛ-àtíbɔ̀ ŋa gbo. 34Tsí à kò tì tsí arũ tã́ná à wà wí fú ŋa ní: Ɔlá-àŋa ti dzí ti náàŋírĩ-òkú ŋa wá náyé ìɖéǹɖè, tsí mú ara‐ɛ̀ ŋa Sìmɔ́nì.

35Tsí àŋa ká-ŋa gbo, à wà kpɛ̀rɔ́#ɛ́ fú ŋa ńǹkɛ̀ɛ́ ti nára-kíbí iŋɛ́ ŋa#á lɔ fú ŋa gbà nɔ́ɔ̀nà#á, òŋu kíbí à rí Yèésù mà ńǹwèrè yèé ó bu kpɔ̃́nɔ́ bɔwɔ́-ŋa#á.

Yèésù mú ara‐ɛ̀ ŋa ɔmatsɛ́‐ɛ̀ ŋa

(Màtéwò 28:16-20; Mákò 16:14-18; Yòhánà 20:19-23; Itsɛ́ 1:6-8)

36Ńǹwèrè yèé à wà wíìnyɛ̀ làkóò#ɛ́, Yèésù òŋu ká‐ɛ̀ wáa bɔ́ náàŋírĩ-ŋa, tsí wà wí fú ŋa ní: Ɔ̀ɖáyé kó fú ŋɛ́ ńtútùúrɔ̀‐ɛ̀.

37Tsí ɛ̀ɖɔ̃̀ ɖá ŋa gbòkã́, tsí ɔ̀rɛ̃rɛ̃ kpa ŋá málɛ̀ kpó mɛ́rɛ̃́mɛ́rɛ̃́. À ɖédzú àŋa rí ɛnɛ̀rɔ̃-kã̀ ni. 38Tsí Yèésù wà bèrè ŋá ní: Kí tse tsí à kí nyɛ̀ɛ́nyɛ̀ɛ́ si, tsí à wà dzèrèbe bɛ́ɛ̀ ná? 39Ká rí ɔwɔ́-òŋu òŋu ɛsɛ̀-òŋu ŋa káyí! Òŋu ká-òŋu gìɖì gìɖì ni. Ká mɔ́wɔ́ kã òŋu káyí! Awɔ òŋu ɛrã ní bo ekũkũ-òŋu ŋa si#ɛ́. Ɛnɛ̀rɔ̃-kã̀ kà nɛ́ bɛ́ɛ̀ nɛ́!

40Kíbí ó wí fú ŋa bɛ́ɛ̀ tã́#á, ó mú ɔwɔ́‐ɛ̀ ŋa òŋu ɛsɛ̀‐ɛ̀ ŋa, ńbí à mú ekìkã̀-irɛ̃, tsí ń kã̀ã́#á, tsí ń ŋà ŋá. 41Tsí ayè tɛ́ ŋa si, ó ɖi, kò tì yáa yé ŋa wòná. Ó tsàlá fú ŋa héŋú. Kíbí Yèésù rí bɛ́ɛ̀#ɛ́, ó wà bèrè ŋá ní: Dzídzɛ-kã̀ kò wà fú ŋa, tsí òŋu kó dzɛɛ̀?

42Tsí à kɛ́ àbùbɔ̀-ɛdzã nyínya-kã̀ fúu, 43tsí ó ń dzɛ nódzú-ŋa bɛ̀.

44Tsí ó sɛ̃̀ wà wí fú ŋa ró ní: Ńǹwèrè yèé òŋu wà náàŋírĩ-ŋa si#ɛ́, òŋu ti wí fú ŋa ní iŋɛ́ yèé à kɔ si ti nára-òŋu ńǸwé-Ɔ̀ɖáyé† si ŋa#á, ó wà ní iŋɛ́ ŋa#á kpó kó tsɛ bɛ́ɛ̀. Ó ɖi, à ti kɔ ŋá si ńǹwé-ɛkpa-Mɔ̀ɔ́sè† òŋu agbáfɔ̀-Ɔ̀ɖáyé fɔ̀† ŋa má nára-Ìwé-Orĩ ŋa gbo. Tsí ó wà ní iŋɛ́ ŋa#á kpó kó tsɛ.

45Tsí ó tsí atsɔ nódzú-afɔ̀ yèé ŋa wà ńǸwé-Ɔ̀ɖáyé#ɛ́, tsí tsí ìsérè-ŋa gbo, tsí kó má fú ŋa. 46Tsí ó wà wí fú ŋa ní: À kɔ si ní ó wà ní Kírísítò Agbanɛlà#á kó réré kpíkpɔ̀, tsí kú, tsí ɔdzɔ́-ɛ̀kɛ́ɛta‐ɛ̀ ni kó sɛ̃̀ dzí ti náàŋírĩ-òkú ŋa wá náyé. 47Tsí ó wà gbo ní ká dzíkɔ̀-òŋu fú ìlú kpó ní ká nyíìlò kpaɖà, tsí Ɔ̀ɖáyé kó mú àbi-ŋà ŋa, tsí ń tɔrɛ fú ŋa. À nákó kpée ti ńǹlú-Yèrúsàlɛ́mì títí wáa lɔ ńǹlú ŋa#á kpó náàdzàkáyé#ɛ́. 48Àŋa ní rí ìɖì-iŋɛ́ ŋa#á, tsí à nákó nyáa nya àyídzá-òŋu#ɛ́. 49Tsí bí òŋu lɔ, àlé yèé Boba-òŋu ta si fú ŋa#á, òŋu ká-òŋu, òŋu nákó sãã́ fú ŋa. Ó ɖi, ó wà ní ká ɖóro si ńnɔ́-ìlú#ɛ́ títí fú ìwèrè yèé ikpá-Ɔ̀ɖáyé nákó tì wáa wɔ̀ ńǹtá-ŋa#á.

Yèésù lɔ nɔ́ɔ̀rɔ̃

(Mákò 16:19-20; Itsɛ́ 1:9-11)

50Tsí Yèésù wáa ǹɖe, tsí gbɛ̃́ ɔmatsɛ́‐ɛ̀ ŋa fùɖá ńnɔ́-ìlú#ɛ́, tsí à lɔ sɔ́má-ìlú-Bètàní. Kíbí à tó ńbɛ̀#ɛ́, ó kɛ́ ɔwɔ́ lɔ ńǹgbèrí, tsí wà tu kùsɛ̀ɛ̀ fú ŋa. 51Kíbí ó wà tu kùsɛ̀ɛ̀ fú ŋa#á, ó ǹɖe ńɖi-ŋa, tsí lɔ nɔ́ɔ̀rɔ̃. 52Tsí ɔmatsɛ́‐ɛ̀ ŋa mú erí kãlɛ̀ fúu, tsí à sɛ̃̀ nyí dzì nɔ́ɔ̀nà-Yèrúsàlɛ́mì òŋu ayè títɛ́ lákṹ-kã̀. 53Tsí nɔ́dzɔ́ kɔ́dzɔ́#ɛ́, à náa wà ńlé-Ɔ̀ɖáyé si, tsí wà ɖɔ́kpɛ́ fú Ɔ̀ɖáyé gé ni.

Currently Selected:

Lúkà 24: ngl

Highlight

Copy