Yòhánà 1

Afɔ̀-Ɔ̀ɖáyé wáa ɖi ɔ̀nyà, tsí gbé ńǹtalɛ̀ bí

1Títí ńǹkpìnkpìlɛ̀-iŋɛ́ ŋa#á kpó, oŋù-kã̀ wà. Oŋù#ɛ́ wà bá Ɔ̀ɖáyé si, tsí oŋù#ɛ́ dzɛ́ Ɔ̀ɖáyé. 2Ó ti wà bá Ɔ̀ɖáyé títí ńǹkpìnkpìlɛ̀-iŋɛ́ ŋa#á kpó. 3Ńǹtá‐ɛ̀ ní Ɔ̀ɖáyé gbà, tsí ɖá iŋɛ́ ɔ̀kã̀lɔ́ɔ̀kã̀ kpó#ɛ́. Iŋɛ́-kã̀ kpókpó kò bɔ̀ yèé Ɔ̀ɖáyé kò ɖá gbà ńǹtá‐ɛ̀#ɛ́. 4Òŋu ní dzɛ́ oláàyɛ̀#ɛ́. Tsí àyɛ̀#ɛ́ náa mú ɔ̀nyà ŋa si ńmímá. 5Mímá#á wà má ńɖi-òkùkù, tsí òkùkù kò nyáa múu.#1:5 À nákó nyáa fɔ̀ gbo ní: “Òkùkù kò nyáa gbàá.”

6Ɔ̀nyà-kã̀ wà. À náa kpèé ní Yòhánà†, tsí Ɔ̀ɖáyé bɛ̀ɛ́ wá. 7Ó wá, tsí kó wáa nya àyídzá ti nára-mímá#á, àtsùgbée ɔ̀nyà kpó kó gbɔ́ afɔ̀‐ɛ̀, tsí ká gbàá gbɔ́. 8Òŋu ká‐ɛ̀ kò dzɛ́ mímá#á. Ó wá, tsí kó wáa nya àyídzá ti nára-mímá#á ni.

9Oŋù#ɛ́, ó dzɛ́ mímá-òtítɔ́, tsí kíbí ó wà tó ńǹtalɛ̀ bí#ɛ́, ó wáa mú ɔ̀nyà ŋa si ńmímá. 10Ó ti wà náyé#ɛ́ si. Ńǹtá‐ɛ̀ ní Ɔ̀ɖáyé gbà, tsí ɖá ayé#ɛ́, tsí ɔ̀nyà-ìtalɛ̀ bí ŋa kò si ríi mà. 11Ó wá ńɖi-tɛ̀ɛ̀ ŋa, tsí tɛ̀ɛ̀ ŋa kò gbàá. 12Ó ɖi, ɔ̀nyà kã̀ŋa òŋu gbàá. Kíbí ɛnɛ nyɛ̀ŋɛ̀ ŋa gbàá gbɔ́#ɛ́, ó fú àŋa kpó ńkpá ní ká ɖi ɔma-Ɔ̀ɖáyé. 13À kò ɖi ɔma-Ɔ̀ɖáyé kíbí à náa dzɛ́ ɔma fú boba-nɛ ńǹtalɛ̀ bí#ɛ́ nàmí kíbí náa wu ɔ̀nyà, tsí náa bíma#á. Ó ɖi, Ɔ̀ɖáyé òŋu ká‐ɛ̀ tse tsí à dzɛ́ ɔma‐ɛ̀ ŋa ni.

14Oŋù#ɛ́, ó ɖi ɔ̀nyà, tsí ó wáa gbé bá wa, tsí àa rí iyì‐ɛ̀. Iyì‐ɛ̀#ɛ́, ó gbàá nɔ́wɔ́-Boba‐ɛ̀ kíbí ó dzɛ́ Ɔma bíbí‐ɛ̀ ɔ̀kã̀ntso#ɛ́ ni. Náa tse ore-ɔ̀fɛ́ fúnɛ, tsí náa wà tse òtítɔ́ gbo gé ni. 15Yòhánà nya àyídzá‐ɛ̀, tsí ó wí nódzú-ɔ̀nyà kpó ní: Ɛnɛ yèé, òŋu ní òŋu wà bá fɔ̀ dzɔ̀ɔ́ dzɔ̀ɔ́ kíbí òŋu fɔ̀ ní: Ɔ̀nyà-kã̀ nákó wáa wá náànyì-òŋu, tsí ó tsúwádzú-òŋu, iŋɛ́ yèé tse#ɛ́, ó ti wà tã́ná ká bí òŋu#ɛ́, ɛnɛ nyɛ̀ŋɛ̀ ní.

16Oŋù#ɛ́, olóore-ɔ̀fɛ́ ɔ̀kã̀lɔ́ɔ̀kã̀ ní ó dzɛ́#ɛ́, tsí náa wà tse ore-ɔ̀fɛ́ fú wa tɛ̀má tɛ̀má. 17Ɔ̀ɖáyé ɖá ɛkpa fú wa gbà ńǹtá-Mɔ̀ɔ́sè†. Ó ɖi, ó mú ore-ɔ̀fɛ́ òŋu òtítɔ́, tsí ń ŋà wá gbà ńǹtá-Yèésù Kírísítò. 18Ɔ̀ɖáyé#ɛ́, ɔ̀nyà-kã̀ kpókpó kò ríi wòrí. Ó ɖi, Ɔma bíbí‐ɛ̀ ɔ̀kã̀ntso#ɛ́, Ɔ̀ɖáyé ní ó dzɛ́#ɛ́. Tsí náa dzokó ńtã-Boba‐ɛ̀. Òŋu ní mú Ɔ̀ɖáyé, tsí ń ɖíre fú wa#á.

Yòhánà Awɛ̀fúnɛ wà nya àyídzá ti nára-Yèésù

(Màtéwò 3:1-12; Mákò 1:1-8; Lúkà 3:1-3)

19Ó ɖi nɔ́dzɔ́-kã̀, tsí onùgbó-ɔma-Ìyúɖà† ŋa yèé wà ńǹlú-Yèrúsàlɛ́mì#ɛ́, à bɛ atsɛbɔ-Ɔ̀ɖáyé† ŋa òŋu àtsìtsɛ́-ilé-Ɔ̀ɖáyé† ŋa lɔ fú Yòhánà†, tsí ká lɔ káà bèrèé ní ɔ̀nyà-ìrɔ́ mɛ̀ɛ́ ó dzɛ́. Afɔ̀ yèé ó fɔ̀ fú ŋa#á ní: 20Ó wí fú ŋa gãgã nódzú-ɔ̀nyà kpó ní òŋu kò dzɛ́ Kírísítò† Agbanɛlà yèé Ɔ̀ɖáyé tsã̀, tsí bɛ̀ wá#á.

21Tsí à wà bèrèé ní: Nɛ̀ɛ́ ó dzɛ́ ńǹkɛ̀ɛ́? Ó dzɛ́ Èlíyàà?

Tsí ó ní: Òò, òŋu kò dzɛ́ Èlíyà†.

Tsí à sɛ̃̀, tsí wà bèrèé ní: Òŋu ní dzɛ́ agbáfɔ̀-Ɔ̀ɖáyé fɔ̀† yèé àŋa wà ɖóro wò#ɛ́ɛ̀?

Tsí ó ní: Òò.

22Tsí à tɔ́ sɛ̃̀, tsí wà bèrèé ró ní: Nɛ̀ɛ́ ó dzɛ́ ná? Ó ɖi, ó wà ní àŋa kó káà wíìnyɛ̀-kã̀ fú ɛnɛ yèé ŋa bɛ àŋa wá#á. Ó ɖi, bí òŋu ká‐ɛ̀ wà wí ti nára-ara‐ɛ̀ gbà fáà?

23Tsí ó wà wí fú ŋa ní: Yèsáyà† agbáfɔ̀-Ɔ̀ɖáyé fɔ̀, ó fɔ̀ ní: “Oŋù-ɔ̀nyà-kã̀ wà ɖɔ̃́ nɔ́ɔ̀ɖã̀, tsí wà ɖúgbe ní: È rɛ̃́ ɔ̀nà-Ɔlɔ́dzɔ́ ɖí.”#1:23 Ìwé-Yèsáyà 40:3 (Ésaïe 40:3) Ó ɖi, òŋu ní ó wà bá fɔ̀#ɛ́.

24Ɛnɛ yèé à bɛ̀ wá ŋa#á, à dzɛ́ ɔma-ɛgbɛ́-Fàrísì† ŋa ni. 25Tsí à sɛ̃̀, tsí wà bèrèé ní: Bí kò dzɛ́ Kírísítò, tsí kò dzɛ́ Èlíyà gbo, tsí kò dzɛ́ agbáfɔ̀-Ɔ̀ɖáyé fɔ̀ yèé àŋa wà ɖóro wò#ɛ́ gbo fee, kí tse tsí ó wà wɛ̀† fú ɔ̀nyà ŋa ńǹkɛ̀ɛ́?

26Ńbɛ̀ɛ́, Yòhánà wà wí fú ŋa ní: Òŋu, òŋu wà wɛ̀ fú ŋa òŋu omi ni. Ó ɖi, ɔ̀nyà-kã̀ wà náàŋírĩ-ŋa, tsí à kò màá. 27Ɛnɛ nyɛ̀ŋɛ̀ nákó wáa wá náànyì-òŋu, tsí òŋu kò dzɔ òŋu kó tú okù-kpákò‐ɛ̀ gìɖì.

28Ńǹwèrè yèé à wà bèrèé bɛ́ɛ̀#ɛ́, Yòhánà wà ńǹlú-Bètàní ni. Ìlú#ɛ́ wà náànyì-oɖò-Yòɖánì, ńbí Yòhánà náa wɛ̀ fú ɔ̀nyà ŋa#á.

29Ńlɛ̀ má‐ɛ̀, Yòhánà rí Yèésù†, tsí ó rɛ̃̀ bàa ńɖɔ̀‐ɛ̀. Tsí ó ní: È rí gé! Ɔma-àgbò-Ɔ̀ɖáyé† ńnɛ̀ɛ́. Òŋu ní wà gba àbi-ɔ̀nyà ŋa lɔ#ɛ́. 30Ó ɖi, òŋu ní òŋu wà bá fɔ̀, tsí òŋu fɔ̀ ní: Ɔ̀nyà-kã̀ nákó wáa wá náànyì-òŋu, tsí ó tsúwádzú-òŋu, iŋɛ́ yèé tse#ɛ́, ó ti wà tã́ná ká bí òŋu#ɛ́. 31Ó ɖi, dzɔ̀ɔ́ dzɔ̀ɔ́#ɛ́, òŋu gbo, òŋu kò ma ɔ̀nyà-ìrɔ́ mɛ̀ɛ́ ó dzɛ́. Ó ɖi, òŋu wá, tsí òŋu kó wáa wɛ̀ fúnɛ òŋu omi, àtsùgbée ɔma-Ìsàràyɛ́lì† ŋa kó màá ni.

32Tsí ó fɔ̀ ró ní: Òŋu rí Mímí-Ɔ̀ɖáyé†, tsí ó tì ti nɔ́ɔ̀rɔ̃ wá ńǹwànwà-àlúǹkùkù bɛ́, tsí wáa gbé báa. 33Òŋu kò mà dzɔ̀ɔ́ ní òŋu ni. Ó ɖi, Ɔ̀ɖáyé, ɛnɛ yèé bɛ òŋu wá ní òŋu kó wáa wɛ̀ fúnɛ òŋu omi#ɛ́, ó wí fú òŋu ní: Nàa rí Mímí-Ɔ̀ɖáyé, tsí nákó tì, tsí wáa wà ńǹtá-ɔ̀nyà-kã̀ si. Ɛnɛ nyɛ̀ŋɛ̀ ní nákó tse tsí Mímí-Ɔ̀ɖáyé nákó tì wɔ̀ ńǹtá-ɔ̀nyà ŋa#á. 34Ó ɖi, òŋu rí bɛ́ɛ̀ ìɖéǹɖè, tsí òŋu wà mɔ́wɔ́ kpɛ̀ɖɔ̃̀ ní ɛnɛ yèé bɛ́#ɛ́, Ɔma bíbí-Ɔ̀ɖáyé ní ó dzɛ́#ɛ́.

Yèésù kpé ɔmatsɛ́‐ɛ̀ ŋa tsítsã̀

35Ńlɛ̀ má‐ɛ̀ ró, Yòhánà† wà bɛ̀ si, tsí ɔmatsɛ́‐ɛ̀ méèdzì gbo wà ńɖɔ̀‐ɛ̀ si. 36Ńbɛ̀ɛ́, Yèésù rɛ̃̀ wáa làkóò, tsí Yòhánà wòó kokoko, tsí fɔ̀ ní: È rí gé! Ɔma-àgbò-Ɔ̀ɖáyé ńnɛ̀ɛ́.

37Kíbí ó wí bɛ́ɛ̀#ɛ́, ɔmatsɛ́‐ɛ̀ méèdzì ŋa#á gbɔ́, tsí à ǹɖe, tsí tɛ̀ náànyì-Yèésù làkóò. 38Tsí Yèésù nyíwò, tsí ó rí ní à wà tɛ̀ náànyì-òŋu, tsí ó wà bèrè ŋá ní: Kí à wà wò?

Tsí à ní: Rábì, ńbisí ò wà? (Òkpì-Rábì ní dzɛ́ akɔ́nɛ#ɛ́.)

39Tsí Yèésù wí fú ŋa ní: Ká wá, tsí ká wáa rí ńbí òŋu wà#á.

Ńbɛ̀ɛ́, à tɛ̀ náànyì‐ɛ̀ lɔ, tsí à rí ńbí ó wà#á. Tsí à tse àsòkò yèé bɔ̀ fú ɔdzɔ́ nyɛ̀ŋɛ̀#ɛ́ ńɖɔ̀‐ɛ̀. Nódzúùrɔ̃̀-alɛ́ bɛ́ ní à lɔ ńɖɔ̀‐ɛ̀#ɛ́.

40Náàŋírĩ-àŋa méèdzì yèé gbɔ́ afɔ̀-Yòhánà nyɛ̀ŋɛ̀, tsí tɛ̀ náànyì-Yèésù#ɛ́, ɔ̀kã̀ dzɛ́ Ànɖérè. Ɔmànà-Sìmɔ́nì Òkúta ní ó dzɛ́#ɛ́. 41Ànɖérè#ɛ́, ó tsɛ̃̀tsɛ̃̀ káà rí ìfó‐ɛ̀, Sìmɔ́nì, tsí wà wí fúu ní: Àŋa rí Mɛ̀síyà†, Agbanɛlà yèé Ɔ̀ɖáyé tsã̀ ní òŋu nákó bɛ̀ wá#á. (Òkpì-Mɛ̀síyà ní dzɛ́ Kírísítò ńgɛ̀rɛ́kì#ɛ́.)

42Tsí ó gbɛ̃́ Sìmɔ́nì lɔ ńɖi-Yèésù. Tsí Yèésù wo Sìmɔ́nì títítí, tsí ó wà wí fúu ní: À náa kpèé ní Sìmɔ́nì, tsí ó dzɛ́ ɔma-Yòhánà. Ó ɖi báàyí, à nákó wà kpèé ní Kèfásì. (Òkpì-Kèfásì ní dzɛ́ Òkúta#á.)

43Ńlɛ̀ má‐ɛ̀, Yèésù ǹɖe ní òŋu kó lɔ nérè-Gàlìlé. Tsí ó làkóò, tsí ó kpàɖé Fìlíkpò, tsí ó wí fúu ní kó tɛ̀ náànyì-òŋu.

44Fìlíkpò#ɛ́, ɔma-ìlú-Bètsàyìɖá ŋa ni. Ìlú-Ànɖérè òŋu Òkúta ké ńnɛ̀ɛ́. 45Ńbɛ̀ɛ́, Fìlíkpò, òŋu gbo, ó lɔ káà rí Nàtànàyɛ́lì, tsí wà wí fúu ní: Ńǹwé-ɛkpa-Ɔ̀ɖáyé†#ɛ́, ó tédzú kíbí Mɔ̀ɔ́sè† kɔ iŋɛ́ ti nára-ɔ̀nyà-kã̀#áà? Tsí agbáfɔ̀-Ɔ̀ɖáyé fɔ̀† ŋa gbo wíìnyɛ̀ ti nára‐ɛ̀ nɔ̀! Ó ɖi, ɛnɛ nyɛ̀ŋɛ̀#ɛ́, àŋa ríi. À náa kpèé ní Yèésù, tsí ó dzɛ́ ɔma-Yòsɛ́fù† ńǹlú-Nàsàrɛ́tì.

46Tsí Nàtànàyɛ́lì ní: Ńǹlú-Nàsàrɛ́tìì? Iŋɛ́-ire-kã̀ nákó nyáa ti ńǹlú-Nàsàrɛ́tìì?

Tsí Fìlíkpò wí fúu ní òŋu ká‐ɛ̀ kó wá, tsí kó wáa rí.

47Ńbɛ̀ɛ́, à ǹɖe, tsí dzì nɔ́ɔ̀nà-ìɖì-Yèésù. Kíbí Yèésù rí Nàtànàyɛ́lì, tsí ó bàa ńɖɔ̀‐ɛ̀#ɛ́, ó wà fɔ̀ ti nára‐ɛ̀ ní: Ɛnɛ yèé bɛ́#ɛ́, ɔma-Ìsàràyɛ́lì gìɖì gìɖì ní. Ó ɖi, òtítɔ́ wà nárũ‐ɛ̀, kà rúnɛ.

48Tsí Nàtànàyɛ́lì wà bèrèé ní: Bí ó tse fáà, tsí ma òŋu?

Tsí Yèésù wà wí fúu ní: Tã́ná Fìlíkpò kó wáa kpèé#ɛ́, òŋu ti ríi ńǹwèrè yèé ó wà nábɛ́-òrì#ɛ́ si#ɛ́.

49Tsí Nàtànàyɛ́lì ní: Rábì, Ɔma bíbí-Ɔ̀ɖáyé ní ò dzɛ́#ɛ́, ìwɔ ní dzɛ́ ólú-ìlú-Ìsàràyɛ́lì#ɛ́.

50Tsí Yèésù wà wí fúu ní: Kíbí òŋu wí fúu ní òŋu ríi nábɛ́-òrì#ɛ́ ní ó gba òŋu gbɔ́#ɛ́ nɔ̀? Ó ɖi, nákó rí iŋɛ́ yèé nákó lákṹ lárè bɛ́ɛ̀ ŋa ró#ɛ́.

51Tsí ó ní: Òŋu wà wí fú ŋa ní fee, à nákó rí, tsí ɔ̀rɔ̃ nákó tsí, tsí adzítsɛ́-ɔ̀rɔ̃† ŋa nákó wà gu ìgbèrí lɔ, tsí wà tì nɔ́ɔ̀gbagba-éwo-òŋu, Ɛnɛ yèé ɔ̀nyà bí#ɛ́†.

Currently Selected:

Yòhánà 1: ngl

Highlight

Copy