2 Kòríntì ŋa 1

1Èmi, Kpɔ́lù òŋu ìnàbí-wa Tìmɔ̀té, àwa ní wà tse ìwé yèé bɛ́ fú ŋɛ́#ɛ́. Adzítsɛ́-Yèésù† Kírísítò ní ǹ dzɛ́#ɛ́, iŋɛ́ yèé tse#ɛ́, ó dzɔdzú-Ɔ̀ɖáyé, tsí ó tsã̀ mí ni. Àa dzɔ́ wà kí ɛ̀ŋɛ, ɔma-ɛgbɛ́-Ɔ̀ɖáyé yèé ŋa wà ńǹlú-Kòríntì#ɛ́ òŋu ɛnɛ yèé ŋa kpó dzɛ́ ti Ɔ̀ɖáyé, tsí wà nérè-Àkáyà#á kpó#ɛ́. 2Ɔ̀ɖáyé Boba-wa òŋu Yèésù† Kírísítò† Ɔlá-wa méèdzì ká tse ore-ɔ̀fɛ́ fú ŋɛ́, tsí ká fú ŋɛ́ ńtútùúrɔ̀ gbo.

Ɔ̀ɖáyé náa ɖáàmí le ɛnɛ yèé wà ńǹréré si#ɛ́

3Kùsɛ̀ɛ̀ fú Ɔ̀ɖáyé, ɛnɛ yèé dzɛ́ Boba-Yèésù Kírísítò Ɔlá-wa gbo#ɛ́. Ó dzɛ́ Boba yèé náa rí ànyínɔ́ fúnɛ#ɛ́, tsí dzɛ́ Ɔ̀ɖáyé yèé náa ɖáàmí le wá ńnɔ́-iŋɛ́ ɔ̀kã̀lɔ́ɔ̀kã̀ gbo kpó#ɛ́. 4Òŋu ní náa ɖáàmí le wá ńnɔ́-ìréré-wa ŋa kpó#ɛ́. Náa tse bɛ́ɛ̀, àtsùgbée àwa gbo, àa kó nyáa ɖáàmí le ɛnɛ yèé ŋa gbo wà ńǹréré ŋa si ńǹrɔ́ǹrɔ́#ɛ́. Bí ɔ̀nyà-kã̀ wà réré, àa nákó nyáa ɖáàmí leé ńǹrɔ́-kíbí Ɔ̀ɖáyé náa ɖáàmí le àwa gbo gbà#á. 5Ó ɖi fee, ńǹrɔ́-kíbí àwa gbo, àa wà réré náàtsùgbé-Kírísítò tó gbà#á, bɛ́ɛ̀ ké ní Ɔ̀ɖáyé gbo wà gbà ńǹtá‐ɛ̀, tsí wà ɖáàmí le wá tó#ɛ́ ńnɛ̀ɛ́. 6Bí ó dzɛ́ ní àa wà réré#ɛ́, àtsùgbée àa kó nyáa ɖáàmí le ŋɛ́, tsí e rí ɔlà gbo ni. Tsí bí Ɔ̀ɖáyé wà ɖáàmí le wá#á, àtsùgbée àa kó nyáa ɖáàmí le ɛ̀ŋɛ gbo ni. Tsí àmí yèé àa nákó ɖá le ŋɛ́#ɛ́ nákó tse tsí ɛ̀ŋɛ gbo è nákó gbódzú si kã̀nyìì si, tsí wà ńǹréré ŋa#á si ńǹrɔ́-kíbí àwa gbo àa wà ńŋa si#ɛ́. 7Ńbɛ̀ɛ́, àa nɛ́ àkaralé si ńǹtá-ŋɛ́ si, iŋɛ́ yèé tse#ɛ́, àa mà si ní kíbí ó dzɛ́ ní è wà réré kíbí àwa gbo#ɛ́, Ɔ̀ɖáyé wà ɖáàmí le ŋɛ́ ńǹrɔ́-kíbí ó wà ɖáàmí le àwa gbo#ɛ́ ni. 8Fee, ìnàbí-mi ŋa, ìréré yèé àa réré ńlɛ̀-Àsíyà#á, àa kàkó kɔ àrìmáa fɔ̀ɔ́ fú ŋɛ́. Ìréré#ɛ́ kpa wá nárù mɛ́rɛ̃́mɛ́rɛ̃́, ó láre ɔ̀gɔ̃̀rɔ̃̀ fú wa títí ayé#ɛ́ gìɖì sú wa kpó. 9Ɛ̃ɛ̃, àa dzɛ́ ńnɔ́-àwa ká-wa ní ikú ɖi ikú-wa ni. Ó ɖi, iŋɛ́ ŋa#á lɔ bɛ́ɛ̀, àtsùgbée àa kó máa karalé si ńǹtá-àwa ká-wa, àa kó karalé si ńǹtá-Ɔ̀ɖáyé, ɛnɛ yèé náa dzí òkú ŋa wá náyé#ɛ́ ni. 10Òŋu ní kpɔ̀ wá ǹɖe nárũ-ìrɔ́-ikú yèé bɛ́#ɛ́. Tsí òŋu ké ní nákó kpɔ̀ wá ǹɖe nárũ‐ɛ̀ ró#ɛ́. Ɛ̃ɛ̃, àa módzú si nɔ́ɔ̀nà si fúu ní nákó wà kpɔ̀ wá ǹɖe nárũ‐ɛ̀ bɛ́ɛ̀ làkóò làkóò gé ni. 11Tsí ɛ̀ŋɛ ká-ŋɛ́ gbo è nákó wà mɔ́wɔ́ gbè fú wa gbà ńǹtá-ìre wúwú. Bí è wà tse bɛ́ɛ̀, Ɔ̀ɖáyé nákó gba ìre yèé ɔ̀nyà kpíkpɔ̀ wà wú fú wa#á, tsí nákó tse ore fú wa, tsí ɔ̀nyà kpíkpɔ̀ gbo nákó ɖɔ́kpɛ́ fúu fú wa.

Kpɔ́lù sɔ́ ɔdzɔ́-ɔ̀nà yèé ó bàkó lɔ#ɛ́ lɔ

12Nóòtítɔ́#ɛ́, iŋɛ́ yèé àa wà ń nya akpá#á ní wà dzɛ́ ní àa mà si ńnɔ́-ara-wa rere ní kíbí àa gbé náyé#ɛ́ gbà#á, tsí yèé yɔ#ɛ́, kíbí àa gbé bá ŋɛ́#ɛ́, àa fɔ òtítɔ́, tsí àa kò mú iŋɛ́-kã̀ ɖúku ɔ̀nyà-kã̀ gbo. Tsí ńɖi-Ɔ̀ɖáyé ní iŋɛ́ nyɛ̀ŋɛ̀ ti ɛ́. Ore-ɔ̀fɛ́-Ɔ̀ɖáyé ní àa ń gbɛ̃́ ara-wa#á, kò tsi ifɛ̀ɛ́nɔ́-ɔ̀nyà ni. 13-14Fee, iŋɛ́ yèé ŋa àa fɔ̀ si ńǹwé yèé àa tse wá fú ŋɛ́ ŋa#á, kò tsi ànyì-afɔ̀ ni. Iŋɛ́ yèé è náa kã̀ ńnɔ́-ìwé ŋa#á, tsí gbɔ́ òkpì‐ɛ̀#ɛ́, òŋu#ɛ́ gé ńnɛ̀ɛ́. Iŋɛ́-kã̀ wà, tsí è wà gbɔ́ òkpì‐ɛ̀ oɖé báàyí gé ni. Ó ɖi, ǹ karalé ní è nákó wáa gbɔ́ òkpì‐ɛ̀ dzálɛ̀ kpó. Tsí iŋɛ́#ɛ́ ní wà dzɛ́ ní nɔ́dzɔ́ yèé Yèésù Ɔlá-wa nákó wá#á, è nákó nyáa mú wa, tsí ń nya akpá kíbí àwa gbo, àa nákó nyáa mú ŋɛ́, tsí ń nya akpá#á.

15Ǹ ti karalé si bɛ́ɛ̀. Ńnɛ̀ ní ǹ wà wò ní n gbà ńɖi-ŋɛ́ náàtsɛ̃̀tsɛ̃̀#ɛ́, àtsùgbée n mú ayè tɛ́ ŋɛ́ gbà méèdzì. 16Fee, ǹ tse ètò#ɛ́ si ní bí ǹ wáa làkóò ńlɛ̀-Màkɛ̀ɖónìyà, ni n yà gbà ńɖi-ŋɛ́. Tsí bí ǹ sɛ̃̀ kpaɖà ni n yà gbà ńɖi-ŋɛ́ ró, tsí e mɔ́wɔ́ gbè fú mi, tsí n lɔ nérè-Yùɖéyà ńǹkɛ̀ɛ́. 17Tsí bí ǹ fɔ̀ bɛ́ɛ̀, tsí ǹ kò nyáa wá bɛ́ɛ̀ ró fe, ni ǹ tse iŋɛ́-maɖé ńnɛ̀ɛ́ɛ̀? Nàmí è ɖédzú ètò-mi yèé mà tse ŋa#á, ìsérè ti ɔ̀nyà ní màa ń tse ŋá, tsi èmi níìkã̀ntso#ɛ́ bí ǹ fɔ̀ ní ɛ̃ɛ̃ tã́, ni n fɔ̀ ní òò róò? 18Kíbí ó dzɛ́ ní Ɔ̀ɖáyé kà tsòɖòbò#ɛ́, èmi gbo ǹ kà tsòɖòbò. Iŋɛ́ yèé àa fɔ̀ fú ŋɛ́#ɛ́ kò dzɛ́ ɛ̃ɛ̃ tã́, tsí dzɛ́ òò ró. 19Iŋɛ́ yèé tse#ɛ́, Yèésù Kírísítò Ɔma bíbí-Ɔ̀ɖáyé yèé Sìlásì òŋu Tìmɔ̀té má nára-èmi ká-èmi gbo, àa dzíkɔ̀ ti nára‐ɛ̀ fú ŋɛ́#ɛ́, Yèésù#ɛ́ kò tsi ɛ̃ɛ̃ òŋu òò ni. Ɛ̃ɛ̃ gé ní ó dzɛ́#ɛ́. 20Fee, ńǹtá‐ɛ̀ ní Ɔ̀ɖáyé náa gbà, tsí sã àlé ɔ̀kã̀lɔ́ɔ̀kã̀ yèé ó ta#á. Ńbɛ̀ɛ́, ńǹtá-Yèésù Kírísítò ní àa náa gbà, tsí fɔ̀ ní ɛ̀tsɛ, tsí ń nyɛ Ɔ̀ɖáyé#ɛ́. 21Ó ɖi, Ɔ̀ɖáyé òŋu ká‐ɛ̀ ní wà ɖáàmí le àwa-ŋɛ́ méèdzì ńnɔ́-kíbí Kírísítò tse ɔ̀kã̀ntso bá wa si#ɛ́. Òŋu#ɛ́ ké ní tsã̀ wá, 22tsí ɖíìsèdzè-wa gbo#ɛ́. Ó mú Mímí‐ɛ̀ gbo, tsí ń si ńnɔ́-wa. Tsí Mímí‐ɛ̀#ɛ́ ní dzɛ́ akpálà-àtsɛ̃̀tsɛ̃̀-iŋɛ́-ire yèé ŋa ó kpaɖí si fú wa#á.

23Èmi òŋu, Ɔ̀ɖáyé wà rí mi. Ó ma inɔ́-mi. Ǹ kò wò ní n kã odzudzu fú ŋɛ́, ńnɛ̀ ní ǹ kò sɛ̃̀ gbà wá ńKòríntì ró#ɛ́. 24Tsí kò tsi ní àa wà mú ŋɛ́ ńkpá ní iŋɛ́ yèé bɛ́ ní ó wà ní e gbà gbɔ́#ɛ́ ni, iŋɛ́ yèé tse#ɛ́, àkaralé-ŋɛ́ ta ogùgù múlɛ̀ si kpãŋu. Ó ɖi fee, àa wà ńtsɛ́ tsítse si fú ŋɛ́, àtsùgbée ayè kó wà tɛ́ ŋɛ́.

Currently Selected:

2 Kòríntì ŋa 1: ngl

Highlight

Copy