1 Kòríntì ŋa 16

Kpɔ́lù wà fɔ̀ afɔ̀-ɔ̀yà yèé à nákó tse lɔ fú olí-Yèésù ŋa ńYèrúsàlɛ́mì#ɛ́

1Báàyí#ɛ́, ɔ̀yà-owó yèé ǹ kperí fú ŋɛ́ ní ɛ̀ŋɛ kó tse, tsí ká kpérí‐ɛ̀ lɔ fú ɛnɛ yèé ŋa dzɛ́ ti Ɔ̀ɖáyé ńYèrúsàlɛ́mì#ɛ́ fee, ǹ ɖíre kíbí ɛgbɛ́-Kírísítò yèé ŋa wà nérè-Gàlátì#ɛ́ nákó tseé gbà#á fú ŋa. Ɛ̀ŋɛ gbo, è fa ɛkpa-ŋa. 2Nɔ́dzɔ́ɔ̀sɛ̃̀ kã̀kã̀#á, owó yèé kṹnukṹ rí#ɛ́, kó wà nya ìmarũ-kã̀ ńnɛ̀ si níìkã̀ si ńɖɔ-ara‐ɛ̀ si. Ńbɛ̀ɛ́, kàkó bèrè ní e ɖóro si, tsí wà wò ní n wá tã́ná e kpérí owó ŋa#á. 3Ńǹwèrè nyɛ̀ŋɛ̀#ɛ́, è nákó ti tsã ɔ̀nyà kã̀ŋa si, tsí bí ǹ wáa tó ńɖi-ŋɛ́ ná, màa tse ìwé-kã̀, tsí ìwé#ɛ́ nákó nya àyídzá ní à bɛ̀ ŋá làkóò ni. Tsí à nákó kɛ́ ɔ̀yà yèé è tse#ɛ́ lɔ fú olí-Yèésù ŋa ńYèrúsàlɛ́mì. 4Tsí bí ó sì bèrè ní èmi gbo n lɔ ná, èmi-ŋa méèdzì, àa kó dzɔ́ lɔ.

Kpɔ́lù wà fɔ̀ afɔ̀-ètò‐ɛ̀ ŋa

5Màa gbà ńlɛ̀-Màkɛ̀ɖónìyà tã́ná n wáa tó ńɖi-ŋɛ́. Ɛ̃ɛ̃, ńbɛ̀ ní màa gbà#á. 6Bí ǹ wá, màa gbé ńɖi-ŋɛ́ fú ìwèrè-oɖé-kã̀, tsí bóyá gìɖì#ɛ́, màa gbé títí ìwèrè-òdzò-awu nákó wáa lɔ. Ńbɛ̀ɛ́, è nákó nyáa mɔ́wɔ́ gbè fú mi, tsí ńbí ǹ wáa làkóò#ɛ́, n nyáa rɛ̃ ɔ̀nà#á káà tó bɛ̀. 7Iŋɛ́ yèé tse#ɛ́, ǹ kò wò ní kó dzɛ́ ní n tó ǹ kò sɔ̀ gé, tsí n sɛ̃̀ nyí kpaɖà. Ó ɖi, bí Ɔlá-wa dzɛ́, màa wáa gbé ńɖi-ŋɛ́ fú ìwèrè-oɖé-kã̀. 8Màa gbé ńǹlú-Èfɛ́sì ńbíbɛ́ si títí fú ɔɖɔ̃́-Dzídzɛ titɔ̃†. 9Iŋɛ́ yèé tse#ɛ́, ɔ̀nà-kã̀ tsí si fú mi ńbíbɛ́ tó bɛ́ɛ̀ fú itsɛ́ yèé ǹ wà tse#ɛ́. Ó ɖi, ɔ̀tɛ̀ yèé wà nyà mí kãdzú ŋa#á sì ɖɛ̀rɛ̀.

10Bí Tìmɔ̀té wáa tó ńɖi-ŋɛ́#ɛ́, è náa gbàá rere, àtsùgbée kó máa kí sídzó sídzó. Ó wà tsitsɛ́-Ɔlá-wa kíbí èmi gbo ǹ wà tseé#ɛ́ ni. 11Ɔ̀nyà-kã̀ kpókpó kó máa múu kpe kí ŋa ńnɛ̀ɛ́. È náa mɔ́wɔ́ gbè fúu, tsí kó rɛ̃ ɔ̀nà sɛ̃̀ bɔ̀ wá ńɖɔ̀-mi ńtútùúrɔ̀. Ǹ wà ɖóro ɖèé òŋu enìkéèdzì‐ɛ̀ ŋa.

12Ìnàbí-wa Àkpòlósì òŋu#ɛ́, ǹ ɖáàmí lée kpíkpɔ̀ ní kó wá ńɖi-ŋɛ́ òŋu ìnàbí-àtíbɔ̀ ŋa. Ó ɖi, kò wùú ní kó wá báàyí. Bí ó rí ayè gé ná, nákó wá.

Kpɔ́lù wà ɖáàmí le ŋá, tsí wà kí ŋa nókũ-ìtã̀ntã́ ŋa gbo

13Ó ɖi, è náa gbé nódzúfò si, tsí àkaralé-ŋɛ́ gbo kó ta ogùgù múlɛ̀ kpó kpãŋu si. È náa wà tse akɔ gbo, tsí e le gbóŋúgbóŋú nɔ́Ɔ̀ɖáyé sísɛ̃̀ gbo si. 14Tsí iŋɛ́ ɔ̀kã̀lɔ́ɔ̀kã̀ kpó yèé è nákó wà tse#ɛ́, è tseé òŋu àmúɖɔ̃̀.

15Ìnàbí-mi ŋa, ǹ wà bere iŋɛ́-kã̀ ti ńɖi-ŋɛ́ ró. È ma Sètèfánà#16:15 È káà kã Ìwé-àtsɛ̃̀tsɛ̃̀ fú ɛnɛ-Kòríntì ŋa 1:16. òŋu ɛnɛ-kpáfɛ‐ɛ̀ ŋa méèdzì nɔ̀! Àŋa ní tsɛ̃̀tsɛ̃̀ gba Kírísítò gbɔ́ kélékélé nérè-Àkáyà, tsí mú ara-ŋa bɔ̀ ńtsɛ́ fú ɛnɛ yèé ŋa dzɛ́ ti Ɔ̀ɖáyé gbo#ɛ́. 16Ǹ wà wò ní e tɛ ara-ŋɛ́ bɔlɛ̀ fú ɔ̀nyà-ìrɔ́-nyɛ̀ŋɛ̀ ŋa òŋu ɔ̀nyà kpó yèé wà múgírí, tsí wà tsitsɛ́ bá ŋa gbo#ɛ́. 17Ó tɛ́ mi náyè gbo ní Sètèfánà òŋu Fɔ̀tùnátù má nára-Akayikú gbo, à wá, tsí wáa kpalɛ̀wò mí. Iŋɛ́ yèé tse#ɛ́, à kparɔ arũ-ŋɛ́ ńɖɔ̀-mi. 18Ó ɖi, kíbí à wá bɛ́ɛ̀#ɛ́, à mú inɔ́-mi tù ńǹrɔ́-kíbí à mú inɔ́ tiŋɛ́ gbo tù#ɛ́. Ɔ̀nyà-ìrɔ́ nyɛ̀ŋɛ̀ ŋa#á, ó wà ní e wà bu ìɖì si fú ŋa.

19Ɛnɛ yèé wà nɛ́gbɛ́-Kírísítò ŋa ńlɛ̀-Àsíyà#á wà kí ŋɛ́. Àkílà òŋu aya‐ɛ̀ Kpìsílà méèdzì gbo má nára-ɛgbɛ́-Kírísítò yèé náa kpàɖé ńlé-ŋa#á gbo, à wà gbà ńǹtá-Ɔlá-wa, tsí wà kí ŋɛ́ tó bɛ́ɛ̀. 20Ìnàbí ŋa, olí-Yèésù yèé ŋa gbo wà bí kpó#ɛ́ wà kí ŋɛ́. È náa kí ara-ŋɛ́ ŋa nókũ-àmúɖɔ̃̀ nɛ́kpa nɛ́kpa kpó. 21Èmi, Kpɔ́lù, ǹ wà kí ŋɛ́ kpó. Okũ yèé bɛ́#ɛ́, èmi ká-mi Kpɔ́lù ní mú ɔwɔ́-ara-mi, tsí ń kɔɔ́#ɛ́. 22Bí ɔ̀nyà-kã̀ kò nɛ́ àmúɖɔ̃̀ fú Ɔlá-wa, èhée fú ɛnɛ nyɛ̀ŋɛ̀. Ɔlá-wa bàa!#16:22 “Ɔlá-wa bàa” yèé à fɔ̀ si ńbíbɛ́#ɛ́, Kpɔ́lù kɔɔ́ ńǹlú-ɔma-Ìyúɖà ŋa ní: “Màrànátà.” 23Yèésù Ɔlá-wa kó tse ore-ɔ̀fɛ́ fú ŋɛ́. 24Fee, ǹ nɛ́ àmúɖɔ̃̀ fú ɛ̀ŋɛ kpó yèé Yèésù Kírísítò tse ɔ̀kã̀ntso bá si#ɛ́.

Currently Selected:

1 Kòríntì ŋa 16: ngl

Highlight

Copy