Mako 8
8
(Mat 15:32-39)
1Mu manda yalya iumba nalyuze likulu cuze liiza kunoli, nupya litakweti cakulya. Yesu aama alondezi yakwe kunoli ayanena ati, 2“Naya na mizu pa antu yaa, pano yali nani manda yatatu, lelo yatakweti cakuti yalye. 3Ndi naleka yapita kumwao kwaula kulya cimwi yamaongoka mu nzila, pano yamwi yafumile kutali.”
4Alondezi yakwe nao yamuzya yati, “Uzye aukwi mu lwanga kwene muu kuno umuntu angazana vyakulya vyakuti angimula antu avule ndi yaa?”
5Yesu ayauzya ati, “Uzye mukweti mikate inga?”
Nao yaasuka yati, “Tukweti mikate cinimbali.”
6Alino Yesu apeela ilamulo kwi umba kuti ikale pansi. Atoola mikate cinimbali, nga pacisila ca kutaizya kuli Leza, aimokoola, apeela alondezi yakwe kuti yankanye kwi umba. Na alondezi yankanya antu.
7Nupya yakweti nu tuswi tunono. Yesu ataizya, alino anena alondezi yakwe kuti yankanye kwi umba.
8Antu yonsi yalya iikuta. Lyene pacisila alondezi yasola mvungwa izyasile yazuzya imise cinimbali. 9Antu ali penepo yali manye mazimbi yani. 10Yesu yapakasyanya na antu yapita. Lyene apatama mu wato na alondezi yakwe, nga yaya ku mpanga ya Dalamanuta.
Afaliseo yalonda cilangililo ca cinjelengwe
(Mat 16:1-4; Luk 11:16, 29)
11 #
Mat 12:38; Luk 11:16 Afaliseo yamwi iiza kuli Yesu yatandika kupazyanya nawe. Yalondanga kumwezya mu mazwi, caleka yamuzya kuti acite cilangililo ca cinjelengwe cakusininkizya vino wene watumwa na Leza. 12#Mat 12:39; Luk 11:29 Lelo Yesu aisya umwenzo avwanga ati, “Uzye pacani cino antu amu mukulo uu yakalonda cilangililo ca cinjelengwe? Cumi namunena, kusi cilangililo ca cinjelengwe cimwi cino cingacitwa ku antu yaa.”
13Lyene ayasya, nupya apatama mu wato, alambila ku mbalama yuze yakwe yemba.
Citutumusi ca Afaliseo na Helodi
(Mat 16:5-12)
14Alondezi ilile kusenda mikate. Lelo yali sile nu mukate onga mu wato. 15#Luk 12:1 Yesu ayasoka ati, “Cenjelini nupya muye apempukile ku citutumusi ca Afaliseo na Helodi.” 16Nao yalanzyanya aisikulu yati, “Akuvwanga cii pano tusi ni mikate”
17Yesu wamanyile cino yalanzyanyanga, caleka ayauzya ati, “Uzye pacani mukulanzyanya pamulandu wakuti musi na mukate? Uzye mutamanyile nanti ukwiluka? Uzye na ndakai kwene mutali mumanye? 18#Yel 5:21; Eze 12:2; Mk 4:12 Mwakwata amanso, uzye musyalola? Mwakwata amatwi, uzye musyauvwa? Uzye musyakwiusya 19lino namokoozile mikate isano nu kwimula antu mazimbi yasano? Uzye mwasozile muzuzya mise inga ya mvungwa?”
Nao yaasuka yati, “Ikumi na iili.”
20Nupya Yesu ayauzya ati, “Lino namokoozile mikate cinimbali nu kwimula antu mazimbi yani mwasozile muzuzya mise inga ya mvungwa?”
Nao yaasuka yati, “Cinimbali.”
21Nawe ayauzya ati, “Uzye nali kwene mutali mumanye?”
Yesu wapozya impafu ku Betisaida
22Lyene lino iiza ku Betisaida, antu yamwi yaleta umuntu impafu kuli Yesu yamulenga kuti amulemelele. 23Yesu alema umuntu pi kasa amufumizya kunzi ya muzi. Amuswila mati pa manso, aika na makasa yakwe panoli alino amuuzya ati, “Uzye ukulola cimwi?”
24Nawe ainuka alola alino ati, “Ee, nalola antu, lelo yakuloleka wa miti ikupita.”
25Nupya Yesu amulemelela pa manso. Insita iyo kwene umuntu alolekesya, na manso yakwe yapola, lyene alola vyonsi ningo. 26Yesu nawe amunena ati, “Pitanga ukwako, utaswilila mwa muzi uu.”
Petulo waumbula ukuti Yesu ali Katuula Uwalavilwe
(Mat 16:13-20; Luk 9:18-21)
27Alino Yesu na alondezi yakwe yapita yaya ku mizi yapalime ku Kesaliya Filipi. Mu nzila ayauzya ati, “Nenini, uzye antu yakati nene weni?”
28 #
Mk 6:14; Luk 9:7 Nao yaasuka yati, “Yamwi yakati wewe Yoane Kawatizya. Yamwi yakati wewe Eliya. Alino yamwi nao yakati wewe umwi wamuli yakasema.”
29 #
Yoa 6:68
Yesu nawe ayauzya ati, “Uzye mwemo mukati nene weni?” Petulo nawe aasuka ati, “Wewe Katuula uwalavilwe.”
30Alino Yesu ayapeela ilamulo ati, “Mutanena nanti umwi pali nene.”
Yesu wasowela ucuzi, imfwa nu kuzyukuka kwakwe
(Mat 16:21-28; Luk 9:22-27)
31Alino Yesu atandika kusambilizya alondezi yakwe ati, “Mwana wa Muntu ali nu kucula cuze, nupya aikolo na yasimapepo akalamba, na yakasambilizya ya Masunde yalamukana nu kumukoma, lelo pa wanda uwalenga yatatu alazyukuka nu kuya nu umi.” 32Avwanga paswe kunoyali. Caleka Petulo amusenda pa mbali atandika kumukalipila.
33Lelo Yesu aseleuka, alola pa alondezi yakwe, asinkola Petulo ati, “Fuma pano, Ciwa! Pano amelenganyo yako yatafumile kuli Leza, lelo auntunze.”
34 #
Mat 10:38; Luk 14:27 Lyene Yesu aama iumba na alondezi yakwe kunoli. Alino ayanena ati, “Muntu umwi ndi akasi kundondela, aikanye, aisendele ulupanda nga andondele. 35#Mat 10:39; Luk 17:33; Yoa 12:25 Pano wino wensi akalonda kutuula umi wakwe, wene alauponzya. Lelo wino wensi amaponzya umi wakwe pamulandu wi Landwe Lisuma wene alautuula. 36Uzye umuntu angakwata muzano cii ndi walonka ivya mu nsi vyonsi, lelo waponzya umi wakwe? Awe kusi cimwi! 37Uzye kuli cimwi cino umuntu angalipa kuti umi wakwe umuwelele? 38Muntu ndi waya ni nsonyi pali nene na pa mazwi yane mu mukulo uu uwa uzelele nu wankota, Mwana wa Muntu alaya ni nsonyi panoli lino aliza pali pamwi na angeli yamuzilo, mu lulumbi lwakwe Isi.”
Currently Selected:
Mako 8: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
