Mako 7
7
(Mat 15:1-9)
1Afaliseo na yakasambilizya ya Masunde yamwi afumile ku Yelusalemu iiza yakongana kuli Yesu. 2Yalola kuti alondezi yakwe yamwi yalyanga ni minwe ya mifitalila. 3(Ayuda yonsi pamwi na Afaliseo yatangalya suka yafulala ku minwe kulingana nu lutambi lwa vikolwe vyao. 4Lino yafuma kwi sokoni yatangalya suka yafulala. Yalondelanga intambi na zyuze izingi zino yapokelile kufuma ku vikolwe, wakwe vino yangafula ingako, inyungu zya mukuwa nga ni misazi.)
5Alino Afaliseo na yakasambilizya ya Masunde yuzya Yesu yati, “Uzye pacani cino alondezi yako yasyayela intambi zino vikolwe vitu vyatusilile, yakalya ni minwe ya mifitalila?”
6 #
Eza 29:13
Yesu nawe ayaasuka ati, “Ezaya wali ningo lino wasemile pali mwemwe! Mwe yasomvi, wakwe vino walemvile ati,
‘Leza ati, antu yaa, yakancindika sile mu mazwi yao.
Lelo melenganyo yao yali kutali kufuma kunondi.
7 #
Eza 29:13
Nanti yakumpepa icasilesile,
pano yakasambilizya masunde ya untunze kwati ali
masunde yane!’”
8“Mwasya masunde yakwe Leza nu kusunga intambi zya untunze.”
9Nupya Yesu atwalilila kuyanena ati, “Mwacenjela mwakukanila masunde yakwe Leza nu kusakamala kusunga intambi zinu. 10#Kuf 20:12; 21:17; Levi 20:9; Malg 5:16 Pano Mose wakonkomizye ati, ‘Cindika so na nyoko. Wino wensi uwatuka isi nanti nyina, alinzile ukufwa.’ 11Lelo mwemo mukasambilizya ukuti umuntu ndi akweti cimwi cino angapeela kwazwa isi nanti nyina, lelo ndi wati, ‘Cii a Kobani’ (icikusenula ukuti, cino capeelwa kuli Leza), 12wene atangapeelwa mulandu pa kuntazwa isi nanti nyina. 13Mu nzila ii mukalenga antu kusula mazwi yakwe Leza, pa kulondela intambi zinu. Akuno vili vintu navyuze ivili wakwe vii vino mukacita.”
Ivintu ivikakowezya umuntu
(Mat 15:10-20)
14Lyene Yesu aama iumba kunoli alinena ati, “Uvwini kunondi, mwensi, nu kumanya. 15Kutaya cikaingila mu muntu kufuma kunzi cingamukowezya. [16Suka cikafuma mu muntu icingakowezya muntu.]”
17Lino wasya iumba wingila mu ng'anda, alondezi yakwe yamuzya kuti alondolole vino mulumbe uu ukusenula. 18Yesu ayauzya ati, “Uzye namwe kwene mutilwike! Uzye mutamanyile vino kusi cintu icikafuma kunzi cino mu cumi cingamukowezya? 19Pano cisiingila mu mwenzo wakwe lelo munda yakwe alino pacisila cikafumila kunzi.” (Mukuvwanga cii Yesu walanzile ukuti vilyo vyonsi vilinzile kuliwa.)
20Atwalilila nu kuvwanga ati, “Icintu cino cikafuma mu mwenzo wa muntu icingamukowezya. 21Pano kufuma mukasi, mu mwenzo wa muntu, mukafuma amelenganyo yankota akamutungulula ku kucita ivya winyi, uwivi, kukoma, 22kulongozya, lunkumbwa, vintu vyonsi viipe, intumpu, ukowezi, uzuwa, kutumpwila, vilumba, nu utumpe. 23Amelenganyo ya yonsi a nkota yakafuma mu mwenzo wa muntu nu kumukowezya.”
Utailo wa mwanaci umwina Kenani
(Mat 15:21-28)
24Lyene Yesu afuma ku cifulo cici aya ku mpanga iyaya pipi nu musumba wa Tuli. Aingila mu ng'anda, nupya atalondanga kuti umwi amanye vino wene ali kuku, lelo antu yene yacimanyile. 25Umwanaci wino uwali nu mwana kaci, uwali nu mupasi wankota munoli, uvwile ilandwe lya pali Yesu, nga aiiza, afukama pa ngazo zyakwe. 26Umwanaci wali u Mugiliki, uwavyalilwe mu mpanga ya Fonisya mu Silya. Apapatila Yesu kuti afumye mupasi wankota mu mwana wakwe kaci. 27Lelo Yesu nawe amunena ati, “Leka ana yatale ikute. Cisi cisuma kutoola vyakulya vya ana nu kusumbila yasimbwa.”
28Umwanaci avwanga ati, “Endi Mwene, Na yasimbwa kwene ali mwisika lya cipango yakalya vilakasi vya vyakulya vya ana!”
29Alino Yesu nawe amunena ati, “Apa kwaasuka kwako, swilila ku ng'anda, umazana mupasi wankota wati ufuma mu mwana wako!”
30Lyene apita ku ng'anda aya azana mwana aizi pa musanzi, nu mu cumi mupasi wankota ala wati ufumamo.
Yesu wapozya cipuuli
31Yesu afuma ku mpanga yapalamana na Tuli nu kuya pita mu Sidoni ala akuya kuli yemba wa Galile, kulepula mpanga pakasi ka misumba ikumi. 32Lyene yaleta kunoli umuntu uwali a cipuuli nupya katitisya, yalenga Yesu kuti amwikepo makasa yakwe. 33Yesu amusenda amupaatula kufuma kwi umba, aika minwe yakwe mu matwi yakwe cipuuli, aswa mati, nu kukumya ululimi lwa muntu. 34Lyene Yesu alingamila kwiyulu, aisya umwenzo, amuvwanzya ati, “Efata,” kuli kuti, “Yulika!”
35Lilyo kwene umuntu atandika kuvwa, nu lulimi lwakwe lusapulwa. 36Lyene Yesu apeela ilamulo ku antu kuti yatanena umuntu nanti umwi. Lelo lino wayapeela ilamulo lii kuti yatanena umwi, yene yatwalilila kunena antu. 37Na yonsi acuvwile yazunguka cuze yati, “Akucita vintu vyonsi ningo! Akulenga yacipuuli yauvwa na yaciulu yavwanga!”
Yesu wimula antu kuluta pa mazimbi yani
Currently Selected:
Mako 7: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
