Mako 10
10
(Mat 19:1-12; Luk 16:18)
1Lyene Yesu afuma ku Kapenaumu, aya ku muputule wa mpanga ya Yudeya alamba luzi lwa Yodani. Nupya maumba iiza kunoli, nawe ayasambilizya, mwaelile mwata wakwe.
2Lyene Afaliseo yamwi iiza kunoli yamwezya yati, “Uzye cilingine na Masunde kuti umuntu angata umuci wakwe?”
3Yesu nawe aasuka ati, “Uzye isunde ci lino Mose wamupile?”
4 #
Malg 24:1; Mat 5:31 Nao yaasuka yati, “Mose wapile ulusa ku monsi ulwakulemba kalata wakutaana nu muci wakwe.”
5Yesu nawe aasuka ati, “Mose wamulembile isunde lii pamulandu wakukoma kwa myenzo inu. 6#Uta 1:27; 5:2 Lelo pa utandiko wa uumbo, Leza wayaumvile umonsi nu mwanaci. 7#Uta 2:24 ‘Pamulandu ukwene, umonsi alasya isi na nyina nu kuilundanya ku muci wakwe, 8lyene oili yalaya umwili onga. Acino yatacili yaili, lelo umwili onga.’ 9Caleka kusi umuntu angalekanya cino Leza watalundanya.”
10Lino yaswilila mu ng'anda, alondezi yuzya Yesu pamulandu kwene uu. 11#Mat 5:32; 1Kol 7:10 Nawe aasuka ati, “Muntu wensi uwata umuci wakwe nu kutwala mwanaci muze ala walongozya. 12#Mat 5:32; 1Kol 7:10 Nanti mwanaci kwene ndi wafuma kuli iya nu kuya twalwa ku monsi muze ala walongozya.”
Yesu wapolelela ana anono
(Mat 19:13-15; Luk 18:15-17)
13Antu yamwi yaleta ana anono kuli Yesu kuti aiikepo makasa yakwe, lelo alondezi yayakalipila. 14Lino Yesu wacuvwa, akalipa, anena alondezi yakwe ati, “Lekini ana anono iize kunondi, mutayalesya, pano Uwene wakwe Leza uwakwe yao ali ndi yaa. 15#Mat 18:3 Cumi namunena nati, wino wensi atalapokelela Uwene wakwe Leza wa mwana munono, wene atalingilamo”
16Alino atoola ana ayafukatila, aika makasa yakwe panoyali ayapolelela.
Muntu mukama
(Mat 19:16-30; Luk 18:18-30)
17Lino Yesu watandika kupita, umuntu asimula kunoli, aya afukama amuuzya ati, “Kasambilizya musuma, uzye icani cino ndinzile kucita kuti mpokelele umi wape?”
18Yesu amwaasuka ati, “Uzye pacani wangama musuma? Kusi nanti umwi musuma suka Leza wenga. 19#Kuf 20:12; Malg 5:16 Wamanya masunde akati, Utakoma, utalongozya, utaiya, utatumpwila umuzo, utacenjezya, wacindika so na nyoko.”
20Muntu aasuka Yesu ati, “Kasambilizya, nkayela masunde yaa yonsi kufuma ku ulumendo wane.”
21Yesu amulolekesya, amutemwa, nga amunena ati, “Kwasyala cintu conga cino uulizya. Yanga kakazye vyonsi vino wakwata ukapeele ni mpiya zino ulazana ku apina. Lyene ulaya ni vyuma mwiyulu, nga wize undondele.” 22Lino umuntu uvwa cii, aya nu ulanda nga apita akungumile, pano wali u mukama cuze.
23Yesu acelecensya manso nga anena alondezi yakwe ati, “Catalila akama kwingila mu Wene wakwe Leza!”
24Alondezi yazunguka pa mazwi yakwe, lelo Yesu avwanga nupya ati, “Yana mwe, catala kwingila mu Wene wakwe Leza! 25Cangupalila ingamila kupuzya mwi linso lya nsindano kuluta mukama kwingila mu Wene wakwe Leza.”
26Pali cii alondezi yazunguka cuze yavwanzyanya yati, “Uzye lyene, aweni angatuulwa?”
27Yesu ayalolekesya ayanena ati, “Ku antu citangacitika, lelo kuli Leza cingacitika, pano vintu vyonsi Leza wene angacita.”
28Petulo avwanga ati, “Lola! Swemo twasya vyonsi nu kukulondela.”
29Yesu nawe ayanena ati, “Ee, cumi namunena vino, kusi nanti umuntu wenga uwasya ing'anda yakwe, aina aonsi, yakaci yakwe, nyina, isi, ana nanti vyalo pamulandu wane nu wi Landwe Lisuma, 30atangapokelela ivingi kuluta mu nsita kwene ya mukulo uu. Alapokelela vintu vii kuluta, mang'anda, aina yakwe, yakaci yakwe, ya nyina, ana ni vyalo, nga nu kuzunyiwa kwene, nga nu umi wapee mu mukulo uuliza. 31#Mat 20:16; Luk 13:30 Lelo antu aingi ali ankolelo ndakai yalaya acisila, nga na ingi acisila yalaya ankolelo.”
Yesu wasowela iila lwakwe citatu pa mfwa yakwe
(Mat 20:17-19; Luk 18:31-34)
32Lino yacili pa lwendo lwa kuya ku Yelusalemu, Yesu wali pa nkolelo ya alondezi, yano apeziwe mano. Antu amulondile yuvwa intete. Nupya kwene Yesu asenda alondezi yakwe ikumi na yaili pa mbali atandika kuyanena vintu vino vili nu kumucitikila. 33Ayanena ati, “Uvwini, tukuya ku Yelusalemu kuno Mwana wa Muntu alakoopelwa kuli yasimapepo akalamba na kuli yakasambilizya ya Masunde, nu kumuvunuka kuti afwe. Alakoopelwa ku Akulukuwa. 34Yalamusaalula, yalamuswila mati, yalamuma ivikoti, nu kumukoma, lelo pa wanda wakulenga yatatu alazyukuka aye umumi.”
Yakobo na Yoane yalenga
(Mat 20:20-28)
35Lyene Yakobo na Yoane, ana yakwe Zebedi, iiza kuli Yesu, yamunena yati, “Kasambilizya, tukulenga kuti utucitileko cintu cimwi.”
36Yesu ayauzya ati, “Uzye icani cino mukulonda kuti mucitile?”
37Nao yaasuka yati, “Lino ulikala pa cilimba cako ca wene ica lulumbi, tukulonda kuti tukikale pali pamwi nawe, wenga kwi kasa lilunji nu muze kwi mani lyako.”
38 #
Luk 12:50
Lelo Yesu ayanena ati, “Mutamanyile cino mukulenga. Uzye mungamwa mu lwako lwa ucuzi luno indi nu kumwelamo? Uzye mungawatiziwa umu nzila ino ndinzile kuwatiziwilwamo?”
39Nao yaasuka yati, “Tungacita.”
Yesu ayanena ati, “Icacumi mungamwa mu lwako luno indi nu kumwelamo nu kuwatiziwa umu nzila ino indi nu kuwatiziwilamo. 40Lelo ntakweti nsambu yakusolola wino angikala kwi kasa lilunji nanti kwi mani lyane. Leza alapeela vifulo kuli yano wateyanyizizya.”
41Lino alondezi yauze ikumi yacuvwa, yasokela Yakobo na Yoane. 42Caleka Yesu aama yonsi pali pamwi ayanena ati, “Mwamanya ukuti yakateeka ya antu atataila Leza yakwata maka pa antu yao, nga ni ntunguluzi zyao nazyo zyakwata uwangalizi. 43Lelo cisi vivyo muli mwemwe. Wino wensi wamuli mwemwe akulonda kuya mukulu, alinzile kuya muomvi wa yauze, 44#Mat 23:11; Mk 9:35; Luk 22:26 na wino wensi wamuli mwemwe akulonda kuya intunguluzi, nawe alinzile kuya muzya pali onsi. 45Pano Mwana wa Muntu atizile kuti atumikilwe, lelo kuti atumikile yauze nu kupeela umi wakwe kuti akulule antu aingi.”
Yesu wapozya Batimeo wino uwali Impafu
(Mat 20:29-34; Luk 18:35-43)
46Yesu wizile ku Yeliko pamwi na alondezi. Lyene lino wafumanga ku Yeliko na alondezi yakwe ni iumba likulu, impafu kalenga, zina lyakwe a Batimeo mwana Timeo, watenzi pa mbali ya museo. 47Lino uuvwa ukuti a Yesu uwaku Nazaleti, atandika kulaizya ati, “Yesu! Mwana wakwe Davidi! Uye na mizu kunondi!”
48Antu aingi yamukalipila yamunena kuti amyalale. Lyene alino asanzika izwi nu kuluta ati, “Mwana wakwe Davidi! Uye na mizu kunondi!”
49Yesu aimilila avwanga ati, “Mwamini.”
Caleka yama impafu yati, “Teku mwenzo! Katuka, akukwama.” 50Nawe asumba mwingila wakwe, avwandamuka, aiiza kuli Yesu.
51Yesu amuuzya ati, “Uzye ukulonda kuti nkucitile cani?” Impafu imwasuka iti, “Kasambilizya, nkulonda kuti nalola.” 52Yesu nawe amunena ati, “Pitanga, utailo wako wakupozya.” Lilyo kwene atandika kulola nu kulondela Yesu mu museo.
Yesu wingila nu ucindami mu Yelusalemu
Currently Selected:
Mako 10: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
