Mako 11
11
(Mat 21:1-11; Luk 19:28-40; Yoa 12:12-19)
1Lino yapalama ku Yelusalemu, iiza ku misumba ya Betifage na Betaniya, iyali pa Mwamba wa Olivi. Yesu atuma alondezi yakwe yaili 2ayanena ati, “Yangini ku muzi ulya uuli inkolelo inu. Lyene lino mwafika kuku, lilyo kwene mumaya mukazane mwana punda anyefilwe, wino umuntu atatala wakwelapo. Mumusapule mumulete kuno. 3Muntu umwi ndi wamuzya wati, ‘Uzye pacani mukucita cico?’ Mumunene muti, Mwene akumulonda, nupya amamuwezya zuwa”
4Lyene yapita yaya yazana mwana punda anyefilwe lwa mu museo pa mulyango wa ng'anda. Lino yasapulanga mwana punda, 5yamwi aimi pipi yuzya yati, “Uzye pacani mukusapwila mwana punda?”
6Nao yaasuka wakwe vino Yesu wayanenyile, na ainipamba yayaleka yapita. 7Lino yatwala mwana punda kuli Yesu, yanzapo ni nsalu zyao, nga akwelapo. 8Antu aingi yanza insalu zyao mu museo, alino yamwi yatema misambo ya miti mu vyalo nu kwanza mu museo. 9#Mas 118:25 Antu ali nkolelo nga na alondelile cisila yonsi pamwi yasanzika mazwi yao yati,
“Mucinzi upelwe kuli Leza!
Walongo awiyo akwiza mwi zina lya Mwene!
10Walongo Uwene ukwiza, Uwene wakwe tata Davidi!
Mucinzi upelwe kuli Leza!”
11Yesu aingila mu Yelusalemu, nga aya mu Ng'anda ikulu yakwe Leza, alino acelecensya konsi konsi. Lelo pano yali amanguzi, apita aya ku Betaniya pamwi na alondezi yakwe ikumi na yaili.
Yesu watipwila musamvu
(Mat 21:18-19)
12Uca katondo, lino yafumanga ku Betaniya, Yesu auvwa inzala. 13Lyene lino walola musamvu ulembe katalamukila, nga ayako kuti akalole ndi angazanako masamvu. Lelo lino wafikapo, atazanyileko vizao suka sile amafwa yatupu, pano itali nsita ya kuseeka kwa masamvu. 14Yesu atipwila musamvu ati, “Kusi umuntu alalyako vizao kufuma kunuli nupya!”
Na alondezi yakwe yala yakuuvwa.
Yesu wazinga aculuzi mu Ng'anda Ikulu yakwe Leza
(Mat 21:12-17; Luk 19:45-48; Yoa 2:13-22)
15Lino yafisile mu Yelusalemu, Yesu aingila mu Ng'anda ikulu yakwe Leza atandika kuzinga aculuzi na akauzyanyanga vintu vyao. Lyene apenola vipango vyakwe yakakauzya ya mpiya ni vilimba vyakwe yano akazyanga inkunda, 16nga atazumilizye nanti umwi kusenda cintu mu musolo wa Ng'anda ikulu yakwe Leza. 17#Eza 56:7; Yel 7:11 Alino ayasambilizya ati, “Uzye citalembwa mu malembelo ukuti, ‘Ing'anda yane ilaamwa ing'anda ya mapepo yakupepelamo amu nko zyonsi?’ Lelo mwemo mwaicita ininga ya iivi!”
18Yasimapepo akalamba na yakasambilizya ya Masunde, lino yuvwa cii, yatandika kulonda inzila yakuti yakomelemo Yesu. Lelo yamoopanga, pano iumba lyonsi lyazungwike pa usambilizyo wakwe.
19Lino kwaya manguzi Yesu na alondezi yakwe yafuma mu musumba.
Isambililo lya pa musamvu
(Mat 21:20-22)
20Akatondo, lino yakupita mu museo, yalola musamvu wati uma nu ku misisi. 21Petulo aiusya icacitike nga anena Yesu ati, “Kasambilizya, lola musamvu uno watipwizile wati uma!”
22Yesu nawe ati, “Muye nu utailo muli Leza. 23#Mat 17:20; 1Kol 13:2 Cumi namunena nati wino wensi anganena umwamba ati katuka uisumbe muli yemba ndi asyakutwisika mu mwenzo wakwe, lelo wataila ukuti cino watalanda cilacitika, cii cilacitwa ndi muno avwangile. 24Caleka namunena nati, lino mukupepa nu kulenga pali cimwi, mutaile ukuti mwati mupokelela, nga mulapelwa consi cino mwalenga. 25#Mat 6:14 Lino mwati mwapepa, mutala mwelela umuzo ali nu mulandu namwe pakuti, [26So uwa mwiyulu amwelele maifyo yano mwacita.]”
Yesu yamuzya kuno wafumya maka
(Mat 21:23-27; Luk 20:1-8)
27Yesu afika mu Yelusalemu. Lino akupita mu Ng'anda ikulu yakwe Leza, yasimapepo akalamba, na yakasambilizya ya Masunde, na aikolo iiza kunoli 28yamuzya yati, “Uzye maka cii yano ukweti akucita vintu vii? Uzye aweni uwakupeela maka kwene yaa?”
29Yesu nawe aasuka ati, “Namamuzya iuzyo lyonga sile, namwe ndi mwaasuka namamunena uwampela maka akucita vintu vii. 30Nenini, Uzye Yoane wafumizye kwi maka akuwatizya? Uzye akuli Leza nanti ku antu?”
31Nao yatandika kupazyanya aisikulu yati, “Uzye tumati uli? Ndi twati, ‘Wafumizye kuli Leza,’ nawe amati, ‘Uzye lyene, pacani mutataile Yoane?’ 32Nupya tutangati, ‘Wafumizye ku antu!’” (Yoofile antu pamulandu wakuti yonsi yasininkizya vino Yoane wali akasema.) 33Acino yaasuka Yesu yati, “Tutamanyile.”
Yesu ayanena ati, “Nani kwene ntakumunena uwampela maka akucita vintu vii.”
Mulumbe wa alimi ya calo ca matingi
Currently Selected:
Mako 11: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
