Luka 9
9
Yesu watuma alondezi yakwe ikumi na yaili
(Mat 10:5-15; Mk 6:7-13)
1Yesu aama alondezi ikumi na yaili pali pamwi, nga ayapeela maka akufumya mipasi yankota yonsi nu kupozya indwala. 2Lyene ayatuma ku kukosola vya Wene wakwe Leza nu kupozya alwale. 3#Luk 10:4; Mil 13:51 Alino ayanena ati, “Mutasenda icintu cimwi pa lwendo lwinu. Kusi kusenda intuwa, mufuko wakulengelamo vimwi, nanti mukate, nanti mpiya, nanti cakuzwala na cuze. 4Konsi kuno yalamupokelela mwikale mu ng'anda ili imwi kufika lino mulafuma mu musumba uwo. 5Konsi kuno antu yatalamuzengela, muce mufume mu musumba uwo, nu kukunta ulukungu lwaku ngazo zinu, kuya umboni kunoyali.”
6Alino alondezi yapita mu mizi, ala yakukosola Ilandwe Lisuma nu kupozya alwale konsi.
Helodi wasakamikwa
(Mat 14:1-12; Mk 6:14-29)
7 #
Mat 16:14; Mk 8:28; Luk 9:19 Lino Helodi kateeka uwamu Galile uvwa vintu vii vyonsi ivyacitikanga, cimupezya mano cuze. Pano antu yamwi yatangi Yoane Kawatizya watazyukuka kufuma ku afwe. 8Yauze nao ala yakuti, Eliya wataiza, nga nupya ala yakuti awenga wamuli yakasema yampiti watazyukuka kufuma ku afwe. 9Lelo Helodi ati, “Naputwile Yoane umutwe. Uzye lyene umuntu wii aweni, wino nkuvwilapo vintu vii?” Lyene wakasi kuti angalola Yesu.
Yesu wimula antu kuluta pa mazimbi yasano
(Mat 14:13-21; Mk 6:30-44; Yoa 6:1-14)
10Lino atumwa yawela yalandila Yesu vyonsi vino yaomvile. Lyene yapaatuka, ayasenda, yapita nawe ku musumba wa Betisaida. 11Lelo lino maumba yamanya cii, yamulondela. Nawe ayazengela, ayasambilizya pamulandu wa Wene wakwe Leza, nga apozya na yao alondanga kupoziwa.
12Lino ilanzi lyatemba, alondezi ikumi na yaili yapalama kunoli yamunena yati, “Nena antu yapite mu mitanda nu ku mizi izingulwike pakuti yalonde ivyakulya nu kwa kulala. Pano kuno uku matololo.”
13Lelo wene aasuka ati, “Mwemwe kwene yapelini vyakuti yalye.” Nao yati, “Tukweti sile mikate isano nga ni inswi ziili. Uzye ukulonda kuti tuye tukakalile iumba lii lyonsi ivyakulya?” 14Pali antu aonsi manye mazimbi yasano.
Yesu anena alondezi yakwe ati, “Nenini antu ikale pansi mu maumba maumba, cila umba manye makumi yasano.”
15Lyene alondezi yateka antu pansi. 16Alino Yesu atoola mikate isano ni inswi ziili, alingamila kwiyulu, ataizya kuli Leza. Lyene amokoola mikate, apeela alondezi yakwe kuti yankanye antu. 17Onsi yalile iikuta. Lyene alondezi yasola imvungwa izyasile, yazuzya imise ikumi na iili.
Petulo waumbula ukuti Yesu ali Katuula Uwalavilwe
(Mat 16:13-19; Mk 8:27-29)
18Insita imwi Yesu wapepanga ala ali sile na alondezi yakwe. Yesu ayauzya ati, “Uzye antu yakati nene weni?”
19 #
Mat 14:1; Mk 6:14; Luk 9:7 Nao yaasuka yati, “Yamwi yakati wewe Yoane Kawatizya. Yamwi yakati wewe Eliya. Alino yamwi nao yakati wewe umwi wamuli yakasema yampiti uwatazyukuka kufuma ku afwe.”
20 #
Yoa 6:68
Yesu nawe ayauzya ati, “Uzye mwemo, mukati nene weni?” Petulo nawe aasuka ati, “Wewe uli Katuula uwalavilwe.”
Yesu wasowela ucuzi, imfwa nu kuzyukuka kwakwe
(Mat 16:20-28; Mk 8:30; 9:1)
21Alino Yesu ayapeela ilamulo kuti yatanena umuntu nanti umwi pali cii. 22Caleka ayanena ati, “Mwana wa Muntu ali nu kucula cuze, nupya aikolo na yasimapepo akalamba, na yakasambilizya ya Masunde yalamukana nu kumukoma, lelo pa wanda wakulenga yatatu alazyukuka kufuma ku afwe.”
23 #
Mat 10:38; Luk 14:27 Lyene anena yonsi ati, “Muntu umwi ndi akasi kundondela, aikanye, aisendele ulupanda manda yonsi nga andondele. 24#Mat 10:39; Luk 7:33; Yoa 12:25 Pano wino wensi akalonda kutuula umi wakwe wene alauponzya. Lelo wino wensi amaponzya umi wakwe pamulandu wane, wene alautuula. 25Uzye umuntu alakwata muzano cii ndi walonka ivya mu nsi vyonsi, lelo waponzya umi wakwe nanti ukuulovya? Awe kusi cimwi! 26Muntu ndi wankana pamwi na mazwi yane, Mwana wa Muntu nawe alamukana lino aliiza mu lulumbi lwakwe, nu mu lulumbi lwakwe Isi nga nu lwa angeli yamuzilo. 27Cumi namunena vino, apano yali yamwi pano atalafwa kufika lino yalalola Uwene wakwe Leza.”
Yesu wakaoka pa mwamba
(Mat 17:1-13; Mk 9:2-8)
28 #
2Pet 1:17
Papisile umulungu kufuma lino Yesu walanzile vintu vii, Yesu asenda Petulo, Yoane na Yakobo yaya pa mwamba ku kupepa. 29Lino acili akupepa, cinso cakwe ciloleka ciiyele, ni vizwalo vyakwe viyengesa cuze viya vitiswe wa luswepo. 30Lilyo kwene antu yaili, Mose na Eliya, yavwazyanya nawe. 31Yene yalolike mu lulumbi ala yakulanda na Yesu pamulandu wa mfwa ino wali nu kufwa ku Yelusalemu. 32Petulo na auze yano wali nao ala yati yanyomelwa nu tulo. Lelo lino yazyuka yalola kuyengesa kwa lulumbi lwakwe Yesu na antu yaili aimi nawe. 33Lino yaa yaili yacilifumapo yasya Yesu, Petulo anena Yesu ati, “Kasambilizya, catuzipila kuti twali tutenzi kuno kwene. Tumakuula insakwe zitatu, yonga iyakwako, yuze iyakwe Mose, nayuze iyakwe Eliya.” (Atamanyile cino wavwanzile.)
34Lino acili akuvwanga, Lyene ikumbi liiza liyavimba. Caleka alondezi yuvwa intete lino cinzingwa ci kumbi cayavimba. 35#Eza 42:1; Mat 3:17; 12:18; Mk 1:11; Luk 3:22 Ni izwi lyuvwika kufuma mwi kumbi liti, “Wii, Mwanane wino nasolola, mwamuvwa.”
36Pacisila lino izwi lyuvwika, alondezi yalola vino Yesu ali wenga. Caleka yene pa nsita ilya yatanenyile umuntu nanti umwi pali cino yaweni.
Yesu wapozya umwana mulumendo uwali nu mupasi wankota
(Mat 17:14-18; Mk 9:14-27)
37Pa wanda uwalondelile, lino Yesu na alondezi yakwe yatatu yatentemuka kufuma pa mwamba, iumba likulu cuze limukomanya. 38Umuntu umwi mwi umba alaizya ati, “Kasambilizya nakupapata kuti upozye umwanane umonsi, uwaya sile wenga. 39Mupasi wankota ukamulema, umuponya pansi nga apunda izwi likulu, alino umutensya na maka cakuti afumya ni itomvu ku mulomo. Pa kufuma ukasya wamucisola. 40Nali napapatila alondezi yako kuti yaufumye, lelo yali yaposiwa.”
41Lyene Yesu ayanena ati, “Ala! Mwe antu amu mukulo usi na utailo nupya uvulungane! Uzye namaya namwe nu kumutekelela kufika lilaci?” Lyene anena umuntu ati, “Leta umwana wako kuno.”
42Lino mulumendo acili akwiza, mupasi wankota umuponya pansi alino umutensya na maka. Alino Yesu akalipila mupasi wankota, apozya mulumendo, nga nupya amupeela kuli isi. 43Antu yonsi yazunguka pa maka akulu yakwe Leza.
Yesu wasowela nupya pa mfwa yakwe
(Mat 17:22-23; Mk 9:30-32)
Lelo lino antu yonsi yacili yakuzunguka pa vintu vyonsi vino Yesu wacitanga, Yesu anena alondezi yakwe ati, 44“Muvwikisye ningo vino nati munena. Mwana wa Muntu alakoopelwa ku antu.” 45Lelo yene yatamanyile vino cii casenulanga. Walanga muvwango uu wafiswa kunoyali cakuti yatamanyile vino ukusenula nga yuvwile intete kuti yamuzye pamulandu uu.
Uzye mukulu aweni?
(Mat 18:1-5; Mk 9:33-37)
46 #
Luk 22:24
Lyene alondezi yatandika kupazyanya pamulandu wakwe wino angaya mukulu pakasi kao. 47Lelo Yesu amanya vino yakwelenganya. Caleka atoola umwana munono, amwimika pa mbali yakwe, 48#Mat 10:40; Luk 10:16; Yoa 13:20 ayanena ati, “Wino wensi akazengela umwana munono wakwe wii pamulandu wane, ala wanzengela. Na wino wensi uwanzengela, ala wazengela wino uwantuma. Pano wino ali munono kuluta pali mwemwe mwensi, wene ali mukulu.”
Wino wensi asikumulwisya ala ali namwe
(Mk 9:38-40)
49Yoane avwanga ati, “Kasambilizya, twaweni umuntu umwi ala akufumya mipasi yankota mwi zina lyako, nga twamulesizye pano asi uwa mwi umba litu.”
50Lelo Yesu ayanena ati, “Mutamulesya. Pano wino wensi asikumulwisya ala ali namwe.”
Aina Samaliya yakana kupokelela Yesu
51Lino manda yapalama akuti Yesu asendwe kwiyulu, lyene apanga ulwendo kuya ku Yelusalemu. 52Atuma inkombe zyakumukolelela, zino zyaile mu muzi wa Samaliya ku kumuteyanyizizya vintu vyonsi. 53Lelo kuku antu yatamupokelile, pano camanyike ningo vino wayanga ku Yelusalemu. 54#2Yam 1:9 Lino Yoane na Yakobo alondezi yakwe Yesu yaweni cii, yamuzya yati, “Mwene, uzye ukulonda kuti twame moto kufuma kwiyulu kuti wize uyonone?”
55Lelo Yesu aseleuka ayakalipila. 56Lyene apita nao ku muzi uze.
Antu alinzile kulondela Yesu
(Mat 8:19-22)
57Lino yacili yakupita mu museo, umonsi umwi anena Yesu ati, “Namakulondela konsi kuno umaya.”
58Yesu amunena ati, “Yankusa yakwata ininga umwa kulala, ni vyunyi vyakwata ivinsanzo, lelo Mwana wa Muntu atakwata pa kusamila mutwe wakwe.”
59Lyene anena umonsi namuze ati, “Ndondela.” Lelo wene amwaasuka ati, “Mwene, leka ntale mpite kuti nkazike tata.”
60Yesu amunena ati, “Leka afwe yazike afwe yao. Wemo pita ukakosole vya Wene wakwe Leza.”
61 #
1Yam 19:20
Na muze kwene ati, “Mwene, namakulondela, lelo leka ntale mpite nkapakasye aku ng'anda yane.”
62Yesu amwaasuka ati, “Wino wensi uwatandika kulima nga acili akulola icisila ala atalinzile ukuya mu Wene wakwe Leza.”
Currently Selected:
Luka 9: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
