Luka 10

Yesu watuma antu makumi cinimbali na yaili

1Pacisila cakwe cii, Mwene wasolwile antu nayauze makumi cinimbali na yaili, nu kuyatuma yaili yaili, kuti yamukolelele ku misumba nu ku mpanga yonsi kuno umwisikulu wali pipi nu kuyako. 2#Mat 9:37 Ayanena ati, “Uzombozi uukulu cuze, lelo aomvi yati yacepa. Caleka pepini ku mwine wa uzombozi kuti atume aomvi nayauze ku uzombozi wakwe. 3Pitini! Namutuma wa ana ya mfwele pakasi ka mimbulu. 4Mutasenda cikwama nanti mufuko wakulengelamo vimwi nanti ndyatu. Nupya mutaimilila kuti mulamuke umuntu umwi mu nzila. 5Mu ng'anda yonsi muno mwingila ndi yamupokelela, mutale muti, ‘Mutende uye pali onsi amu ng'anda ii.’

6“Ndi muli umuntu wa mutende, ale mutende winu ulaya panoli. Ndi cisi vivyo, ale mutende winu ulamuwelela. 7#Mat 10:7; Mk 6:8; Luk 9:3; 1Kol 9:14; 1Tim 5:18 Ikalini mu ng'anda kwene iyo, mulye nu kumwa consi cino yamupeela. Pano muomvi alinzile apelwe malipilo yakwe. Mutapitana mu misolo. 8#Mat 10:7; Mk 6:8; 9:3 Mu musumba onsi muno mwingila ndi yamupokelela nu kumuzengela, mwalya consi cino yamupeela. 9Mupozye alwale ali mu musumba uo, alino muyanene muti, ‘Uwene wakwe Leza wati upalama kunomuli.’ 10#Mat 10:7; Mk 6:8; Luk 9:3; Mil 13:51 Lelo mu musumba onsi uno mwingila ndi yakana kumupokelela, pitini mu miseo muvwange muti, 11‘Nu lukungu kwene ulwa mu musumba, ulukambatile ku ngazo zitu, lwakuntilwa kunomuli. Acino iusyini vino Wene wakwe Leza wati upalama kunomuli!’ 12#Uta 19:24; Mat 10:15; 11:24 Cumi namunena vino pa wanda wa upinguzi Leza alaya na mizu cuze pa kuvunuka antu amu Sodoma kuluta antu amu musumba ulya.

Kalanda ku antu amu misumba asi na utailo

(Mat 11:20-24)

13 # Eza 23:1; Eze 26:1; Yow 3:4; Amo 1:9; Zak 9:2 “Kalanda ku antu amu Kolazini! Kalanda ku antu amu Betisaida! Ndi cakuti vinjelengwe ivyacisilwe munomuli vyacisilwe nu ku Tuli na Sidoni, antu ya kuku yange ikale pansi, yazwale masaaka, nu kuiswela itwi kuti yalange vino yati yazenzuka. 14Lelo pa wanda wa upinguzi, mwemo mulavunukwa kuluta antu amu Tuli na Sidoni. 15#Eza 14:13 Mwe antu amu Kapenaumu uzye mukwelenganya vino mungakweziwa kwiyulu kupela? Awe! Mulasumbwa pansi kuzimo!”

16 # Mat 10:40; Mk 9:37; Luk 9:48; Yoa 13:20 Yesu anena alondezi yakwe makumi cinimbali na yaili ati, “Wino akamuvwila, akauvwila nene. Lelo wino uwamukana, ala wakana nene. Caleka wino uwankana, ala wakana uwantuma.”

Kuwela kwa antu makumi cinimbali na yaili

17Antu makumi cinimbali na yaili yawela nu luzango yati, “Mwene, mipasi yankota nayo kwene yatuyelanga mwi zina lyako.”

18Yesu ayanena ati, “Naweni Ciwa wapona wa nkuwa kufuma mwiyulu. 19#Mas 91:13 Uvwini! Namupeela amaka akulyata pa nzoka na makalela nu kucimvya maka yonsi yakwe Ciwa mwanisi, nga mutalazanzwa. 20Lelo mutazanga pano mipasi yankota ikumuyela. Muzange pano mazina inu yalembwa mu lupapulo lwa kwiyulu.”

Yesu wazanga

(Mat 11:25-27; 13:16-17)

21Pa kasita kaka Yesu azanga cuze kupitila mu maka ya Mupasi Wamuzilo, nga avwanga ati, “Tata, Mwene wi yulu ni nsi! Nakutaizya pano watusokolola ku antu atasambilila cino wafisa ku antu yamano na asambilile. Endi Tata, cii acino walondanga kuti cicitike.

22 # Yoa 3:35; 10:15 “Tata, wampeela vintu vyonsi. Pasi nanti wenga uwamanya Mwana suka sile Tata. Nupya pasi nanti wenga uwamanya Tata suka sile Mwana, nga na yao yonsi yano Mwana wasola kuti amusokolole kunoyali.”

23Lyene aseleukila ku alondezi yakwe, ayanena mu nkama ati, “Alongo antu akalola vintu vino mukulola. 24Namunena vino yakasema nga na ene aingi nao yalondanga kulola vintu vino mukulola, lelo yataviweni, nupya yalondanga ukuuvwa vino mukuuvwa, lelo yatavyuvwile.”

Mulumbe wa musamaliya musuma

25 # Mat 22:35; Mk 12:28 Lyene umuntu umwi uwali nkonkotela ya Masunde akatuka kuti aezye Yesu. Amuuzya ati, “Kasambilizya, Uzye ncite uli pakuti mpokelele umi wape?”

26Yesu nawe amuuzya ati, “Uzye malembelo yakati uli? Uzye ukauvwa uli ndi wawelenga?”

27 # Levi 19:18; Malg 6:5; Mat 22:35; Mk 12:28 Nawe aasuka ati, “Uwatemwa Mwene Leza wako nu mwenzo wako onsi, nu umi wako onsi, na mano yako yonsi, na maka yako yonsi. Nupya uwatemwa umuzo ndi vino waitemwa.”

28 # Levi 18:5; Mat 22:35; Mk 12:28 Lyene Yesu ati, “Waasuka ningo. Avino wacita nga ulaya nu umi.”

29Lelo kasambilizya wa Masunde walondanga ukuizifilizya ukuti umololoke. Lyene auzya Yesu ati, “Uzye unji aweni?”

30Yesu aasuka ati, “Kwali umuntu uwafumanga ku Yelusalemu ala akutantamukila ku Yeliko. Lyene vipondo vimuzanza, vimuzula, vimuma nga vimusya pipi nu kufwa. 31Kwaula kwenekela simapepo umwi apita mu museo kwene ulya. Lelo lino walola umuntu, amupambata. 32Cali cili conga kwene ku mwina Levi. Lino wafika pa cifulo cici alola umuntu, nga amupambata. 33#2Mil 28:15 Lelo lino Musamaliya umwi uwapitanga mu museo ulya wiza apali umuntu, amulola, nga aya na mizu. 34Amupalamila, amwitulwila amafuta na waini mu vilonda vyakwe, nga amunyepela. Lyene amukwezya pali punda wakwe, amutwala ku ng'anda ya enyi, kuno waile amusunga. 35Pa wanda uwalondelile afumya impiya madenali yaili, apeela kuli kasunga wa ng'anda, amunena ati, ‘Sunga umuntu wii, kufika lino ndawela. Ndakuwezezya zyonsi zino ulasumba kuluta pali zii.’”

36Lyene Yesu auzya nkonkotela ya Masunde ati, “Uzye pali yaa otatu, aweni wino ukwelenganya walolike kwati umuze wa muntu wilya uwazanzilwe ku vipondo?”

37Kasambilizya wa Masunde nawe amwaasuka ati, “Awilya uwamuyelile uluse.” Alino Yesu amunena ati, “Pita kacite ivili vimwi.”

Yesu walaula mata na maliya

38 # Yoa 11:1 Lino Yesu na alondezi yakwe yacili pa lwendo lwao, aingila mu muzi muno umwanaci uwamwangwa izina lya kuti Mata wamuzengile mu ng'anda yakwe. 39Mata wakweti umwina wakwe kaci izina lyakwe a Maliya, uwatenzi pipi ni ngazo zya Mwene, ala akuuvwa kuli vino wasambilizyanga. 40Lelo Mata wasakamikwe pamulandu wakuvulilwa kwa milimo. Caleka aiiza kuli Yesu amunena ati, “Mwene uzye utasakamile vino kaci wane watansila milimo yonsi ii kuti mbombe sile nenga? Munene aiize angazweko.”

41Mwene nawe amwaasuka ati, “Mata! Mata! Wati usakamikwa nu kucuziwa pamulandu wa vintu ivingi. 42Lelo cikulondekwa sile cili conga. Maliya watasolola icintu campomvu, nupya citalapokwa kunoli.”

Currently Selected:

Luka 10: MamL13

Highlight

Copy