Luka 11

Yesu wasambilizya alondezi yakwe kupepa

(Mat 6:9-13; 7:7-11)

1Yesu wapepanga mu cifulo cimwi. Lino wamala, wenga uwamu alondezi yakwe amunena ati, “Mwene, tusambilizye kupepa, ndi vino Yoane Kawatizya wasambilizye alondezi yakwe.”

2Lyene Yesu ayanena ati, “Lino mukupepa, mwati,

‘Tata,

Izina lyako licindikwe;

Uwene wako wize.

3Utupeele cila wanda ivyakulya vitu vya manda pe.

4Utwelele maifyo itu,

vino naswe tukaelela onsi yano akatwifya,

nupya utaleka tuponele mu matunko.’”

5Yesu auzya alondezi yakwe ati, “Uzye aweni uwa munomuli angaya ku ng'anda yakwe cuza wakwe usiku nu kumunena ati, ‘Cuza wane nkongwesye mikate itatu. 6Pano cuza wane wataiza pane, ali pa lwendo, nga ntakweti cakulya ca kumupeela.’ 7Lyene cuza wako ali mu ng'anda aasuke ati, ‘Utanganola! Cisasa cati ciyalwa, nupya nemo pamwi na ana yane tuizi. Ntange nkatuke kuti nkupele mukate.’ 8Namunena ukuti nanti atangakatuke nu kumupeela cili consi pano wene acuza wakwe, lelo pamulandu wa muzonda wakwe wene angakatuka kuti amupeele consi cino akulonda.

9“Caleka namunena nati, lengini nga mumapelwa, londini nga mumazana, konkonsyini nga mumayulilwa. 10Pano wensi akalenga akapelwa, na wino akalonda akazana, nga na wino akakonkonsya akayulilwa. 11Uzye umwi muli mwe yaisi mwana ndi wamulenga inswi angamupeela inzoka? 12Nanti uzye ungamupeela ikalela lino wakulenga iyai? 13Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela Mupasi Wamuzilo kuli yao akamulenga?”

Yesu na Belezebu

(Mat 12:22-30; Mk 3:20-27)

14Yesu wafumyanga mupasi wankota uwacisile umonsi umwi uciulu. Lino mupasi wankota wafumile, ciulu atandika ukuvwanga. Amaumba ya antu yazunguka cuze. 15#Mat 9:34; 10:25 Lelo yamwi munoyali yavwanga yati, “A Belezebu, mwanangwa wa mipasi yankota, uwamupeela maka yakufumizya mipasi yankota.”

16 # Mat 12:38; 16:1; Mk 8:11 Yamwi yalondanga kwezya Yesu. Caleka yamuzya ukuti acite cilangililo ca cinjelengwe kunoyali icakusininkizya ukuti wene watumwa na Leza. 17Lelo Yesu lino wamanya vino yakwelenganya, ayanena ati, “Antu amu wene uli onsi ndi yakatukilana aisikulu nu kuilwisya lyene uwene uwo ulawa, na amu ng'anda ndi yakatukilana aisikulu yene yalapaatukana. 18Uwene wakwe Ciwa ndi waipaatula uwisikulu, uzye ungakoma uli? Nalanda vii pano mukati Belezebu uwampela maka akufumizya mipasi yankota. 19Ndi nkafumya mipasi yankota mu maka yakwe Belezebu, uzye antu inu yakaifumya mu maka yakwe weni? Caleka antu inu kwene yalamupingula ukuti mwaponga. 20Lelo ndi nkafumya mipasi yankota mu maka yakwe Leza, ale lyene Uwene wakwe Leza wati wiza panomuli.

21“Lino umuntu wa maka waipangasya ivyanzo nu kucingilila ng'anda yakwe, vintu vyakwe vyonsi vilacingililwa ningo. 22Lelo lino wino amulusile maka wiza wamuzanza nu kumucimvya, wene alapoka ivyanzo vyonsi kwene vino mwine wataila, nu kwankanya vino wapokolola.

23 # Mk 9:40 “Wino aakumpazya ala asi nani, na wensi wino asingazwa kukolonganika ala akusalanganya.

Mupasi wankota ukaswilila mu muntu

(Mat 12:43-45)

24“Lino mupasi wankota wafuma mu muntu, ukapitana mu lwanga ala ukulonda cifulo apa kupuza. Lelo ndi utazanyile pamwi, lyene ukati, ‘Namaswilila ku ng'anda yane ino nafumilemo.’ 25Lino waswilila, iuzana ing'anda ipyele ningo na vyonsi iviseziwa. 26Lyene iufuma iuya uleta mipasi yuze cinimbali iipisye ukuuluta, nga iiza ikalamo. Lyene miyele ya muntu wiyo, iipisya kuluta vino yali pa kutandika.”

Ulongo lwa Cumi

27Lino Yesu acili akuvwanga vintu vii, umwanaci umwi mwi umba asanzika izwi lyakwe ati, “Walongo umwanaci uwakuvile, wino wewe onsileko.”

28Lelo Yesu amunena ati, “Alongo ayao akauvwa mazwi yakwe Leza nu kuyayela.”

Antu Yalonda cilangililo ca cinjelengwe

(Mat 12:38-42)

29 # Mat 16:4; Mk 8:12 Lyene lino maumba yakongana kunoli, atandika kuvwanga ati, “Antu amu mukulo uu aipe! Yakalonda cilangililo ca cinjelengwe. Lelo kusi cilangililo ca cinjelengwe icilapelwa kunoyali, suka sile cilangililo cakwe Yona. 30#Yon 3:4 Ndi vino Yona wali cilangililo ca cinjelengwe ku antu aku Ninive, vivyo kwene nu Mwana wa Muntu alaya cilangililo ca cinjelengwe ku antu amu mukulo uu. 31#1Yam 10:1; 2Mil 9:1 Pa wanda wa upinguzi namwene uwaku kaeya alimilila pamwi na antu amu mukulo uu nu kuyasinila, pano wapisile mpanga itali cuze kuya ku mwene Solomoni ku kuvwa mazwi ya mano kunoli. Lola umwi mukulu kuluta Solomoni ali pano. 32Pa wanda wa upinguzi, antu amu Ninive yalimilila pamwi na antu amu mukulo uu nu kuyasinila, pano yene yazenzwike lino Yona wakosozile kunoyali. Lola, umwi mukulu kuluta Yona ali pano.

Manso ilampi lya kukozezya mwili

(Mat 5:15; 6:22-23)

33 # Mat 5:15; Mk 4:21; Luk 8:16 “Kusi umwi akakozya ilampi nu kuliika mu ncende ifisame, nanti kulitupika mu nyungu. Lelo akaliika pa sanzame, pakuti antu akwingila mu ng'anda yalole luswepo. 34Amanso inu yakoline wi lampi lya kukozezya mwili. Lino manso inu yali ningo, mili inu nayo kwene imazulamo luswepo. Lelo lino manso inu yasi ningo, mili inu ilazulamo mfinzi. 35Caleka cenjelini, kuti luswepo luli munomuli lutasenuka luye mfinzi. 36Mili inu yonsi ndi izilemo luswepo, ukwaula kuti cilundwa cimwi ciye mu mfinzi, Lyene cila cilundwa cilayengesa, wakwe vino ilampi likayengesa panomuli.”

Yesu wakalipila Afaliseo na Yakasambilizya ya Masunde

(Mat 23:1-36; Mk 12:38-40)

37Lino Yesu wamala ukuvwanga, Mufaliseo umwi amwama ku cakulya. Caleka aingila mu ng'anda alya pamwi nawe. 38Mufaliseo azunguka pa kulola vino Yesu akulya ukwaula kufulala ku minwe kulingana nu lutambi. 39Lyene Mwene amunena ati, “Mwe Afaliseo mukafula ingako ni mbale kunzi, lelo mu myenzo inu mwazula ukakasi ni nkota. 40Viwelewele mwe! Uzye asi a Leza uwaumvile kunzi nu mukasi kwene? 41Lelo pelini vino vili mu mbale ku apina, alino myenzo inu imasanguluka.

42 # Levi 27:30 “Kalanda kunomuli mwe Afaliseo! Mukapela kuli Leza cikumi ca pa vilimwa vyonsi ivikanunkizya vyakulya. Vili wakwe kanyenze ni vinzali nga navyuze vilimwa vyamu miyanda. Lelo mwatazyela cumi nu kutemwa kwakwe Leza. Mulinzile mwacita vii vyonsi, kwaula kutazyela vimwi.

43“Kalanda kunomuli mwe Afaliseo! Mwatemwa ivilimba vya ucindami mu mang'anda ya mapepo nu kulamukwa nu mucinzi mu masokoni. 44Kalanda kunomuli! Mwakolana na malindi asi ni vimanyililo yano antu yakapita papela kwaula kumanya.”

45Wenga uwamu nkonkotela zya Masunde amwaasuka ati, “Kasambilizya, lino ukuvwanga vii naswe kwene ala ukututuka.”

46Yesu amunena ati, “Kalanda kuno muli namwe kwene yakasambilizya ya Masunde! Mukatwika antu visendo vinyomesye nupya vitale ukusenda. Lelo mwemo mutangakatusya nanti umunwe kuti muyazwe kusenda visendo vivyo vya masunde inu. 47Kalanda kunomuli! Mukakuulila yakasema vipilala vya pa malindi. Yakasema yaa ayano vikolwe vinu vyakomile. 48Mwemwe yakambone, nupya mwasininkizya vino vikolwe vinu vyacisile, pano vyakomile yakasema. Lyene namwe muyakuulila vipilala vya pa malindi. 49Pamulandu uu, Leza mu mano yakwe wavwanzile ati, ‘Ndayatumila yakasema na atumwa. Na munoyali yamwi yalayakoma na yamwi nao yalayazunya.’ 50Caleka antu amu mukulo uu yalapeelwa cilanduzi pamulandu wa kukoma yakasema yonsi kufuma ku uumbo wa nsi. 51#Uta 4:8; 2Mil 24:20 Kutandikila pa kukomwa kwakwe Abeli kufika na pa kukomwa kwakwe Zakaliya, wino wakomilwe mu Ng'anda ikulu yakwe Leza pakasi ka kavuwa ni cifulo camuzilo. Endi, namunena, vino mukulo uu ulapelwa cilanduzi.

52“Kalanda kunomuli mwe nkonkotela zya Masunde. Mwasunga imfungulo ino ikayula ku kumanya vya pali Leza. Mwemo mweisikulu mwaposiwa ukwingilamo, nga mukalesya yano akwezya ukwingilamo.”

53Lino Yesu wafumile pa ncende iilya, yakasambilizya ya Masunde na Afaliseo yatandika kumusokela nu kumuuzya amauzyo aingi, 54pakuti yamuteye mu mivwangile yakwe.

Currently Selected:

Luka 11: MamL13

Highlight

Copy