Luka 8

Anaci alondelanga Yesu

1Pacisila Yesu apita mu misumba nu mu mizi ala akukosola Ilandwe Lisuma lya Wene wakwe Leza. Alondezi ikumi na yaili yali nawe, 2#Mat 27:55; Mk 15:40; Luk 23:49 pali pamwi na anaci yamwi yano wapozizye kufuma ku mipasi yankota ni ndwala zyuze. Anaci yaa yali a Maliya (Wino yatangi waku Magadala), wino mipasi yankota cinimbali yafumiwe munoli. 3Na Yoana muka Chuza uwali musika wakwe Helodi. Na Susana na anaci yauze aingi yano aomvyanga cuma cao pa kutumikila Yesu na alondezi yakwe.

Mulumbe wakwe kata wa mbezu

(Mat 13:1-9; Mk 4:1-9)

4Lino iumba lyakongana kufuma mu misumba, Yesu alinena mulumbe ati,

5“Uvwini! Kwali kata wa mbezu uwaile kukuta imbezu. Lyene lino akuta, imbezu zimwi ziponela mu nzila, zilyatolwa, nga ni vyunyi vizikompa. 6Zimwi ziponela pa lwala, apali musili unono. Lelo lino zyamela, zuwazuwa zyuma pano musili utali na munyezi. 7Imbezu zimwi ziponela mu myunga. Lyene imyunga ikula izitotola. 8Lelo imbezu zimwi ziponela pa musili uvunde, nga zikula nu kuseeka vizao vivule, zimwi umwanda onga.” Lyene lino wayanena vii, asanzika izwi ati, “Ali na matwi yakuuvwa, auvwe!”

Imilimo ya milumbe

(Mat 13:10-17; Mk 4:10-12)

9Lyene alondezi yakwe yamuzya vino mulumbe u ukusenula. 10#Eza 6:9 Yesu nawe ayanena ati, “Mwemo mwapelwa amano ya kumanya nkama zya Wene wakwe Leza. Lelo yano asyala yene yakauvwila mu milumbe, pakuti, yangalola lelo yatangailuke nu kuvwa yanguvwa lelo yatangamanya ningo.

Yesu wilula mulumbe wakwe kata wa mbezu

(Mat 13:18-23; Mk 4:13-20)

11“Mulumbe u ukusenula vii, imbezu izwi lyakwe Leza. 12Imbezu izyaponile mu nzila, antu yano akauvwa mazwi yakwe Leza. Lelo Ciwa aiiza afumya mazwi yonsi mu myenzo yao, pakuti yatataila nu kutuulwa. 13Imbezu izyaponile pa lwala, antu yano akauvwa mazwi yakwe Leza, nu kuyapokelela nu luzango. Lelo mazwi yakwe Leza yasiingila nu kwika misisi mukasi ka myenzo yao. Caleka lino nsita yakweziwa yafika, yanenuka. 14Imbezu izyaponile mu myunga, ayao akauvwa mazwi yakwe Leza. Lelo masakamiko ya wikazi wamu nsi ii, nu ukama, nga nu kuipakizya kwa umi uu, viza vitotola mazwi nga ni vizao vyakweyo visyaca. 15Imbezu izyaponile pa musili uvunde, ayao yano ndi yuvwa mazwi yakwe Leza, yayapokelela nu mwenzo usuma uwakuyela. Caleka yaposya kufika lino yaseeka vizao.”

Kutupika ilampi mu nyungu

(Mk 4:21-25)

16 # Mat 5:15; Luk 11:33 “Kusi umwi akakozya ilampi nu kulitupika mu nyungu, nanti kuliika mwi zungu. Lelo akaliika pa sanzame pakuti antu yangalola uluswepo lino yakwingila.

17 # Mat 10:26; Luk 12:2 “Pano cino consi icafiswa cilasokololwa, na cino consi cankama cilaumbulwa paswe.

18 # Mat 25:29; Luk 19:26 “Caleka ikini amano pali vino mukuuvwa, pano wino wensi akweti wene alapeelwa navyuze, na wino wensi atakweti cimwi nawe alapokwa nu tunono tuno akwelenganya kuti akweti.”

Nyina na ina yakwe Yesu

(Mat 12:46-50; Mk 3:31-35)

19Lyene nyina na ina yakwe Yesu iiza kunoli, lelo pamulandu ni umba yaposiwa kufika panoli. 20Alino umuntu umwi anena Yesu ati, “Ala nyoko na anyonko yaimi panzi yakulonda kukulola.”

21Yesu ayanena ati, “Mayo na ina yane ayao akuuvwa mazwi yakwe Leza nu kuyayela.”

Yesu walesya cipupu

(Mat 8:23-27; Mk 4:35-41)

22Uwanda umwi Yesu apatama mu wato na alondezi yakwe, nga ayanena ati, “Tuini tulambe ku mbalama yakwe yemba.” Lyene yamusenda. 23Lyene lino yali mu wato, Yesu akasula. Mukupumikizya cipupu cikatuka, caleka na manzi yatandika kwingila mu wato. Yene yaya mu uzanzo ukulu cuze. 24Nao yamuzyula, yati, “Kasambilizya, Kasambilizya! Tuli pipi nu kuundwa.”

Yesu azyuka, alesya cipupu na maimbi, navyo vimyalala nga kuya cele. 25Alino auzya alondezi ati, “Uzye utailo winu uli kwi?”

Lyene yazunguka, yuvwa intete. Alino yuzyanya yati, “Uzye umuntu wii aweni? Wino angakalipila cipupu na maimbi, navyo vimuyela!”

Yesu wafumya mipasi yankota mu muntu

(Mat 8:28-34; Mk 5:1-20)

26Yesu na alondezi yakwe yafika ku mpanga ya Gelasa, ino iloline ni mpanga ya Galile. 27Lino Yesu wapatukila pa cituntu, umuntu umwi uwali ni mipasi yankota afuma mu musumba aiiza amukomanya. Apa nsita ntali umuntu wii wapitanga tupu nupya atikalanga mu ng'anda, suka ku malindi. 28Lino walola Yesu apunda, afukama pa ngazo zyakwe Yesu alaizya ati, “Yesu we Mwana wakwe Leza uwa papelapela! Uzye ukulonda cani kunondi? Nakupapata, utancuzya!” 29Wavwanzile ci pano walanga Yesu watanena mupasi wankota kufuma munoli. (Mupasi wankota wamulemanga lililili, caleka lyonsi kwene pa kumusunga yamunyepanga ni minyololo. Lelo waputolanga minyololo, nga asendwa nu mupasi wankota mu lwanga.)

30Lyene Yesu amuuzya ati, “Uzye izina lyako wewe weni?” Nawe aasuka ati, “Izina lyane nene Mazimbi,” pano mipasi yankota iingi yalanga iingila munoli. 31Mipasi yankota ipapata Yesu kuti ataizingila ku ciwina caula impela.

32Lyene kwali ufyo ukulu wakwe yakapoli mu pipi, ala ukulya umu mbali ya mwamba. Caleka mipasi yankota ipapata Yesu kuti aizingile muli yakapoli, kuti amuno ikingile. Nawe aileka ipita. 33Lyene mipasi yankota ifuma mu monsi nga iingila muli yakapoli. Alino ufyo onsi utantamukila ku lwema, uponela muli yemba, umwela.

34Lino acemanga yakapoli yalola icacitika, yasimula yaya yalanda vintu vii mu musumba nu mu mizi yapalime. 35Alino antu yapita kuyalola cati cicitika. Lyene lino iiza kuli Yesu, yazana umonsi wino mipasi yankota yafumilemo, ala atenzi pa ngazo zyakwe Yesu, watazwala, nupya wali na mano ya untu. Alino onsi yuvwa intete. 36Yao aciweni yanena antu vino umuntu wilya wali ni mipasi yankota wapozile. 37Lyene antu yonsi amu mpanga izingulwike Gelasa yapapata Yesu kuti afume mu mpanga yao, pano yuvwile intete cuze. Caleka Yesu apatama mu wato afumako. 38Lyene umuntu wino mipasi yankota yafumilemo, apapata Yesu ati, “Leka nkulondele.” Lelo Yesu amukanya ati, 39“Pitanga kumwinu kanene antu cino Leza watakucitila.” Caleka umonsi apita mu musumba onsi, ala akunena antu cino Yesu watamucitila.

Yesu wapozya mwana yailo nu mwanaci umwi

(Mat 9:18-26; Mk 5:21-43)

40Lyene lino Yesu wawela ku mbalama yuze yakwe yemba, iumba limupokelela, pano yonsi yamulolelanga.

41Lyene kwiza umuntu izina lyakwe a Yailo, wiyo uwali intunguluzi yamu ng'anda ya mapepo. Afukamila Yesu amupapata kuti apite nawe ku ng'anda yakwe. 42Pano umwana wakwe wenga sile kaci, uwali ni myaka manye ikumi na iili, wali pipi nu kufwa. Lino Yesu wayangako, amaumba yamuunganila. 43Kwali umwanaci umwi uwalwile cendamongo pa myaka ikumi na iili. Wasumvile vyuma vyakwe vyonsi kuli yasing'anga lelo kutali nanti wenga wakuti amupozye. 44Caleka aiiza kucisila cakwe Yesu, nga akumya kwi sempele lya nsalu yakwe, nga lilyo kwene cendamongo cisila. 45Yesu auzya ati, “Uzye aweni uwankumya?”

Lino yonsi yakana, Petulo ati, “Kasambilizya, antu yonsi yati yakuunganila nu kukupupumila.”

46Lelo Yesu avwanga ati, “Umwi wankumya, pano nuvwa maka yapunguka munondi.” 47Lyene lino umwanaci walola ukuti atafisime, aiiza afukama pa ngazo zyakwe Yesu ala akuzakaza. Alino alondolola pa manso ya antu yonsi cino wali wamulemela na vino wali wapoziwa lilyo kwene. 48Yesu amunena ati, “Kaciwe! Utailo wako wakupozya. Pita ulumi.”

49Lino Yesu acili akuvwanga vii, inkombe iiza ukufuma ku ng'anda yakwe Yailo uwali intunguluzi, inena Yailo iti, “Umwana wako kaci watafwa. Utasakamika Kasambilizya.”

50Lelo lino Yesu uvwa cii anena Yailo ati, “Utuvwa intete taila sile, wene amapola.”

51Lino wafisile pa ng'anda, Yesu atazumilizye umuntu nanti umwi kwingila nawe mukasi suka sile Petulo, Yoane na Yakobo na isi wa mwana nga na nyina. 52Onsi yala yakulosya ni mpoma, lelo wene ati, “Tini kulosya, pano mwana wene atafwile, lelo watakasula sile.” 53Lelo yene yamuseka, pano yamanyile ukuti umwana wiya watafwa. 54Lelo Yesu amulemelela ikasa amunena ati, “Mwana we, katuka!” 55Lyene lilyo kwene atutuluka, nga akatuka. Alino Yesu ayanena kuti yamupele cimwi cakuti alye. 56Akwasi yakwe nao yazunguka cuze, lelo Yesu ayapeela ilamulo kuti yatanena umuntu nanti umwi cicitike.

Currently Selected:

Luka 8: MamL13

Highlight

Copy