Luka 7
7
Yesu wapozya muomvi wakwe musika wa mpuka ya vita umwanda onga
(Mat 8:5-13)
1Lino Yesu wamala kuvwanga vintu vii vyonsi ku antu akuuvwa, lyene aingila mu Kapenaumu. 2Kuku kwali musika wa mpuka ya vita umwanda onga uwakweti muomvi wino watemilwe cuze. Muomvi wii walwile pipi nu kufwa. 3Lino musika wa vita vya Ciloma uvwile landwe lya pali Yesu, atuma aikolo ya Ayuda ku kumuuzya kuti aiize apozye muomvi wakwe. 4Lyene lino iiza kuli Yesu, yamupapata cuze yati, “Muntu wii alinzile kwazwiwa naawe. 5Pano watemwa antu itu nupya aliwe watukuulila ing'anda ya mapepo.”
6Lyene Yesu apita nao. Lino wali pipi ni ng'anda, musika atuma yacuza yakwe ku kumunena ati, “Mwene, utaicuzya, pano nemo ntalinzile kuti wize mu ng'anda yane. 7Caleka, nanti anene nemwisikulu, ntakuyelenganyizizya ukwiza kunuli. Lelo vwanga sile izwi, nu muomvi wane amapola. 8Pano nani kwene, nene muntu uwalasikwa na maka ku uteko pi sika lya ntunguluzi zikulu. Nani kwene nakwata asilika yano nkaangalila. Ndi nanena wenga nati, ‘Pita!’ Nawe apita, nu ku muze inti, ‘Iza!’ Nawe aiiza, nupya ndi nanena muzya wane nati, ‘Cita cii!’ Nawe acita.”
9Lino Yesu uvwa cii, azunguka cuze, aseleuka nga anena iumba lyamulondile ati, “Namunena vino ntatala nalola utailo wakwe uu, nanti mu Izlaeli kwene.”
10Lyene nkombe zyaswililemo kukunena amu ng'anda yakwe musika nga zizana vino umuzya watapola.
Yesu Watutulula Mwana Mukamfwilwa uwaku Naini
11Zuwazuwa pacisila Yesu aya ku musumba wa Naini pamwi na alondezi yakwe ni umba likulu. 12Lino wapalama pa mpongolo ya musumba, akomanya iumba likulu ilya fumangamo ala yasenzile icala. Icala cii cali ca mwana umonsi wenga sile mu mwanaci uwali mukamfwilwa. Iumba likulu kufuma mu musumba nalyo lyamusukilile. 13Lino Mwene wamulola, aya na mizu, nga amunena ati, “Utaalila.” 14Lyene apalama akumya icintamba, na antu asenzile icintamba iimilila. Yesu avwanga ati, “Mulumendo, nakunena, katuka!” 15Nu mufwe akatuka atandika nu kuvwanga. Alino Yesu amupeela kuli nyina.
16Onsi yuvwa intete, yalumbanya Leza yati, “Kasema mukulu wataloleka pakasi kitu! Leza wataiza ku kwazwa antu yakwe!”
17Ilandwe lya pali Yesu lisalangana mu mpanga yonsi ya Yudeya nu mu mpanga zyuze izya zingulwike.
Yoane Kawatizya watuma inkombe kuli Yesu
(Mat 11:2-19)
18Lino alondezi yakwe Yoane yanena Yoane vintu vii vyonsi, 19Yoane aama yaili amu alondezi yakwe. Ayatuma kuli Yesu ku kumuzya, yati, “Uzye wewe uli wino Yoane walanzile ukuti akwiza, nanti tumalolelanga muze?”
20Lino iiza kuli Yesu yamunena yati, “Yoane Kawatizya watatutuma kuti twize tukuzye ndi wewe uli wino akwiza, nanti tumalolelanga muze?”
21Pa nsita kwene ilya Yesu apozya alwale aingi alwile ndwala zya misango na misango, na ali ni mipasi yankota, nga nu kuleka impafu kuti zyalola. 22#Eza 35:5; 61:1 Lyene anena nkombe zyakwe Yoane ati, “Pitini, mukanene Yoane vintu vino mwati mulola nu kuuvwa. Mumunene muti mpafu zikulola, vilema vikupita, yakwe tembwe yakupoziwa, yacipuuli yakuuvwa. Afwe yakututululwa, ni Landwe Lisuma likukosolwa ku apina. 23Alongo ayao asikuntwisika.”
24Lyene lino nkombe zyakwe Yoane zyapita, atandika ukunena maumba vya pali Yoane, ati, “Uzye mwaile ku lwanga kukulola cani? Uzye mwaile ku kulola umuntu muzakantike wa mafwa akupungaila nu muza? Awe! 25Ndi cisi vivyo uzye mwaile kukulola cani? Uzye umuntu uwazwite insalu ziyembe? Awe! Antu akazwala wakwe vivyo ayao akazanwa mu masano. 26Lyene nenini, uzye mwaile kukulola cani? Uzye akasema? Endi, namunena mwaweni alusile kasema. 27#Mal 3:1 Pano Yoane awino calembwa mu malembelo pali aliwe cati, ‘Leza wavwanzile ati,
Ndatuma nkombe yane ikukolelele,
kuti ikateyanye inzila yako.’
28Namunena nati, mu antu yonsi avyalwa mu nsi ii, kusi umuntu wino alusile Yoane. Lelo wino ali munono mu Wene wakwe Leza, wene ali mukulu kuluta Yoane.”
29 #
Mat 21:32; Luk 3:12 Lyene antu yonsi na yakasonkesya kwene lino yuvwa yazumila ukuti Leza umololoke pano yawatiziwe na Yoane. 30Lelo Afaliseo na yakasambilizya ya Masunde pakukana kuwatiziwa na Yoane, yasuzile vino Leza walondanga kuyacitila.
31Yesu atwalilila kulanda ati, “Uzye ningakolanya antu amu mukulo uu kuli cani? Uzye yakolana na cani? 32Yakolana na ana atenzi mwi sokoni, ala yakulaizya yakuti, ‘Twamulizizye ving'weng'we vya pa winga, lelo mutacinyile! Twalaezile ni mpoma zya ndosya, lelo mutalosizye!’ 33Pano Yoane Kawatizya wizile, aizilizya ukulya nu kumwa waini, namwe muti, ‘Wakwata mupasi wankota munoli’ 34Mwana wa Muntu wiza, akalya nu kumwa, namwe mukuti, ‘Lolini umuntu wii! Wene wapunuka nupya umukolesi. Wene acuza wakwe yakasonkesya na yakaifya.’ 35Lelo antu yalalola ukuti amano yakwe Leza alungame ndi yalola milimo yakweyo.”
Yesu yamupongolwela mafuta
36Umwi wenga uwamu Afaliseo amwama kuti aingile mu ng'anda yakwe yakalye pamwi nawe. Lyene Yesu aingila mu ng'anda ya Mufaliseo aikala pa cakulya. 37#Mat 26:7; Mk 14:3; Yoa 12:3 Lolini mu musumba ulya mwali umwanaci uwali cizelele. Uvwile vino Yesu akulya mu ng'anda ya Mufaliseo. Caleka aleta musazi wa mafuta amununko usuma, 38aimilila kwi tundu ku mbali ya ngazo zyakwe Yesu, ala akulila, akuponyezya minsozi pa tuntunta twa ngazo zyakwe Yesu. Lyene akumbula ingazo zyakwe Yesu ni nyele zyakwe, azitonsola nga azipongolwela amafuta acinunu cisuma. 39Lino Mufaliseo uwamwamile walola cii, aivwanzya umwisikulu ati, “Ndu muntu wii akasema, wange amanye umwanaci wii akumukumya. Wange amanye nu musango wa umi wa ukakasi uno waya nao, pano wene wali a cizelele.”
40Yesu amunena ati, “Simoni, nkweti cimwi icakukunena.” Nawe amwaasuka ati, “Kasambilizya, nena tuvwe.”
41Alino Yesu ati, “Kwali antu yaili yano akongwile impiya kuli kakongwisya, umwi madenali imyanda isano, nu muze makumi yasano. 42Lino yaposiwa kumulipa ayelela. Uzye aweni pali yaa angamutemwa kuluta?”
43Simoni aasuka ati, “Nkwelenganya angaya awilya uwakweti nkongole izingi.” Yesu amunena ati, “Wavwanga ningo.” 44Lyene aseleukila ku mwanaci nga anena Simoni ati, “Uzye walola umwanaci wii? Kufuma lino ningile mu ng'anda yako utampile manzi akufulala ku ngazo. Lelo wene wafula ingazo zyane na minsozi yakwe nu kuzikumbula ni nyele zyakwe. 45Wemo utatala wa ntonsola, lelo wene atatazile ate kutonsola ingazo zyane kufuma pano nizile. 46Wemo utatala wapongolwela amafuta pa mutwe wane. Lelo wene watapongolwela amafuta acinunu cisuma pa ngazo zyane. 47Caleka nakunena vino kutemwa kuno wene wantemwisya kukulanga vino Leza wamwelela maifyo yakwe aingi. Lelo wino wensi uwelelwa maifyo yanono, akatemwa panono.”
48Lyene Yesu anena umwanaci ati, “Maifyo yako yelelwa.”
49Lyene yano atenzi pa vilimba pa kulya yatandika kuuzyanya aisikulu yati, “Uzye aweni wii, wino akaelela maifyo?”
50Lelo Yesu anena umwanaci ati, “Utailo wako wakutuula. Pita ulumi.”
Currently Selected:
Luka 7: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
