Génesis 42

José tɨkeɨ reta yuweru ɨwɨ Egipto pe

1Jae ramiño wi ɨwɨ Canaán pe yureko reta wi karuái wasu pe. Jayawe jeräkua Jacob pe yawe ime tembiurä ɨwɨ Egipto pe, jei taɨ reta pe: “¿Maera pa pe reta pemaemaeño peï piyé?” jei. 2“¡Mase! Jeräkua chewe ime tembiurä ɨwɨ Egipto pe. Pekua pewa yandewe ndei yembaɨ pe yanderowaruru ñamano mbowe,” jei chupe reta.

3Jayawe payandepo José tɨkeɨ reta yuraa ɨwɨ Egipto pe owa waerä jembiurä. 4Erëi Jacob omondo’ä jae reta ndiwe taɨ Benjamín, José tɨwɨ, echa’ä Jacob urukɨye ramo. 5Jayawe Jacob taɨ reta yuraa ɨwɨ Egipto pe. Jare jae nunga ikotɨ̈a wi yuraa reta wi jae reta ndiwe, echa’ä jokua karuái wasu uwäe ma opaete ɨwɨ Canaán rupi wi.

6Ɨwɨ Egipto pe José ko jae mburuwicha reta itenondewa. Jae ko owaka oï tembiurä opaete pewarä. Jáeramo José oï wae pe yuweru uwäe tɨkeɨ reta, jare uñeñono reta ɨwɨ re uipɨu rewe José jowai. 7Jare José uecha yawe, uikuaa woi tɨkeɨ reta ko. Erëi José uyekuaaka’ä chupe reta jae ko tɨwɨ José wae. Jayawe iñeeäta rewe upɨrandu chupe reta: “¿Ketɨ wi pa peyu?” jei.

Jare jae reta jei chupe: “Ndoyu ɨwɨ Canaán wi. Ndoyu kua pe ndowa waerä orerembiurä,” jei reta chupe.

8Yepe tëi José uikuaa tɨkeɨ reta ko, erëi jae reta uikuaa’ä jae. 9José imandúa ipau reta re tɨkeɨ reta rewa. Jayawe jei chupe reta: “¡Upurupiäro wae ko pe reta! Peyu ko pemae wɨari waerä oreɨwɨ re, pikuaa waerä kerupi ra orepɨräta’ä noï wae oremɨamɨri waerä,” jei chupe reta.

10Erëi jae reta jei chupe: “Jukuärai’ä ko, mburuwicha,” jei. “Ore nuñemɨmichi rewe ndoyu ko ndowa waeräño orerembiurä. 11Opaete ore pëti tu waeño ko. Ore jae’ä ko upurupiäro wae reta, oreya. Ore ko jae kuimbae reta jeko kawi wae,” jei reta chupe.

12Erëi José jeiete jei chupe reta: “¡Añetete’ä ko! Peyu ko pemae waerä oreɨwɨ re, pikuaa waerä kerupi ra orepɨräta’ä noï wae oremɨamɨri waerä,” jei chupe reta.

13Jayawe jae reta jei chupe: “Ore ndepo pe noï nuñemɨmichi rewe, jare doce pëti tu waeño ɨwɨ Canaán pewa ko ore. Orerɨwɨ taɨkuewaete upɨtaño oreru ndiwe, jare ïru orerɨwɨ mbaetɨ ma iko,” jei reta chupe.

14Erëi José jei ye chupe reta: “¡Kërái che jae wae rami, upurupiäro wae reta ko pe reta!” jei. 15“Jare kuärái aikuaata añetete wae: Mburuwicha wasu jee re tae pewe, ndarau peë kua wi perɨwɨ ou rewa kua pe. 16Jayawe amondokata pëti pepɨte wi ueru waerä perɨwɨ kua pe. Ïru wae reta upɨtañota kua pe peresorɨru pe. Jukuärái aikuaata pe pere wae añetete ra ani papu ra peï chewe. Ueru’ä yawe perɨwɨ, jayawe aikuaata añetete upurupiäro wae reta ko pe reta,” jei chupe reta. 17Joko wi José uyukendaka opaete tɨkeɨ reta peresorɨru pe mbapɨ ara pewa.

18Mbapɨ ara ma uasa yawe, José ueruruka ye tɨkeɨ reta jae jowai jare jei chupe reta: “Tumpa wi aipɨu wae ko che. Jáeramo piyapo yawe kua che jaeta pewe wae, jayawe ndarau puyukaka,” jei chupe reta. 19“Añetete kuimbae jeko kawi wae reta ko pe reta yawe, jayawe tupɨta kua pe pëti wae pepɨte wi peresorɨru pe. Jare pe reta peraata jokua perembiurä pewa wae pemɨngaru waerä perëtara iyembaɨ ñonoï wae reta,” jei chupe reta. 20“Erëi peru yawe chewe perɨwɨ, jukuärái aikuaata pe pere chewe wae añetete ko. Jayawe puyukakata’ä,” jei José chupe reta. Jayawe jokua jaekawi chupe reta.

21Erëi uyemɨngeta reta jae yepái kuärái: “Kua mbaesusere oa oï yanderé karamboe yayapo mbae ikawi mbae wae yanderɨwɨ José kotɨ jeko pewa. Yaecha tëi jae ikuasɨ katu uyerure yandewe yaiparareko waerä tëi, erëi yayapɨsaka’ä jese. Jáeramo añawe oa oï yanderé kua mbaesusere tuicha wae.” Jukuärái jei iyupe reta.

22Jayawe Rubén jei chupe reta: “Ambeu tëi pewe awɨye piyapo marái yanderɨwɨ, erëi pe reta piyapɨsaka’ä cheré. Añawe yaiporarata ko aipo jokua ikawi mbae yayapo wae jeko pewa,” jei chupe reta Rubén.

23Jae reta hebreo ñee pe uyemɨngeta ñonoï, erëi uikuaa’ä reta José uikuaa wi uyemɨngeta jokua ñee pe wae. Echa’ä José jekuaeño uyemɨngeta ɨwɨ Egipto pewa reta iñee pe, jare pëti uyeyokui chupe wae umbɨasa iko José tɨkeɨ reta pe jae reta iñee pe.

24Jayawe uyandu yawe jae reta yepái uyemɨngeta iko wae, José ipɨatɨtɨ tuicha rupi. Jáeramo usɨrɨ chuwi reta jare oo uyao. Joko wi ipɨamaña ye ma yawe, ou ye tɨkeɨ reta ñonoï wae pe. Jare jae reta ipɨte wi uekika wɨraa pëti tɨkeɨ Simeón jee wae jare uñapɨ̈tika ïru tɨkeɨ reta jowai.

25Joko wi José oyokui amokue uyeyokui chupe wae reta umɨtɨnee waerä pëti pëti tɨkeɨ reta jewɨta tembiurä wae pɨpe. Jare umeeka chupe reta wi itapekerä. Erëi José oyokui wɨari jokua uyeyokui wae reta oñono ye waerä chupe reta ikorepoti jembiurä umbɨepɨ tëi wae, pëti pëti wae jewɨta japɨpe. Jayawe uyapo reta José oyokui wae rupi.

26Jayawe tɨkeɨ reta umbɨwɨta imburika reta jare opa oë ye yuraa reta joko wi.

27Jare pɨ̈tu ma chupe reta yawe, upɨta uputuu reta. Jayawe pëti jae reta ipɨte wi oyora jewɨta umɨngaru waerä imburika reta, jare uecha joko pe ikorepoti oï tembiurä wae iáramo. 28Jayawe jei ïru reta pe: “¡Mase! ¡Umɨñatima ye reta chewe chekorepoti! ¡Ko oï cherewɨta japɨpe!” jei chupe reta.

Jáeramo jae reta ipɨakañɨete, jare jei iyupe reta ukɨye rewe: “¿Mbae ra ko Tumpa uyapo oï yandewe?” jei iyupe reta.

29Joko wi yuraa uwäe reta yawe ɨwɨ Canaán pe tu Jacob oï wae pe, imiäri reta tu pe opaete uasa wae rewa. Jei reta chupe kuärái: 30“Jokua kuimbae mburuwicha ɨwɨ Egipto pewa pochɨ rewe uyemɨngeta ore ndiwe,” jei reta. “Jae umae oreré upurupiäro wae reta rami,” jei reta. 31“Jayawe ore ndoe chupe: ‘Jae’ä ko ore upurupiäro wae reta. Ore ko jae kuimbae jeko kawi wae reta. 32Ore ko jae doce pëti tu waeño. Pëti orerɨwɨ mbaetɨ ma iko, jare orerɨwɨ taɨkuewaete upɨtaño oreru ndiwe ɨwɨ Canaán pe,’ ndoe chupe,” jei reta tu pe.

33“Erëi mburuwicha ɨwɨ Egipto pewa jei orewe: ‘Aikuaata pe reta pere chewe wae añetete ra kuärái: Pëti pepɨte wi imeta ko upɨta kua pe peresorɨru pe. Jare opaete ïruwe pe reta peraata perembiurä pemɨngaru waerä perëtara iyembaɨ ñonoï wae reta. 34Erëi peru ñotái ko perɨwɨ taɨkuewaete chewe. Jukuärái aikuaata pe reta upurupiäro wae reta’ä ko jare kuimbae jeko kawi wae reta. Jayawe ramo apoi yeta pewe Simeón, jare jekuaeño pepuereta peyu ye pewa waerä perembiurä,’ jei orewe.” Jukuärái jei imiäri reta tu Jacob pe.

35Joko wi, umbɨpɨ uekuawo reta yawe tembiurä wae jewɨta wi, pëti pëti wae uecha ikorepoti jewɨta japɨpe oï. Jáeramo ukɨyete reta. Tu ukɨyete wi.

36Jayawe tu Jacob jei chupe reta: “Pereko pewa ko ukañɨ ma chewi mokui cheraɨ reta. Tenonde cheraɨ José ukañɨ, jare añawe cheraɨ Simeón ukañɨ wi chewi. Jare añawe pipota peraa ye peï chewi Benjamín. Opaete kua mbaesusere oa oï cheré, mbaetɨ peré,” jei chupe reta.

37Jayawe Rubén jei tu pe: “Emee chewe ayandareko waerä jese, jare taru ye ndewe. Aru yewɨ'ä ndewe yawe, jayawe iyuka cheraɨ reta mokui rewe,” jei tu pe.

38Erëi Jacob jei chupe reta: “Oota’ä cheraɨ mii pe reta ndiwe. Echa’ä tɨkeɨ umano ma, jare jaeño ma ko iko pëti ichɨ wae imembɨ. Chendechiete ma parawete, jare uasa yawe marái chupe tape rupi, cheyukata ko mbɨatɨtɨ,” jei chupe reta.

Currently Selected:

Génesis 42: gnwPB

Highlight

Copy