Génesis 43

José tɨkeɨ reta yuweru ye ɨwɨ Egipto pe

1Joko wi jeieteño karuái täta rupi ɨwɨ Canaán pe. 2Jare ɨmambae Jacob jëtara reta opa jou jokua tembiu uerukue ɨwɨ Egipto wi wae. Jáeramo Jacob jei taɨ reta pe: “Pekua pewa ye yanderembiurä ɨwɨ Egipto pe,” jei chupe reta.

3Erëi Judá jei tu pe: “Jokua mburuwicha ɨwɨ Egipto pewa jei ma orewe: ‘Peru’ä yawe perɨwɨ pe ndiwe, awɨye ye peyu cherowai,’ jei orewe,” jei. 4“Nemaeño oo yawe orerɨwɨ Benjamín ore ndiwe, jayawe ndoota ndowa ye yanderembiurä. 5Erëi nemaeño’ä yawe, ndoota’ä. Echa’ä jokua mburuwicha jei orewe nduraa’ä yawe orerɨwɨ ore ndiwe, ndarau orepuere ndoo ye jae jowai,” jei Judá tu pe.

6Jayawe Jacob ipɨatɨtɨ rewe upɨrandu chupe reta: “¿Maera pa pembeu jokua mburuwicha pe ime penoi ïru perɨwɨ wae? ¿Maera pa peru chewe kua yembɨawái tuicha wae?” jei chupe reta.

7Jae reta jei chupe: “Jokua mburuwicha jeiete upɨrandu orewe orerëtara reta rewa. Jare upɨrandu wi orewe: “¿Peru imeño pa iko? ¿Ime pa penoi ïru perɨwɨ?’ jei orewe,” jei reta chupe. “Ore imeta ko numɨmbeu chupe jesewa. Ore nduikuaa’ä nduiko jae oreokuita ko nduraa waerä chupe orerɨwɨ,” jei reta tu Jacob pe.

8Jayawe Judá jei tu Jacob pe: “Emondoño kunumi che ndiwe jare ndoo woita,” jei. “Erëi nemondo’ä yawe, yanderowaruruta ñaï – nde, jare ore, jare oresambiaɨ reta wi,” jei. 9“Mase, che tayandareko kawi jese. Erëi mbae uasa chupe yawe, che tanoi kuri teko tuicha wae jesewa jaeño mái pewa,” jei. 10“¡Kuerae ma nde orembɨawai’ä yawe, mokui wese ma ndoota tëi jare ndoyu yeta tëi ma ko!” jei Judá tu pe.

11Jayawe Jacob jei taɨ reta pe: “Jukuäraita yawe, peraa jayawe amokue mbaembae ikawi wae kua yandeɨwɨ pewa pemee waerä mburuwicha pe,” jei. “Peraa pemee chupe mbaembae utimbo kawi wae, jare ɨwɨrayaɨsɨ bálsamo jare mirra, jare ei, jare sara reta, jare ɨwɨra almendra#43.11 Almendra ko jae ɨwɨra ɨwɨ Canaán pewa ía sara echa rami. ía reta,” jei. 12“Peraa wi mokui wese ye yanderembiu jepɨrä, echa’ä aramoi tenonde uyawɨ ramo oñono ye pekorepoti perewɨta japɨpe. Jáeramo imeta ko pemee ye chupe jokua korepoti,” jei. 13“Peraa wi perɨwɨ Benjamín jare pekua ye mburuwicha jowai,” jei chupe reta.

14Jare Jacob jei wi chupe reta: “Tumpa opaete mbaepuere onoi wae tuyapo mburuwicha pe ipɨakawi waerä yandewe, jare tumee ye yandewe Simeón jare Benjamín. Erëi umano chewi yawe cheraɨ reta, jukuärái jayawe tuiko. ¿Mbae ye ma pa che ayapota?” jei Jacob taɨ reta pe.

15Jayawe uyeyapɨkatu reta jare opa oë yuraa reta. Jare wɨraa reta jokua mbaembae umee waerä mburuwicha pe. Wɨraa reta wi mokui ye tembiurä jepɨrä. Wɨraa reta wi tɨwɨ Benjamín jae reta ndiwe jare yuraa ye reta ɨwɨ Egipto kotɨ.

Jare yuraa joko pe uwäe yawe, uyemboɨ reta José jowai. 16Jare José uecha yawe Benjamín oï jae reta ndiwe, oyokui jëta pewa uyeyokui chupe wae reta itenondewa jare jei chupe: “Eraa cherëta pe kua kuimbae reta,” jei. “Jawoi pewa iyuka pëti mbaemɨmba jare iyapo tembiu ikawi wae. Echa’ä jae reta ukaruta che ndiwe ara mbɨte pe,” jei oyokui. 17Jayawe jae uyapo José oyokui wae rupi jare oo woi wɨraa reta José jëta kotɨ.

18Erëi José tɨkeɨ reta jare Benjamín uikuaa reta yawe wɨraa onoi reta José jëta pe, ukɨye reta jare jei reta iyupe: “Mburuwicha uikuaa ko aipo jokua korepoti kía nunga oñono ye yandewe yanderewɨta japɨpe wae rewa. Añawe jëwa oï chupe yanembɨjeko waerä jare yandepɨsɨ waerä. Añawe upɨ̈rota oï yandewi yanemburika reta, jare yandapota oï yayeyokui täta chupe waerä. Jokuaerä ko yandereraaka oï jae jëta pe,” jei reta iyupe.

19Jayawe yuraa uwäe reta José jëta jöke pe yawe, jare ndei uike o pe mbowe, oya reta jokua José pe uyeyokui wae re uyemɨngeta reta waerä jae ndiwe. 20Jare jei reta chupe: “Oremburuwicha, iyapɨsaka mii michi pewa oreré,” jei reta. “Tenonde yawe, ore ndoyu kua pe jaeño ndowa waerä orerembiurä. 21Erëi noë yawe kua wi, jare ndoo nuwäe yawe kiape jokua pɨ̈tu ndupɨtata nduiko wae pe, ndoyora pëti pëti wae orerewɨta. Jare nduecha japɨpe oï opaete orekorepoti tembiurä jepɨrä tëi wae. Jáeramo ndueru ye jokua korepoti,” jei reta. 22“Ore nduikuaa’ä kía ra oñono ye orekorepoti orewe orerewɨta japɨpe wae. Erëitu ndueru ye wi ïru korepoti ndowa ye waerä orerembiurä,” jei reta José pe uyeyokui wae pe.

23Jayawe jae jei chupe reta: “Awɨye pepɨatɨtɨ jare awɨye pekɨye wi,” jei. “PeTumpa – peru iTumpa ko – jae ko aipo oñono pewe perewɨta japɨpe. Echa’ä che etei ko aipɨsɨ pekorepoti wae,” jei chupe reta. Joko wi ueru Simeón chupe reta. 24-25Jare uikuaaka chupe reta José ukaruta oï jae reta ndiwe ara mbɨte pe jëta pe. Jayawe wɨraa reta José jëta japɨpe. Joko wi ueru chupe reta ɨ oyoe waerä ipɨ. Jare wɨraa wi umɨngaru chupe imburika reta. Tɨkeɨ reta jare Benjamín uäro José yureko rambuewe, uyapɨkatu reta mbaembae ueru umee waerä José pe wae.

26Joko wi José ou uwäe yawe jëta pe, jae reta umee chupe jokua mbaembae reta, jare uñeñono reta ɨwɨ re uipɨu rewe José jowai. 27Jare José upɨrandu chupe reta: “¿Kërái pa peï?” Jare upɨrandu ye chupe reta tu rewa: “Pe reta pemiäri chewe peru indechi mii wae rewa. ¿Kërái pa oï jae? ¿Imeño pa iko jae?” jei José chupe reta.

28Jayawe jae reta jei chupe: “Oreru imeño oï jare ikawiño oï,” jei reta chupe. Jare uñeñono ye reta ɨwɨ re José jowai uipɨu rewe.

29Jare José uecha jae reta ndiwe oï tɨwɨ Benjamín – José ichɨ imembɨ ko. Jayawe upɨrandu chupe reta: “¿Jae ko perɨwɨ pe reta pemiäri jese chewe wae?” jei. Jare José jei Benjamín pe: “Tumpa tuyandareko nderé, cheraɨ,” jei chupe.

30Erëi José uecha rambuewe Benjamín, uipota echa uyao uyerowia pɨpei. Jáeramo usɨrɨ chuwi reta, jare uike pëti o mbaetɨ kiawe oï wae pe, jare joko pe uyao.

31Jare ipɨamaña ye ma yawe, José oyowae kawi, jare ou ye Benjamín jare tɨkeɨ reta ñonoï wae pe. Joko wi oyokui chupe uyeyokui wae reta oñono waerä tembiu.

32Jare ueru chupe reta tembiu yawe, José uwapɨ tee imesa pe. Ambɨe mesa pe Benjamín jare tɨkeɨ reta uwapɨ tee reta wi. Jare ïru Egipto pewa ukaruse José ndiwe wae reta uwapɨ tee reta wi Benjamín jare José tɨkeɨ reta wi. Echa’ä jokua ara reta rupi Egipto pewa reta ukaru’ä etei hebreo reta ndiwe umae kawi’ä jese reta ramo.

33Ndei ukaru reta mbowe, José umbɨasa umbɨwapɨka waerä Benjamín jare tɨkeɨ reta tenondewa wiwe taɨkuewaete rewa iaño rupi. Jáeramo jae reta ipɨakañɨete jare jei reta iyupe: “¿Kërái ra uikuaa mburuwicha ñaneaño rewa?” jei reta iyupe.

34Joko wi José umeeka imesa wi tembiu chupe reta, erëi Benjamín pe umeeka pandepo wese ye tɨkeɨ reta wi. Jare ukaru reta jare jou reta vino José ndiwe uyerowia rewe uyemɨngapɨɨ rewa.

Currently Selected:

Génesis 43: gnwPB

Highlight

Copy