Génesis 41

José uikuaaka mburuwicha wasu ipau rewa

1Joko wi mokui año ma uasa yawe, pëti pɨ̈tu mburuwicha wasu oke iko yawe, upau. Jare ipau pe jae iko ɨ wasu Nilo jee wae jembeɨ pe. 2Jare aramoiño jae uecha oë reta ɨ wasu wi chiu waka maepöra jare ikɨra kawi wae reta. Jare yuweru ukaru ɨ wasu jembeɨ rupi. 3Joko wi oë reta ïru chiu waka reta wi. Erëi jokua waka reta kachi jare ipiru wae reta. Jare yuraa uyemboya reta tenonde chiu waka ikɨra wae reta ɨ wasu jembeɨ rupi ñonoï wae reta re. 4Jare jokua chiu waka kachi jare ipiru wae reta opa jou jokua ïru chiu waka maepöra jare ikɨra kawi wae reta. Jayawe mburuwicha wasu usareko ipɨakañɨ rewe.

5Jare oke ye yawe, jekuae upau ye. Jare ipau pe uecha aramoiño jeñɨ pëti trigo iɨ, jare oë woi chiu jäka yawɨye kawi jare maepöra wae reta. 6Jare uecha wi jae reta jaɨkue rupi oë ïru chiu jäka reta. Erëi jokua reta pöiraɨ jare ipiru wae reta, umbɨyɨpi echa ɨwɨtu ɨwɨ utiniete wae kotɨ wi ou wae rami. 7Jare jawoi pewa jokua chiu jäka pöiraɨ jare ipiru wae reta opa jou jokua ïru chiu jäka yawɨye kawi wae reta. Jayawe mburuwicha wasu usareko jare uikuaa upau yepe.

8Joko wi pɨarewe ndimbowe yawe, mburuwicha wasu ipɨatɨtɨete upɨta ipau reta jeko pewa. Jáeramo omondo uenika opaete upurumbusuerte wae reta jare opaete iyarakuaa katu wae reta ɨwɨ Egipto pewa. Jayawe mburuwicha wasu imiäri chupe reta ipau reta rewa. Erëi pëti awe jae reta ipuere’ä uikuaaka chupe mbae ra ipau reta uipota jei wae.

9Jayawe mburuwicha wasu pe vino umeeñoi wae jei chupe: “Añawe chemandúa aï ayawɨ aiko wae re,” jei. 10“Nde ndepochɨ ndiko yawe chekotɨ jare mbɨyape uyapo wae reta itenondewakue kotɨ, oreñonoka mokui rewe peresorɨru pe,” jei chupe. 11“Joko pe nduiko yawe, pëti pɨare ore mokui rewe ndupau wi. Jare pëti pëti orepau reta ime wɨreko mbae uipota jei wae,” jei chupe.

12“Jare iko joko pe wi ore ndiwe pëti hebreo taurusu wae. Jae ko mburuwicha wasu isɨndaro reta itenondewa pe uyeyokui iko wae. Oremiäri yawe chupe orepau rewa, jae uikuaaka kawi orewe,” jei chupe. 13“¡Jare uyeyapo orewe jae jei wae etei! Nde nemee ye chewe cherenda ayeyokui ye waerä ndewe, jare ndiyukaka mbɨyape uyapo wae reta itenondewa.” Jukuärái jei mburuwicha wasu pe.

14Jayawe mburuwicha wasu omondo amokue uyeyokui chupe wae reta ueru waerä José. Jáeramo jae reta jawoi pewa onoe reta José peresorɨru wi, jare uñapika reta ía, jare uipëpika reta chuwi jendɨwaa, jare umee chupe temimonde ikɨa mbae wae uyemonde waerä. Joko wi ueru reta José mburuwicha wasu jowai.

15Jayawe mburuwicha wasu jei José pe: “Che apau, erëi mbaetɨ kiawe ipuere uikuaaka chewe chepau rewa,” jei. “Erëi uikuaaka reta chewe nde rewa, kërái nde ndikuaa yawe kía ipau rewa, nde ndaye ndikuaa ndikuaaka waerä chupe mbae uipota jei ipau wae,” jei José pe.

16Jayawe José jei mburuwicha wasu pe: “Che jae’ä ko aikuaaka pau rewa wae. Tumpa ko jae uikuaakata ndewe ndepau rewa wae jare nembɨpɨakatuta,” jei chupe.

17Jayawe mburuwicha wasu imiäri José pe ipau rewa jare jei chupe: “Chepau pe aiko ɨ wasu Nilo jembeɨ pe. 18Aramoiño aecha oë reta ɨ wasu wi chiu waka maepöra jare ikɨra kawi wae reta. Jare yuweru ukaru ñonoï ɨ wasu jembeɨ rupi,” jei chupe. 19“Joko wi oë ïru chiu waka reta wi jare yuraa uyemboya reta ïru chiu waka reta re. Jokua waka reta kachi jare ipiru wae reta, jare mbaetɨ etei aecha jokua nunga waka reta kachiete wae rami opaete kua ɨwɨ Egipto rupi,” jei chupe. 20“Jare jokua chiu waka kachi jare ipiru wae reta opa jou jokua ïru chiu waka maepöra jare ikɨra kawi wae reta. 21Erëi yepe tëi opa ma jou, jesewe imeño mbaetɨ mbae jou wae echa reta, echa’ä jekuaeño ipiru ñonoï tenonde rami. Joko wi asareko,” jei chupe.

22“Jawoi pewa ake ye jare apau ye. Chepau pe aecha aramoiño jeñɨ pëti trigo iyɨpɨ, jare oë woi chiu jäka yawɨye kawi jare maepöra wae reta. 23Jare aecha wi jae reta jaɨkue rupi oë ïru chiu jäka reta. Erëi jokua reta pöiraɨ jare ipiru wae reta, umbɨyɨpi echa ɨwɨtu ɨwɨ utiniete wae kotɨ wi ou wae rami,” jei chupe. 24“Jare jawoi pewa jokua chiu jäka pöiraɨ jare ipiru wae reta opa jou jokua ïru jäka yawɨye kawi wae reta. Jukuärái ko chepau reta,” jei chupe. “Chemiäri tëi opaete chepau reta rewa upurumbusuerte wae reta pe. Erëi pëti awe jae reta ipuere’ä uikuaaka chewe mbae ra uipota jei wae,” jei imiäri José pe.

25Jayawe José jei mburuwicha wasu pe: “Ndepau reta uipota jei pëti waeño,” jei. “Tumpa uikuaaka oï ndewe jae uyapota oï wae,” jei chupe. 26“Jokua chiu waka ikɨra wae reta jare jokua chiu trigo jäka yawɨye kawi wae reta mokui rewe uyembɨjaanga chiu año reta re. Jae ko chiu año opaete koo reta kua ɨwɨ Egipto pewa imeta jeta ye ye mbaewɨye wae,” jei. 27“Jare jokua chiu waka kachi jare ipiru wae reta jare jokua chiu trigo jäka pöiraɨ wae jare ipiru wae reta uyembɨjaanga chiu año reta re imeta karuái wasu wae,” jei chupe.

28“Jukuärái che jae ndewe, mburuwicha wasu, Tumpa uikuaaka oï ndewe jae uyapota oï wae,” jei. 29“Tenonde outa rani chiu año mbaewɨye jeta ye ye wae opaete kua ɨwɨ Egipto rupi,” jei. 30“Erëi taɨkue rupi outa oï karuái wasu chiu año pewa. Jayawe ɨwɨ Egipto pewa reta iñakañɨta jokua tenonde chiu año mbaewɨye jetaete wae wi, echa’ä karuái wasu urukuasɨeteta opaete kua ɨwɨ pewa reta,” jei. 31“Jukuärái opata iñakañɨ reta jokua tenonde chiu año mbaewɨye jetaete wae wi, echa’ä karuái wasu jasɨeteta ko,” jei. 32“Ndepau mokui wese wae uikuaaka oï ndewe jokua uyeyapota ko wae, jare ɨmambae rupiño Tumpa uyapota oï,” jei José mburuwicha wasu pe.

33Jayawe José umbɨarakuaa mburuwicha wasu jare jei chupe: “Jáeramo ikawi ko ndeka jare ndiparawo waerä pëti kuimbae iyarakuaa katu wae,” jei. “Emee mii chupe mbaepuere opaete kua ɨwɨ Egipto pewa reta re,” jei. 34“Jare iñono wi mburuwicha reta opaete kua ɨwɨ rupi umbatɨka waerä tembiurä,” jei. “Jare opaete kua ɨwɨ Egipto pewa umaetɨ wae reta tumee mbɨte wi mbɨte seri rupi imbaewɨye wi jokua mburuwicharä niñonota neï wae reta pe. Jare jokua mburuwicha reta tupika jokua mbaewɨye reta kua chiu año jeta mbaewɨye ime oï rambuewe,” jei. 35“Iyokui jokua mburuwicha reta umbatɨka waerä opaete jokua tembiurä kua chiu año ikawi wae wi,” jei. “Jare emee chupe reta mbaepuere upika reta waerä jokua tembiurä jare uyandareko kawi waerä jese pëti pëti tëta wasu reta rupi,” jei. 36“Jukuärái jokua tembiurä upikue reta imeta opaete kua ɨwɨ Egipto pewa reta jou waerä ou uwäe yawe jokua karuái wasu chiu año pewa,” jei. “Jukuärái ndarau jowaruru umano reta,” jei José mburuwicha wasu pe.

Mburuwicha wasu umbɨjee José ɨwɨ Egipto pewa reta imburuwicharä

37Jokua José jei wae ikawiete mburuwicha wasu pewarä jare imborɨa umbɨarakuaa wae reta pewarä. 38Jayawe mburuwicha wasu jei imborɨa reta pe: “Ndarau etei ñawäe pëti kuimbae iyarakuaa katuete wae José echa, echa’ä Tumpa iEspíritu oï jese ramo,” jei chupe reta.

39Jayawe mburuwicha wasu jei José pe: “Tumpa etei uikuaaka ma ndewe kua chepau reta rewa,” jei. “Jáeramo mbaetɨ ye kía iyarakuaa katuete ndewi wae,” jei. 40“Añawe wiwe nde ndikota opaete kua ɨwɨ imburuwicha reta itenondewarä,” jei chupe. “Opaete cheɨwɨ pewa reta tuyapo nde ndere wae rupi uipɨu rewe. Jaeño che anoita mbaepuerete ndewi, echa’ä che ko jae mburuwicha wasu. 41Mase, che amee aï ndewe mbaepuere opaete ɨwɨ Egipto re,” jei mburuwicha wasu José pe.

42Jayawe mburuwicha wasu ueki ipoäkarewái mburuwicha wasu pewa jare oñono José ipoäka re. Jare umbɨyemimondeka José temimonde ikawi wae mburuwicha wasu pewa pe, jare oñonoka mboɨ oro pewa José iyayu re. 43Mburuwicha wasu umee wi José pe pëti karosa mburuwicha wasu uruwata pɨpe wae. Jare omondo jae jenonde amokue sɨndaro jae iyandarekoa reta usapɨkai pɨi reta: “¡Piñeñono petawa re kua yanemburuwicha jowai!” jei reta. Jukuärái mburuwicha wasu uyapo José opaete ɨwɨ Egipto pewa reta itenondewarä.

44Jare mburuwicha wasu jei wi José pe: “Yepe tëi che ko jae mburuwicha wasu, erëi kiawe ɨwɨ Egipto pewa ndarau ipuere uyapo mbae awe nde ndere mbae,” jei chupe.

45-46Jayawe mburuwicha wasu umbɨjee José pëti tee ñee ɨwɨ Egipto pewa pe, Zafnat-panea ko. Jare umee chupe wi pëti kuñatái ɨwɨ Egipto pewa jembirekorä Asenat jee wae. Jae ko kuimbae Potifera jee wae tayɨ. Potifera ko jae tëta wasu On jee wae pewa, jare pëti tumparaanga re umbɨadora wae reta itenondewa. Jayawe José ime wɨreko treinta año yawe, kua mbaembae uasa jae uyemboɨ yawe mburuwicha wasu ɨwɨ Egipto pewa jowai.

Joko wi José oë oo mburuwicha wasu jowai wi jare oo opaete ɨwɨ Egipto rupi umae waerä.

47Jokua chiu año ikawi wae rambuewe, opaete temitɨ uñeñotɨ wae yawɨye kawiete. 48Jayawe José umbatɨka jetaete tembiurä jokua chiu año mbaewɨye ikawi wae reta iko rambuewe ɨwɨ Egipto pe, jare upika tëta wasu ɨwɨ Egipto pewa reta rupi. Opaete koo reta wi José umbatɨka mbaewɨye, jare upika pëti pëti tëta wasu rupi koo reta tëta wasu wi koiño oï wae wi. 49José umbatɨka jare upika jetaete tembiurä, jeta ye ye ɨwɨkuïti mar jembeɨ rupi oï wae echa rami. Jare tembiurä umbatɨ ñonoï wae reta tenonde yawe umbatɨ reta umɨanga rewe. Erëi umbɨyemboɨ umɨanga reta, echa’ä tembiurä jetaete ye ramo. Jáeramo upi reta umɨanga mbae rewe.

50Ndei karuái wasu ou uwäe mbowe, José jembireko Asenat ime mokui imembɨ kuimbae. Asenat ko Potifera jee wae tayɨ. Potifera ko jae tëta wasu On jee wae pewa, jare pëti tumparaanga re umbɨadora wae reta itenondewa. 51Jare José umbɨjee taɨrɨpɨ Manasés,#41.51 Tee Manasés uipota jei “ñanemɨakañɨka wae” hebreo ñee pe. echa’ä jei iyupe: “Tumpa chemɨakañɨka ma opaete chembaesusere reta wi jare opaete cherëtara reta wi,” jei iyupe. 52Jare José umbɨjee taɨ taɨkuewa Efraín,#41.52 Tee Efraín uipota jei “Tumpa chemɨñemoña wae” hebreo ñee pe. echa’ä jei iyupe: “Tumpa umee chewe chesambiaɨ retarä kua ɨwɨ jeta aiporara wae pe,” jei iyupe.

53-54Jare jokua chiu año ikawi wae reta uasa ma yawe, uyembɨpɨ chiu año karuái tuicha wae kërái José jei rami. Jare jokua karuái tuichaete wae uwäe opaete ambɨembɨe ɨwɨ reta rupi. Jukuärái wi ɨwɨ Egipto pe opaete umaetɨ wae jeñɨ'ä etei. Erëitu joko pe ime jokua tembiurä upikue reta wae.

55Jare opaete umaetɨ wae jeñɨ'ä etei yawe ɨwɨ Egipto pe, umbɨpɨ uata tembiurä chupe reta. Jáeramo jeta yuraa uyerure reta mburuwicha wasu pe tembiurä re. Jayawe mburuwicha wasu omondo jae reta yuraa waerä José kotɨ jare uyapo reta waerä opaete jae jei wae rupi. 56Jayawe karuái tuichaete oï ramo, José uipeaka opaete tembiurä jɨru reta jare umbɨpɨ owaka tembiurä ɨwɨ Egipto pewa reta pe.

57Jayawe ou reta ikotɨ̈atɨ̈a ɨwɨ wi Egipto pe owa reta waerä tembiurä José wi, echa’ä karuái tuichaete oï opaete ɨwɨ rupi ramo.

Currently Selected:

Génesis 41: gnwPB

Highlight

Copy