Éxodo 3

Tumpa ueni Moisés yái jendɨ oï wae wi

1Pëti ara Moisés oo umɨngaru waerä jowaya Jetro iowecha reta. Jare wɨraa warasɨ uike wae kotɨ ɨwɨtini wasu kutɨ katu kapii ime wae pe. Jare wɨraa uruwäe reta ɨwɨtu wasu Horeb#3.1 Jokua ɨwɨtu wasu jee wi ko Sinaí. jee wae pe, jokua ɨwɨtu wasu Tumpa oñono tee jae imaerä wae pe. 2Joko pe araɨwa Tumpa etei wae uyekuaa Moisés pe pëti yái jendɨ oï wae pe kuärái: Moisés uecha yái tuicha jendɨ oï, erëi okai’ä oï. 3Jayawe ipɨakañɨ jare jei iyupe: “¿Marái ramo okai’ä jokua yái? Yaecha, taa tamae jese,” jei iyupe.

4Erëi Tumpa uecha yawe Moisés oya katu ou oï jese wae, ueni yái jendɨ oï wae wi jare jei chupe: “¡Moisés, Moisés!” jei chupe.

Moisés jei: “¿Mbae pa, cheYa?” jei.

5Jare Tumpa jei chupe: “Epɨta joko pe. Awɨye eya katu cheré,” jei chupe. “Eki ndepɨpasa, echa’ä kua ɨwɨ ndiyemboɨ neï jese wae añono tee chemaerä,” jei chupe. 6“Che ko jae nderamɨkue reta Abraham, Isaac, jare Jacob iTumpa,” jei chupe. Jayawe Moisés uyandu yawe kua ñee, oñomi jowa ipo pe, echa’ä ukɨyete umae jese ramo.

7Jare Tumpa jei chupe: “Che aecha aï kërái uiporara ñonoï aiparawo wae reta ɨwɨ Egipto pe,” jei. “Ayandu ma ipüe ñonoï täta upurumɨmbarawɨkɨ wae reta jeko pewa. Jare aikuaa wi jae reta ikuasɨete ñonoï reta,” jei. 8“Jáeramo che ayu aepɨ reta waerä ɨwɨ Egipto pewa reta wi,” jei. “Che anoeta reta jokua ɨwɨ Egipto wi araa waerä pëti ɨwɨ ikawiete wae pe kiape uyekouta ñonoï wae,” jei. “Jokua ɨwɨ pe ñonoï cananeo jee wae reta, jare heteo jee wae reta, jare amorreo jee wae reta, jare ferezeo jee wae reta, jare heveo jee wae reta, jare jebuseo jee wae reta,” jei Tumpa Moisés pe.

9Jare Tumpa jei wi chupe: “Mase, aiparareko ayandu yawe Israel iñemoñaa reta iyao,” jei. “Aecha wi ɨwɨ Egipto pewa reta kërái urukuasɨete Israel iñemoñaa reta,” jei. 10“Jáeramo ekua nde. Che nomondota ɨwɨ Egipto pe mburuwicha wasu jowai nenoe waerä jokua ɨwɨ Egipto wi Israel iñemoñaa reta – jae reta ko che aiparawo wae,” jei Tumpa Moisés pe.

11Erëi Moisés jei Tumpa pe: “¿Kía pa ko che a waerä mburuwicha wasu jowai? Ndarau chepuere anoe Israel iñemoñaa reta ɨwɨ Egipto wi,” jei Moisés chupe.

12Jayawe Tumpa jei chupe: “Añetete che aïta nde ndiwe,” jei. “Nenoeta reta ɨwɨ Egipto wi. Jare pe reta peyu yeta kua pe cheree pembutuicha waerä kua ɨwɨtu wasu re. Jare jokua uikuaakata che ko jae nomondo wae,” jei Tumpa chupe.

13Erëi Moisés jei Tumpa pe: “Che a yawe jae waerä Israel iñemoñaa reta pe, ‘Yanderamɨkue reta iTumpa chembou pekotɨ,’ aikuaa aï jae reta upɨranduta chewe kërái ko nderee wae. Jayawe, ¿mbae pa jaeta chupe reta?” jei Moisés Tumpa pe.

14Jayawe Tumpa jei Moisés pe: “Che cheree ko CHE KO CHE,” jei chupe. “Nde ndereta chupe reta, ‘CHE KO CHE jee wae chembou pekotɨ.’ 15Ere wi chupe reta kuärái: ‘Tumpa ikoño mái wae – jae ko yanderamɨkue reta Abraham, Isaac, jare Jacob iTumpa – jae ko chembou pekotɨ,’ ere chupe reta. Jokua ko cheree jaeño mái pewa, jare opaete piñemoñaa reta rupi timandúa kua ko cheree wae,” jei.

16“Ekua embatɨ Israel iñemoñaa itenondewa reta, jare ere chupe reta kuärái: ‘Tumpa ikoño mái wae – jae ko yanderamɨkue reta Abraham, Isaac, jare Jacob iTumpa – uyekuaa chewe jare jei chewe kuärái: ‘Aikuaa aï kërái pe Israel iñemoñaa piko wae reta piporara peï ɨwɨ Egipto pewa reta ipo pe wae. Jare aiparareko amae peré. 17Jáeramo che ponoeta ɨwɨ Egipto wi jare puraata pëti ɨwɨ ikawiete wae pe kiape piyekouta peï wae. Jokua ɨwɨ pe ñonoï cananeo jee wae reta, heteo jee wae reta, amorreo jee wae reta, ferezeo jee wae reta, heveo jee wae reta, jare jebuseo jee wae reta.’ Jukuärái ere chupe reta,” jei Tumpa Moisés pe.

18Jare Tumpa jei wi chupe: “Jae reta uyapɨsakata nderé. Jare nde ndeota Israel iñemoñaa itenondewa reta ndiwe mburuwicha wasu jowai, jare ndereta chupe kuärái: ‘Ore hebreo reta nduiko wae, oreTumpa ikoño mái wae uyekuaa orewe. Jáeramo emaeño oreré noë nduwata waerä kua wi mbapɨ ara rupi ɨwɨtini wasu kotɨ. Joko pe orepuere nduyuka mbaemɨmba reta numee oreTumpa pewarä.’ Jukuärái ndereta chupe,” jei.

19“Erëi che aikuaa aï mburuwicha wasu Egipto pewa umaeñota’ä peré peo waerä. Jaeño chembaepuere rupi umaeñota oï peré,” jei. 20“Jayawe chembaepuere rupi aiporarakata aï ɨwɨ Egipto pewa reta pe mbaembae ipuere mbaei kía uyapo wae pɨpe. Jayawe ramo mburuwicha wasu umaeñota peré peë peo waerä,” jei chupe.

21“Che puparawo ma chemaerä. Jare ayapota Egipto pewa reta uipɨu waerä pewi jare umae kawi waerä peré. Jukuärái pe reta peë peo yawe ɨwɨ Egipto wi, peraata jeta mbaembae ikawiete wae,” jei. 22“Pëti pëti kuña Israel iñemoñaa reta tueka jëta iyɨpɨ rupiwa Egipto pewa reta pe, jare jae reta imboupa pe wi, mbaembae jepɨete wae oro pewa jare korepoti tïi wae pewa. Tueka reta wi isambiaɨ reta jemimonderä. Jukuärái peraata peyupe ɨwɨ Egipto pewa reta imbaembae jepɨ wae,” jei Tumpa Moisés pe.

Currently Selected:

Éxodo 3: gnwPB

Highlight

Copy