Éxodo 4

Tumpa umee Moisés pe mbaepuere uyapo waerä mbaembae ipuere mbaei kía uyapo wae

1Jayawe Moisés jei Tumpa pe: “Erëi ndarau chererowia reta. Jare ndarau wi uyapɨsaka reta che jae wae re. Jae reta jeita chewe: “¿Këraita ra Tumpa uyekuaa ndewe?’ jeita chewe reta,” jei Moisés Tumpa pe.

2Jayawe Tumpa upɨrandu chupe: “¿Mbae pa nenoi ndepo pe?” jei.

Jare Moisés jei chupe: “Chepopoka ko,” jei.

3Tumpa jei chupe: “Emombo ndepopoka ɨwɨ pe,” jei. Jare Moisés omombo ɨwɨ pe yawe, ipopoka uyeyapo mboi. Moisés jokua uecha yawe, ukɨye jare usɨrɨ chuwi.

4Jayawe Tumpa jei chupe: “Ipɨsɨ mboi juwai pe,” jei. Jare Moisés uipɨsɨ mboi juwai pe yawe, uyeyapo ye ipopoka Moisés ipo pe.

5Jare Tumpa jei chupe: “Kua iyapo Israel iñemoñaa itenondewa reta jowai, jae reta wɨrowia waerä peramɨkue reta Abraham, Isaac, jare Jacob iTumpa ko uyekuaa ndewe wae,” jei.

6“Añawe iñono ndepo neremimonde japɨpe ndepɨtía re,” jei chupe. Jayawe Moisés uyapo jukuärái, jare ueki ye yawe, uecha ipo ipire mbaerasɨ okui wae jare opa uyepiro oï.

7Jayawe Tumpa jei chupe: “Añawe iñono ye ndepo neremimonde japɨpe,” jei chupe. Jare Moisés oñono ye ipo jemimonde japɨpe. Erëi ueki ye yawe, uecha ipo ikawi oï tenonde iko wae echa, opaete jete ipire rami.

8Jare Tumpa jei chupe: “Iyapo wi Israel iñemoñaa itenondewa reta jowai. Jare jae reta ndererowia’ä yawe jokua tenondewa ndiyapo wae rupi, jayawe ndererowiata ñonoï reta kua ïru ndiyapo yawe,” jei. 9“Erëi ndererowia’ä reta yawe jokua mokui ndiyapo wae rupi, jare uyapɨsaka’ä ñeño reta yawe niñee re, jayawe ekua eki ɨ ɨ wasu wi jare epɨyere ɨwɨ utini wae re. Jare ɨwɨ re jokua ɨ uyeyapota tuwɨ,” jei Tumpa Moisés pe.

10Erëi Moisés jei Tumpa pe: “CheTumpa, awɨye mii chemondo. Chemichi wiwe che mbaetɨ chepuere ayemɨngeta kawi. Jare añawe, yepe tëi ayemɨngeta aï nde ndiwe, jesewe chepuere nunga’ä ayemɨngeta,” jei Moisés Tumpa pe.

11Jayawe Tumpa jei Moisés pe: “¿Kía pa uyapo ɨwɨ pewa reta iyururä? ¿Kía pa uyapo iyapɨsa mbae wae jare iñee mbae wae? ¿Kía pa umee ɨwɨ pewa reta pe jesarä jare uyapo jesa mbae wae? Jaeño che, ndeTumpa, chepuere ayapo,” jei chupe. 12“¡Jáeramo ekua añawe! Che aïta nde ndiwe jare nomborɨta ndiyemɨngeta waerä. Aikuaakata ndewe opaete mbae ndereta wae,” jei Tumpa Moisés pe.

13Erëi Moisés jei ye chupe: “CheTumpa, emondo mii ïru wae chepepɨka pe,” jei.

14Jokua uyandu yawe, Tumpa pochɨ Moisés pe. Jáeramo jei chupe: “Jayawe nderɨkeɨ Aarón, Leví iñemoñaa pewa, jae uyemɨngeta kawi,” jei. “Jare aramoete jae ou oï nerowäiti waerä. Jae uyerowiata oï nderecha yawe,” jei. 15“Joko wi pe reta peo yeta ɨwɨ Egipto pe, jare joko pe nemɨmbeuta chupe mbaembae jei waerä. Che pomborɨta aï mokui rewe piyemɨngeta waerä, jare aikuaakata pewe mbaembae piyapo waerä,” jei chupe. 16“Jayawe Aarón uyemɨngetata opaete wae pe ndepepɨka pe. Jare kërái che, ndeTumpa, aikuaaka ndewe mbaembae ndere waerä wae, jae ramiño wi nde ndikuaakata Aarón pe mbaembae jei waerä. Jae uyapɨsakata niñee re Tumpa iñee re uyapɨsaka oï rami,” jei. 17“Jare awɨye neakañɨ eraa ndepopoka, echa’ä jokua pɨpe ndechakata chembaepuere. Echa’ä jokua pɨpe ndiyapota neï opaete mbaembae che jae ndewe wae.” Jukuärái jei Tumpa Moisés pe.

18-19Jayawe Moisés uñatima ye ɨwɨ Madián pe. Joko pe Tumpa jei chupe: “Awɨye ekɨye ndeo ye waerä ɨwɨ Egipto pe, echa’ä opa ma umano opaete jokua arakae uipota tëi ndeyuka wae reta,” jei chupe.

Jayawe Moisés oo uyemɨngeta jowaya Jetro ndiwe, jare jei chupe: “Emaeño mii cheré a ye waerä ɨwɨ Egipto pe cherëtáɨwa reta ñonoï wae pe. Aipota aikuaa aï imeño ra iko reta wae,” jei chupe.

Jare Jetro jei Moisés pe: “Ekuaño ndepɨawiwe rewe,” jei chupe.

Moisés uñatima ye ɨwɨ Egipto pe

20Jayawe Moisés ombopo jembireko jare taɨ reta mburika re, jare oë oo reta ɨwɨ Egipto kotɨ. Moisés wɨraa wi ipopoka Tumpa jei chupe rami.

21Jare yuraa reta rambuewe, Tumpa jei ye Moisés pe: “Ndeo newäe yawe ɨwɨ Egipto pe, chembaepuere rupi iyapo mburuwicha wasu jowai opaete mbaembae che aechakata aï ndewe wae,” jei. “Erëi che amɨtätata mburuwicha wasu ipɨa chuwi. Jayawe jae umaeñota’ä Israel iñemoñaa reta re oë wɨrae yuraa waerä,” jei. 22“Joko wi ndereta chupe kuärái: ‘OreTumpa jei kuärái: ‘Israel iñemoñaa reta ko cheraɨrɨpɨ rami. 23Jare che jae ma ndewe nemaeño waerä cheraɨrɨpɨ re oë oo cheree umbutuicha waerä. Erëi nde nemaeño’ä ma oë oo. Jáeramo añawe che ayukata aï ndewi nderaɨrɨpɨ,’ jei oreTumpa.’ Jukuärái ndereta mburuwicha wasu pe,” jei Tumpa Moisés pe.

24Joko wi uwata reta ɨwɨ Egipto kotɨ rambuewe, Moisés jare jëtara reta yuraa uwäe kiape upɨta oke reta waerä pɨarewe rewa. Joko pe Tumpa ou ombowaicho waerä Moisés jare uyukata tëi iko. 25-26Erëi Moisés jembireko Séfora jee wae ueki ita jaimbete wae, jare jokua pɨpe umbɨcircuncida#4.25 Umbɨcircuncida ko jae “circuncisión” jei chupe reta karái ñee pe wae. Kua ñee uipota jei uikɨ̈tika chuwi jäkuipire mii. Jokua umbɨjaanga yemɨngeta Tumpa arakae uyapo Abraham jare Abraham iñemoñaa kuimbae reta ndiwe wae re. Emɨngeta Génesis 17.9-14 pe. imembɨ kuimbae. Jáeramo Tumpa uyuka’ä Moisés. Joko wi Séfora uñatai Moisés ipɨ imembɨ umbɨcircuncida ipirekue pɨpe, jare jei chupe: “¡Nde ko jae cheme tuwɨ pewa chemaerä!” jei chupe.

27Jokua rambuewe, Tumpa jei Aarón pe: “Ekua eowäiti Moisés ɨwɨtini wasu pe,” jei chupe. Jayawe Aarón oo owäiti Moisés jokua ɨwɨtu wasu Tumpa oñono tee jae imaerä wae pe. Jare uyeyurupɨte reta jowa pe.#4.27 Arakae yawe ɨwɨ Canaán pewa reta jeko pe, kuimbae reta uyeyurupɨte jowa pe uechaka waerä uyerau wae jare uipɨu iyuwi wae. 28Jayawe Moisés umɨmbeu tɨkeɨ Aarón pe opaete Tumpa jei chupe umɨmbeu reta waerä ɨwɨ Egipto pewa reta pe. Jare umɨmbeu chupe wi jokua mbaembae uyapota oï Tumpa imbaepuere rupi wae rewa.

29Jaɨkue rupi Moisés jare Aarón yuraa uwäe reta ɨwɨ Egipto pe. Joko pe umbatɨ opaete Israel iñemoñaa itenondewa reta. 30Jare Aarón umɨmbeu chupe reta opaete Tumpa jei Moisés pe wae. Moisés uyapo wi Tumpa imbaepuere rupi jokua mbaembae Israel iñemoñaa reta jowai. 31Jayawe Israel iñemoñaa itenondewa reta wɨrowia Tumpa ombou chupe reta Moisés jare Aarón wae. Jáeramo uñeñono reta ɨwɨ re uñemɨmichi rewe jare umbutuicha reta Tumpa jee. Echa’ä jae reta uikuaa ma Tumpa uecha kërái uiporara ñonoï reta jare uiparareko umae oï jese reta wae.

Currently Selected:

Éxodo 4: gnwPB

Highlight

Copy