Éxodo 2

Moisés oa wae rewa

1Pëti kuimbae Leví iñemoñaa pewa umenda pëti kuña ndiwe Leví iñemoñaa pewa wi. 2Jayawe kuña ipurúa jare oa imembɨ kuimbae. Jare uecha sambiaɨ maepöra wae ko. Erëi imembɨ kuimbae ramo, jae oñomi ɨwɨ Egipto pewa reta wi mbapɨ yasɨ rupi. 3Erëi ipuere’ä ma oñomi yawe, uyapo pëti canasta, jare uyapete mbae ipomoete wae pɨpe uwewi kawi waerä ɨ iáramo. Jayawe umɨinge sambiaɨ canasta japɨpe, jare wɨraa ueya ñanapɨte pe ɨ wasu Nilo jee wae jembeɨ pe. 4Joko wi sambiaɨ jindɨ upɨta uipiäro uikuaa waerä mbae ra uasata oï jae ndiwe wae.

5Jare ndei ɨma mbowe, ou ɨ wasu kotɨ mburuwicha wasu tayɨ uyau waerä. Yuweru wi jae ndiwe amokue kuña uyeyokui chupe wae reta. Jare mburuwicha wasu tayɨ uyau iko rambuewe, kuña uyeyokui chupe wae reta uwata yureko ɨ wasu jembeɨ rupi. Aramoiño mburuwicha wasu tayɨ uecha jokua canasta ñanapɨte pe oï wae ɨ wasu jembeɨ pe. Jayawe omondo ueru. 6Jare uipea canasta yawe, uecha sambiaɨ uyao oï japɨpe. Jayawe mburuwicha wasu tayɨ uiparareko umae jese jare jei: “Kua sambiaɨ ko aipo jae pëti hebrea imembɨ,” jei.

7Jayawe sambiaɨ jindɨ ou mburuwicha wasu tayɨ kotɨ jare upɨrandu chupe: “¿Ndipota pa che a aeka waerä ndewe pëti kuña hebrea umbɨkambu jare umbɨkuakuaa waerä ndewe?” jei chupe.

8Jare mburuwicha wasu tayɨ jei chupe: “Jaekawi, ekua eru chewe,” jei chupe. Jayawe kuñatái oo ueru sambiaɨ ichɨ etei chupe.

9Jare mburuwicha wasu tayɨ jei chupe: “Eraa nerëta pe kua sambiaɨ chewe ukambupoi rewa. Ambɨepɨta ndewe,” jei chupe. Jayawe kuña wɨraa jëta pe sambiaɨ, jare umbɨkambu, jare uyandareko jese.

10Jaɨkue rupi sambiaɨ ukambupoi ma yawe, ichɨ wɨraa mburuwicha wasu tayɨ pe. Jayawe mburuwicha wasu tayɨ wɨreko sambiaɨ imembɨrä, jare umbɨjee Moisés,#2.10 Tee Moisés uipota jei “ueki” hebreo ñee pe. echa’ä jei: “Che aeki ɨ wi,” jei.

Moisés osi ɨwɨ Egipto wi

11Jeta año ma uasa yawe, Moisés ukuakuaa ma. Jare pëti ara Moisés oë oo opou waerä jëtáɨwa hebreo reta ipɨ. Joko pe uecha kërái kuimbae ɨwɨ Egipto pewa reta umɨmbarawɨkɨ täta hebreo reta. Aramoiño uecha pëti kuimbae Egipto pewa uinupa täta oï pëti kuimbae hebreo. 12Moisés umae opaete rupi, jare uecha yawe mbaetɨ wae echa kiawe chupe joko pe, jayawe Moisés uyuka jokua kuimbae Egipto pewa. Joko wi oñotɨ jetekue ɨwɨkuïti pe.

13Pɨarewe pe Moisés oo ye uwata jokoropi, jare uecha uñeräro ñonoï mokui hebreo reta. Jayawe Moisés upɨrandu teko iya pe: “¿Marái ramo ndekua neï neïru re?” jei chupe.

14Jayawe jokua kuimbae hebreo jei Moisés pe: “¿Kía pa neñono ma oremburuwicharä nde ndere waerä orereko rewa?” jei. “¿Ndipota pa cheyuka wi, jokua kuimbae Egipto pewa káarumo ndiyuka wae rami?” jei chupe. Jokua uyandu yawe, Moisés ukɨye jare jei iyupe: “Jokua ayapo wae uñemi’ä etei ko jayawe,” jei iyupe.

15Jare jokua jae uyapo wae jeräkua mburuwicha wasu pe. Jáeramo mburuwicha wasu omondo uekaka uyuka waerä tëi. Erëi Moisés osi ɨwɨ Egipto wi ɨwɨ Madián jee wae kotɨ.

Jare oo uwäe yawe joko pe, Moisés uwapɨ koiño pëti ɨkua wi. 16Joko wi yuweru jokua ɨkua kotɨ chiu kuñatái reta. Jae reta tu ko jae ɨwɨ Madián pewa, jare jokua ɨwɨ pewa Tumpa re wɨrowia wae reta itenondewa. Kuñatái reta uipota tëi onoe ɨ ɨkua wi umɨtɨnee waerä owecha reta iɨwarɨru tu iowecha reta jou waerä. 17Erëi yuweru ïruwe owecha iyandarekoa reta jare opa umbɨsɨrɨ jokua kuñatái reta ɨkua wi. Jokua uecha yawe, Moisés oo ikotɨ jare uepɨ jokua kuñatái reta ïruwe reta wi. Jare omborɨ wi kuñatái reta umee waerä jou ɨ iowecha reta.

18Joko wi kuñatái reta yuweru ye yawe jëta pe, tu Jetro#2.18 Jetro jee wi Reuel. jee wae upɨrandu chupe reta: “¿Kërái pa kua ara opa pemee jou ɨ owecha reta ɨmambae pewa?” jei chupe reta.

19Jayawe jae reta jei tu pe: “Pëti kuimbae ɨwɨ Egipto pewa orerepɨ ïruwe owecha iyandarekoa reta wi. Joko wi jae oremborɨ onoe ɨ ɨkua wi umee waerä jou ɨ yandeowecha reta,” jei reta chupe.

20Jayawe tu jei chupe reta: “¿Kiape pa oï jokua kuimbae?” jei. “¿Marái ramo peya joko peño? ¡Pekua peparea chupe ukaru waerä yande ndiwe!” jei chupe reta.

21Jáeramo yuraa uparea reta Moisés pe oo ukaru waerä jae reta ndiwe. Jare Jetro uparea Moisés pe upɨta waerä jae reta ndiwe. Jokua ikawi iko Moisés pewarä. Jaɨkue rupi Jetro umee chupe tayɨ Séfora jee wae Moisés jembirekorä.

22Joko wi Moisés jembireko Séfora ipurúa jare oa imembɨ kuimbae. Jare Moisés umbɨjee taɨ Gersón,#2.22 Tee Gersón uipota jei “ambɨe ɨwɨ pewa” hebreo ñee pe. echa’ä jei iyupe: “Ambɨe ɨwɨ pewa ko che jare aiko ambɨe ɨwɨ pe,” jei iyupe.

23Jeta año ma uasa yawe, mburuwicha wasu Egipto pewa umano. Erëitu Israel iñemoñaa reta jekuaeño uiporaraete reta, echa’ä tätaete uyeyokui Egipto pewa reta pe. Jáeramo Israel iñemoñaa reta uyerure iñeeäta rewe Tumpa pe omborɨ reta waerä. Jare Tumpa uyandu uyerure reta wae. 24Tumpa uyandu wi uyao reta wae, jare imandúa jokua yemɨngeta ikawi wae re arakae uyapo Abraham, jare Isaac, jare Jacob ndiwe wae. 25Tumpa uiparareko uecha yawe Israel iñemoñaa reta ikuasɨete oï; jáeramo uipota omborɨ reta.

Currently Selected:

Éxodo 2: gnwPB

Highlight

Copy