Luuk 15

Kubolpɔ foeso be keŋasa be asheŋ

(Matiu 18:12-14)

1Lamposɔpoana nɛ alubiworapoana kikɛ daa tiŋ a chala nna a buu Yesu a nu mbe kamalga. 2Ndoŋ nna nɛ Efarisiana nɛ mbraŋinipoana bile asheŋ nseŋ kaŋɛ: “Men keni, kanyɛn ere ka sɔ alubiworapoana n shin nɛ mo nɛ bumo bee ji.” 3Nɛ e bɔ bumo keŋasa ere m bishi bumo le: “Menyi to be emo e naaŋ baa kɔ mbolpɔ kalfa 4nɛ kuko e foe nɛ e maaŋ yige adekpanu nɛ akpanu nɛ a ka na kiyi to nseŋ ya fin kukoŋwule nɛ k foe na loŋ hale n ya wu kumo? 5E baŋ ya wu kumo, mbe kagbene beeŋ fuli mo ga, nɛ e ta kumo n dii ŋkɔŋ. 6Nɛ e baŋ ba epe e beeŋ tre mo teriana nɛ mbe bechenashapoana ŋ kaŋɛ bumo le: ‘Men chɛ ma to nɛ n ji ma kumu, ŋkpal manɛ so, ma kubolpɔ daŋ foe nna, ama n naŋ wu kumo.’ 7To, ma e yɛ menyi na fanɛ nɛ esa koŋwule baŋ lar mbe alubi to, Ebɔrɛ be emalaika be ŋgbene beeŋ fuli mo so ga a chɔ basa adekpanu nɛ akpanu nɛ b kaŋɛ b la belelapo Ebɔrɛ be anishito a maŋ kɔ alubi nɛ b lar amo to na.

Kemansherbi foeso na be asheŋ

Ŋko eche mo e naaŋ baa kɔ gbiti be ndarbi kudu nɛ kuko e foe nɛ e maaŋ chɔɔ fitila so nseŋ fige mbe ebu ŋ keni kakpa kikɛ nɛnɛ n fin kumo loŋ hale n ya wu kumo? 8Ŋko eche mo e naaŋ baa kɔ gbiti be ndarbi kudu nɛ kuko e foe nɛ e maaŋ chɔɔ fitila so nseŋ fige mbe ebu ŋ keni kakpa kikɛ nɛnɛ n fin kumo loŋ hale n ya wu kumo? 9E baŋ wu kumo, e beeŋ tre mo teriana nɛ mbe bechenashapoana ŋ kaŋɛ bumo le: ‘Men chɛ ma to nɛ n ji ma kumu, ŋkpal manɛ so, n wu ma kemansherbi nɛ k daŋ foe na.’ 10To, ma e kaŋɛ menyi na fanɛ nɛ esa koŋwule baŋ lar mbe alubi to, Ebɔrɛ be emalaika be ŋgbene beeŋ fuli bumo ga.”

Ebi foeso na be asheŋ

11Ndoŋ nna nɛ Yesu kaŋɛ: “Kanyɛn ko e daa wɔtɔ a kɔ mbinyɛnsobi benyɔ. 12Kachako nɛ ekekarso na kaŋɛ mo tuto le: ‘N tuto, barga asɔ nɛ feeŋ wu nɛ a ki anyi be kapetɛ na to n ta meya n sa ma’. 13Nɛ etuto na barga mbe asɔ na to n sa bumo. K maŋ chɛr ko nɛ ekekarso na chala mbe asɔ kikɛ n fa nseŋ ta mbe amansherbi m pɛ efuli wɔfɔ ko be ekpa. E ka yɔ kade ko nɛ e ya ji mbe amansherbi na chilchilso n loge pɔp. 14E ka ji kusɔ kama n loge nɛ akoŋgboŋ ko tɔr efuli na so nɛ awurfoŋ pɛ mo. 15Ndoŋ nna nɛ e ta mbe kumu n ya mata kadetobia ko nɛ amo be kadetobia na yɛr mo mbe ndɔ to nɛ e ya kaa keni mbe epreku so. 16Ndoŋ nna nɛ akoŋ pɛ kebia na loŋ hale nɛ e ya kaa yɛlga keji asɔrso be afɔfɔ nɛ epreku na daa ji na, ama esa kama maŋ sa mo amo. 17E ka wu kebaawɔtɔ nɛ e daa wɔ na to nɛ e bishi mbe kumu le: ‘N tuto be nyɛrbi afanɛ e kɔ ajibi a ji a ka nɛ m ba kaa wɔ nfe nɛ akoŋ bee shin nɛ k mɔ ma n to jiga le? 18Cha, meeŋ koso n yɔ n tuto kutɔ n ya kaŋɛ mo le: N tuto, n wora alubi ŋ gbiti fo nɛ Ebɔrɛ. 19A maŋ naŋ daga b ka naa tre ma fo pibi, amoso, naniere shin nɛ ŋ ki fo beshumpo ere be eko.’ 20Ndoŋ nna nɛ e koso m pɛ epe be ekpa a ba mo tuto kutɔ. E ka ba kaa fo epe ŋ kraa wɔ kufɔ nɛ mo tuto wu mo nseŋ wu mo kuwɔr nseŋ shile n ya pɛ mo to kashaso n wora mo ansaŋ nɛ keba ga. 21Nɛ kebinyɛnbi na kaŋɛ mo le: ‘N tuto, n wora alubi ŋ gbiti fo nɛ Ebɔrɛ. A maŋ naŋ daga b ka naa tre ma fo pibi.’ 22Nɛ etuto na kplaŋ mo so nseŋ kaŋɛ mbe anya le: ‘Men nya manaŋ n ya lara piŋi lela chɔɛŋ na m ba buu mo nseŋ ta kepinibi n wɔtɔ mbe enɔ to nseŋ ta asɛbta n wɔtɔ mo. 23Amo be kaman, men ya pɛ kenafɔlbi danso na m mɔ nɛ an wora kejigboŋ n ji anyi be amu, 24ŋkpal manɛ so, ma kebia ere daŋ wu nna, ama e naŋ ba ŋkpa to, e daŋ foe nna, ama e naŋ wu epe be ekpa m ba.’ Ndoŋ nna nɛ b fara a ji bumo be amu. 25Jemanɛ ere so kikɛ nɛ kanyɛn na be kebia nimuso na wɔ ndɔ to. E ka ba kaa taga to kowu nseŋ nu basa ka bee boŋ nshɛ nsaa cha laŋ na to na 26nɛ e tre anya na be eko m bishi kusɔ nɛ k bar awɔr na. 27Ndoŋ nna nɛ kenya na kaŋɛ mo le: ‘Fo sipo e ba nɛ fo tuto shin nɛ b mɔ kenafɔlbi danso na ŋkpal fo sipo ka bɛta m ba nɛ eyur be alenfia na so.’ Ndoŋ nna nɛ e nya agbo nseŋ kini keluri laŋ to. 28Nɛ mo tuto lar m ba kule mo fanɛ e wushi kagbene nseŋ luri a ba. 29Nɛ e kini nseŋ kaŋɛ mo tuto le: ‘Keni, ŋ ka baŋ koso ma kebiato kikɛ m baa wɔtɔ a shuŋ, m maŋ naŋ kini kenu n sa fo kikɛ. Ama fo alɛ maŋ naŋ sa ma kalotebi gba fanɛ n ta nɛ ma nɛ n teriana e ji anyi be amu. 30Ŋkeshin nɛ, keni kananɛ fo pibi ere ta fo asɔ n ya jija ebojuache so nseŋ bɛta m ba nɛ fo shin nɛ b mɔ kenafɔlbi danso loŋ n sa mo.’ 31Nɛ etuto na kaŋɛ kebia na le: ‘Keni, m pibi, fo wɔ ŋ kutɔ nna saŋkama, ma alɛ be kusɔ kama nɛ ŋ kɔ la feya nna. 32Nɛ kananɛ fo sipo ere ba le ere, a daga fanɛ an ji anyi be amu kagbenefuliso, ŋkpal manɛ so, fo sipo ere daŋ wu nna nseŋ naŋ ba ŋkpa to, e daŋ foe nna, ama an naŋ wu mo.’ ”

Currently Selected:

Luuk 15: GJNb

Highlight

Copy