Luuk 14

Yesu ka chɛ elɔponyɛn ko be asheŋ

1Kewushiachɛ ko Yesu ka yɔ Efarisiana be enimu ko pe nɛ e ya ji nɛ baa tɛ mo nɛnɛ. 2Kanyɛn ko malɛ daŋ tiŋ a wɔ ndoŋ. 3Ndoŋ nna nɛ Yesu bishi mbraŋinipoana na nɛ Efarisiana na le: “A daga fanɛ b chɛ elɔpo ewushiachɛ na ŋko b sa maŋ chɛ mo?” Nɛ b lo to boeŋ a maŋ kaŋɛ shɛŋ. 4Nɛ e pɛ kanyɛn na to n chɛ mo nseŋ shin nɛ e yɔ. 5Kumo be kaman nɛ e bishi basa na: “Men be emo e naaŋ baa kɔ mo pibinyɛn ŋko kena nɛ e tɔr ŋko nɛ k tɔr kemaŋ chiŋgeliŋ ko to kewushiachɛ nɛ e maaŋ lara mo ŋko kumo kemaŋ na to epul na to?” 6Ama b maŋ tiŋ ŋ kaŋɛ shɛŋ.

Yesu ka fiɛ kamoowuwuraana so be asheŋ

7Ndoŋ nna nɛ Yesu wu basa nɛ b daŋ tre fanɛ b ba ji na ka ba fin bunyanso be echenakpaana n chena nɛ e bɔ bumo keŋasa ere ŋ kaŋɛ: 8“Esa kama nɛ e baŋ tre fo kejafɔ be kejigboŋ to nɛ fo yɔ, sa maŋ ya chena bunyanso be echenakpa. Nɛ mannɛ aloŋ, nɛ esa nɛ e chɔ fo baŋ ba, 9esa nɛ e tre menyi kikɛ na beeŋ ba kaŋɛ fo: ‘Koso nseŋ ta kabɛ ere n sa ede.’ Saŋɛ na so feeŋ ta anishinyɔr n ya chena bebɔlpo be kakpa. 10B baŋ tre fo loŋ be kakpa, fo ya chena bebɔlpo be kakpa n shin nɛ kowurnyɛn gbagba e ba wu fo nseŋ kaŋɛ fo le: ‘N teri, koso n dii a ba nfe.’ Saŋɛ na so nɛ basa nɛ b chena ndoŋ na kikɛ e wu bunyaŋ nɛ fo nya ejikpa na. 11Ekama nɛ e bee maŋ mbe kumu so, baaŋ bar mo kaseto nɛ ekama nɛ e bee bar mbe kumu kaseto, baaŋ maŋ mo so.”

12Ndoŋ nna nɛ Yesu kaŋɛ kanyɛn nɛ e daŋ tre mo kejigboŋ na to na: “Fo baŋ wora kejigboŋ kapaso ŋko kanyɛso, sa maa tre fo teriana ŋko fo sipoana nɛ fo daana ŋko fo kurgepoana ŋko fo bechenashapo nɛ b la damawuraana. Nɛ mannɛ aloŋ, bumo alɛ gba beeŋ wora ajigboŋ n tre fo nɛ fo ba ji n tal to. 13Ama nɛ fo baŋ wora kejigboŋ, tre betirpo nɛ basa dulgiso nɛ basa nɛ bumo be mboŋ ko wu nɛ betanpo. 14Loŋ nɛ feeŋ nya nɛfa, ŋkpal manɛ so, bumo e maaŋ tiŋ n nya n wora fo n tal to. Kachɛ nɛ kagbene koŋwule wuraana beeŋ tiŋi luwu to na, feeŋ nya fo kakɔka.”

Kejigboŋ ko be keŋasa be asheŋ

(Matiu 22:1-10)

15Basa nɛ b chena ndoŋ na be eko ka nu loŋ nɛ e kaŋɛ Yesu le: “Esa kama nɛ e nya Ebɔrɛ be kuwura na to n chena n ji, kagbenefuli beeŋ baa la mo peya.” 16Nɛ Yesu kaŋɛ mo: “Kanyɛn ko e daŋ wora kejigboŋ nseŋ tre basa damta. 17Keji be saŋɛ ka ba fo nɛ kanyɛn na shuŋi mbe anya fanɛ b ya kaŋɛ basa nɛ e daŋ tre na le: ‘Naniere bre kusɔ kama loge, amoso, men baa ba.’ 18Ndoŋ nna nɛ bumo kikɛ fara a wora nambara a kini. Nɛ ejuŋkparso na kaŋɛ: ‘Ma ere tɔ kasawule nna nsaa sha kelar n ya keni kumo. Amoso, jande baa yɔ, m maaŋ tiŋ n yɔ.’ 19Nɛ eko malɛ kaŋɛ le: ‘N tɔ ana be anyɔnyɔ be ntuŋ anu so nna nsaa sha keyaa keni amo. Amoso, jande baa yɔ, m maaŋ tiŋ n yɔ.’ 20Nɛ eko malɛ kaŋɛ: ‘N ta eche popɔr nna. Amoso, m maaŋ tiŋ n yɔ.’ 21Ndoŋ nna nɛ kenya na ta asheŋ na m bɛta n ya kaŋɛ mo nyɛnpe. Nɛ kowurnyɛn na nya agbo nseŋ kaŋɛ mbe kenya na le: ‘Lar manaŋ manaŋ n yɔ kadegboŋ ere to be abɔrbi nɛ kumo be akɔlɔbiana to n shin nɛ betirpo nɛ basa dulgiso nɛ betanpo nɛ eyurwusowuraana e ba.’ 22Kenya na ka yɔ m ba nɛ e ba kaŋɛ le: ‘Enyɛnpe, n wora asheŋ nɛ fo kaŋɛ na kikɛ, ama ebu na maŋ naŋ bɔlɔ basa.’ 23Nɛ enyɛnpe na kaŋɛ kenya na: ‘To, yɔ abɔrbigboŋana so nɛ nde karso be ekpaana so n ya leŋ basa to nɛ b ba nɛ ma ebu ere e nya m bɔlɔ basa. 24Ŋkpal manɛ so, ma e kaŋɛ fo na fanɛ basa nɛ fo daŋ tre nɛ b kini na be ekama maaŋ nya ma kejigboŋ na to be ajibi n da ŋ keni.’ ”

Kebaala ebɛsopo ka du kpakpa be asheŋ

(Matiu 10:37-38)

25Basa damta ko daŋ tu Yesu a wɔ enite to nɛ e kilgi ŋ kaŋɛ bumo le: 26“Esa kama nɛ e ba ma kutɔ nsaa maŋ kishi mo tuto gbagba nɛ mo nio nɛ mbe eche nɛ bibi nɛ besiponyɛnana nɛ besipocheana hale mo gbagba be kumu be aparsheŋ, e maaŋ tiŋ a la ma ebɛsopo. 27Esa kama nɛ e maŋ sulɔ mbe kedibi largato m bɛ ma so, maaŋ tiŋ a la ma ebɛsopo.

28Ŋkpal manɛ so, menyi be emo e naaŋ baa sha kepɔr ebu nsaa maaŋ chena m ber amansherbi nɛ e beeŋ jija ebu na so ŋ keni ŋko a beeŋ fo mo pɔɛŋ nseŋ fara a pɔr? 29Nɛ mannɛ aloŋ, e beeŋ tɔl ebu na be kifi nseŋ pɔr kumo ŋ gben. Esa kama nɛ e wu kumo beeŋ fara a wora mo eyurto a kaŋɛ le: 30‘Kanyɛn ere daa pɔr ebu nna na, ama e maŋ tiŋ nɛ e loge kumo.’ ”

31Ŋko ewura mo e naaŋ baa yɔ nɛ mo nɛ ewura pɔtɛ e ya kɔ kena nsaa maaŋ chena n fɛ kumo be nfɛra pɔɛŋ m pin ŋko e beeŋ tiŋ n ta benapo ŋgboŋ kudu n ya tu mo doŋ nɛ e kɔ benapo ŋgboŋ adunyɔ ŋko e maaŋ tiŋ a ba na? 32Nɛ e wu fanɛ e maŋ kɔ eleŋ, mo doŋ na beeŋ ba kraa wɔ ekpa to kufɔ kufɔ nna nɛ e shuŋi bematapo nɛ b ya mata mo m bar kagbenewushi. 33To, nɛ men be ekama baa maŋ kplaŋ kusɔ kikɛ nɛ e kɔ so, e maaŋ tiŋ a la ma ebɛsopo.

Nfɔl be kela be asheŋ

(Matiu 5:13; Maak 9:50)

34“Nfɔl walɛ, ama nɛ fanɛ amo be ebel baŋ lar amo to, nuso nɛ baaŋ naŋ tiŋ n wora amo ebel? 35Fo ta amo n lɛ kasawule ŋko n sa asɔbɔya gba, a maŋ kɔ tɔnɔ kama. Loŋ be nfɔl na, basa bee ta amo nna a lɛ jiga. Fo nɛ fo kɔ asoe, fo nu.”

Currently Selected:

Luuk 14: GJNb

Highlight

Copy