Luuk 16

Eshumpo nyiashempo na be asheŋ

1Nɛ Yesu naŋ fara a kaŋɛ mbe bebɛsopo le: “Damawura ko e daa kɔ esibɛpo, kachako n nu fanɛ esibɛpo na wɔtɔ nna a jija mbe asɔ. 2Nɛ damawura na tre esibɛpo na ŋ kaŋɛ mo: ‘Manɛ be kushuŋ lubi nɛ fo wɔtɔ a wora ma? Ber amansherbi na nseŋ kaŋɛ ma asɔ nɛ fo ta amo n wora, ŋkpal manɛ so, m maaŋ naŋ shin nɛ fo naŋ shuŋ n sa ma kikɛ.’ 3Ndoŋ nna nɛ esibɛpo na fara a fɛ le be nfɛra: ‘To, naniere n nyɛnpe ka lara ma kushuŋ ere to ere, nuso nɛ meeŋ wora, ŋkpal manɛ so, m maŋ kɔ eleŋ nɛ n dɔ, ma alɛ anishinyɔr so m maaŋ tiŋ ŋ kule n ji.’ 4Nɛ e kaŋɛ mbe kumu le: ‘N nyi kusɔ nɛ meeŋ wora nɛ basa e sɔ ma bumo peana saŋɛ nɛ m paŋ ma kushuŋ ere na.’ 5Ndoŋ nna nɛ e fara a tre mo nyɛnpe be akɔjipoana kukoko to a bishi bumo akɔ na. Le nɛ e daŋ bishi ejuŋkparpo na: ‘N nyɛnpe be kukɔ afanɛ e wɔ fo so?’ 6Nɛ e kaŋɛ mo: ‘Fo nyɛnpe be ŋku be egalɔn kalfa e wɔ ma so.’ Nɛ esibɛpo na kaŋɛ mo: ‘To, sibɛ egalɔn adunu n wɔtɔ fo kawɔl to manaŋ manaŋ nɛ an ta fo kukɔ na n yili loŋ.’ 7Ade be kaman nɛ esibɛpo na naŋ bishi enyɔsopo na le: ‘Nɛ afanɛ be kukɔ e wɔ fo alɛ so?’ Nɛ akɔjipo na kaŋɛ mo: ‘Fo nyɛnpe be ayu be ebɔtɛ kalfa e wɔ ma so.’ Nɛ esibɛpo na kaŋɛ mo: ‘To, sibɛ ebɔtɛ aduburwa n wɔtɔ fo kawɔl to.’ 8Damawura na daŋ kpaŋ mbe esibɛpo kebirkɔnshiwura na ga ŋkpal kashennyi nɛ e daŋ ŋini na so. Ŋkpal manɛ so, durnya ere to ebi kɔ kebirkɔnshi be kashennyi nna a wora bumo be asheŋ a chɔ basa nɛ b wɔ kefulto to.”

Kebaakeni asɔ so nɛnɛ be asheŋ

9Ade kikɛ be kaman nɛ Yesu kaŋɛ le: “To, ma e kaŋɛ menyi na fanɛ men baa ta durnya to be kanya a ji basa keteri, saŋɛ na so, nɛ a ba loge, menyeeŋ nya kowu ashi bumo kutɔ nɛ kumo be kebaawɔtɔ maŋ kɔ ekar na n ya kaa wɔtɔ.

10Esa nɛ feeŋ tiŋ n yirda n ta kusɔbi n sa mo nɛ e tiŋ ŋ keni kumo so la esa nɛ e beeŋ tiŋ ŋ keni kusɔgboŋ gba so nna. Esa kama malɛ nɛ e kɔ kebirkɔnshi kusɔbi to, beeŋ baa kɔ kebirkɔnshi kusɔgboŋ gba to. 11Nɛ fanɛ fo maŋ tiŋ n ta kagbene koŋwule ŋ keni durnya ere to be asɔ so, wanɛ e naaŋ ta asɔ nɛ a la dama kashenteŋto n sa fo nɛ fo baa keni so? 12Nɛ fanɛ fo maŋ bugi kagbene ŋ keni esa pɔtɛ be kusɔ so, esa mo e naaŋ sa fo fo gbagba be kusɔ?

13Kenya koŋwule maaŋ tiŋ n shuŋ a sa benyɛnpe anyɔ. Nɛ e baa maŋ kishi bumo be eko nsaa sha eko, e beeŋ bugi kagbene a shuŋ eko nsaa wora eko malɛ emurpi. Fo maaŋ tiŋ n ta fo kagbene kikɛ a bɛ amansherbi so nseŋ tiŋ n ta kagbene koŋwule na a bɛ Ebɔrɛ so.” 14Efarisiana na ka daa sha amansherbi ga so, b ka nu asheŋ na kikɛ nɛ b wora mo eyurto. 15Nɛ e kaŋɛ bumo le: “Menyi e naa sha fanɛ basa e baa tre menyi basa lela, ama Ebɔrɛ nyi menyi be ŋgbene to be nfɛra. Asɔ nɛ durnya ere to ebi malɛ bee bunyaŋ a fɛ fanɛ a la asɔ lela na maŋ la shɛŋ Ebɔrɛ be anishito.”

Mbra be asheŋ

(Matiu 11:12-13)

16Mbra nɛ Ebɔrɛ daŋ bɔla anebi Mosis to n sa na nɛ asheŋ nɛ anebiana na daŋ malga na daŋ tar Jɔn kabɔrɛbɛrpo so nna. Yili mbe jemanɛ na a ba, Ebɔrɛ be kuwura na so be baru lela be kubɔya nɛ baa bɔ nɛ ekama bee kɔ a fin keluri kuwura na to. 17Ama ebɔrɛso nɛ kasawule be kemur du potɔpotɔ a chɔ mbra na to be kedosobi nyitiibi gba ko ka beeŋ ki jiga m mur.

Kakilgboŋi be asheŋ

(Matiu 5:31-32; Maak 10:11-12)

18Enyɛn kama nɛ e kini mbe eche nseŋ naŋ ya ta eche pɔtɛ ji kubojua nna ŋ gbiti mbe eche dra na nna na. Enyɛn kama malɛ nɛ e ta eche nɛ mo kul kini mo ji kubojua nna na.

Lazɔrɔs nɛ damawura na be asheŋ

19Kamalga ere be kaman nɛ e naŋ bɔ keŋasa ere ŋ kaŋɛ: “Damawura ko e daa wɔtɔ a buu yawu kpakpaso be asɔbuuso lela peper mɔlmɔlbi ko a wɔtɔ a ji ajibi belbelso damta kachɛ kama. 20Nɛ etirpo ko malɛ nɛ b daa tre Lazɔrɔs daa kɔ achuu damta a tase damawura na be kabuna 21a yɛlga keji damawura na be ejiŋka. Ade kikɛ be kaman njɔnɔ daa ba nna m ba kaa dente mbe achuu na. 22Kachako nɛ etirpo na wu nɛ emalaika ta mbe kiyoyu n yɔ ebɔrɛso n ya chena Eebraham be kekel so. 23Kachako nɛ damawura na malɛ wu nɛ basa ta mo n ya puli nɛ e yɔ edɛ to n ya kaa wɔ ebesa to nseŋ maŋ kumu so n wu Lazɔrɔs ka ya chena Eebraham be kekel so. 24Ndoŋ nna nɛ e lara ebɔl n tre Eebraham ŋ kaŋɛ mo le: ‘Etuto Eebraham, wu ma kuwɔr nseŋ shuŋi Lazɔrɔs nɛ e ta mbe keshilbi n wɔtɔ nchu to m ba do ma kudonduloŋ so nɛ k wushi ma, ŋkpal manɛ so, ebesa gbagba e naa tɔrɔ ma edɛ wuloŋwuloŋ ere to na.’ 25Nɛ Eebraham kaŋɛ mo le: ‘M pibi baa nyiŋi saŋɛ nɛ fo daa wɔ ŋkpa to a ji fo ebel na nsaa nyiŋi kananɛ Lazɔrɔs malɛ daŋ ji awurfoŋ na. Ama naniere e luri ebel to nɛ fo alɛ luri ebesa to. 26Ade malɛ kikɛ be kaman, kemaŋ chiŋgeliŋ ko wɔ anyi nɛ menyi be nferinto nɛ basa nɛ b wɔ nfe maaŋ tiŋ n yɔ menyi kutɔ nɛ ekama malɛ nɛ e wɔ menyi kutɔ maaŋ tiŋ n shi ndoŋ m ba anyi kutɔ nfe.’ 27Nɛ kanyɛn na kaŋɛ Eebraham: ‘N tuto, kumo ere, mee kule fo, shuŋi mo nɛ e yɔ n tuto pe 28n ya fiɛ n sipoana so nɛ b sa maŋ ba ebesa be kakpa ere. Ŋkpal manɛ so, besipo anu nɛ ŋ kɔ.’ 29Nɛ Eebraham kaŋɛ mo le: ‘B kɔ mmalga nɛ anebi Mosis nɛ anebiana na sibɛ na, amoso, shin nɛ b baa nu amo.’ 30Nɛ kanyɛn na naŋ kaŋɛ: ‘Ayai, etuto Eebraham, mannɛ aloŋ nna, ŋkpal manɛ so, nɛ esa baŋ shi luwu to n ya malga n sa bumo, baaŋ lar bumo be alubi to.’ 31Nɛ Eebraham kaŋɛ mo: ‘Nɛ b baŋ kini kenu asheŋ nɛ Mosis nɛ anebiana na bee malga na, kumo ere baa nyi fanɛ nɛ esa shi luwu to n ya kaŋɛ bumo gba, b maaŋ nu.’ ”

Currently Selected:

Luuk 16: GJNb

Highlight

Copy