Jɔn 16

1Nɛ Yesu kaŋɛ mbe bebɛsopo na le: “Ŋ kaŋɛ menyi asheŋ ere nna nɛ men sa maŋ kaŋ foe ekpa. 2Basa beeŋ ba kaa ju menyi ashi nshɛrbuana na to be keluri to. Saŋko beeŋ ba fo nɛ esa kama nɛ e mɔ menyi beeŋ baa fɛ fanɛ Ebɔrɛ nɛ e bee shuŋ. 3Bumo alɛ beeŋ wora loŋ nna ŋkpal b ka maŋ nyi Etuto ŋko ma so. 4Ŋ kaŋɛ menyi kesheŋ ere nna, saŋɛ na so, jemanɛ nɛ baaŋ wora asheŋ na kaŋ fo, menyeeŋ nyiŋi fanɛ n chɛr ŋ kaŋɛ menyi. Ŋ ka wɔ menyi kutɔ na so so nɛ n daa maŋ kaŋɛ menyi kesheŋ ere sososo na.”

Kiyoyu Cheeŋ na be kushuŋ be asheŋ

5Ama naniere bre mee bɛta a yɔ esa nɛ e shuŋi ma na kutɔ nna ŋkeshin nɛ menyi alɛ be ekama maŋ bishi ma fanɛ: ‘Nnɛ nɛ fee yɔ?’ 6Ama ŋkpal ŋ ka kaŋɛ menyi kesheŋ ere so so, kagbenejija luri nna m bɔlɔ menyi to. 7Kashenteŋ malɛ nɛ mee kaŋɛ menyi na fanɛ menyi be kechɛto so nɛ mee yɔ na, ŋkpal manɛ so, nɛ m baa maŋ yɔ, Echɛtopo na maaŋ ba menyi kutɔ. Ama nɛ m baŋ yɔ bre, meeŋ shuŋi mo nɛ e ba menyi kutɔ. 8Mo alɛ kaŋ ba, e beeŋ ŋini durnyaebi kananɛ baa fɛ alubi be asheŋ nɛ Ebɔrɛ be anishito be alelasheŋ be asheŋ nɛ mbe kasogberge be asheŋ. E beeŋ ŋini bumo fanɛ b foe amo be kenyi be ekpa. 9E beeŋ ŋini bumo fanɛ b foe alubi be kenyi be ekpa, ŋkpal b ka maŋ yirda ma, Yesu Kristo so, 10nseŋ naŋ ŋini bumo fanɛ b foe alelasheŋ be kenyi be ekpa, ŋkpal ŋ ka bee yɔ Etuto na kutɔ nɛ men maaŋ naŋ wu ma so. 11Mo alɛ beeŋ naŋ ŋini bumo fanɛ b foe kasogberge be kenyi be ekpa, ŋkpal manɛ so, Ebɔrɛ teŋ gboŋi durnya ere to be ejuŋkparpo na ashi mbe kejuŋkpar na to.

12Ŋ kraa kɔ asɔ damta nɛ ŋ kaŋɛ menyi, ama nɛ ŋ kaŋɛ amo naniere, a beeŋ wora keshi n sa menyi. 13Ama nɛ mo ere, kashenteŋ be Kiyoyu na kaŋ ba, e beeŋ ŋini menyi kashenteŋ be ekpa kikɛ. E maaŋ ta mo gbagba be kumu so be eleŋ m malga, asɔ nɛ e beeŋ nu nawule be asheŋ nɛ e beeŋ malga nseŋ kaŋɛ basa asɔ nɛ a beeŋ ba be asheŋ. 14E beeŋ bar ma kemaŋkura, ŋkpal manɛ so, e beeŋ ta asɔ nɛ ŋ kɔ nɛ ŋ kaŋɛ menyi na m malga n sa menyi. 15Asɔ nɛ n Tuto na kɔ na kikɛ la meya nna. Amoso nɛ ŋ kaŋɛ fanɛ Kiyoyu na beeŋ ta asɔ nɛ ŋ kɔ nɛ ŋ kaŋɛ menyi na m malga n sa menyi na.

Kagbenewushi nɛ kagbenejija be asheŋ

16“A ka gbrɛbi nɛ men maaŋ naŋ wu ma nɛ a naŋ wora gbrɛbi nɛ men wu ma.” 17Ndoŋ nna nɛ mbe bebɛsopo na be beko fara a bishi abar: “Manɛ bre nɛ e de nsaa malga le be asheŋ ere fanɛ: ‘A ka gbrɛbi nɛ men maaŋ naŋ wu ma nɛ a naŋ wora gbrɛ nɛ men naŋ wu ma’ ere ŋko nɛ manɛ malɛ nɛ e naa de fanɛ: ‘Ŋkpal ŋ ka bee yɔ n Tuto na kutɔ na so’ ere?” 18B yɛ: “To, a ka gbrɛbi, a ka gbrɛbi ere be kifito bre e baa la nuso? Anyi maŋ nyi kusɔ nɛ e bee malga ere be kifito.” 19Ndoŋ nna nɛ Yesu pin b ka bee sha kebishi kesheŋ na be kifito nseŋ fara m bishi bumo: “Menyee bishi abar nuso nɛ ŋ kaŋɛ fanɛ: ‘A ka gbrɛbi nɛ men maaŋ naŋ wu ma nɛ a naŋ wora gbrɛbi nɛ men naŋ wu ma’ na be kifito nna ŋko? 20Ma e kaŋɛ menyi kashenteŋto na fanɛ menyi ere beeŋ boŋ to nseŋ shu anishichubi, ama durnya ere to ebi bre be ŋgbene beeŋ fuli bumo. Kashenteŋ nna fanɛ menyi be ŋgbene bee jija menyi, ama menyi be kagbenejija na beeŋ ba ki kagbenefuli. 21K du fanɛ eche ka bee sha kekurge nna. Mbe saŋɛ baŋ fo nɛ e luri kakurge be ebesa to, mbe kagbene bee jija mo nna, ama nɛ e baŋ kurge ebi na e bee teŋ mbe ebesa na so nna, ŋkpal manɛ so, mbe kagbene bee fuli mo nna ŋkpal e ka kurge ebi n wɔtɔ durnya ere to so. 22To, loŋ nɛ k du n sa menyi alɛ gba. Naniere bre, men be ŋgbene jija menyi nna, ama a wora gbrɛ, meeŋ naŋ wu menyi nɛ menyi be ŋgbene e fuli menyi nɛ esa kikɛ malɛ maaŋ tiŋ n lara loŋ be kagbenefuli na ashi menyi to. 23Loŋ be saŋɛ na ba fo, men maaŋ naŋ kule ma shɛŋ. Ma e kaŋɛ menyi kashenteŋto na fanɛ n Tuto na beeŋ sa menyi kusɔ kama nɛ men ta ma ketre ŋ kule mo. 24Hale m ba fo mbre, men maŋ naŋ ta ma ketre ŋ kule shɛŋ. Men kule nseŋ nya nɛ menyi be ŋgbene e fuli menyi m baŋ so.

25Kashenteŋto, aŋasa to nɛ m bɔla m malga asheŋ na, ama saŋko bee ba nɛ m maaŋ naŋ ta aŋasa m malga asheŋ n sa menyi, meeŋ bugi asheŋ to filifili ŋ kaŋɛ menyi n Tuto na be asheŋ. 26Amo be saŋɛ na ba fo, menyeeŋ ta ma ketre ŋ kule Ebɔrɛ. M maa kaŋɛ nna fanɛ ma e naaŋ yili menyi be katelamu to ŋ kule mo n sa menyi. 27Ŋkpal manɛ so, Etuto na gbagba bee sha menyi ŋkpal men ka bee sha ma nseŋ yirda fanɛ n shi Ebɔrɛ na kutɔ na so. 28N Tuto na kutɔ nɛ n shi m ba durnya ere to, ma alɛ nseŋ naa lar durnya ere to a yɔ Etuto na kutɔ.”

29E ka malga le ere n loge nɛ mbe bebɛsopo na kaŋɛ le: “Too, naniere bre fo maŋ naa malga aŋasa to, fee bugi asheŋ to nna filifili a kaŋɛ. 30Naniere nɛ an pin fanɛ fo nyi kusɔ kikɛ. Amoso, nɛ esa maŋ bishi fo asheŋ nɛ a wɔ mbe kagbene to gba, fo nyi amo. Loŋ malɛ e shin nɛ an yirda fanɛ Ebɔrɛ na kutɔ nɛ fo shi.” 31Ndoŋ nna nɛ Yesu bishi bumo: “Naniere bre men yirda nna na ŋko? 32Ama men baa nyiŋi fanɛ saŋko beeŋ ba fo, k teŋ fo gba nɛ menyi kikɛ e pesaŋ to nɛ ekama e yɔ mo gbagba pe. Menyeeŋ yige n nawule n to, ama mannɛ n nawule e wɔtɔ, ŋkpal manɛ so, n Tuto wɔ ŋ kutɔ nna. 33Ŋ kaŋɛ menyi asheŋ ere nna, saŋɛ na so, menyeeŋ bɔla ma so n nya kagbenewushi. Menyeeŋ nya tɔrɔ durnya ere to, ama men baa kɔ kagbene, ma e pɔɔ durnya ere so.”

Currently Selected:

Jɔn 16: GJNb

Highlight

Copy