Jɔn 15

Yesu ka du fanɛ kedibi sɔrso gbagba na be asheŋ

1Yesu yɛ: “N du fanɛ kedibi sɔrso gbagba nna nɛ n Tuto malɛ la ndibi sɔrso na be ekenipo. 2Keyabi kama nɛ k chɔɔ ma so ŋkaa maa sɔr shɛŋ, e bee ku kumo nna a lɛ nɛ keyabi kama malɛ nɛ k bee sɔr e bee lɔŋɛ kumo so nna nɛ k tiŋ n sɔr ga n ti so. 3Men teŋ nyalɛ so ŋkpal kamalga nɛ m malga n sa menyi na so. 4Men baa wɔ ma to nɛ ma alɛ gba e baa wɔ menyi to. Kedibi be keyabi kama nawule maaŋ tiŋ n sɔr asɔrso ama k baa chɔɔ kedibi na gbagba so nna. Menyi alɛ gba maaŋ tiŋ n nya asɔrso kama ama men baa wɔ ma to nna. 5Ma e la kedibi sɔrso na nɛ menyi alɛ la kumo be ayabi. Nɛ esa baa wɔ ma to nɛ ma alɛ gba baa wɔ mo to, amodoŋwura beeŋ nya asɔrso damta, ama nɛ m baa maa wɔ men be asheŋ to, men maaŋ tiŋ n wora shɛŋ. 6Esa kama nɛ e maŋ wɔ ma to du fanɛ kedibi be keyabi nɛ b ku ashi kedibi gbagba so nna n lɛ nɛ k bee wɔl na nna. Ayabi mo nɛ a du loŋ malɛ, baa muu amo nna n wɔtɔ edɛ to nɛ a chɔɔ. 7Nɛ men baa wɔ ma to nɛ ma mmalga gba wɔ menyi to, men kule kusɔ kama nɛ menyee sha nɛ men nya kumo. 8Kusɔ nɛ k bee bar n Tuto na kemaŋkura e la men ka bee nya asɔrso damta, loŋ e naa ŋini men ka la ma bebɛsopo.

9Kananɛ Etuto na sha ma na gbagba nɛ ma alɛ gba sha menyi. Men baa wɔ ma kasha na to. 10Nɛ men baa bɛ ma mmalga naseso so, menyeeŋ baa wɔ ma kasha to fanɛ kananɛ mee bɛ Etuto na be mmalga naseso so nsaa wɔ mbe kasha to na.

11Ŋ kaŋɛ menyi kesheŋ ere nna nɛ kagbenefuli nɛ mee sa na e baa wɔ menyi to, saŋɛ na so, menyi be ŋgbene beeŋ fuli menyi m baŋ so. 12Ma kamalga naseso nde: ‘Men baa sha abar fanɛ kananɛ mee sha menyi na.’ 13Kasha kama maŋ naa chɔ le be kasha ere fanɛ esa ka beeŋ ta mbe ŋkpa n sa mo teriana. 14Nɛ men baa wora asɔ nɛ mee kaŋɛ menyi, kumo ere n teriana e la menyi. 15M maŋ naa tre menyi ma anya, ŋkpal manɛ so, kenya maa pin mo nyɛnpe be asheŋ woraso to. Naniere bre mee tre menyi n teriana nna, ŋkpal manɛ so, kusɔ kama nɛ ŋ koya ashi n Tuto na kutɔ, m maŋ ta amo ŋ ŋana menyi so. 16Mannɛ menyi e lara ma, ma e lara menyi nseŋ kaŋɛ menyi fanɛ men ya nya asɔrso nɛ a beeŋ baa wɔtɔ a yɔ. Saŋɛ na so, Etuto na beeŋ sa menyi kusɔ kama nɛ men ta ma ketre ŋ kule mo. 17Ma kamalga naseso nɛ ŋ kɔ a sa menyi nde fanɛ: ‘Men baa sha abar.’ ”

Kananɛ durnya beeŋ kishi bebɛsopo na be asheŋ

18“Nɛ durnya ere baŋ kishi menyi, men baa nyi fanɛ ma nɛ k fara ŋ kishi pɔɛŋ nseŋ ba kaa kishi menyi na. 19Nɛ men daa la durnya ere peya nna, k daa beeŋ baa sha menyi fanɛ kumo be basa gbagba. Ama n lara menyi ashi durnya ere to nna nɛ men maŋ naa la kumo be basa, amoso nɛ k kishi menyi na. 20Men baa nyiŋi kananɛ n daŋ kaŋɛ menyi na fanɛ: ‘Kenya maŋ chɔ mo nyɛnpe’. Nɛ durnya ere to ebi baŋ tɔrɔ ma, kumo ere baaŋ tɔrɔ menyi alɛ gba. Nɛ b baŋ ta ma mmalga n wɔtɔ bumo be ŋgbene to, baaŋ ta menyi alɛ gba peya n wɔtɔ bumo be ŋgbene to. 21Asheŋ ere kikɛ nɛ baaŋ wora menyi ŋkpal men ka la meya so, ŋkpal manɛ so, b maŋ nyi esa nɛ e shuŋi ma na. 22Kumo alɛ nɛ n daa maŋ ba nna m ba malga n sa bumo, b daa maaŋ tɔr alubi be ntaŋ, ama naniere b maaŋ tiŋ n ji n lar. 23Esa kama nɛ e kishi ma, kishi n Tuto gba nna. 24Nɛ fanɛ n daa maŋ wora emamachisheŋ nɛ esa kikɛ maŋ naŋ wora ere bumo to nna, b daa maaŋ tɔr alubi be ntaŋ, ama naniere b wu emamachisheŋ ere kikɛ, bumo alɛ kraa kishi ma nɛ n Tuto na kikɛ. 25Ama kumo alɛ du loŋ nna nɛ kusɔ nɛ k wɔ bumo be mbra na to na e bɔla. K yɛ: ‘B kishi ma nna kenyanyaŋɛso’.

26Ama Echɛtopo nɛ meeŋ shin nɛ e shi Etuto na kutɔ m ba menyi kutɔ na, mo e la kashenteŋ be Kiyoyu nseŋ shi Etuto na kutɔ na kaŋ ba, e beeŋ ji ma shɛda. 27Ama a daga fanɛ menyi alɛ gba ka ji shɛda na, ŋkpal manɛ so, ma nɛ menyi e baa la sososo na kikɛ.”

Currently Selected:

Jɔn 15: GJNb

Highlight

Copy