Malakaus 15

Philaj Taug Yexus Zaaj

(Mathais 27.1-2,11-14; Lukas 23.1-5; Yauhaas 18.28-38)

1Thaus kaaj ntug lawm, cov thawj ntawm cov povthawj txawm moog nrug cov txwjlaug, cov xwbfwb kws qha Vaajtswv txuj Kevcai, hab cov numtswv saablaaj, saib puab yuav ua le caag rua Yexus. Puab muab Yexus khi coj moog rua Philaj. 2Philaj nug Yexus has tas, “Koj yog cov Yudas tug vaajntxwv los?”

Yexus teb has tas, “Yog le koj has.”

3Cov thawj ntawm cov povthawj has ntau zaaj nkaug Yexus, 4Philaj rov nug Yexus has tas, “Koj tsi teb puab los? Koj tsi nov puab has ntau zaaj nkaug koj los?”

5Tabsis Yexus tsi teb ib lus le hab, ua rua Philaj xaav tsi thoob le.

Txav Txim Muab Yexus Tua

(Mathais 27.15-26; Lukas 23.13-25; Yauhaas 18.39–19.16)

6Lawv le ibtxwm, txhua zag kws ua Kevcai Hlaa Dlhau, Philaj yeej tso ib tug tuabneeg raug txim lawv le cov pejxeem thov. Puab thov tug twg, nwg tso tug ntawd. 7Thaus ntawd muaj ib tug txivneej hu ua Npalanpas, nwg raug kaw huv tsev lojcuj, vim nwg nrug cov tuabneeg ntxeev num ntxeev tswv kws tua tuabneeg. 8Thaus cov tuabneeg coob coob ua ke tuaj thov Philaj tso ib tug tuabneeg rua puab lawv le nwg ibtxwm tso, 9Philaj nug puab has tas, “Mej xaav kuas kuv tso cov Yudais tug vaajntxwv rua mej los?” 10Philaj yeej paub tseeb has tas, cov thawj ntawm cov povthawj khib, puab txhaj nteg Yexus coj tuaj rua nwg.

11Tabsis cov thawj ntawm cov povthawj ntxag kuas cov pejxeem thov Philaj tso Npalanpas lug rua puab. 12Philaj rov nug cov pejxeem has tas, “Mej xaav kuas kuv ua le caag rua tug txivneej kws mej hu has tas, ‘Cov Yudais tug vaajntxwv?’ ”

13Puab teb nrov nrov has tas, “Muab nwg ntsa rua sau ntoo khaublig!” 14Philaj rov nug puab has tas, “Nwg ua txhum dlaabtsi?”

Puab hajyam has nrov dlua qub has tas, “Muab nwg ntsa rua sau ntoo khaublig.” 15Philaj xaav ua kuas hum cov pejxeem suavdlawg sab, nwg txhaj tso Npalanpas rua puab. Tom qaab ntawd nwg kuas luas muab Yexus nplawm, hab coj Yexus moog ntsa rua sau ntoo khaublig.

Cov Tubrog Ua Saib tsi Taug Yexus

(Mathais 27.27-31; Yauhaas 19.2-3)

16Cov tubrog txawm coj Yexus moog rua huv lub tshaav puam ntawm tug tswvxeev lub tsev, hab hu paab tubrog taagnrho tuaj ua ke. 17Puab muab ib lub tsho ntev tsaamxem lab rua Yexus naav, hab muab maab xuavpaug ua kauj looj Yexus taubhau. 18Puab ua txuj hawm nwg dlog dlig hab has tas, “Thov kuas cov Yudais tug Vaajntxwv muaj sa nyob ntev!” 19Puab muab ib tug lojkov ntaus Yexus taubhau, ntu quavncaug rua Yexus, txhus caug hab ua txuj pe nwg. 20Thaus puab ua saib tsi taug Yexus taag lawm, puab muab lub tsho ntev tsaamxem lab hle hab muab Yexus lub khu rua Yexus naav. Puab coj Yexus moog ntsa rua sau ntoo khaublig.

Muab Yexus Ntsa rua Sau Ntoo Khaublig

(Mathais 27.32-44; Lukas 23.26-43; Yauhaas 19.17-27)

21Thaus puab taug kev moog, puab ntsib ib tug txivneej hu ua Ximoos, nwg tuaj peg yaajsaab tuaj, yuav moog rua huv lub nroog. Puab yuam nwg kwv Yexus tug ntoo khaublig. (Tug Ximoos nuav nyob huv lub nroog Kulenes, nwg ob tug tub yog Alexaades hab Lufus.) #Loo 16.13 22Puab coj Yexus moog rua ntawm qhov chaw kws hu ua Khaulakhauthas, lub npe ntawd txhais has tas, “Pobtxhaa Taubhau.” 23Thaus puab moog txug tod lawm, puab muab cawv txiv maab xyaw tshuaj tsw qaab maules cev rua Yexus haus, tabsis Yexus tsi kaam haus. 24Thaus puab muab Yexus ntsa rua sau ntoo khaublig lawm, puab muab Yexus cev rig tsho lug twv saib leejtwg yuav tau yaam twg.#Pnk 22.18 25Lub sijhawm kws puab muab Yexus ntsa rua sau ntoo khaublig, yog thaus cuaj teev sawv ntxuv. 26Puab sau ib nqais lug nkaug Yexus has tas, “Cov Yudais tug Vaajntxwv.”. 27Puab muab ob tug tubsaab ntsa rua sau ob tug ntoo khaublig, muab ib tug txhus rua ntawm Yexus saab xis, hab muab ib tug txhus rua ntawm Yexus saab txhumphem. [28Tej nuav muaj tav lawv le Vaajtswv txujlug kws has tas, “Luas suav has tas nwg ua txhum ib yaam le cov tuabneeg ua txhum.”]#15.28 Tej phoo qub ntxiv nqai 28 rua, (saib Lukas 22.37).#Yay 53.12

29Cov tuabneeg kws dlhau txujkev ntawd, puab cu hau nto hab thuam has tas, “Koj has tas, koj yuav rhuav lub Tuamtsev, hab peb nub koj yuav rov ua tau ib lub tshab! #Pnk 22.7; 109.25; Mak 14.58; Yhs 2.19 30Koj ca le paab koj kuas dlim hab nqeg sau tug ntoo khaublig ko lug!”

31Cov thawj ntawm cov povthawj hab cov xwbfwb kws qha Vaajtswv txuj Kevcai thuam Yexus ib yaam nkaus. Puab sis thaam has tas, “Nwg cawm tau lwm tug, tabsis nwg cawm tsi tau nwg! 32Kuas tug Mexiyas kws yog cov Yixalayees tug vaajntxwv ca le nqeg kag sau tug ntoo khaublig lug rua peb saib, peb txhaj yuav ntseeg nwg!”

Ob tug tubsaab kws raug ntsa rua sau ntoo khaublig ib yaam le Yexus los kuj thuam Yexus hab.

Yexus Tuag

(Mathais 27.45-56; Lukas 23.44-49; Yauhaas 19.28-30)

33Thaus nub ntseg txawm tsaus ntuj nti thoob plawg lub tebchaws, tsaus moog txug thaus peb teev nub qaij. 34Thaus peb teev nub qaij, Yexus hu nrov nrov has tas, “Elau-is, Elau-is, lemas xanpathanis?” Lu lug ntawd txhais has tas, “Kuv tug Vaajtswv, kuv tug Vaajtswv, ua le caag koj muab kuv tso tseg lawm?”#Pnk 22.1

35Cov tuabneeg kws sawv ntawd muaj qee leej nov Yexus has le ntawd, puab has tas, “Mej noog saib, nwg hu Eliyas!” 36Cov tuabneeg ntawd muaj ib tug txawm moog muab ib tug lojkov chob ib lub taub ntxuav yag raus cawv txiv maab qaub, cev moog rua ntawm Yexus qhovncauj hab has tas, “Peb tog mivntsiv saib, puas pum Eliyas lug paab nwg dlim ntawm tug ntoo khaublig!”#Pnk 69.21

37Yexus qw ib suab nrov nrov, ces nwg txawm tu sav nrho lawm.

38Taamsim ntawd dlaim ntaub kws thaiv huv lub Tuamtsev txawm ndluag rhe sau ti nkaus rua huv taw ua ob dlaig.#Tsd 26.31-33 39Tug thawj tubrog kws sawv ze ntawm tug ntoo khaublig pum Yexus tuag le ntawd,#15.39 Tuag le ntawd; Tej phoo qub has tas, qw nrov nrov, ces txawm tuag lawm.

Nwg has tas, “Tug nuav yog Vaajtswv tug Tub tag.”

40Muaj ib cov quaspuj tuaj sawv dleb dleb saib. Cov quaspuj ntawd yog Malis Madalas, Malis tug kws yog Yakaunpaus hluas hab Yauxej nam, hab Xalaumes.#Luk 8.2-3 41Cov quaspuj ntawd yog cov kws ibtxwm paab Yexus, hab nrug Yexus tuaj peg Kalilais tuaj, hab muaj dlua ib cov quaspuj kws nrug Yexus tuaj rua huv Yeluxalees los nyob ntawd hab.

Log Yexus

(Mathais 27.57-61; Lukas 23.50-56; Yauhaas 19.38-42)

42Thaus yuav tsaus ntuj kws yog nub npaaj qhov txhua chaw ca rua nub Xanpataus, Yauxej kws nyob huv lub nroog Alimathas txawm tuaj txug. 43Nwg yog ib tug numtswv kws suavdlawg fwm, hab nwg yog ib tug kws tog ntsoov Vaajtswv lub Tebchaws yuav lug. Yauxej moog thov Philaj kuas muab Yexus lub cev rua nwg. 44Thaus Philaj nov has tas Yexus tuag lawm, nwg xaav tsi thoob le. Nwg hu tug thawj tubrog lug nug saib Yexus tuag tau hov ntev lawm. 45Thaus tug thawj tubrog qha rua Philaj taag lawm, Philaj pub Yauxej moog muab Yexus lub cev txu coj moog log. 46Yauxej moog yuav ib chaws ntaub maag, nwg muab Yexus lub cev txu hab muab chaws ntaub maag qhwv hab kwv moog log rua huv ib lub qhov ntxaa kws luas txaug tau rua huv ib phaab pobzeb. Nwg dlov ib dlaim txag zeb luj lug npug lub rooj ntxaas ca. 47Malis Madalas hab Malis kws yog Yauxej nam pum qhov chaw kws Yauxej coj Yexus lub cev moog log.

Currently Selected:

Malakaus 15: HNJ2000

Highlight

Copy