Malakaus 16

Yexus Sawv Huv Qhovtuag Rov Lug

(Mathais 28:1-8; Lukas 24:1-12; Yauhaas 20:1-10)

1Thaus dlhau nub Xanpataus lawm, Malis Madalas, Malis kws yog Yakaunpaus nam, hab Xalaumes txawm moog yuav tshuaj tswqaab coj moog pleev Yexus lub cev. 2Nubkaaj thaus kaajntug txoog, thaus lub nub taabtom pib tawm tuaj, puab txawm moog tom lub qhovntxaa. 3Thaus puab taug kev moog, puab sisthaam has tas, “Leejtwg yuav paab peb muab dlaim laagzeb kws npug lub rooj ntxaas dlov tawm?” (Dlaim laagzeb ntawd luj kawg le.) 4Thaus puab moog txug lawm, puab tsaa qhovmuag saib mas pum tas dlaim laagzeb tub dlov rua ibcaag lawm. 5Thaus puab moog rua huv lub qhovntxaa, puab pum ib tug tub hluas naav ib lub tsho dlawb ntev-ntev nyob huv lub qhovntxaa saab xis, mas puab ntshai kawg le.

6Tug tub hluas ntawd has rua puab tas, “Mej tsi xob ntshai, kuv paub tas mej tuaj nrhav Yexus kws yog tuabneeg Naxalev kws luas muab ntsa rua sau ntoo khaublig. Nwg tsi nyob ntawm nuav, Nwg tub sawv lug lawm! Mej saib maj, ntawm nuav yog qhov chaw kws luas muab Nwg lub cev tso ca. 7Mej cale rovqaab moog qha rua Nwg cov thwjtim, hab has rua Petus has tas, ‘Nwg yuav ua mej ntej moog rua peg Kalilais; mej yuav ntsib Nwg peg lawvle Nwg tau qha rua mej lawm.’ ” #Math 26:32; Malak 14:28

8Cov quaspuj ntawd txawm tawm huv lub qhovntxaa dlha rovqaab lug, ntshai ua ibce tsheenyo hab ntxhuvsab kawg. Puab tsi qha rua leejtwg le ruaqhov puab ntshai heev.

NQAI XAUS QUB NTAWM PHOO MALAKAUS#16:8: Tej phoo ntawv qub kws xuas teg sau hab tej phoo kws xub txhais tsi muaj cov nqai xaus ntev nuav nyob rua huv phoo Malakaus (nqai 9-20).

Yexus Tshwm Rua Malis Madalas Pum

(Mathais 28:9-10; Yauhaas 20:11-18)

[ 9Thaus Yexus sawv huv lub qhovtuag rovqaab lug kws yog Nubkaaj thaus tseem ntxuv-ntxuv, Nwg xub lug tshwm rua Malis Madalas pum uantej. Malis Madalas yog tug kws Yexus tau ntab xyaa tug dlaab tawm lawm. 10Nwg tau moog qha tej kws nwg pum rua Yexus cov phoojywg kws puab tseem taabtom nyuajsab hab quajntsuag. 11Txawm puab nov Malis has tas Yexus tub rov muaj txujsa hab Malis tub pum Yexus lawm los puab tsi ntseeg le hab.

Yexus Lug Tshwm Rua Ob Tug Thwjtim Pum

(Lukas 24:13-35)

12Tomqaab ntawd, Yexus hloov dlua lwm lub cev lug tshwm rua ob tug thwjtim pum, thaus lub sijhawm kws obtug taabtom taug kev moog rua peg yaajsaab. 13Obtug rovqaab lug qha tej nuav rua cov thwjtim noog, tabsis puab kuj tsi ntseeg obtug le hab.

Yexus Lug Tshwm Rua Kaum-Ib Tug Thwjtim Pum

(Mathais 28:16-20; Lukas 24:36-49; Yauhaas 20:19-23; Tegnum 1:6-8)

14Thaus kawg Yexus lug tshwm rua kaum-ib tug thwjtim pum thaus puab taabtom noj mov. Yexus tshev puab, ruaqhov puab tsi muaj kev ntseeg, puab muaj lub sab tawv, vim puab tsi kaam ntseeg tej tuabneeg kws tub pum Yexus cajsa rov lug lawm. 15Yexus has rua puab tas, “Mej cale moog thoobplawg lub nplajteb nuav hab qha Txuj Moo Zoo rua txhua tsaav tuabneeg. #Tegnum 1:8 16Tug kws ntseeg hab ua kevcai rausdlej yuav dlim; tabsis tug kws tsi ntseeg yuav raug txim. 17Cov kws ntseeg yuav tau lub fwjchim kws ua tau tej txujci tseemceeb: puab yuav tuav Kuv lub npe ntab tau dlaab tawm; puab yuav has tau lwmyaam lug tshab; 18yog puab tuav raug naab los naab yuav tsi tum, yog puab haus tau tshuaj muaj taug los puab yuav tsi tuag; thaus puab cev teg npuab cov tuabneeg muaj mob, cov tuabneeg ntawd yuav zoo.”

Vaajtswv Coj Yexus Moog Sau Ntuj

(Lukas 24:50-53; Tegnum 1:9-11)

19Thaus tug Tswv Yexus qha puab taag lawm, Vaajtswv txawm coj Nwg moog rua sau ntuj ceebtsheej hab moog nyob ntawm Vaajtswv saab xis. #Tegnum 1:9-11 20Cov thwjtim txhaj tawm moog qha thoobplawg txhua qhov, hab tug Tswv tau nrug puab ua num hab leeg paub tas puab tej lug qhuabqha yeej tseeb tag lug ntawm qhov kws puab ua tau tej txujci tseemceeb.]

DLUA LWM NQAI XAUS QUB#16:20: Tej phoo ntawv qub kws xuas teg sau hab tej phoo kws xub txhais, muab cov nqai xaus tuablu nuav tso rua huv phoo Malakaus kws yog ntxiv rua ntawm cov nqai xaus ntev (nqai 9-20).

[ 9Cov quaspuj moog cuag Petus hab Nwg cov phoojywg, hab qha mivntsiv txug txhua yaam kws Yexus tau has rua puab. 10Tomqaab ntawd, Yexus txhaj xaa Nwg cov thwjtim moog thoobplawg saab nubtuaj moog rua saab nubpoob, kws yog moog qha txujlug cajsa hab txuj kev cawmdlim kws nyob moog ibtxhis.]

Currently Selected:

Malakaus 16: HNJ2022

Highlight

Copy