Lukas 4

Dlaab Ntxwgnyoog Sim Yexus Sab

(Mathais 4.1-11; Malakaus 1.12-13)

1Thaus Yexus rov qaab ntawm tug Dlej Yauladees moog, nwg puv npo Vaaj Ntsujplig tug Dlawbhuv, hab Vaaj Ntsujplig coj nwg moog tom roob mojsaab qhua, 2Dlaab Ntxwgnyoog sim Yexus sab tau plaub caug nub. Lub sijhawm ntawd Yexus tsi tau noj ib yaam dlaabtsi le, thaus dlhau plaub caug nub ntawd lawm, nwg tshaib plaab heev.

3Dlaab Ntxwgnyoog has rua Yexus has tas, “Yog koj yog Vaajtswv tug Tub tag, koj ca le has kuas lub pobzeb nuav txa ua mov.”

4Yexus teb has tas, “Vaajtswv Txujlug sau qha tseg has tas, ‘Tsi yog mov xwb txhaj cawm tau tuabneeg txujsa.’ ”#2 Kev 8.3

5Tom qaab ntawd, dlaab Ntxwgnyoog txawm coj Yexus moog rua sau ib qhov chaw sab sab, hab ua rua Yexus pum taagnrho tej tebchaws huv qaab ntuj nuav. 6Dlaab Ntxwgnyoog has rua Yexus has tas, “Kuv yuav muab hlo lub fwjchim hab muab ib puas tsaav yaam kws muab rua kuv lawm ntawd huv tuabsi rua koj, rua qhov tej ntawd yog kuv tug, kuv yuav muab rua leejtwg los tau. 7Yog koj txhus caug pe kuv, ib puas tsaav yaam ntawd yuav yog koj tug taagnrho.”

8Yexus teb has tas, “Vaajtswv Txujlug sau qha tseg has tas, ‘Mej yuavtsum pehawm tug Tswv kws yog mej tug Vaajtswv tuab leeg hab ua nwg teg num xwb!’ ”#2 Kev 6.13

9Tom qaab ntawd dlaab Ntxwgnyoog txawm coj Yexus moog rua huv lub nroog Yeluxalees, hab nwg coj Yexus nce moog rua sau lub Tuamtsev qhov kws sab tshaaj plawg, nwg has rua Yexus has tas, “Yog koj yog Vaajtswv tug Tub tag, koj ca le dlha rua huv aav, 10rua qhov Vaajtswv Txujlug sau qha tseg has tas, ‘Vaajtswv yuav kuas nwg cov timtswv lug tsomkwm koj.’ #Pnk 91.11-12 11Hab tseem muaj ib lus has ntxiv tas, ‘Puab ob txhais teg yuav fwj koj, hab yuav tsi pub koj ob txhais kutaw tsoo pobzeb le.’ ”

12Yexus teb dlaab Ntxwgnyoog has tas, “Vaajtswv Txujlug has tas, ‘Koj tsi xob sim tug Tswv kws yog koj tug Vaajtswv sab.’ ”#2 Kev 6.16

13Thaus dlaab Ntxwgnyoog dlaag Yexus txhua yaam taag lawm, nwg txawm ncaim Yexus moog txug thaus rov muaj sijhawm.

Yexus Pib Ua Num huv Kalilais

(Mathais 4.12-17; Malakaus 1.14-15)

14Tom qaab ntawd, Yexus rov qaab moog rua peg Kalilais, hab Vaaj Ntsujplig tug Dlawbhuv lub fwjchim nrug nraim nwg. Nwg lub moo nrov nchaa moog thoob plawg cheebtsaam ntawd. 15Yexus moog qha huv puab tej tsev saablaaj, hab txhua tug kws nov nwg qha, qhuas nwg kawg le.

Cov Tuabneeg huv Naxales tsi Fwm Yexus

(Mathais 13.53-58; Malakaus 6.1-6)

16Tom qaab ntawd, Yexus moog txug huv lub nroog Naxales kws nwg luj hlub. Nub Xanpataus nwg moog rua huv tsev saablaaj lawv le nwg ibtxwm moog. Nwg sawv ntsug nyeem Vaajtswv Txujlug rua suavdlawg noog, 17luas muab thooj ntawv kws Yaxayas tug kws cev Vaajtswv lug sau lug rua Yexus. Yexus nthuav thooj ntawv ntawd tau zaaj kws has tas:

18“Tug Tswv tug Ntsujplig

nrug nraim kuv,

rua qhov nwg tsaa kuv ua tug

qha Txujmoo Zoo

rua cov tuabneeg txomnyem.

Vaajtswv khaiv nwg moog qha

txujkev cawm dlim

rua cov tuabneeg kws raug kaw,

hab khu cov tuabneeg dligmuag

kuas rov pum kev,

hab tso cov kws raug kev

tsimtxom kuas dlim #Yay 61.1-2 (LXX)

19hab qha rua suavdlawg paub

lub sijhawm

kws tug Tswv yuav lug cawm

nwg tsaav tuabneeg.”

20Thaus Yexus nyeem taag, nwg muab thooj ntawv ntawd dlov ca hab muab rua tug kws saib tej ntawv ntawd, hab nwg txawm nyob quastsawg. Txhua tug kws nyob huv lub tsev saablaaj saib ntsoov Yexus, 21Yexus pib qha puab has tas, “Vaajtswv Txujlug kws nub nua mej nov tub tav lawm.”

22Cov tuabneeg ntawd qhuas hab xaav tsi thoob rua tej lug zoo kws nwg has ntawd. Puab has tas, “Tug nuav tsi yog Yauxej tug tub los?”

23Yexus has rua puab tas, “Kuv paub has tas mej yeej yuav has lu paajlug nuav rua kuv has tas, ‘Koj yog tug kws tshuaj, koj yuavtsum xub khu koj kuas zoo tsaiv.’ Hab mej yuav has rua kuv tas, ‘Koj sim ua tej txujci kws peb nov koj ua peg lub nroog Kapena-us, rua huv koj lub nroog nuav rua peb saib.’ ” 24Yexus has rua puab tas, “Kuv qha tseeb rua mej has tas, yeej tsi muaj ib tug cev Vaajtswv lug kws cov tuabneeg nyob huv nwg lub zog yuav fwm nwg.#Yhs 4.44

25“Mej noog kuv has: kuv qha tseeb rua mej has tas, thaus lub sijhawm kws Eliyas nyob, muaj tej puj ntsuag coob coob nyob huv tebchaws Yixalayees. Thaus ntawd naag tsi lug tau peb xyoos hab rau hli, hab muaj kev tshaib plaab thoob plawg lub tebchaws.#1 Vnt 17.1 26Vaajtswv tsi tau khaiv Eliyas moog paab cov puj ntsuag kws nyob huv tebchaws Yixalayees ib tug le, tabsis tsuas khaiv Eliyas moog paab tug puj ntsuag kws nyob huv lub nroog Xalefas huv cheebtsaam Xidoos xwb.#1 Vnt 17.8-16 27Hab thaus lub sijhawm kws Elisas tug kws cev Vaajtswv lug nyob, muaj cov tuabneeg mob ruas coob coob nyob huv tebchaws Yixalayees, tabsis tsi muaj ib tug zoo ruas le, tsuas yog Na-amaas tug kws yog tuabneeg Xilias tuab leeg txhaj zoo ruas xwb.”#2 Vnt 5.1-14

28Thaus cov tuabneeg kws nyob huv lub tsev saablaaj nov Yexus has le ntawd, suavdlawg chim heev. 29Puab txawm sawv tseeg muab Yexus thawb ntag tawm huv lub nroog moog, hab coj Yexus moog rua sau hauv roob, yuav muab Yexus thawb rua huv qaab tsuas, rua qhov lub nroog ntawd nyob sau roob, 30tabsis Yexus ca le phoom ntag phua plhawv puab hab tsiv moog lawm.

Tug Txivneej Raug Dlaab

(Malakaus 1.21-28)

31Tom qaab ntawd, Yexus moog rua peg lub nroog Kapena-us kws nyob huv lub xeev Kalilais, nub Xanpataus Yexus qha cov tuabneeg suavdlawg. 32Cov tuabneeg ntawd xaav tsi thoob rua tej kws Yexus qha, rua qhov Yexus tej lug qha muaj fwjchim heev.#Mat 7.28-29 33Muaj ib tug txivneej raug dlaab tuaj rua huv lub tsev saablaaj, nwg qw nrov nrov has tas, 34“Yexus kws yog tuabneeg Naxales, koj tuaj ua kuas peb puamtsuaj los? Kuv paub koj yog leejtwg, koj yog Vaajtswv tug Tub kws dlawbhuv!”

35Yexus has tawv tawv rua dlaab has tas, “Koj tsi xob has lug, koj ca le tawm huv tug txivneej nuav moog!” Dlaab txawm ua rua tug txivneej ntawd qaug kag rua huv aav taabmeeg suavdlawg, ces dlaab txawm tawm plawg lawm, tsi ua rua tug txivneej ntawd raug mob le.

36Cov tuabneeg coob coob ntawd xaav tsi thoob hab sis thaam has tas, “Tej lug ntawd yog has le caag? Ua le caag nwg tej lug yuav muaj fwjchim ua luaj le, hab ntab tau dlaab tawm!” 37Yexus lub moo txawm nrov nchaa moog thoob plawg cheebtsaam ntawd.

Yexus Khu Petus Nam Tais

(Mathais 8.14-17; Malakaus 1.29-34)

38Yexus tawm huv lub tsev saablaaj hab moog rua huv Ximoos tsev. Ximoos nam tais ua npaws nwg kub cev heev. Puab thov kuas Yexus paab nwg. 39Yexus moog sawv ntawm lub txaaj kws Ximoos nam tais pw ib saab, hab has kuas tug npaws ca le tu. Ces tug npaws txawm tu hab nwg sawv tseeg taamsim ntawd lug ua zaub ua mov rua Yexus puab noj.

40Thaus nub poob qho lawm, txhua tug kws muaj tej kwvtij kws muaj mob, puab coj tuaj cuag Yexus: Yexus cev teg tuav txhua tug, ces puab tej mob txawm zoo huv tuabsi lawm. 41Hab muaj ntau tug kws raug dlaab, Yexus ntab dlaab tawm huv tuabsi. Cov dlaab ntawd has nrov nrov has tas, “Koj yog Vaajtswv tug Tub!”

Tabsis Yexus txwv tsi pub dlaab has lug, rua qhov dlaab paub has tas Yexus yog tug Mexiyas.

Yexus Qhuab Qha Huv tej Tsev Saablaaj

(Malakaus 1.35-39)

42Thaus kaaj ntug, Yexus tawm huv lub nroog moog rua ib qhov chaw kws tsi muaj tuabneeg. Muaj ib paab tuabneeg tuaj nrhav Yexus, thaus puab nrhav tau nwg lawm, puab cheem tsi pub nwg moog. 43Tabsis nwg has rua puab tas, “Kuv yuavtsum moog qha Txujmoo Zoo kws has txug Vaajtswv lub Tebchaws rua lwm lub nroog hab, rua qhov Vaajtswv yeej khaiv kuv lug ua teg num nuav.”

44Yexus moog qhuab qha huv tej tsev saablaaj kws nyob txhua qhov huv xeev Yudas.

Currently Selected:

Lukas 4: HNJ2000

Highlight

Copy