Lukas 3

Yauhaas Moog Qhuab Qha

(Mathais 3.1-12; Malakaus 1.1-8; Yauhaas 1.19-28)

1Thaus Tinpeli-us ua vaajntxwv kaav tebchaws tau kaum tsib xyoos lawm, lub sijhawm ntawd Pauti-us Philaj ua tswvxeev kaav lub xeev Yudas. Helauj ua nom kaav lub xeev Kalilais hab Helauj tug kwv Filis ua nom kaav lub xeev Itule-as hab lub xeev Takaunitis; Lixaniyas ua nom kaav lub xeev Anpilees, 2Aanas hab Kayafas ua ob tug Povthawj Hlub. Lub sijhawm ntawd, Vaajtswv qha Vaajtswv txujlug rua Xakhaliyas tug tub Yauhaas tom roob mojsaab qhua. 3Yog le ntawd, Yauhaas txhaj moog qhuab qha thoob plawg cheebtsaam kws nyob ntawm tug Dlej Yauladees has tas, “Mej yuavtsum tso mej tej kev txhum tseg hab ua kevcai raus dlej, Vaajtswv txhaj yuav zaam txim rua mej.” 4Qhov nuav muaj lawv le Yaxayas tug kws cev Vaajtswv lug tau sau tseg rua huv nwg phoo ntawv has tas:

“Muaj ib tug has nrov nrov

tom roob

mojsaab qhua has tas,

‘Ca le khu kev tog tug Tswv;

khu kev kuas ncaaj

nwg yuav lug! #Yay 40.3-5 (LXX)

5Txhub txhua lub kwj haa

kuas puv,

khawb txhua lub roob hab txhua

lub pov roob kuas taj.

Khu tej kev nkhaus kuas ncaaj,

muab qhov sab hab qhov qeg

pheej kuas taj xwmyeem.

6Txhua tsaav tuabneeg yuav

pum Vaajtswv

txujkev cawm dlim!’ ”

7Muaj tuabneeg coob coob tuaj cuag Yauhaas kuas Yauhaas muab puab ua kevcai raus dlej. Yauhaas has rua puab tas, “Cov nam naab! Leejtwg qha rua mej has tas, mej yuav tsiv dlim Vaajtswv txujkev txav txim kws tub lug yuav txug? #Mat 12.34; 23.33 8Mej yuavtsum ua mej lub neej rua suavdlawg pum has tas, mej tub tso mej tej kev txhum tseg lawm. Mej tsi xob khaav has tas, Anplahaas yog mej yawmkoob. Kuv qha rua mej has tas, txawm yog Vaajtswv muab tej pobzeb nuav lug ua Anplahaas cov xeebntxwv los nwg yeej ua tau! #Yhs 8.33 9Nwgnuav tub muab raab taus tso rua ntawm lub hauvpaug ntoo lawm, tub yuav ntuv tug ntoo; txhua tsob ntoo kws tsi txi cov txiv zoo, luas yuav muab ntuv hab muab pov rua huv cub suavtawg.”#Mat 7.19

10Cov tuabneeg coob coob ntawd nug Yauhaas has tas, “Yog le ntawd, peb yuav ua le caag?”

11Yauhaas teb puab has tas, “Yog leejtwg muaj ob lub tsho, yuavtsum muab ib lub pub rua tug kws tsi muaj, hab yog leejtwg muaj mov muaj zaub, nwg yuavtsum muab faib rua tug kws tsi muaj.”

12Cov tuabneeg kws sau se muaj qee leej tuaj ua kevcai raus dlej, hab puab nug Yauhaas has tas, “Xwbfwb peb yuav ua le caag?”#Luk 7.29

13Yauhaas teb has tas, “Mej yuavtsum sau lawv le kevcai xwb, tsi xob sau tshaaj.”

14Cov tubrog muaj qee leej nug Yauhaas ib yaam nkaus has tas, “Ua le peb ne, peb yuav ua le caag?”

Yauhaas teb has tas, “Mej tsi xob yuam leejtwg lossis ntxag luas nyaj yuav. Mej tau nyaj hli npaum le caag, ca le txaus sab yuav le ntawd xwb.”

15Cov tuabneeg kws ca sab ntsoov tog tug cawmseej xaav has tas, Yauhaas yog tug Mexiyas ntaag. 16Yauhaas has rua puab tas, “Kuv muab mej ua kevcai raus dlej, tabsis tug kws yuav lawv kuv qaab lug, nwg muaj Fwjchim Luj dlua kuv, kuv tub tsi tsimnyog dlaws nwg txuj nyuas hlua khau. Nwg yuav muab mej ua kevcai raus lug ntawm Vaaj Ntsujplig tug Dlawbhuv hab ntawm suavtawg. 17Nwg tuav rawv raab ntxuam, nwg yuav ntxuaj nwg pawg nplej, kuas cov npluag yaa tawm huv tuabsi. Nwg yuav muab cov nplej zoo ntim rua huv nwg lub txhaab, tabsis nwg yuav muab cov npluag pov rua huv cub suavtawg kws cig tsi paub tuag.”

18Yauhaas qha Txujmoo Zoo ntau zaaj tsi sis thooj ntuag cov tuabneeg ntawd, kuas puab hloov puab lub sab. 19Tabsis Yauhaas tshev Helauj tug kws ua nom kaav lub xeev Kalilais, rua qhov Helauj yuav Helaudias kws yog Helauj tug kwv tug quaspuj, hab Helauj ua ntau yaam phem.#Mat 14.3-4; Mak 6.17-18 20Helauj tseem ua ib qhov phem ntxiv kws yog nwg nteg Yauhaas coj moog kaw rua huv tsev lojcuj.

Yexus Ua Kevcai Raus Dlej

(Mathais 3.13-17; Malakaus 1.9-11)

21Tom qaab kws suavdlawg ua kevcai raus dlej taag lawm, Yexus ua kevcai raus dlej hab. Thaus Yexus taabtom thov Vaajtswv, rooj ntug txawm qheb hlo, 22hab Vaaj Ntsujplig tug Dlawbhuv kws muaj lub cev zoo le tug nquab lug rua sau Yexus. Hab muaj ib lub suab has sau ntuj tuaj rua Yexus has tas, “Koj yog kuv tug Tub kws kuv hlub, kuv txaus sab rua koj.”#Chk 22.2; Pnk 2.7; Yay 42.1; Mat 3.17; Mak 1.11; Luk 9.35

Yexus Cov Yawmkoob

(Mathais 1.1-17)

23Thaus Yexus pib ua num, nwg noobnyoog muaj kwvlaam le peb caug xyoo. Lawv le suavdlawg xaav, Yexus yog Yauxej tub, Yauxej yog Helis tub, 24Helis yog Mathas tub, Mathas yog Levis tub, Levis yog Melekhis tub, Melekhis yog Yaanais tub, Yaanais yog Yauxej tub, 25Yauxej yog Matatiyas tub, Matatiyas yog Amaus tub, Amaus yog Nahus tub, Nahus yog Exalis tub, Exalis yog Nakhais tub, 26Nakhais yog Ma-as tub, Ma-as yog Matatiyas tub, Matatiyas yog Xemis tub, Xemis yog Yauxes tub, Yauxes yog Yaudas tub, 27Yaudas yog Yau-anaas tub, Yau-anaas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub, 28Nelis yog Melekhis tub. Melekhis yog Adis tub, Adis yog Kauxas tub, Kauxas yog Emadas tub, Emadas yog Eles tub, 29Eles yog Yausuas tub, Yausuas yog Eli-exes tub, Eli-exes yog Yaulimes tub, Yaulimes yog Mathas tub, Mathas yog Levis tub, 30Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliyakees tub, 31Eliyakees yog Mele-as tub, Mele-as yog Menas tub, Menas yog Matathas tub, Matathas yog Nathaas tub, Nathaas yog Daviv tub. 32Daviv yog Yexais tub, Yexais yog Aunpes tub, Aunpes yog Npau-am tub, Npau-am yog Xamoos tub, Xalemoos yog Nasoos tub, 33Nasoos yog Aminadas tub, Aminadas yog Amis tub, Amis yog Anis tub, Anis yog Heloos tub, Heloos yog Peles tub, Peles yog Yudas tub, 34Yudas yog Yakhauj tub, Yakhauj yog Ixaj tub, Ixaj yog Anplahaas tub, Anplahaas yog Telas tub, Telas yog Nahaus tub, 35Nahaus yog Xelus tub, Xelus yog Le-us tub, Le-us yog Pelej tub, Pelej yog Enpes tub, Enpes yog Selas tub, 36Selas yog Kainas tub, Kainas yog Afaxas tub,. Afaxas yog Xees tub, Xees yog Nau-es tub, Nau-es yog Lamej tub, 37Lamej yog Methuxelas tub, Methuxelas yog Enauj tub, Enauj yog Yales tub, Yales yog Mahalalees tub, Mahalalees yog Kenaas tub, 38Kenaas yog Enauses tub, Enauses yog Xej tub, Xej yog Adaas tub, Adaas yog Vaajtswv tub.

Currently Selected:

Lukas 3: HNJ2000

Highlight

Copy