Lukas 4

Dlaab Ntxwgnyoog Sim Yexus Sab

(Mathais 4:1-11; Malakaus 1:12-13)

1Yexus rovqaab ntawm tug Dlej Yauladees lug, Nwg puvnpo Vaaj Ntsujplig tug Dlawbhuv, hab Vaaj Ntsujplig coj Nwg moog tom roob mojsaab qhua; 2qhov chaw ntawd dlaab ntxwgnyoog tau sim Nwg sab tau plaubcaug nub. Nyob rua plaubcaug nub ntawd Yexus yeej tsi tau noj ib yaam dlaabtsi le, thaus dlhau lub sijhawm ntawd lawm, Nwg tshaib plaab heev.

3Dlaab ntxwgnyoog txawm has rua Yexus tas, “Yog Koj yog Vaajtswv tug Tub tag, Koj kuj has kuas lub coszeb nuav txa ua mov.”

4Tabsis Yexus teb tas, “Vaajtswv Txujlug sau tseg has tas, ‘Tuabneeg tsi yog yuav cajsa lug ntawm zaub-mov xwb.’ ” #2Kev 8:3

5Tes dlaab ntxwgnyoog txawm coj Nwg moog rua sau ib qhov chaw sab-sab, hab tuab ntsais muag xwb nwg txawm ua kag rua Yexus pum taagnrho tej tebchaws huv qaabntuj nuav. 6Dlaab ntxwgnyoog has rua Yexus tas, “Kuv yuav muab hlo tej fwjchim hab tej kev npluanuj nuav rua Koj, ruaqhov tej ntawd kuv tub tau txais lug ua kuv tug lawm, kuv yuav muab rua leejtwg los tau. 7Yog Koj pe kuv, txhua yaam nuav yuav yog Koj tug.”

8Yexus teb tas, “Vaajtswv Txujlug sau tseg has tas, ‘Koj yuavtsum pehawm tug Tswv kws yog koj tug Vaajtswv hab tsuas ua Nwg tegnum nkaus xwb!’ ” #2Kev 6:13

9Tomqaab ntawd, dlaab ntxwgnyoog txawm coj Nwg moog rua huv Yeluxalees hab coj Nwg moog rua sau lub ruv kws sab tshaajplawg ntawm lub Tuamtsev, hab has rua Nwg tas, “Yog Koj yog Vaajtswv tug Tub tag, Koj kuj cale dlha sau nuav moog rua huv aav. 10Ruaqhov Vaajtswv Txujlug tau sau tseg has tas, ‘Vaajtswv yuav kuas Nwg cov timtswv ceebtsheej tsomkwm Koj.’ #Nnkauj 91:11-12 11Hab tseem muaj ib lus has ntxiv tas, ‘Puab ob txhais teg yuav fwj Koj, kuas Koj ob txhais kutaw tsi xob ntsawm pobzeb le.’ ”

12Yexus teb tas, “Vaajtswv Txujlug has tas, ‘Tsi xob sim tug Tswv kws yog koj tug Vaajtswv.’ ” #2Kev 6:16

13Thaus dlaab ntxwgnyoog ua txhua yaam txhua tsaav sim Yexus taag lawm, nwg txawm ncaim Yexus moog tog txug thaus rov muaj sijhawm dlua.

Yexus Chiv Ua Nwg Tegnum Huv Kalilais

(Mathais 4:12-17; Malakaus 1:14-15)

14Yexus rovqaab moog rua peg Kalilais, puvnpo Vaaj Ntsujplig tug Dlawbhuv lub fwjchim. Nwg lub moo nrov-nchaa moog thoobplawg tej cheebtsaam ntawd. 15Yexus moog qha huv puab tej tsev saablaaj, hab txhua tug kws nov Nwg qha, qhuas Nwg kawg le.

Cov Tuabneeg Huv Naxalev Tsi Txais Yuav Yexus

(Mathais 13:53-58; Malakaus 6:1-6)

16Dlhau ntawd, Yexus moog rua huv lub nroog Naxalev kws Nwg lujhlub. Nub Xanpataus Nwg moog rua huv tsev saablaaj lawvle Nwg txeev moog. Nwg sawvntsug nyeem Vaajtswv tej Lug rua suavdlawg noog, 17puab txawm muab Yaxayas, kws yog tug xwbfwb cev Vaajtswv lug, thooj ntawv kauv kws tau sau ca lawm lug cev rua Yexus. Yexus nthuav thooj ntawv ntawd hab nrhav tau zaaj kws has tas:

18“Tug Tswv tug Ntsujplig tau lug rua sau Kuv,

ruaqhov Nwg tsaa Kuv ua tug qha Txuj Moo Zoo rua cov tuabneeg pluag.

Nwg khaiv Kuv moog qha txuj kev ywjpheej rua cov tuabneeg kws raug kaw,

hab khu cov tuabneeg dligmuag kuas rov pumkev,

tso cov kws raug kev caijtsuj kuas dlim #Yaxaya 61:1-2 (LXX)

19hab qha has tas lub sijhawm

kws tug Tswv yuav lug cawm Nwg tsaav tuabneeg tub lug txug lawm.”

20Thaus Yexus nyeem taag lawm, Nwg txawm muab thooj ntawv kauv ntawd dlov hab rov muab cev rua tug kws saib tej ntawv ntawd, tes Nwg txawm nyobtsawg lawm. Txhua tug kws nyob huv lub tsev saablaaj yeej saibntsoov Yexus le, 21tes Nwg txhaj chiv qha puab has tas, “Vaajtswv Txujlug nqai nuav tau tav nubnua lawvle qhov kws mej nov Kuv nyeem ntawd.”

22Cov tuabneeg ntawd qhuas hab xaav tsi thoob rua tej lug zoo kws Nwg has ntawd. Puab has tas, “Tug nuav tsi yog Yauxej tug tub lov?”

23Yexus has rua puab tas, “Kuv paub tas mej yeej yuav siv lu paajlug nuav has rua Kuv has tas, ‘Kws-khumob, xub khu koj kuas zoo tsaiv.’ Hab mej yuav has rua Kuv tas, ‘Koj sim ua tej txujci kws peb nov Koj ua peg lub nroog Kapena-us, rua huv Koj lub nroog nuav rua peb seb.’ ”

24Yexus has ntxiv rua puab tas, “Kuv qha tseeb rua mej has tas, yeej tsi muaj ib tug xwbfwb cev Vaajtswv lug kws cov tuabneeg nyob huv nwg lub zog yuav fwm nwg. #Yauh 4:44 25Mej noog Kuv has: Kuv qha tseeb rua mej has tas, thaus lub sijhawm kws Eliyas nyob, muaj tej pujntsuag coob-coob nyob huv tebchaws Yixalayees, thaus ntawd naag tsi lug tau 3 xyoos hab rau hli, hab muaj kev tshaib plaab thoobplawg lub tebchaws. #1Vaaj 17:1 26Txawm le ntawd los Vaajtswv yeej tsi khaiv kuas Eliyas moog paab cov pujntsuag kws nyob huv tebchaws Yixalayees ib tug le, tabsis tsuas yog khaiv nwg moog paab tug pujntsuag kws nyob huv lub nroog Xalefas huv cheebtsaam Xidoos nkaus xwb. #1Vaaj 17:8-16 27Hab thaus lub sijhawm kws tug cev Vaajtswv lug Elisas nyob ntawd, muaj cov tuabneeg mob ruas#4:27: mob ruas: lug Kilis siv lulug nuav rua ntau yaam kaab mob kws yog mob phem-phem rua ntawm dlaim tawv nqaj, kuj yuav tsi yog kag mob ruas hab. coob-coob nyob huv tebchaws Yixalayees, tabsis tsi muaj ib tug zoo mob ruas le, tsuas yog Na-amaas kws yog tuabneeg Xilias tuableeg txhaj zoo xwb.” #2Vaaj 5:1-14

28Thaus cov tuabneeg kws nyob huv lub tsev saablaaj nov Yexus has le ntawd, puab txhua tug chim heev. 29Puab txawm sawvtseeg, muab Yexus caab tawm huv lub nroog moog, hab coj Nwg moog rua sau lub hauv tsua kws puab rhawv lub nroog ntawd. Puab npaajsab yuav muab Yexus thawb rua huv qaabtsuas, 30tabsis Yexus cale phua plhawv huv cov tuabneeg coob-coob ntawd moog hab tsiv lawm.

Tug Txivneej Kws Raug Ib Tug Ntsujplig Phem

(Malakaus 1:21-28)

31Tomqaab ntawd, Yexus txawm nqeg moog txug rua ntawm lub nroog Kapena-us kws nyob huv lub xeev Kalilais, hab nub Xanpataus Nwg qha cov tuabneeg suavdlawg. 32Cov tuabneeg ntawd xaav tsi thoob txug tej lug kws Yexus qha, ruaqhov Nwg qha le ib tug kws muaj fwjchim heev. #Math 7:28-29 33Nyob rua huv lub tsev saablaaj ntawd, muaj ib tug txivneej raug dlaab phem le ib tug ntsujplig, nwg txawm qw nrov-nrov has tas, 34“Ab! Yexus kws yog tuabneeg Naxalev, Koj tuaj taabkaum peb ua dlaabtsi? Koj yuav tuaj rhuav kuas peb puamtsuaj puas yog? Kuv paub tas Koj yog leejtwg, Koj yog tug Dlawbhuv kws lug ntawm Vaajtswv lug!”

35Yexus has tawv-tawv rua tug ntsujplig phem ntawd has tas, “Koj tsi yoom haslug, koj cale tawm kag huv tug txivneej nuav moog!” Tug dlaab txawm ua rua tug txivneej ntawd qaug kag rua huv aav taabmeeg suavdlawg, tes dlaab txawm tawm plawg moog hab tsi ua rua tug txivneej ntawd raug mob le.

36Cov tuabneeg coob-coob ntawd xaav tsi thoob hab sisthaam zumzawg has tas, “Tej lug ntawd yog lug dlaabtsi? Nwg muaj cai hab muaj fwjchim ntab tau cov ntsujplig phem ntawd ua rua puab cale tawm plawg moog lawm!” 37Yexus lub moo txawm nrov-nchaa moog thoobplawg cheebtsaam ntawd.

Yexus Khu Ntau Leej

(Mathais 8:14-17; Malakaus 1:29-34)

38Yexus txawm tawm huv lub tsev saablaaj hab moog rua huv Ximoos tsev. Ximoos namtais uanpaws ua rua nwg kub cev heev. Puab thov kuas Yexus paab nwg. 39Yexus txawm moog sawv ib saab ntawm Ximoos namtais lub txaaj pw, hab has kuas tug npaws cale tu. Tes tug npaws txawm tu hab nwg sawvtseeg taamsim ntawd lug tam puab.

40Thaus nub yuav poobqho, txhua tug kws muaj tej phoojywg kws muaj mob, puab txawm nyag taug nyag coj cov muaj mob ntawd tuaj cuag Yexus; Yexus tsaa teg rua sau puab txhua tug, tes puab txawm zoo mob huv tuabsi lawm. 41Muaj ntau tug dlaab tau tawm huv ntau tug tuabneeg moog, hab qw nrov-nrov tas, “Koj yog Vaajtswv tug Tub!”

Tabsis Yexus txwv tsi pub cov dlaab ntawd haslug, ruaqhov puab paub tas Yexus yog tug Mexiyas.

Yexus Qhuabqha Huv Tej Tsev Saablaaj

(Malakaus 1:35-39)

42Thaus kaajntug, Yexus tawm huv lub nroog moog rua ib qhov chaw kws nyob ntsagtu. Tej tuabneeg nrhav Yexus kawg le; thaus puab nrhav tau Nwg lawm, puab cheem tsi pub Nwg moog. 43Tabsis Nwg has rua puab tas, “Kuv yuavtsum moog qha Txuj Moo Zoo kws has txug Vaajtswv lub Tebchaws rua lwm lub nroog hab, ruaqhov Vaajtswv yeej khaiv kuas Kuv lug ua tegnum ntawd.”

44Yogle ntawd Yexus txhaj moog qhuabqha huv tej tsev saablaaj kws nyob txhuanrho lub xeev Yudas.

Currently Selected:

Lukas 4: HNJ2022

Highlight

Copy