Lukas 14

Yexus Khu Ib tug Txivneej Kws Muaj Mob

1Muaj ib nub kws yog nub Xanpataus, Yexus moog noj mov huv cov Falixais ib tug thawj lub tsev; muaj tuabneeg saib ntsoov Yexus. 2Muaj ib tug txivneej teg taw xaab xaab lug cuag Yexus, 3Yexus nug cov xwbfwb kws qha Vaajtswv txuj Kevcai hab cov Falixais has tas, “Peb txuj kevcai puas pub peb khu mob nub Xanpataus los tsi pub?”

4Tabsis puab tsi teb le. Yexus tuav nkaus tug txivneej ntawd, Yexus khu nwg tug mob zoo hab kuas nwg moog tsev lawm. 5Yexus has rua puab tas, “Nub Xanpataus, yog mej leejtwg muaj ib tug mivnyuas lossis ib tug nyuj moog poob rua huv qhov tshij lawm, txawm yog nub ntawd yog nub Xanpataus los mej yeej yuav moog muab nrawm nroog xwb los sav?”#Mat 12.11

6Puab teb tsi taug Yexus lu lug ntawd le.

Txu Fwjchim thaus Moog Ua Qhua

7Yexus pum cov tuabneeg kws tuaj noj mov muaj qee leej xaiv nyob peg hauv tsum, Yexus has ib zaaj lug pevtxwv rua puab has tas, 8“Thaus muaj tuabneeg hu koj moog noj tshoob, koj tsi xob xub moog xaiv nyob peg hauv tsum. Nyob tsaam tug tswv tsev tub hu ib tug kws tseemceeb dlua koj tuaj, #Plg 25.6-7 9hab tug tswv tsev kws hu meb ob leeg tuaj, yuav lug has rua koj tas, ‘Ca tug nuav nyob lub chaw ko.’ Thaus ntawd koj yuav poob ntsejmuag heev, hab koj yuav tau moog nyob tom qaab. 10Thaus muaj tuabneeg hu koj moog noj mov, koj yuavtsum xub moog nyob tom qaab, thaus tug tswv tsev lug, nwg yuav hu koj has tas, ‘Phoojywg, koj ca le moog nyob peg hauv tsum.’ Ces koj yuav tau ntsejmuag taabmeeg cov tuabneeg kws nrug koj nyob noj mov ua ke ntawd. 11Rua qhov txhua tug kws khaav has tas nwg muaj fwjchim, tug ntawd yuav poob fwjchim, tabsis txhua tug kws txu fwjchim, yuav tau fwjchim.”#Mat 23.12; Luk 18.14

12Yexus has rua tug tswv tsev ntawd has tas, “Thaus koj noj sus lossis noj mo, koj tsi xob moog hu koj tej phoojywg, koj tej kwvtij neejtsaa, hab tej tuabneeg zej zog kws npluanuj tuaj xwb, rua qhov puab yeej yuav ua ib rooj mov pauj rua koj. 13Thaus koj muaj noj muaj haus, koj ca le moog hu tej tuabneeg pluag, tej tuabneeg qhuav teg qhuav taw, tej tuabneeg cegtawv, hab tej tuabneeg dligmuag tuaj noj; 14koj txhaj yuav tau koob moov, rua qhov puab cov ntawd pauj tsi taug koj txaj ntsig. Thaus Vaajtswv tsaa cov tuabneeg ncaaj nceeg sawv huv qhov tuag rov qaab lug, Vaajtswv yuav muab nqe zug rua koj.”

Tug Kws Ua Ib Rooj Mov Luj

(Mathais 22.1-10)

15Cov tuabneeg kws nrug Yexus nyob ntawm rooj mov nov Yexus has le ntawd, muaj ib tug has rua Yexus has tas, “Tug kws tau moog noj mov huv Vaajtswv lub tebchaws, tug ntawd yuav zoo sab kawg le!”

16Yexus has rua nwg tas, “Muaj ib tug txivneej ua ib rooj mov luj, nwg moog caw ntau leej tuaj noj. 17Thaus txug lub sijhawm noj lawm, nwg khaiv ib tug tubkhai moog hu cov tuabneeg kws nwg tub caw lawm has tas, ‘Mej ca le moog, tub rau mov txhij lawm!’ 18Tabsis cov tuabneeg ntawd txhua tug yig has tas, tsi khoom moog. Thawj tug has rua tug tubkhai ntawd has tas, ‘Kuv yuav tau ib thaaj laj, kuv yuav moog saib; koj rov moog has rua koj tug tswv kuas nwg tsi xob tu sab.’ 19Muaj dlua ib tug has tas, Kuv yuav tau tsib nkawm nyuj, kuv yuav moog muab kuv cov nyuj sim laij lag. Koj rov moog has rua koj tug tswv kuas nwg tsi xob tu sab. 20Muaj dlua ib tug has tas, ‘Kuv nyavnyuas yuav quaspuj, yog le ntawd kuv tsi moog.’ 21Tug tubkhai rov moog qha tej nuav rua nwg tug tswv. Tug tswv chim heev, nwg has rua tug tubkhai has tas, ‘Koj ca le moog rua tom tej kev luj kev miv huv nroog, coj tej tuabneeg pluag, tej tuabneeg qhuav teg qhuav taw, tej tuabneeg dligmuag hab tej tuabneeg cegtawv tuaj noj.’ 22Tug tubkhai rov lug has rua nwg tug tswv has tas, ‘Kuv tub moog ua lawv le koj has rua kuv lawm, tabsis tseem tshuav chaw hab.’ 23Tug tswv rov has rua tug tubkhai ntawd tas, ‘Koj ca le moog rua tom tej kev luj hab kev miv, koj ntsib leejtwg, koj ca le coj tuaj kuas puv kuv lub tsev. 24Kuv qha rua mej has tas, cov tuabneeg kws tub caw lawm, tsi muaj ib tug yuav tau saaj kuv rooj mov hlo le!’ ”

Tug Kws Ua Tau Yexus Thwjtim

(Mathais 10.37-38)

25Muaj tuabneeg coob coob nrug Yexus ua ke moog, Yexus tig lug has rua puab tas, 26“Yog leejtwg yuav lug cuag kuv, tug ntawd yuavtsum hlub kuv heev dlua le nwg hlub nwg nam nwg txiv, nwg quaspuj mivnyuas, nwg kwv nwg tij, nwg nkauj nwg muam, hab heev dlua le nwg hlub nwg lub cev, nwg txhaj le ua tau kuv tug thwjtim.#Mat 10.37 27Tug kws tsi kwv nwg tug ntoo khaublig nrug kuv moog, tug ntawd ua tsi tau kuv tug thwjtim.#Mat 10.38; 16.24; Mak 8.34; Luk 9.23 28Mej cov yog muaj ib tug yuav ua ib lub chaw tsomfaaj, tug ntawd yuavtsum xub nyob quastsawg ua tuab zoo xaav saib yuav siv nyaj npaum le caag, hab nwg puas yuav muaj nyaj txaus ua tau. 29Yog nwg tsi xub ua le ntawd, ces thaus txhus tau ncej lawm, nwg yuav ua lub chaw tsomfaaj ntawd tsi tav. Cov tuabneeg kws pum le ntawd yuav thuam nwg 30has tas, ‘Tug txivneej nuav pib ua, tabsis nwg tsi muaj peevxwm ua kuas tav!’ 31Tug vaajntxwv kws muaj tubrog kaum txheeb leej, thaus nwg yuav moog ua rog rua ib tug vaajntxwv kws muaj tubrog neeg nkaum txheeb leej, nwg yeej yuav xub ua tuab zoo xaav saib, nwg cov tubrog puas yuav moog ntaus yeej tug vaajntxwv kws muaj tubrog neeg nkaum txheeb leej ntawd. 32Yog nwg xaav has tas nwg yuav tua tsi yeej, thaus nwg tseem nyob dleb, nwg yeej yuav xub khaiv tuabneeg moog thov tug vaajntxwv tod, kuas ob tog sis raug zoo.” 33Yexus xaus lug has tas, “Ib yaam nkaus le ntawd, tug kws tsi tso txhua yaam kws nwg muaj tseg, tug ntawd ua tsi tau kuv tug thwjtim.

Cov Ntsev Kws Tsuag Lawm

(Mathais 5.13; Malakaus 9.50)

34“Ntsev yog yaam kws zoo, tabsis yog ntsev tsuag lawm, yuav ua le caag kuas rov qaab ntsev tau. 35Cov ntsev ntawd tsi zoo siv ua dlaabtsi, muab rua aav los aav tsi zoo, hab muab xyaw chiv los tsi zoo, tsuas muaj yuav muab povtseg xwb. Yog leejtwg muaj qhovntsej ca le noog!”

Currently Selected:

Lukas 14: HNJ2000

Highlight

Copy