Lukas 13

Hloov Dlua Sab Tshab Lossis Raug Kev Tuag

1Thaus lub sijhawm ntawd, muaj qeeleej kws nyob ntawd qha rua Yexus has txug zaaj kws Philaj tau muab cov tuabneeg Kalilais tua thaus kws puab taabtom tua tsaj fij rua Vaajtswv. 2Yexus txhaj teb puab has tas, “Mej xaav tas, cov tuabneeg Kalilais kws raug tua le ntawd, puab muaj txim luj dlua txhua tug tuabneeg Kalilais nua lov? 3Tsi yog le ntawd! Kuv qha rua mej has tas, yog mej tsi tso mej tej kev txhum tseg, mej yuav tuag taag ib yaam le puab cov ntawd hab. 4Mej xaav tas kaum-yim leej kws lub chaw tsomfaaj qaug lug ntaus tuag taag huv Xilau-aas ntawd yog puab ua txhum luj dlua txhua tug tuabneeg kws nyob huv lub nroog Yeluxalees nua lov? 5Tsi yog le ntawd! Kuv qha rua mej has tas, yog mej tsi tso mej tej kev txhum tseg, mej yuav tuag taag ib yaam le puab cov ntawd hab.”

Zaaj Lug Pevtxwv Has Txug Tsob Txiv Ncuavpas Kws Tsi Txitxiv

6Yexus txawm has ib zaaj lug pevtxwv rua puab noog has tas, “Muaj ib tug txivneej cog tau ib tsob txiv ncuavpas rua huv nwg lub vaaj txivmaab. Nwg moog saib seb puas txitxiv tabsis tsi pum txitxiv le. 7Nwg txawm has rua tug kws tu lub vaaj ntawd has tas, ‘Saib maj, tub tau peb lub xyoos lawm kws kuv pheej tuaj saib tsob txiv ncuavpas nuav seb puas txitxiv, tabsis tsi pum txi le. Cale muab nwg ntuv povtseg! Uacaag tseem yuav ca nyob ntxoov aav ua dlaabtsi?’ 8Tabsis tug kws tu lub vaaj teb tas, ‘Tug tswv, ca nwg nyob ib xyoos ntxiv; kuv yuav khawb aav npoog hab rau chiv rua. 9Yog lwm xyoo nwg ho txitxiv lawm kuj zoo, yog nwg tseem tsi txitxiv le hab, koj maam muab ntuv povtseg.’ ”

Yexus Khu Tug Quaspuj Khoov Dluav Nub Xanpataus

10Muaj ib nub kws yog nub Xanpataus, Yexus taabtom qha huv ib lub tsev saablaaj. 11Muaj ib tug quaspuj kws nyob ntawd tau raug ib tug ntsujplig phem kws ua rua nwg mob tau kaum-yim lub xyoos lug lawm; nwg cale khoov dluav hab sawv tsi tau ntseg le lawm. 12Thaus Yexus pum tug quaspuj ntawd, Yexus txawm hu nwg lug hab has rua nwg tas, “Tug quaspuj 'e, koj dlim koj tug mob lawm lau!” 13Yexus txawm tsaa teg rua sau tug quaspuj ntawd, tes taamsim ntawd nwg txawm sawv tau ntseg hab nwg ua Vaajtswv tsaug.

14Tug thawj kws saib lub tsev saablaaj txawm npautawg heev vim Yexus khu mob rua nub Xanpataus, nwg txhaj has rua cov tuabneeg kws nyob ntawd tas, “Tub muaj rau nub rua peb ua dlejnum; yogle ntawd, mej yuavtsum tuaj khu mob rua cov nub ntawd, tsi xob tuaj rua Nub Xanpataus!” #Tsiv 20:9-10; 2Kev 5:13-14

15Tug Tswv teb tas, “Cov nam tuabneeg ntsejmuag ncaaj sabnkhaus! Nub Xanpataus mej tub dlaws nyuj lossis dlaws neegluav caab tawm huv nkuaj moog haus dlej hab los sav. 16Tug quaspuj nuav tub yog Anplahaas le caajceg kws tau raug Xataas muab khi tau kaum-yim lub xyoo lug lawm; es nub Xanpataus tseem tsi tsimnyog dlaws kuas nwg dlim hab lov?” 17Yexus cov lug teb ntawd ua rua cov tuabneeg kws tawmtsaam Nwg txaajmuag heev. Tabsis cov tuabneeg kws pum tej txujci kws Yexus ua, puab zoosab kawg le.

Zaaj Lug Pevtxwv Has Txug Lub Noob Maxataj

(Mathais 13:31-32; Malakaus 4:30-32)

18Yexus nug has tas, “Vaajtswv lub Tebchaws zoo lecaag? Kuv yuav muab Vaajtswv lub Tebchaws ntawd pev rua dlaabtsi? 19Vaajtswv lub Tebchaws pev ib yaam le ib tug txivneej nqaa ib lub noob maxataj moog cog rua huv nwg dlaim teb. Tsob zaub ntawd cale lujhlub tuaj hab dlhau moog ua ib tsob ntoo, hab noog lug ua zeg rua sau tej ceg.”

Zaaj Lug Pevtxwv Has Txug Cov Keeb

(Mathais 13:33)

20Yexus rov has dlua has tas, “Kuv yuav muab Vaajtswv lub Tebchaws pev rua dlaabtsi? 21Vaajtswv lub Tebchaws pev ib yaam le cov keeb kws ib tug quaspuj muab xyaw rua peb sab moov nplej, tes cale ua rua cov moov nplej ntawd su taagnrho huv tuabsi.”

Lub Qhovrooj Nqaim

(Mathais 7:13-14, 21-23)

22Thaus Yexus taabtom taug kev moog rua nraag lub nroog Yeluxalees, Nwg ibke moog ibke qha tej tuabneeg suavdlawg kws nyob huv tej nroog hab tej zejzog. 23Muaj ib tug nug Yexus has tas, “Tug Tswv, cov kws yuav dlim txim tsuas yog muaj tsawg-tsawg leej xwb lov?”

Yexus teb puab has tas, 24“Mej yuavtsum ua tag txeem ntawm lub qhovrooj nqaim kuas nkaag tau moog rua saabhuv. Kuv qha rua mej has tas, muaj ntau leej yuav txeem kuas nkaag tau moog rua saabhuv, tabsis puab yuav moog tsi tau. 25Thaus tug tswvtsev sawv hab lug kaw qhovrooj lawm; tes mej yuav sawv saabnrau khob hab hu has tas, ‘Tug tswv, thov qheb qhovrooj rua peb hab os!’ Nwg yuav teb mej has tas, ‘Kuv tsi paub sov mej tuaj qhovtwg tuaj!’ 26Thaus ntawd mej yuav teb tas, ‘Peb tub nrug Koj noj Koj haus, hab Koj tub tuaj qha huv peb lub nroog neb!’ 27Tug tswvtsev yuav rov has rua mej has tas, ‘Kuv tsi paub sov mej tuaj qhovtwg tuaj. Cov nam tuabneeg sabphem, mej cale tsiv tawm ntawm Kuv moog!’ #Nnkauj 6:8

28“Thaus mej pum Anplahaas, Ixaj, Yakhauj hab cov xwbfwb cev Vaajtswv lug txhua tug nyob huv Vaajtswv lub Tebchaws, thaus ntawd mej cov kws raug muab ntab tawm rua saabnrau, mej yuav quaj qw qes nav qawv! #Math 22:13; 25:30 #Math 8:11-12 29Yuav muaj tuabneeg tuaj saab nubtuaj, saab nubpoob, saab qaumteb, hab saab qaabteb tuaj nyob uake ntawm rooj noj rooj haus huv Vaajtswv lub Tebchaws. 30Thaus ntawd cov kws nwgnuav nyob tom tw yuav tau moog nyob tom hauvntej, hab cov kws nwgnuav nyob tom hauvntej, yuav rov moog nyob tom tw.” #Math 19:30; 20:16; Malak 10:31

Yexus Txuj Kev Hlub Rua Cov Tuabneeg Huv Yeluxalees

(Mathais 23:37-39)

31Lub sijhawm ntawd, cov Falixais qeeleej tuaj cuag Yexus hab has rua Nwg tas, “Koj cale tsiv tawm ntawm qhov nuav moog rua lwmqhov, vim Helauj xaav muab Koj tua povtseg.”

32Yexus teb puab has tas, “Mej cale moog qha rua tug maa ntawd has tas, ‘Nubnua hab pigkig, Kuv tseem yuav ntab dlaab hab khu tej tuabneeg muaj mob, nub thib peb Kuv tegnum maamle tav.’ 33Txawm lecaag los xij, nubnua, pigkig hab quasneeg, Kuv yeej yuav tau taug kev moog; ruaqhov tsi tsimnyog kws ib tug xwbfwb cev Vaajtswv lug raug tua tuag nyob saabnrau lub nroog Yeluxalees.

34“Yeluxalees, Yeluxalees! Koj muab cov xwbfwb cev Vaajtswv lug tua hab muab pobzeb ntaus cov tubkhai kws Vaajtswv khaiv lug qha koj! Muaj ntau zag Kuv tub yuav muab koj cov mivnyuas lug puag ib yaam le tug pujqab cuab nwg cov mivnyuas lug puag rua huvqaab nwg ob phob tis, tabsis koj ho tsi kaam Kuv ua le ntawd! 35Saib maj, koj lub Tuamtsev yuav raug muab tsotseg hab nyob nqhaa lug ca. Kuv qha rua koj has tas, koj yuav tsi pum Kuv moog txug nub kws koj has tas, ‘Thov Vaajtswv foom koobmoov rua tug kws lug huv Vaajtswv lub npe lug.’ ” #Nnkauj 118:26

Currently Selected:

Lukas 13: HNJ2022

Highlight

Copy