Lukas 13

Tso Kev Txhum Tseg

1Thaus lub sijhawm ntawd, muaj qee leej qha rua Yexus has txug zaaj kws Philaj muab cov tuabneeg Kalilais tua, thaus puab taabtom tua tsaj fij rua Vaajtswv. 2Yexus teb puab has tas, “Mej xaav has tas, cov tuabneeg Kalilais kws raug tua le ntawd, puab muaj txim luj dlua lwm tug tuabneeg Kalilais huv tuabsi nua los? 3Tsi yog le ntawd! Kuv qha rua mej has tas, yog mej tsi tso mej tej kev txhum tseg, mej yuav tuag ib yaam le puab cov ntawd hab. 4Mej xaav has tas, kaum yim leej kws lub chaw tsomfaaj qaug lug ntaus tuag taag huv Xilau-aas ntawd, yog puab ua txhum luj dlua cov tuabneeg kws nyob huv lub nroog Yeluxalees huv tuabsi nua los? 5Tsi yog le ntawd! Kuv qha rua mej has tas, yog mej tsi tso mej tej kev txhum tseg, mej yuav tuag taag ib yaam le puab cov ntawd hab.”

Tsob Txiv Ncuav Pas Kws tsi Txi Txiv

6Yexus has ib zaaj lug pevtxwv rua puab noog has tas, “Muaj ib tug txivneej cog ib tsob txiv ncuav pas rua huv nwg lub vaaj txiv maab. Nwg moog saib puas txi txiv, tabsis tsi pum txi txiv le. 7Nwg txawm has rua tug kws tu lub vaaj ntawd has tas, ‘Koj saib, kuv tuaj saib tsob txiv ncuav pas nuav tau peb xyoos lawm, tabsis kuv tsi pum txi ib lub txiv le. Koj ca le muab ntuv povtseg! Ua le caag tseem yuav ca nwg nyob ntxoov aav ua dlaabtsi?’ 8Tabsis tug kws tu lub vaaj teb has tas, ‘Tug tswv, thov ca nwg nyob ib xyoos hab tsaiv. Kuv yuav khawb aav npoog hab rau chiv rua. 9Yog lwm xyoo nwg txi txiv lawm kuj zoo, yog nwg tsi txi txiv, koj maam le muab ntuv povtseg.’ ”

Yexus Khu tug Quaspuj Khoov Dluav

10Muaj ib nub kws yog nub Xanpataus, Yexus taabtom qha huv ib lub tsev saablaaj. 11Muaj ib tug quaspuj raug dlaab hab mob tau kaum yim xyoo lawm; ua rua nwg khoov dluav sawv tsi tau ntseg. 12Thaus Yexus pum tug quaspuj ntawd, Yexus hu nwg lug hab has rua nwg tas, “Tug ntxhais, koj tug mob tub zoo lawm!” 13Yexus cev teg moog tuav nkaus tug quaspuj ntawd, taamsim ntawd tug quaspuj ntawd txawm sawv tau ntseg, hab nwg ua Vaajtswv tsaug.

14Thaus tug kws saib lub tsev saablaaj pum Yexus khu mob nub Xanpataus, nwg chim heev, nwg has rua cov tuabneeg kws nyob ntawd tas, “Tub muaj rau nub rua peb ua Vaajtswv num; ua le caag rau nub ntawd mej tsua tsi tuaj khu, Nub Xanpataus mej tsua tuaj khu?”#Tsd 20.9-10; 2 Kev 5.13-14

15Tug Tswv teb has tas, “Cov tuabneeg ntsejmuag ncaaj sab nkhaus! Nub Xanpataus mej tub dlaws nyuj dlaws lossis neeg luav caab tawm huv nkuaj moog haus dlej. 16Tug quaspuj nuav tub yog Anplahaas ib tug xeebntxwv hab. Dlaab Ntxwgnyoog tub muab nwg khi tau kaum yim lub xyoo lug lawm: Nub Xanpataus tseem tsi tsimnyog dlaws kuas nwg dlim hab los?” 17Yexus teb le ntawd, ua rua cov tuabneeg kws tawmtsaam Yexus poob ntsejmuag heev. Tabsis cov tuabneeg kws pum tej txujci kws Yexus ua, puab zoo sab kawg le.

Lub Noob Zaub

18Yexus nug has tas, “Kuv yuav muab Vaajtswv lub Tebchaws pev rua dlaabtsi? 19Vaajtswv lub tebchaws pev ib yaam le lub noob zaub kws muaj ib tug coj moog cog rua huv nwg lub vaaj. Lub noob zaub ntawd tuaj hab luj hlub ua ib tsob ntoo kws luj heev, hab noog lug ua zeg rua sau nwg tej ceg.”

Cov Keeb

(Mathais 13.33)

20Yexus rov nug dlua has tas, “Kuv yuav muab Vaajtswv lub Tebchaws pev rua dlaabtsi? 21Vaajtswv lub Tebchaws pev ib yaam le cov keeb kws muaj ib tug quaspuj muab xyaw rua peb sab moov nplej, hab ua rua cov moov nplej su taag huv tuabsi.”

Lub Qhovrooj Nqaim

22Yexus taug kev moog qhuab qha rua tej tuabneeg suavdlawg huv tej nroog hab tej zog moog txug nraag lub nroog Yeluxalees. 23Muaj ib tug nug Yexus has tas, “Tug Tswv, cov kws yuav dlim txim muaj tsawg tsawg leej xwb los?”

Yexus teb puab has tas, 24“Mej ua tag txeem lub qhovrooj nqaim moog rua saab huv. Kuv qha rua mej has tas, muaj ntau leej xaav moog saab huv, tabsis puab moog tsi tau. 25Thaus tug tswv tsev sawv lug kaw qhovrooj lawm; mej yuav sawv saab nrau khob qhovrooj hab hu has tas, ‘Tug tswv, thov qheb qhovrooj rua peb!’ Tug tswv tsev yuav teb mej has tas, ‘Kuv tsi paub sov mej tuaj qhov twg tuaj!’ 26Thaus ntawd mej yuav teb has tas, ‘Peb tub nrug koj noj koj haus; hab koj tub tuaj qha huv peb lub nroog!’ 27Tug tswv tsev yuav rov has rua mej has tas, ‘Kuv tsi paub sov mej tuaj qhov twg tuaj. Cov tuabneeg sab phem, mej ca le tsiv moog!’ #Pnk 6.8 28Thaus mej pum Anplahaas, Ixaj, Yakhauj hab cov cev Vaajtswv lug txhua tug nyob huv Vaajtswv lub Tebchaws, thaus ntawd mej cov kws tseem nyob saab nrau, mej yuav quaj qw tum nav qawv! #Mat 22.13; 25.30 29Yuav muaj tuabneeg tuaj saab nubtuaj, saab nubpoob, saab qaumteb, hab saab qaabteb tuaj nyob ua ke ntawm rooj mov huv Vaajtswv lub Tebchaws.#Mat 8.11-12 30Thaus ntawd tug kws nwgnuav nyob tom tw yuav tau moog ua tug thawj, hab tug kws nwgnuav ua tug thawj, yuav tau lug nyob tom tw.”#Mat 19.30; 20.16; Mak 10.31

Yexus Hlub Cov Tuabneeg huv Yeluxalees

31Thaus lub sijhawm ntawd, cov Falixais qee leej tuaj cuag Yexus hab has rua nwg tas, “Koj ca le tsiv tawm qhov nuav hab moog rua lwm qhov, Helauj yuav muab koj tua povtseg.”

32Yexus teb puab has tas, “Mej ca le moog qha rua tug maa ntawd has tas: ‘Nub nua hab pigkig, kuv tseem ntab dlaab hab khu tej tuabneeg muaj mob, nub peb kuv teg num maam le tav.’ 33Txawm le caag los xij, nub nua, pigkig hab quasneeg, kuv yeej yuav taug kev moog rua nraag; rua qhov tsi tsimnyog yuav muab ib tug kws cev Vaajtswv lug tua rua lwm qhov, tsuas tsimnyog muab tua rua huv lub nroog Yeluxalees xwb.

34“Yeluxalees, Yeluxalees! Koj muab cov kws cev Vaajtswv lug tua povtseg, koj muab pobzeb ntaus cov tubkhai kws Vaajtswv khaiv lug qha koj! Muaj ntau zag kuv tub yuav muab koj cov pejxeem lug puag, ib yaam le tug puj qab cuab nwg cov mivnyuas lug puag rua huv nwg ob phob tis, tabsis koj tsi ca kuv ua le ntawd! 35Nwgnuav Vaajtswv yuav muab koj lub Tuamtsev tso povtseg nyob qhuav nkuag ca. Kuv qha rua koj has tas, koj yuav tsi pum kuv moog txug nub kws koj has tas, ‘Thov Vaajtswv foom koob moov rua tug kws Vaajtswv khaiv lug.’ ”#Pnk 118.26

Currently Selected:

Lukas 13: HNJ2000

Highlight

Copy