Chivkeeb 12
12
Vaajtswv Hu Anplaas
1Vaajtswv has rua Anplaas has tas, “Koj ca le tso koj lub tebchaws, koj cov kwvtij neejtsaa, hab koj txiv lub tsev tseg, hab sawv kev moog rua nraag lub tebchaws kws kuv yuav qha rua koj.#Ten 7.2,3; Hen 11.8 2Kuv yuav pub koj muaj xeebntxwv coob, hab puab yuav ua ib tsaav tuabneeg tseemceeb. Kuv yuav foom koob moov rua koj, kuas koj lub koob lub npe nyob nto moo lug, hab koj yuav ua rua lwm leej lwm tug tau txais koob moov.
3Kuv yuav foom koob moov rua tug kws ua zoo rua koj,
Tabsis kuv yuav foom tsi zoo
rua tug kws ua phem rua koj.
Hab kuv yuav foom koob moov
ntawm koj moog rua txhua
tsaav tuabneeg kws nyob
thoob plawg nplajteb.”#12.3 Hab kuv… txhua tsaav tuabneeg; lossis Txhua tsaav tuabneeg yuav thov kuas kuv foom koob moov rua puab ib yaam le kuv tau foom koob moov rua koj lawm.#Kal 3.8
4Thaus Anplaas noobnyoog muaj xyaa caum tsib xyoos, nwg txawm tsiv tawm huv lub nroog Halaas lawv le tug TSWV tau has rua nwg lawm, hab Lauj nrug nwg moog. 5Anplaas coj Xalais kws yog nwg tug quaspuj, nwg tug kwv Halaas tug tub Lauj, hab taagnrho obtug tej cuabtaam, obtug tej tubqhe hab ntxhais qhev kws nyob huv lub nroog Halaas, hab puab txawm sawv kev moog rua nraag tebchaws Kana-aas lawm.
Thaus puab tsiv moog txug rua huv tebchaws Kana-aas lawm, 6Anplaas taug kev huv lub tebchaws ntawd lug txug rua ntawm tsob ntoo xeeb huv Maules kws yog qhov chaw tseemceeb huv lub nroog Sekhees. (Thaus lub sijhawm ntawd cov tuabneeg Kana-aas tseem nyob huv lub tebchaws ntawd.) 7Tug TSWV tshwm rua Anplaas pum hab has rua nwg tas, “Lub tebchaws nuav yog lub kws kuv yuav muab pub rua koj cov xeebntxwv nyob.” Ces Anplaas txhaj teeb tau ib lub thaaj rua ntawm qhov chaw ntawd rua tug TSWV kws tau lug tshwm rua nwg pum.#Hen 7.5; Kal 3.16 8Dlhau ntawd, Anplaas txhaj txaav chaw moog rua yaav qaabteb ntawm lub laaj roob kws nyob ntawm lub nroog Npethees saab nubtuaj hab nwg tsaa tsevntaub nyob rua ntawd. Lub nroog Npethees nyob saab nubpoob hab lub nroog A-is nyob saab nubtuaj. Thaus Anplaas nyob qhov ntawd, nwg teeb tau ib lub thaaj rua tug TSWV hab pehawm tug TSWV. 9Ces nwg tsiv ib qho rua ib qho, nwg txhaj tsiv moog nyob rua tebchaws Kana-aas yaav qaabteb lawm.
Anplaas Moog rua Nraag Tebchaws Iziv
10Lub sijhawm ntawd muaj kev tshaib nqhes nyob huv tebchaws Kana-aas, Anplaas txhaj tsiv moog nyob rua nraag tebchaws Iziv tau ib ntus. 11Thaus nwg taabtom moog yuav txug ntawm tug nrimteb moog rua huv tebchaws Iziv, nwg has rua nwg tug quaspuj tas, “Kuv paub koj yog ib tug quaspuj kws zoo nkauj heev. 12Thaus cov Iziv pum koj, puab yuav has tas, koj yog kuv tug quaspuj. Ces puab yuav tua kuv povtseg hab tseg koj ca. 13Koj ca le has rua puab tas, koj yog kuv tug muam xwb; yog vim muaj koj puab txhaj yuav tseg kuv txujsa hab ua zoo rua kuv.”#Chk 20.2; 26.7 14Thaus Anplaas moog dlhau plawg nrimteb rua huv tebchaws Iziv lawm, cov Iziv pum nwg tug quaspuj zoo nkauj heev. 15Muaj qee leej numtswv pum Xalais zoo nkauj heev, puab txhaj moog pav qha rua Falaus, yog le ntawd, luas txhaj tuaj coj Xalais moog rua huv Falaus lub loog. 16Vim muaj Xalais, Falaus txhaj ua zoo heev rua Anplaas hab muab yaaj, tshis, nyuj, neeg luav, qhev hab ntxhuav pub rua Anplaas.
17Tabsis vim Falaus tau coj Xalais moog, tug TSWV txhaj tso tej kaab mob phem lug raug Falaus hab cov tuabneeg huv nwg lub loog nyaav heev. 18Falaus txhaj tso tuabneeg moog cuag Anplaas hab nug nwg has tas, “Vim le caag koj ua le nuav rua kuv? Ua le caag koj tsi qha ncaaj rua kuv paub tas, Xalais yog koj tug quaspuj? 19Vim le caag koj txhaj has tas, nwg yog koj tug muam, hab ca kuv coj nwg moog yuav ua kuv tug quaspuj? Koj tug quaspuj nyob ntawm nuav, ca le coj nwg hab tsiv tawm moog!” 20Falaus saamfwm rua nwg cov tubkhai, puab txhaj ntab Anplaas tawm huv puab lub tebchaws, nrug nwg tug quaspuj hab coj txhua yaam kws yog nwg tug huv tuabsi moog.
Currently Selected:
Chivkeeb 12: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
