Chivkeeb 13
13
Anplaas hab Lauj sis Ncaim
1Anplaas txhaj coj nwg tug quaspuj hab txhua tsaav yaam kws yog nwg tug, hab Lauj nrug nwg tawm huv tebchaws Iziv moog txug rua peg Nenkes huv tebchaws Kana-aas saab qaabteb. 2Anplaas yog ib tug tuabneeg muaj txag npluanuj, muaj yaaj, muaj tshis, muaj nyuj, muaj nyaj hab muaj kub ntau heev. 3Ces Anplaas tawm ntawm qhov chaw ntawd hab nwg tsiv ib qho dlhau rua ib qho, rov lug rua huv Npethees. Nwg lug txug rua ntawm qhov chaw kws nyob nruab nraab ntawm Npethees hab A-is kws yaav thaus nwg tau lug tsuam chaw nyob ib ntus 4hab nwg tau teeb ib lub thaaj. Nwg txhaj pehawm tug TSWV nyob qhov ntawd.
5Lauj tug kws nrug Anplaas tsiv ua ke, kuj muaj yaaj, muaj tshis, muaj nyuj, muaj cuab muaj yig hab muaj tubqhe huv tuabsi. 6Yog le ntawd, txhaj tsi muaj tshaav zaub txaus rua obtug nyob ua ke, rua qhov obtug muaj tsaj txhu coob heev. 7Ces Anplaas cov tub yug tsaj hab Lauj cov tub yug tsaj txhaj sis caav sis tshe nyob tsi taug ua ke. (Lub sijhawm ntawd cov tuabneeg Kana-aas hab cov tuabneeg Pelixes tseem nyob huv lub tebchaws ntawd.)
8Anplaas txhaj has rua Lauj tas, “Wb yog kwvtij txiv tub tsi tsimnyog ca koj cov tuabneeg hab kuv cov tuabneeg sis caav sis tshe le nuav. 9Wb ca le sis faib nyag moog nyob nyag. Xaiv saib koj nyam thaaj chaw twg. Yog koj moog nyob saab txhumphem, kuv maam moog nyob saab xis, yog koj moog nyob saab xis, kuv maam moog nyob saab txhumphem.”
10Lauj tig saib ibncig ntawd hab pum taagnrho lub Haav Yauladees moog thoob plawg rua ntawm Xau-as, mas muaj dlej txhawv txhua qhov, ib yaam le tug TSWV lub Vaaj#13.10 Tug tswv lub vaaj: yog lub Vaaj Edees. lossis zoo ib yaam le lub tebchaws Iziv ntaag. (Lub sijhawm ntawd yog ua ntej tug TSWV hlawv lub nroog Xaudoos hab lub nroog Kaumaulas.) #Chk 2.10 11Yog le ntawd, Lauj txhaj hom taagnrho lub Haav Yauladees hab nwg txhaj tsiv moog nyob rua saab nubtuaj lawm. Qhov kws obtug tau sis ncaim yog le ntawd. 12Anplaas nyob rua saab tebchaws Kana-aas, hab Lauj moog nyob huv tej nroog kws nyob lawv haav hab moog tsaa tsevntaub nyob ze lub nroog Xaudoos. 13Cov tuabneeg Xaudoos ua phem ua qas hab ua txhum tawmtsaam tug TSWV luj kawg le.
Anplaas Tsiv Moog Nyob huv Henploos
14Tom qaab kws Lauj ncaim lawm, tug TSWV has rua Anplaas has tas, “Koj tuaj ntawm qhov chaw kws koj nyob ko, tsaa qhovmuag ua tuab zoo saib moog rua saab qaabteb hab qaumteb, nubtuaj hab nubpoob. 15Kuv yuav muab taagnrho lub tebchaws kws koj qhovmuag pum pub rua koj hab koj cov xeebntxwv, hab lub tebchaws ntawd yuav yog koj tug moog ibtxhis le.#Ten 7.5 16Kuv yuav pub kuas koj muaj xeebntxwv coob heev kws tsi muaj leejtwg yuav suav txheeb le, yog leejtwg suav txheeb tej moov aav huv nplajteb nuav, mas txhaj yuav suav txheeb koj cov xeebntxwv! 17Nwgnuav, koj ca le sawv kev moog kuas thoob plawg lub tebchaws nuav, rua qhov kuv yuav muab taagnrho lub tebchaws nuav pub rua koj.” 18Yog le ntawd, Anplaas txhaj le tsiv tawm ntawm thaaj chaw ntawd hab moog tsaa tsevntaub nyob ze tsob ntoo xeeb ntawm thaaj chaw Maales huv lub nroog Henploos, hab thaus nyob ntawd nwg teeb tau ib lub thaaj ua chaw fij khoom rua tug TSWV.
Currently Selected:
Chivkeeb 13: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.
