Maˬkuˆ 9

1Aˬ yawꞈ paˇ ehˇ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Heu gaˇ jawˇ luꞈ-eu tsawˇ haˬ tiˬ paˆ na deuˬ maˬ shiˇ dzeuˇ mi naˆ-ehˇ, Miˬyehˇ Miˇkʼahˬ baoˬ tiˬ byah ni keuˆ le gaˇ ya mawˇ tehꞈ-a.”

Yeˬsuˇ gʼawˇ mawˇ paˇ-euˬ

(Maꞈtehˬ 17.1-13; Luˇkaꞈ 9.28-36)

2Koꞈ nah dzeuˇ-iˇ ngeh, Beˬtuˆluˆ, Yaˬkoˆ, Yoˇhaˬ aˬ ha smˇ gʼaˬ-ahˇ tehꞈ-ehˇ Yeˬsuˇ sheuˬ-awˇ, gawˬ jawˬ yaw goˇ-ahˇ daˆ leˇ-euˬ meh. Kʼoeˇ gaˇ, aˬ ha smˇ gʼaˬ-euˬ mehˬ shi Yeˬsuˇ gʼawˇ mawˇ paˇ-euˬ meh. 3Aˬ yawꞈ-euˬ mehˬ tsoeˬ yaw shehꞈ bya laˇ-awˇ, pyuˇ deuˬ ni gʼeh-eu meh. Miˇ tsaˬ kʼoeˇ taˆ jawˇ-eu mehˬ tsoeˬ lehˬ tsiˬ-eu tsawˇ haˬ tiˬ gʼaˬ-iˬ, kʼoeˇ naˆ naˆ-ehˇ pyuˇ laˇ ni maˬ lehˬ tsiˬ shawˇ nya-a. 4Eˇliˇyaˆ hawˇ-eu Moˇseˬ aˬ nyaꞈ kʼawꞈ, kʼoeˇ gaˇ doˆ le-awˇ, Yeˬsuˇ nehˬ-ehˇ dawˬ ngehˬ cawˬ luꞈ gaˇ aˬ yawꞈ maꞈ ya mawˇ-euˬ meh. 5Kʼoeˇ ngeh, Beˬtuˆluˆ Yeˬsuˇ-ahˇ ehˇ-eu, “Saˬ laˬ-oˇ, aˬ dui maꞈ heu gaˇ jawˇ-eu heu aˇ naˆ ni muiˬ-eu nga. Nga maꞈ sehˬ gʼawˆ smˬ gʼawˆ gʼawˆ ma. Nawˬ-euˬ gʼaˇ duˬ tiˬ gʼawˆ, Moˇseˬ gʼaˇ duˬ tiˬ gʼawˆ, Eˇliˇyaˆ gʼaˇ duˬ tiˬ gʼawˆ gʼawˆ ma.” 6Aˬ ha smˇ gʼaˬ guˆ dui dui-awˇ, Beˬtuˆluˆ dawˬ ngehˬ tsaˬ maˬ siˬ-a.

7Kʼoeˇ ngeh, aˬ yawꞈ maꞈ-ahˇ mˬ dmˇ dehˬ kaˬ le-awˇ, mˬ dmˇ laꞈ kʼoeˇ heu loꞈ-ehˇ dawˬ ngehˬ doˆ laꞈ-euˬ meh. “Heu-aˬ, ngaˇ gaˬ dui dui-eu ngaˬ-euˬ Zaˬmaˇ ma. Aˬ yawꞈ-euˬ dawˬ-ahˇ naˇ haˬ geuꞈ-awˬ.” 8Aˬ yawꞈ maꞈ tiˬ jawˬ haw doe gʼeh kʼawꞈ, nui gʼaˬ tiˬ gʼaˬ-iˬ maˬ jawˇ-ehˇ, Yeˬsuˇ tiˬ gʼaˬ tehꞈ-ehˇ aˬ yawꞈ maꞈ nehˬ-ehˇ jawˇ luꞈ gaˇ ya mawˇ-euˬ meh.

9Aˬ yawꞈ maꞈ gawˬ jawˬ-ahˇ neh zaꞈ ka le luꞈ geh, Yeˬsuˇ aˬ yawꞈ maꞈ-ahˇ dawˬ biꞈ-awˇ ehˇ-eu, “Tsawˇ haˬ-euˬ Zaˬmaˇ shiˇ-awˇ, Miˬyehˇ neh maˬ bi gʼoꞈ dehꞈ laˇ kʼoeˇ keuˆ ni, naw maꞈ neh kʼaˇ ya mawˇ-euˬ jeˬ, tiˬ gʼaˬ-ahˇ-iˬ taˬ ja nehˬ.”

10Yeˬsuˇ neh dawˬ biꞈ-euˬ loꞈ-ehˇ aˬ yawꞈ maꞈ naˇ haˬ geuꞈ-euˬ meh. Ehˇ kʼawꞈ, aˬ yawꞈ maꞈ yaw kaˬ ja-eu, “Shiˇ-awˇ gʼoꞈ dehꞈ laˇ-eu lehˇ ehˇ-eu teu aˬ jeˬ-ahˇ ehˇ mawꞈ-eu nga.” 11Aˬ yawꞈ maꞈ Yeˬsuˇ-ahˇ naˇ haˬ-eu, “Eˇliˇyaˆ jeˬ huˬ oe tehꞈ-a lehˇ, aˬ jeˬ miˇ neh Zahˇ dawˬ kʼoꞈ dawˬ mehˬ-eu saˬ laˬ deuˬ ehˇ ta.”

12Yeˬsuˇ ehˇ-eu, “Yawˬ jeˬ na luꞈ lehˬ hmˬ laˆ saˆ le-eu gʼaˇ duˬ, Eˇliˇyaˆ jeˬ huˬ ya oe tehꞈ-a. Ehˇ kʼawꞈ, Tsawˇhaˬ-euˬ Zaˬmaˇ-aˬ, gʼawˬ mya jeˬ-ahˇ ya daˬ-awˇ, aˬ cawˬ neh bi byehˇ dzeh tehꞈ-a lehˇ, Jaˇliꞈ laꞈ kʼoeˇ aˬ jeˬ miˇ neh ehˇ taˬ ta. 13Naw maꞈ-ahˇ ngaˇ ehˇ nehˬ nyaˇ. Eˇliˇyaˆ oe gʼa-euˬ meh. Ehˇ kʼawꞈ, Jaˇliꞈ laꞈ kʼoeˇ ehˇ taˬ-euˬ loꞈ-ehˇ, tsawˇ haˬ zaˬ deuˬ aˬ yawꞈ-ahˇ yehˬ bawˬ sehˇ lu-ehˇ kʼaˇ gʼeh mawꞈ-eu gʼeh nehˬ-euˬ meh.”

Nehꞈ uˇ-eu aˬ li tiˬ li-ahˇ laˆ taˬ nehˬ-euˬ

(Maꞈtehˬ 17.14-20; Luˇkaꞈ 9.37-43a)

14Zaˬ lahˇ nui deuˬ jawˇ gaˇ aˬ yawꞈ maꞈ gʼoꞈ keuˆ le ngeh, zaˬ lahˇ kʼoeˇ deuˬ-euˬ tiˬ jawˬ tsawˇ haˬ aˇ maꞈ maꞈ ma uiˬ le bymˇ le-awˇ, Zahˇ dawˬ kʼoꞈ dawˬ mehˬ-eu saˬ laˬ deuˬ nehˬ-ehˇ tsawˇ pyehˇ pyehˇ luꞈ gaˇ ya mawˇ-euˬ meh. 15Tsawˇ haˬ aˇ maꞈ kʼoeˇ maꞈ Yeˬsuˇ-ahˇ ya mawˇ ngeh, laˬ kʼaˬ cehˇ dui dui-eu laꞈ kʼoeˇ, Yeˬsuˇ jawˇ gaˇ cehˆ gʼeh-awˇ ha-euˬ meh. 16Zaˬ lahˇ deuˬ-ahˇ Yeˬsuˇ naˇ haˬ-eu, “Naw maꞈ aˬ yawꞈ maꞈ nehˬ-ehˇ aˬ jeˬ gaˇ kawˆ pyehˇ luꞈ te.”

17Tsawˇ haˬ aˇ maꞈ maꞈ ma laꞈ kʼoeˇ tiˬ gʼaˬ ehˇ-eu, “Saˬ laˬ-oˇ, ngaˬ li nehꞈ uˇ-awˇ dawˬ maˬ ngehˬ nya-eu miˇ neh, nawˇ jawˇ gaˇ sheuˬ laꞈ-euˬ ma. 18Nehꞈ kʼoeˇ mawˇ aˬ yawꞈ-ahˇ kʼaˇ uˇ-iˇ ngeh, miˇ tsa ciˬ tahˬ ciˬ tuˆ nehˬ-eu meh. Kʼoeˇ naˇ, kʼaˬ meh-ahˇ buiˇ meuꞈ doˆ le-awˇ, seuˬ teuꞈ teuꞈ-ehˇ, gʼawˇ mawˇ gʼahˇ cawˬ ni pyeuꞈ-iˇ-eu meh. Nehꞈ kʼoeˇ mawˇ teh doˆ nehˬ laꞈ lehˇ, nawˬ-euˬ zaˬ lahˇ deuˬ-ahˇ ngaˇ shaˇ-euˬ kʼawꞈ, aˬ yawꞈ maꞈ maˬ teh doˆ nehˬ laꞈ nya-a.”

19Aˬ yawꞈ maꞈ-ahˇ Yeˬsuˇ ehˇ nehˬ-eu, “Jah-eu nui ma maˬ ahˇ-eu ziˇ heu ziˇ-ahˇ dehꞈ luꞈ-eu tsawˇ haˬ deuˬ-oˇ, naw maꞈ nehˬ-ehˇ ngaˇ aˇ myah keuˆ ni ya jawˇ ta. Naw maꞈ-ahˇ ngaˇ aˇ myah keuˆ ni ya oˇ ta. Aˬ li kʼoeˇ li-ahˇ heu gaˇ sheuˬ laꞈ-awˬ.”

20Aˬ li kʼoeˇ li-ahˇ Yeˬsuˇ jawˇ gaˇ sheuˬ laꞈ-awˇ, nehꞈ kʼoeˇ mawˇ Yeˬsuˇ-ahˇ ya mawˇ-eu nehˬ-ehˇ tiˬ poˆ tehꞈ-ehˇ, aˬ li kʼoeˇ li-ahˇ shaˬ guˬ shaˬ caˆ bi gʼeu laˇ-awˇ, mahˬ poˆ poˆ poˆ-ehˇ, kʼaˬ meh-ahˇ buiˇ meuꞈ paˬ paˬ-ehˇ bi teuˆ-euˬ meh.

21Aˬ da gʼaˬ-ahˇ Yeˬsuˇ naˇ haˬ-eu, “Nawˬ li heu loꞈ-ehˇ gʼeh luꞈ-eu aˇ myah ni keuˆ laˇ taˬ.”

Aˬ yawꞈ ehˇ-eu, “Nyiˇ ngeh neh gʼeh luꞈ-eu meh. 22Miˬ dzaˬ-ahˇ bi coˬ puiˆ-awˇ, iˇ cuꞈ-ahˇ bi coˬ duiˆ-eu laꞈ kʼoeˇ, aˬ yawꞈ ya shiˇ ni nehꞈ teu mawˇ gʼawˬ mya poˆ leh jeh-euˬ meh. Gʼeh nya naˇ, nga nyaꞈ da zaˬ-ahˇ gʼawˬ shaˬ gaˬ-eu laꞈ kʼoeˇ, tiˬ poˆ caw ba nehˬ laꞈ-awˬ lehˇ shaˇ-eu ma.”

23Yeˬsuˇ ehˇ-eu, “Gʼeh nya naˇ lehˇ aˬ jeˬ miˇ neh ehˇ te. Jah-eu tsawˇ haˬ gʼaˇ duˬ yawˬ jeˬ na luꞈ pyeuꞈ laˇ nya meh.”

24Kʼoeˇ ngeh, aˬ da kʼoeˇ gʼaˬ ngoeˇ ngoeˇ-ehˇ ehˇ-eu, “Ngaˇ aˬ diˇ jah ma. Ehˇ kʼawꞈ, jah-eu maˬ loꞈ nya. Jah-eu myaˬ laˇ ni ngehˬ gʼeh nehˬ laꞈ-awˬ.”

25Aˬ yawꞈ maꞈ jawˇ gaˇ tsawˇ haˬ aˇ maꞈ cehˆ laꞈ luꞈ gaˇ Yeˬsuˇ ya mawˇ ngeh, nehꞈ kʼoeˇ mawˇ-ahˇ dawˬ biꞈ-awˇ ehˇ nehˬ-eu, “Aˬ dzawˬ bi dzawˬ-iˇ-awˇ naˬ bawˬ bi bawˬ-iˇ-eu nehꞈ-oˇ, aˬ li teu li laꞈ kʼoeˇ neh doˆ le-awˬ. Aˬ kaˇ naˇ, aˬ yawꞈ laꞈ kʼoeˇ tiˬ jawˇ-iˬ taˬ paˇ uˇ-iˇ lehˇ nawˬ-ahˇ ngaˇ dawˬ biꞈ-eu ma.”

26Kʼoeˇ ngeh, nehꞈ kʼoeˇ mawˇ yaw kʼaˆ-ehˇ guˇ laˇ-awˇ, aˬ li kʼoeˇ li-ahˇ mawˇ bawˬ coˬ coˬ-ehˇ yaw kʼaˆ-ehˇ bi teuˆ laˇ-awˇ doˆ-iˇ-euˬ meh. Aˬ li kʼoeˇ li yaw shiˇ-ahˇ duˇ-eu miˇ neh, yawˬ gʼaˬ na luꞈ “Shiˇ-euˬ ngaˇ” lehˇ ehˇ-eu meh. 27Ehˇ kʼawꞈ, Yeˬsuˇ aˬ li kʼoeˇ li-euˬ aˬ laꞈ-ahˇ nyehꞈ tehˬ-awˇ tsahˇ tuˇ nehˬ ngeh, tuˇ laˇ-euˬ meh.

28Yeˬsuˇ nymˇ laꞈ kʼoeˇ uˇ leˇ-awˇ jawˇ ngeh, zaˬ lahˇ deuˬ aˬ yawꞈ-ahˇ ciˬ cuˇ ni naˇ haˬ-eu, “Aˬ jeˬ miˇ neh nga maꞈ nehꞈ kʼoeˇ mawˇ-ahˇ maˬ teh doˆ nya ta.”

29Yeˬsuˇ ehˇ-eu, “Guiˬ lahˬ shaˇ-eu jeˬ baˬ da neh tehꞈ-ehˇ nehꞈ kʼoeˇ jeˬ-ahˇ teh doˆ nya-eu meh. Nuiˬ jeˬ jahˇ-awˇ maˬ teh doˆ nya-a.”

Yeˬsuˇ aˬ yawꞈ ya shiˇ-eu gaˇ kawˆ tiˬ poˆ paˇ ehˇ-eu

(Maꞈtehˬ 17.22-23; Luˇkaꞈ 9.43b-45)

30Yeˬsuˇ hawˇ-eu aˬ yawꞈ-euˬ zaˬ lahˇ deuˬ jawˇ duˬ kʼoeˇ tsahˇ-ahˇ neh doˆ-iˇ-awˇ, Gaˬliˬlehˇ miˇ kʼahˬ laꞈ kʼoeˇ iˇ gʼeh-euˬ meh. Yeˬsuˇ-aˬ, aˬ yawꞈ aˬ geu tsahˇ-ahˇ jawˇ-eu gaˇ kawˆ aˬ cawˬ maˬ bi siˬ mawꞈ-a. 31Aˬ jeˬ miˇ neh ehˇ naˇ, aˬ yawꞈ-euˬ zaˬ lahˇ deuˬ-ahˇ aˬ yawꞈ heu loꞈ-ehˇ mehˬ nehˬ luꞈ-eu meh. “Tsawˇhaˬ-euˬ Zaˬmaˇ-aˬ, aˬ yawꞈ-ahˇ sehꞈ-eu deuˬ-euˬ aˬ laꞈ laꞈ kʼoeˇ aˬ cawˬ neh bi a nehˬ-awˇ bi sehꞈ tehꞈ-a. Ehˇ kʼawꞈ, smˬ nah byah laˇ naˇ, aˬ yawꞈ paˇ gʼoꞈ dehꞈ laˇ tehꞈ-a.”

32Ehˇ kʼawꞈ, aˬ yawꞈ kʼoeˇ loꞈ-ehˇ mehˬ-eu aˬ yawꞈ maꞈ maˬ gʼoˆ shaw nya-ehˇ, aˬ yawꞈ-ahˇ maˬ naˇ haˬ peuˬ ni jawˇ-euˬ meh.

Aˬ geu gʼaˬ aˬ cawˬ naˆ maˬ tseˇ huiˬ ta

(Maꞈtehˬ 18.1-5; Luˇkaꞈ 9.46-48)

33Aˬ yawꞈ maꞈ Gaˬbeˬneˬoˬ meuˬ-ahˇ iˇ keuˆ-awˇ, nymˇ laꞈ kʼoeˇ jawˇ luꞈ ngeh, “Naw maꞈ gaˇ pehˇ-ahˇ aˬ jeˬ gaˇ kawˆ tsawˇ pyehˇ pyehˇ teˬ” lehˇ, aˬ yawꞈ maꞈ-ahˇ Yeˬsuˇ naˇ haˬ-euˬ meh.

34Ehˇ kʼawꞈ, aˬ yawꞈ maꞈ dawˬ maˬ ngehˬ ni ciˬ cuˇ ni jawˇ-eu meh. Aˬ jeˬ miˇ neh ehˇ naˇ, aˬ geu gʼaˬ aˬ cawˬ naˆ maˬ tseˇ huiˬ dzehˬ-eu gaˇ kawˆ, aˬ yawꞈ maꞈ yaw kaˬ gaˇ pehˇ-ahˇ tsawˇ pyehˇ pyehˇ-euˬ meh. 35Yeˬsuˇ nuiˇ-awˇ, zaˬ lahˇ tseˇ nyiꞈ gʼaˬ-ahˇ kuˇ-awˇ ehˇ nehˬ-eu, “Aˬ cawˬ-euˬ mehˬ hu jawˇ mawꞈ-eu tsawˇ haˬ-aˬ, aˬ cawˬ mehˬ nah ya jawˇ-awˇ, dawˬ tawˆ luꞈ-euˬ zaˬ kʼaˆ jeˬ huˬ ya geuꞈ meh.” 36Kʼoeˇ naˇ, aˬ yawꞈ maꞈ-euˬ mehˬ shi aˬ yawꞈ zaˬ yaw nyiˇ tiˬ gʼaˬ sheuˬ taˬ-euˬ meh. Zaˬ kʼoeˇ gʼaˬ-ahˇ aˬ yawꞈ ciˬ-awˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. 37“Ngaˬ-euˬ tsawˇ myahˇ uˬ moˆ heu loꞈ-ehˇ gʼeh-eu zaˬ yaw nyiˇ tiˬ gʼaˬ-ahˇ ha geuꞈ-eu tsawˇ haˬ-aˬ, ngaˬ-ahˇ ha geuꞈ gaˇ duˇ-eu meh. Ngaˬ-ahˇ ha geuꞈ-eu tsawˇ haˬ-aˬ, ngaˬ-ahˇ tehꞈ-ehˇ ha geuꞈ-eu maˬ ngeuˇ-a. Ngaˬ-ahˇ kʼehˇ gʼeh leꞈ-euˬ gʼaˬ-ahˇ kʼawꞈ ha geuꞈ gaˇ duˇ-eu meh.”

Aˬ dui jawˇ paw pyawˬ-eu tsawˇ haˬ

(Luˇkaꞈ 9.49-50)

38Yoˇhaˬ Yeˬsuˇ-ahˇ ehˇ-eu, “Saˬ laˬ-oˇ, tsawˇ haˬ tiˬ gʼaˬ nawˬ-euˬ tsawˇ myahˇ uˬ moˆ nehꞈ teh doˆ luꞈ gaˇ nga maꞈ ya mawˇ-awˇ, kʼoeˇ loꞈ-ehˇ maˬ bi jahˇ ni laˆ tsoeˬ nehˬ-euˬ ma. Aˬ jeˬ miˇ neh ehˇ naˇ, aˬ yawꞈ-aˬ, aˬ dui aˇ muˇ mehˬ nah caw teh-eu tsawˇ haˬ maˬ ngeuˇ-a.”

39Ehˇ kʼawꞈ, Yeˬsuˇ ehˇ-eu, “Aˬ yawꞈ-ahˇ taˬ laˆ tsoeˬ. Aˬ jeˬ miˇ neh ehˇ naˇ, ngaˬ-euˬ tsawˇ myahˇ-ahˇ gʼoe-awˇ zahˬ leˇ paˬ-ehˇ gʼeh-eu jeˬ mˇ mehˬ-eu tsawˇ haˬ aˬ geuˬ gʼaˬ maˬ kaˬ, ngaˬ-ahˇ yaw awˬ awˬ-ehˇ maˬ ja bu-aˇ. 40Aˬ dui-ahˇ muiˇ-eu paw maˬ pyawˬ-eu tsawˇ haˬ-aˬ, aˬ dui jawˇ paw pyawˬ-eu tsawˇ haˬ meh. 41Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ Ka li-euˬ tsawˇ haˬ pyeuꞈ-eu nga lehˇ siˬ nya-awˇ, naw maꞈ-ahˇ iˇ cuꞈ tiˬ kʼmˬ kʼaˇ bi dawˇ laꞈ-eu tsawˇ haˬ aˬ geu gʼaˬ maˬ kaˬ, aˬ diˇ aˬ maˇ guiˬ lahˬ za tehꞈ-a.

Aˬ cawˬ mˇ lehˬ ni sheuˬ bahˬ-eu gaˇ kawˆ

(Maꞈtehˬ 18.6-9; Luˇkaꞈ 17.1-2)

42“Tsawˇ haˬ tiˬ gʼaˬ na, heu loꞈ-ehˇ gʼeh-eu ngaˬ-ahˇ jah-eu zaˬ yaw nyiˇ tiˬ gʼaˬ iˬ baˇ mˇ ni sheuˬ bahˬ naˇ, aˬ yawꞈ-euˬ kawˬ lahˇ-ahˇ lo lehˬ lehˬ ma paꞈ tawꞈ-awˇ, iˬ ma laˆ shaˆ-ahˇ bi biˬ ahˇ-eu-aˬ, aˬ yawꞈ gʼaˇ duˬ muiˬ dzehˬ meh. 43Kʼoeˇ miˇ neh, nawˬ-euˬ aˬ laꞈ tiˬ pyawˬ baˬ da neh nawˇ iˬ baˇ ya mˇ-euˬ ngeuˇ naˇ, aˬ laꞈ kʼoeˇ pyawˬ toˆ tsehˆ dzeh-awˬ. Aˬ laꞈ nyiˬ pyawˬ luꞈ tsoꞈ-awˇ, tiˬ jawˇ-iˬ maˬ miˆ-iˇ ni doꞈ luꞈ-eu shiˬ buiˇ lah ma-ahˇ bi biˬ puꞈ-eu naˆ maˬ tseˇ, aˬ laꞈ tiˬ pyawˬ tehꞈ-ehˇ tsoꞈ kʼawꞈ, mˬ taˆ miˇ kʼahˬ-ahˇ le keuˆ-awˇ ya dehꞈ-eu-aˬ, nawˬ-euˬ gʼaˇ duˬ muiˬ dzehˬ tehꞈ-a.#9.43 Jaˇliꞈ tiˬ paˆ na deuˬ laꞈ kʼoeˇ, ga naˇ yaw zaˬ heu hmˬ ahˇ-eu meh. 9.44: Shiˬ buiˇ lah ma laꞈ kʼoeˇ, aˬ yawꞈ maꞈ-ahˇ dzaˬ-eu luˆ tahˬ tiˬ jawˇ-iˬ maˬ shiˇ-ehˇ, aˬ yawꞈ maꞈ-ahˇ puiˆ-eu miˬ dzaˬ tiˬ jawˇ-iˬ maˬ miˆ-iˇ-a. 45Nawˬ-euˬ aˬ kuiˇ tiˬ kahˬ baˬ da neh nawˇ iˬ baˇ ya mˇ-euˬ ngeuˇ naˇ, aˬ kuiˇ kʼoeˇ kahˬ deuˆ tsehˆ dzeh-awˬ. Aˬ kuiˇ nyiˬ kahˬ luꞈ tsoꞈ-awˇ shiˬ buiˇ lah ma-ahˇ bi biˬ puꞈ-eu naˆ maˬ tseˇ, aˬ kuiˇ tiˬ kahˬ tehꞈ-ehˇ tsoꞈ kʼawꞈ, mˬ taˆ miˇ kʼahˬ-ahˇ le keuˆ-awˇ ya dehꞈ-eu-aˬ, nawˬ-euˬ gʼaˇ duˬ muiˬ dzehˬ tehꞈ-a.#9.45 Jaˇliꞈ tiˬ paˆ na deuˬ laꞈ kʼoeˇ, ga naˇ yaw zaˬ heu hmˬ ahˇ-eu meh. 9.46: Shiˬ buiˇ lah ma laꞈ kʼoeˇ, aˬ yawꞈ maꞈ-ahˇ dzaˬ-eu luˆ tahˬ tiˬ jawˇ-iˬ maˬ shiˇ-ehˇ, aˬ yawꞈ maꞈ-ahˇ puiˆ-eu miˬ dzaˬ tiˬ jawˇ-iˬ maˬ miˆ iˇ-a. 47Nawˬ-euˬ myaˆ nuiˆ tiˬ nuiˆ baˬ da neh nawˇ iˬ baˇ ya mˇ-euˬ ngeuˇ naˇ, myaˆ nuiˆ kʼoeˇ nuiˆ kʼeuꞈ doˆ dzeh-awˬ. Myaˆ nuiˆ nyiˬ nuiˆ luꞈ tsoꞈ-awˇ shiˬ buiˇ lah ma-ahˇ bi biˬ puꞈ-eu naˆ maˬ tseˇ, myaˆ nuiˆ tiˬ nuiˆ tehꞈ-ehˇ tsoꞈ kʼawꞈ, Miˬyehˇ Miˇkʼahˬ-ahˇ ya uˇ le-eu-aˬ, nawˬ-euˬ gʼaˇ duˬ muiˬ dzehˬ tehꞈ-a. 48Shiˬ buiˇ lah ma laꞈ kʼoeˇ, aˬ yawꞈ maꞈ-ahˇ dzaˬ-eu luˆ tahˬ tiˬ jawˇ-iˬ maˬ shiˇ-ehˇ, aˬ yawꞈ maꞈ-ahˇ puiˆ-eu miˬ dzaˬ tiˬ jawˇ-iˬ maˬ miˆ-iˇ-a.

49“Lawˇ-eu jeˬ-ahˇ saˬ deuꞈ sehˬ-awˇ bi shawˇ laˇ-eu loꞈ-ehˇ, tsawˇ haˬ yawˬ gʼaˬ na luꞈ-ahˇ miˬ dzaˬ neh lawˬ haw-awˇ bi shawˇ laˇ tehꞈ-a.

50“Saˬ deuꞈ-aˬ, yaw muiˬ meh. Ehˇ kʼawꞈ, saˬ ca taˆ-eu byoˆ-iˇ naˇ, saˬ ca paˇ taˆ laˇ ni nawˇ aˬ joꞈ-ehˇ paˇ jahˇ nya nmˇ.

“Naw maꞈ laꞈ kʼoeˇ cawˬ cawˬ taꞈ-eu saˬ deuꞈ saˬ ca bi ahˇ-awˇ, tiˬ gʼaˬ tiˇ gʼaˬ tsaˬ leˇ dzoeˇ leˇ-eu laꞈ kʼoeˇ dehꞈ-awˬ.”

Currently Selected:

Maˬkuˆ 9: AHK

Highlight

Copy