Maˬkuˆ 8

Tsawˇ haˬ oeˬ heˇ gʼaˬ-ahˇ bi dzaˬ-euˬ

(Maꞈtehˬ 15.32-39)

1Aˇ nah aˇ yamˬ yaw kʼaˆ-ehˇ maˬ myahˇ laˇ mi naˆ-ehˇ, tsawˇ haˬ aˇ maꞈ tiˬ maꞈ paˇ uiˬ laˇ-euˬ meh. Tsawˇ haˬ koeˇ deuˬ dzaˬ-eu tiˬ jeˬ-iˬ maˬ jaˆ-ehˇ pyeuꞈ laˇ ngeh, Yeˬsuˇ zaˬ lahˇ deuˬ-ahˇ kuˇ-awˇ, heu loꞈ-ehˇ ehˇ nehˬ-euˬ meh. 2“Tsawˇ haˬ heu deuˬ-ahˇ ngaˇ gʼawˬ shaˬ gaˬ dui dui nya. Aˬ yawꞈ maꞈ ngaˬ nehˬ-ehˇ jawˇ luꞈ-eu smˬ nah byah laˇ-awˇ, dzaˬ-euˬ tiˬ jeˬ-iˬ ma paˇ jaˆ meh. 3Aˬ yawꞈ maꞈ-ahˇ tiˬ jeˬ-iˬ maˬ bi dzaˬ ni bi gʼoꞈ-iˇ naˇ, gaˇ pehˇ gʼoꞈ-iˇ luꞈ ngeh, gʼaˬ juˬ dui dui-iˇ tehꞈ-a. Aˬ jeˬ miˇ neh ehˇ naˇ, tiˬ paˆ na deuˬ gaˇ mahˇ kaˬ gaˇ neh laˇ-euˬ meh.” 4Zaˬ lahˇ deuˬ aˬ yawꞈ-ahˇ ehˇ-eu, “Tsawˇ haˬ heu myaˆ ni gʼeh gaˇ bi dzaˬ bi dawˇ-eu gʼaˇ duˬ, heu loꞈ-ehˇ gʼeh-eu bawˇ tsahˬ bawˇ dahˇ kʼaˇ shuiꞈ deh yaˇ laꞈ kʼoeˇ, dzaˬ dzaˬ dawˇ dawˇ aˬ suˇ gʼaˬ poˆ doˆ laˬ-iˇ nya nmˇ.”

5Yeˬsuˇ ehˇ-eu, “Naw maꞈ kaˬ muˇ aˇ myaˆ yaˆ ahˇ te.”

Aˬ yawꞈ maꞈ ehˇ-eu, “Shiꞈ yaˆ ahˇ-eu tehꞈ ma.”

6Kʼoeˇ ngeh, tsawˇ haˬ aˇ maꞈ-ahˇ miˇ tsa nuiˇ-eu gʼaˇ duˬ aˬ yawꞈ dawˬ biꞈ-euˬ meh. Kaˬ muˇ kʼoeˇ shiꞈ yaˆ aˬ yawꞈ yuˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. Koeˇ naˇ, kaˬ muˇ kʼoeˇ ngawˬ pyehˬ-awˇ, aˬ yawꞈ-euˬ zaˬ lahˇ deuˬ-ahˇ biꞈ-awˇ, tsawˇ haˬ aˇ maꞈ-ahˇ bi biˇ nehˬ-euˬ meh. 7Aˬ yawꞈ maꞈ ngaˬ shaˬ shaˬ zaˬ heu myaˆ mawˇ paˇ ahˇ-eu meh. Kʼoeˇ-euˬ gʼaˇ duˬ, Miˬyehˇ-euˬ guiˬ lahˬ-ahˇ Yeˬsuˇ paˇ ja ceuˬ-awˇ, aˬ yawꞈ-euˬ zaˬ lahˇ deuˬ-ahˇ kʼehˇ-awˇ, tsawˇ haˬ aˇ maꞈ-ahˇ ngaˬ shaˬ kʼoeˇ paˇ bi biˇ nehˬ-euˬ meh. 8Aˬ yawꞈ maꞈ tiˬ dehˆ dzaˬ-euˬ meh. Kʼoeˇ uˬ taꞈ, maˬ dzaˬ jiˇ coeˇ-ehˇ dzeˇ laˇ-euˬ deuˬ-ahˇ zaˬ lahˇ deuˬ paˇ gʼoˆ uiˬ ngeh, kʼaˆ puˬ shiꞈ puˬ byah laˇ-euˬ meh. 9Dzaˬ-euˬ tsawˇ haˬ deuˬ oeˬ heˇ gʼaˬ ehˇ gʼaˬ ni byah-eu meh. 10Kʼoeˇ naˇ, tsawˇ haˬ kʼoeˇ deuˬ-ahˇ bi gʼoꞈ-iˇ-euˬ meh. Aˬ yawꞈ-aˬ, aˬ yawꞈ-euˬ zaˬ lahˇ deuˬ nehˬ-ehˇ tiˬ poˆ tehꞈ-ehˇ lawˬ laꞈ kʼoeˇ uˇ-iˇ-awˇ, Daˬmaˬnuˇdaˬ miˇ kʼahˬ-ahˇ iˇ-euˬ meh.

Zahˬ lehˇ paˬ-ehˇ gʼeh-eu jeˬ mˇ mehˬ laꞈ lehˇ Paˬliˬsehˇ deuˬ ehˇ-eu

(Maꞈtehˬ 16.1-4)

11Paˬliˬsehˇ deuˬ Yeˬsuˇ jawˇ gaˇ laˇ-awˇ, tsawˇ pyehˇ pyehˇ laˇ-euˬ meh. Aˬ yawꞈ Miˬyehˇ-euˬ tsawˇ haˬ pyeuꞈ-eu siˬ duˬ laˇ ni, kʼaˆ jeˬ-ehˇ gʼeh-eu jeˬ mˇ mehˬ laꞈ-awˬ lehˇ aˬ yawꞈ maꞈ ehˇ-eu meh. Aˬ yawꞈ maꞈ aˬ yawꞈ-ahˇ lahˇ ju kʼmˇ paꞈ mawꞈ-eu miˇ neh, kʼoeˇ loꞈ-ehˇ ehˇ-eu meh. 12Ehˇ kʼawꞈ, Yeˬsuˇ saꞈ saꞈ ma gʼawˇ ka-awˇ ehˇ-eu, “Heu ziˇ-euˬ tsawˇ haˬ deuˬ aˬ jeˬ miˇ neh zahˬ leˇ paˬ-ehˇ gʼeh jeˬ-ahˇ mawˇ mawꞈ-eu maˬ siˬ. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Heu ziˇ-ahˇ dehꞈ luꞈ-eu tsawˇ haˬ deuˬ-ahˇ zahˬ leˇ paˬ-ehˇ gʼeh-eu jeˬ maˬ bi mawˇ lehˇ ngaˇ ehˇ-eu ma.”

13Kʼoeˇ naˇ , aˬ yawꞈ maꞈ jawˇ gaˇ neh aˬ yawꞈ luˆ-iˇ-awˇ, lawˬ laꞈ kʼoeˇ uˇ-iˇ-awˇ, lah nui baˬ paw iˇ gʼeh-euˬ meh.

Paˬliˬsehˇ-euˬ dehˬ tseˬ hawˇ-eu Heˬloˆ-euˬ dehˬ tseˬ

(Maꞈtehˬ 16.5-12)

14Zaˬ lahˇ deuˬ kaˬ muˇ shaˇ dawˆ-eu ngehˇ-euꞈ miˇ neh, lawˬ laꞈ kʼoeˇ kaˬ muˇ tiˬ yaˆ ahˇ-eu tehꞈ meh. 15Zaˬ lahˇ deuˬ-ahˇ Yeˬsuˇ ehˇ nehˬ-eu, “Noeˬ gahˇ-awˬ. Paˬliˬsehˇ deuˬ-euˬ dehˬ tseˬ hawˇ-eu sahˬ paˬ Heˬloˆ-euˬ dehˬ tseˬ-ahˇ naw maꞈ yaw kʼaˆ kʼaˆ-ehˇ ya yahˇ meh.”

16Zaˬ lahˇ deuˬ yaw kaˬ ehˇ-eu, “Aˬ dui maꞈ kaˬ muˇ maˬ hehˇ ahˇ leꞈ-euˬ miˇ neh, aˬ yawꞈ teu loꞈ-ehˇ ehˇ-eu jeˬ ngaˇ.”

17Aˬ yawꞈ maꞈ kʼoeˇ loꞈ-ehˇ ja luꞈ-eu Yeˬsuˇ siˬ nya-awˇ, heu loꞈ-ehˇ ehˇ nehˬ-euˬ meh. “Aˬ jeˬ miˇ neh kaˬ muˇ maˬ hehˇ leꞈ-euˬ gaˇ kawˆ naw maꞈ ja luꞈ te. Nymˬ-mˇ keuˆ ni naw maꞈ maˬ gʼoˆ shaw-ehˇ jawˇ te siˬ loˇ. Naw maꞈ teu naˆ naˆ-ehˇ dawˇ ga ga te loˇ. 18Naw maꞈ myaˆ nuiˆ tsoꞈ-eu maˬ mawˇ nya-ehˇ, Naˬ bawˇ tsoꞈ-eu maˬ gaˬ nya te loˇ. Maˬ paˇ noeˬ ni ngehˇ jiˇ teˬ loˇ. 19Ngaˇ kaˬ muˇ ngaˬ yaˆ ngawˬ pyehˬ-awˇ tsawˇ haˬ ngaˬ heˇ gʼaˬ-ahˇ bi dzaˬ ngeh, maˬ dzaˬ jiˇ coeˇ-ehˇ dzeˇ laˇ-euˬ deuˬ naw maꞈ gʼoˆ uiˬ-euˬ kʼoeˇ, kʼaˆ puˬ aˇ myaˆ puˬ byah laˇ taˬ.”

Aˬ yawꞈ maꞈ ehˇ-eu, “Tseˇ nyiꞈ puꞈ byah laˇ-euˬ meh.”

20Yeˬsuˇ ehˇ-eu, “Ngaˇ kaˬ muˇ shiꞈ yaˆ ngawˬ pyehˬ-awˇ tsawˇ haˬ oeˬ heˇ gʼaˬ-ahˇ bi dzaˬ ngeh poˆ, maˬ dzaˬ jiˇ coeˇ-ehˇ dzeˇ laˇ-euˬ aˇ jehꞈ deuˬ naw maꞈ neh gʼoˆ uiˬ-euˬ kʼoeˇ, kʼaˆ puˬ aˇ myaˆ puˬ byah laˇ-euˬ ta.”

Aˬ yawꞈ maꞈ ehˇ-eu, “Shiꞈ puˬ byah laˇ-euˬ meh.”

21Aˬ yawꞈ maꞈ-ahˇ Yeˬsuˇ ehˇ nehˬ-eu, “Ehˇ kʼawꞈ, nymˬ-mˇ keuˆ ni naw maꞈ maˬ gʼoˆ shaw ngaˬ siˬ laˬ.”

Behˬdzeˇdaˬ-ahˇ jawˇ-eu myaˆ behꞈ tiˬ gʼaˬ-ahˇ laˆ taˬ nehˬ-euˬ

22Kʼoeˇ naˇ, Behˬdzeˇdaˬ meuˬ-ahˇ aˬ yawꞈ maꞈ iˇ keuˆ-euˬ meh. Tsawˇ haˬ tiˬ deuˬ Yeˬsuˇ jawˇ gaˇ myaˆ behꞈ tiˬ gʼaˬ sheuˬ laꞈ-awˇ, tiˬ poˆ toeˬ ciˆ nehˬ-eu gʼaˇ duˬ, Yeˬsuˇ-ahˇ shaˇ-eu meh. 23Myaˆ behꞈ kʼoeˇ gʼaˬ-euˬ aˬ laꞈ-ahˇ Yeˬsuˇ tsahˇ-awˇ, pu pu dzeˇ sheuˬ doˆ gʼeh-euˬ meh. Myaˆ nuiˆ-ahˇ duˬ kʼaˬ kʼa shehˬ nehˬ-awˇ, uˬ duˬ-ahˇ aˬ laꞈ baꞈ daˆ-awˇ, “Tiˬ jeˬ paˬ maˬ mawˇ laˇ nya loˇ” lehˇ naˇ haˬ-euˬ meh.

24Tsawˇ haˬ kʼoeˇ gʼaˬ baꞈ leuˇ haw-awˇ ehˇ-eu, “Tsawˇ haˬ mawˇ laˇ ngaˇ. Ehˇ kʼawꞈ, aˇ bawˇ-ahˇ duˇ leˇ-awˇ, gaˇ ma cah luꞈ-eu nga.”

25Tsawˇ haˬ kʼoeˇ gʼaˬ-euˬ myaˆ nuiˆ-ahˇ Yeˬsuˇ tiˬ poˆ paˇ toeˬ ciˆ-euˬ meh. Kʼoeˇ ngeh poˆ jawˇ, tsawˇ haˬ kʼoeˇ gʼaˬ yaw duˬ duˬ-ehˇ paˇ haw ngeh, myaˆ nuiˆ muiˬ laˇ-awˇ, yawˬ jeˬ na luꞈ mawˇ shawˇ laˇ-euˬ meh. 26Kʼoeˇ naˇ, tsawˇ haˬ kʼoeˇ gʼaˬ-ahˇ “Pu-ahˇ taˬ uˇ leˇ de” lehˇ ehˇ nehˬ-awˇ bi gʼoꞈ-iˇ-euˬ meh.

Yeˬsuˇ-aˬ Ka li meh lehˇ Beˬtuˆluˆ ehˇ-eu

(Maꞈtehˬ 16.13-20; Luˇkaꞈ 9.18-21)

27Kʼoeˇ naˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ, Piˇliˇpiˆ Gehˇsaˬliˇ meuˬ dawˬ peh jaˆ-eu pu deuˬ-ahˇ iˇ-euˬ meh. Gaˇ pehˇ iˇ luꞈ ngeh, zaˬ lahˇ deuˬ-ahˇ aˬ yawꞈ naˇ haˬ-eu, “Aˬ cawˬ ngaˬ-ahˇ aˬ suˇ gʼaˬ nga lehˇ ehˇ luꞈ ta.”

28Zaˬ lahˇ deuˬ aˬ yawꞈ-ahˇ ehˇ nehˬ-eu, “Tsawˇ haˬ tiˬ paˆ na deuˬ nawˬ-ahˇ Iˇ cuꞈ shawˇ-eu Yoˇhaˬ nga lehˇ ehˇ-eu meh. Tiˬ paˆ na deuˬ-aˬ, Eˇliˇyaˆ nga lehˇ ehˇ-awˇ, tiˬ paˆ na deuˬ-aˬ, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ na ngaˇ lehˇ ehˇ-eu meh.”

29Aˬ yawꞈ maꞈ-ahˇ aˬ yawꞈ ehˇ-eu, “Naw maꞈ toe. Ngaˇ aˬ suˇ gʼaˬ nga lehˇ ehˇ nmˇ.”

Beˬtuˆluˆ ehˇ-eu, “Nawˇ-aˬ, Ka li meh.”

30Kʼoeˇ naˇ, aˬ yawꞈ maꞈ-ahˇ Yeˬsuˇ dawˬ biꞈ-awˇ ehˇ-eu, “Ngaˬ-euˬ gaˇ kawˆ tiˬ gʼaˬ-ahˇ-iˬ taˬ ja nehˬ de.”

Yeˬsuˇ aˬ yawꞈ ya shiˇ-eu gaˇ kawˆ ehˇ-eu

(Maꞈtehˬ 16.21-28; Luˇkaꞈ 9.22-27)

31Kʼoeˇ naˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ heu loꞈ-ehˇ mehˬ nehˬ tsoˆ nehˬ-euˬ meh. “Tsawˇhaˬ-euˬ Zaˬmaˇ-aˬ, gʼawˬ mya jeˬ-ahˇ ya daˬ dui dui tehꞈ-a. Tsawˇ mawˬ tsawˇ kʼaˆ deuˬ, piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ neh byehˇ dzeh nehˬ-euˬ jeˬ-ahˇ ya daˬ tehꞈ-a. Aˬ cawˬ neh bi sehꞈ gaˇ keuˆ ni ya daˬ tehꞈ-a. Ehˇ kʼawꞈ, smˬ nah naˇ, paˇ gʼoꞈ dehꞈ laˇ tehꞈ-a.” 32Gaˇ kawˆ kʼoeˇ aˬ yawꞈ maꞈ-ahˇ bya cehˆ ni aˬ yawꞈ ehˇ duˬ nehˬ-euˬ meh. Kʼoeˇ miˇ neh, Beˬtuˆluˆ aˬ yawꞈ-ahˇ sheuˬ ceuˆ doˆ-awˇ, uˬ dui dui-euˬ meh. 33Ehˇ kʼawꞈ, Yeˬsuˇ aˬ yawꞈ-euˬ zaˬ lahˇ deuˬ-ahˇ nahˇ gʼoꞈ gʼoꞈ haw-awˇ, Beˬtuˆluˆ-ahˇ dehˬ-awˇ ehˇ-eu, “Saˬdaˬ-oˇ, cehˆ-awˬ. Nawˬ-euˬ nui noeˬ teu-aˬ, Miˬyehˇ-euˬ nui noeˬ maˬ ngeuˇ nga. Tsawˇ haˬ zaˬ-euˬ nui noeˬ nga.”

34Kʼoeˇ ngeh, Yeˬsuˇ-aˬ, tsawˇ haˬ aˇ maꞈ hawˇ-eu aˬ yawꞈ-euˬ zaˬ lahˇ deuˬ-ahˇ aˬ yawꞈ jawˇ gaˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Tsawˇ haˬ aˬ geu gʼaˬ maˬ kaˬ, ngaˬ-euˬ mehˬ nah caw teh laˇ mawꞈ naˇ, yawˬ ha-euˬ nui kʼahˇ ya byehˇ dzeh-awˇ, yawˬ ha-euˬ laꞈ yaꞈ baꞈ-awˇ, ngaˬ-euˬ mehˬ nah ya laˇ meh. 35Aˬ jeˬ miˇ neh ehˇ naˇ, yawˬ ha-euˬ dehꞈ-eu jeˬ-ahˇ ka kʼoꞈ-eu lehˇ leh jeh-eu tsawˇ haˬ aˬ geu gʼaˬ maˬ kaˬ, dehꞈ-eu jeˬ-ahˇ smˬ-iˇ tehꞈ-a. Ehˇ kʼawꞈ, ngaˬ-euˬ gʼaˇ duˬ hawˇ-eu laˬ kʼaˬ cehˇ-eu guiˬ lahˬ dawˬ gʼaˇ duˬ yawˬ ha-euˬ dehꞈ-eu jeˬ smˬ-euˬ tsawˇ haˬ aˬ geu gʼaˬ maˬ kaˬ, dehꞈ-eu jeˬ za tehꞈ-a. 36Tsawˇ haˬ tiˬ gʼaˬ miˇ tsaˬ tahˬ kʼawˇ heu dawˬ tawˆ luꞈ-ahˇ za jiˇ-euˬ kʼawꞈ, saꞈ laˇ dehꞈ-eu jeˬ smˬ naˇ, aˬ yawꞈ gʼaˇ duˬ aˬ jeˬ jiˇ jeuˬ paˇ ahˇ ta. 37Aˬ geu jeˬ biꞈ-awˇ zeuˇ kʼoꞈ kʼawꞈ, saꞈ laˇ dehꞈ-eu jeˬ-ahˇ maˬ paˇ zeuˇ kʼoꞈ nya meh. 38Bahˬ dui muˆ dui dui-awˇ iˬ baˇ myaˬ dui dui-eu ziˇ heu ziˇ laꞈ kʼoeˇ, tsawˇ haˬ tiˬ gʼaˬ na, ngaˬ-ahˇ maˬ ehˇ, ngaˬ neh mehˬ nehˬ tsoˆ nehˬ-euˬ jeˬ-ahˇ maˬ ehˇ, shaꞈ dawˇ naˇ, Tsawˇhaˬ-euˬ Zaˬ maˇ kʼawꞈ, aˬ yawꞈ Aˬda-euˬ yaw shehꞈ kʼahˬ sehˇ dm-awˇ muiˬ-eu shawˇ-eu mˬ taˆ gʼaˬ kʼehˇ deuˬ nehˬ-ehˇ zaꞈ le ngeh, tsawˇ haˬ kʼoeˇ gʼaˬ-ahˇ shaꞈ dawˇ tehꞈ-a.”

Currently Selected:

Maˬkuˆ 8: AHK

Highlight

Copy