Maˬkuˆ 7

Aˇ hu neh mehˬ ka leꞈ-euˬ zahˇ

(Maꞈtehˬ 15.1-9)

1Paˬliˬsehˇ deuˬ hawˇ-eu Yeˬluˇsaˬlehˬ meuˬ-ahˇ neh oe-euˬ Zahˇ dawˬ kʼoꞈ dawˬ mehˬ-eu saˬ laˬ deuˬ, Yeˬsuˇ dawˬ peh uiˬ le-euˬ meh. 2Yeˬsuˇ-euˬ zaˬ lahˇ tiˬ paˆ na deuˬ aˬ laꞈ maˬ shawˇ-ehˇ dzaˬ luꞈ dawˇ luꞈ gaˇ aˬ yawꞈ maꞈ ya mawˇ-euˬ meh. Aˬ laꞈ maˬ shawˇ-eu lehˇ ehˇ-eu-aˬ, Paˬliˬsehˇ deuˬ neh mehˬ taˬ-euˬ loꞈ-ehˇ maˬ dzuiꞈ shawˇ gaˇ ehˇ mawꞈ-eu meh.

3(Paˬliˬsehˇ deuˬ hawˇ-eu Yuˇdaˆ tsawˇ haˬ deuˬ-aˬ, aˬ poeˬ aˬ bawˇ deuˬ neh mehˬ ka leꞈ-euˬ zahˇ sahˇ kʼoꞈ mehˬ nah caw teh-eu meh. Zahˇ sahˇ kʼoꞈ jaˆ-eu loꞈ-ehˇ aˬ laꞈ maˬ dzuiꞈ shawˇ gʼaˬ kʼoeˇ keuˆ ni, aˬ yawꞈ maꞈ maˬ dzaˬ maˬ dawˇ kʼmˬ-a. 4Lehˆ-ahˇ zeuˇ-euˬ aˬ geu jeˬ maˬ kaˬ, maˬ tsiˬ shawˇ-ehˇ ma dzaˬ kʼmˬ-a. Kʼmˬ maˬ joˆ-eu maˬ ehˇ, yuꞈ zaˇ bui bahˬ lehˬ tsiˬ-eu maˬ ehˇ, aˇ hu neh zmˬ ka leꞈ-euˬ zahˇ sahˇ kʼoꞈ-ahˇ tsaˬ ni aˬ yawꞈ maꞈ mˇ-eu meh.)

5Kʼoeˇ miˇ neh, Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ Yeˬsuˇ-ahˇ ehˇ-eu, “Aˬ jeˬ miˇ neh nawˬ-euˬ zaˬ lahˇ deuˬ aˬ poeˬ aˬ bawˇ neh mehˬ ka leꞈ-euˬ zahˇ sahˇ kʼoꞈ-ahˇ maˬ caw teh-ehˇ, maˬ shawˇ-eu aˬ laꞈ neh dzaˬ ta dawˇ ta.”

6Yeˬsuˇ aˬ yawꞈ maꞈ-ahˇ ehˇ nehˬ-eu, “Awꞈ-aꞈ tahˬ kʼoˬ-ahˇ duˇ-eu tsawˇ haˬ#7.6 ‘Awꞈ-aˬ tahˬ kʼoˬ-ahˇ duˇ-eu tsawˇ haˬ’ lehˇ ehˇ-eu dawˬ tsuiꞈ, Maꞈtehˬ 6.3-ahˇ haw-awˬ. deuˬ-oˇ, Iˇsaˬyaˇ neh Miˬyehˇ gʼaˇ duˬ ngehˬ dah-eu laꞈ kʼoeˇ naw maꞈ-euˬ gaˇ kawˆ ehˇ taˬ-euˬ aˇ naˆ ni tsaˬ-eu nga. Aˬ yawꞈ neh boꞈ taˬ yaꞈ-euˬ dawˬ heu loꞈ-ehˇ jaˆ-eu meh.

‘Miˬyehˇ heu loꞈ-ehˇ ehˇ-eu meh.

Tsawˇ haˬ heu deuˬ kʼaˬ meh mehˬ boeˬ,

ngaˬ-ahˇ taˬ huiˬ taˬ mahˇ-euˬ kʼawꞈ,

aˬ yawꞈ maꞈ-euˬ nui ma kʼoeˇ siˬ,

ngaˬ-ahˇ gaˇ mahˇ kaˬ dui dui meh.

7Yawꞈ maꞈ ngaˬ-ahˇ uˬ duˬ tahˬ-eu,

gaˇ dahˇ tsoeˬ leˇ duˬ maˬ jaˆ-a.

Tsawˇ haˬ neh jahˇ-euˬ zahˇ sahˇ kʼoꞈ,

ngaˬ-euˬ dawˬ geuꞈ-awˇ mehˬ-euˬ meh.’

8Miˬyehˇ-euˬ dawˬ-ahˇ naw maꞈ taˬ yaꞈ-awˇ, tawˇ haˬ zaˬ neh tawˬ ka leꞈ-euˬ zahˇ sahˇ kʼoꞈ-ahˇ naw maꞈ ziꞈ dah ni tuˆ tehˬ taˬ-euˬ meh.”

9Yeˬsuˇ aˬ yawꞈ maꞈ-ahˇ paˇ ehˇ nehˬ-eu, “Miˬyehˇ-euˬ zahˇ dawˬ kʼoꞈ dawˬ-ahˇ byehˇ dzeh-awˇ, tsawˇ haˬ zaˬ neh tawˬ ka leꞈ-euˬ zahˇ sahˇ kʼoꞈ-ahˇ naw maꞈ kʼoeˇ loꞈ-ehˇ tuˆ tehˬ taˬ nya ni, naw maꞈ yaw gahˇ zmˬ-eu meh. 10Moˇseˬ-euˬ zahˇ dawˬ kʼoꞈ dawˬ laꞈ kʼoeˇ, ‘Nawˬ da nawˬ ma-ahˇ yaw zeu ya baw meh’ lehˇ hawˇ-eu, ‘Yawˬ ha-euˬ aˬ da hawˇ-eu aˬ ma-ahˇ yaˬ kʼehˇ yaˬ-eu tsawˇ haˬ-aˬ, sehꞈ gaˇ ya daˬ tehꞈ-a’ lehˇ ehˇ taˬ-euˬ meh. 11Ehˇ kʼawꞈ, naw maꞈ heu loꞈ-ehˇ mehˬ nehˬ tsoˆ nehˬ luꞈ-eu meh. Tsawˇ haˬ tiˬ gʼaˬ na yawˬ ha-euˬ aˬ da aˬ ma-ahˇ tiˬ jeˬ paˬ caw ba nehˬ nya-eu jaˆ kʼawꞈ, (‘Heu-aˬ, Miˬyehˇ-ahˇ oꞈ-eu jeˬ meh’ lehˇ dawˬ tsuiꞈ ehˇ mawꞈ-eu laꞈ kʼoeˇ), ‘Heu-aˬ, Gawˬ baˬ meh’ lehˇ ehˇ shaw naˇ, 12aˬ da aˬ ma-ahˇ maˬ caw ba nehˬ ni byehˇ nya meh lehˇ naw maꞈ mehˬ-eu tsoˆ-eu meh. 13Kʼoeˇ loꞈ-ehˇ mehˬ-eu tsoˆ-eu laꞈ kʼoeˇ, naw maꞈ neh tawˬ ka leꞈ-euˬ zahˇ sahˇ kʼoꞈ baˬ da neh Miˬyehˇ-euˬ dawˬ byoˆ-iˇ byawˬ-iˇ ni naw maꞈ jahˇ-eu meh. Kʼoeˇ loꞈ-ehˇ duˇ-eu gʼawˬ mya jeˬ, naw maꞈ mˇ luꞈ shaˇ luꞈ-eu meh.”

Tsawˇ haˬ zaˬ-ahˇ maˬ shawˇ ni bi pyeuꞈ-iˇ nya-eu jeˬ

(Maꞈtehˬ 15.10-20)

14Kʼoeˇ naˇ tsawˇ haˬ aˇ maꞈ-ahˇ Yeˬsuˇ tiˬ poˆ paˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Naw maꞈ daw tawˆ luꞈ yaw muiˬ paˬ-ehˇ naˇ haˬ-awˇ gʼoˆ shaw geuꞈ-awˬ. 15Laꞈ nyiˇ paw neh tsawˇ haˬ-euˬ laꞈ kʼoeˇ kʼaˇ ahˇ-iˇ-eu jeˬ, tsawˇ haˬ zaˬ-ahˇ maˬ muiˬ maˬ shawˇ-ehˇ bi pyeuꞈ-iˇ nya-eu tiˬ jeˬ-iˬ maˬ jaˆ-a. Tsawˇ haˬ-euˬ laꞈ kʼoeˇ neh doˆ laˇ-euˬ jeˬ tehꞈ-ehˇ, tsawˇ haˬ zaˬ-ahˇ maˬ muiˬ maˬ shawˇ ni bi pyeuꞈ-iˇ nya-eu meh.”#7.15 Jaˇliꞈ tiˬ paˆ na deuˬ laꞈ kʼoeˇ, ga naˇ yaw zaˬ heu hmˬ ahˇ-eu meh. 7.16: Naˬ bawˇ kʼaˇ tsoꞈ-eu tsawˇ haˬ naˇ haˬ-awˬ.

17Aˬ yawꞈ tsawˇ haˬ aˇ maꞈ-ahˇ gʼawˬ-iˇ-awˇ, iˇ kahˇ-ahˇ uˇ-iˇ ngeh, zaˬ lahˇ deuˬ aˬ yawꞈ-ahˇ dawˬ kʼoeˇ dawˬ gaˇ kawˆ naˇ haˬ-euˬ meh. 18Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ gʼeh maˬ gʼoˆ shaw nya te loˇ. Laꞈ nyiˇ paw neh tsawˇ haˬ-euˬ laꞈ kʼoeˇ kʼaˇ ahˇ-iˇ-euˬ jeˬ, aˬ yawꞈ-ahˇ maˬ muiˬ maˬ shawˇ-ehˇ bi pyeuꞈ-iˇ nya-eu tiˬ jeˬ-iˬ maˬ jaˆ-a. 19Aˬ jeˬ miˇ neh ehˇ naˇ, nui ma-ahˇ maˬ ahˇ-iˇ-ehˇ, baw ma-ahˇ ahˇ-iˇ-awˇ, laꞈ nyiˇ paw iˇ doˆ dzeh-eu meh.” (Kʼoeˇ loꞈ-ehˇ ehˇ-eu laꞈ kʼoeˇ, dzaˬ dzaˬ dawˇ dawˇ dawˬ tawˆ luꞈ yaw shawˇ meh lehˇ, Yeˬsuˇ ehˇ mawꞈ-eu meh.)

20Aˬ yawꞈ paˇ ehˇ-eu, “Tsawˇ haˬ laꞈ kʼoeˇ neh doˆ laˇ-euˬ jeˬ-aˬ, tsawˇ haˬ-ahˇ maˬ muiˬ maˬ shawˇ ni bi pyeuꞈ-iˇ nya-eu meh. 21Aˬ jeˬ miˇ neh ehˇ naˇ, nui ma laꞈ kʼoeˇ neh doˆ le-euˬ jeˬ-aˬ, maˬ muiˬ maˬ jaˬ-eu jeˬ pyeuꞈ-eu, tahˇ joe joe-eu, tsawˇ haˬ sehꞈ-eu, 22aˬ cawˬ-euˬ miˬ zaˬ yo zaˬ-ahˇ bahˬ-eu, aˬ cawˬ-euˬ myawˬ-ahˇ mehˇ juiˇ juiˇ-eu, yaw haiˬ jeˬ mˇ-eu, jaˬ myawꞈ myawꞈ-eu, smˇ kʼaˆ kʼaˆ-eu, myaˆ naˆ-eu, ja bu ja doeˇ-eu, nui ma huiˬ-eu mahˇ-eu, aˬ dzawˬ aˇ gah gah-eu, heu loꞈ-ehˇ gʼeh-eu deuˬ meh. 23Maˬ muiˬ maˬ jaˬ-eu heu deuˬ dawˬ tawˆ luꞈ, tsawˇ haˬ-euˬ laꞈ kʼoeˇ neh doˆ laˇ-euˬ jeˬ pyeuꞈ-awˇ, tsawˇ haˬ-ahˇ maˬ muiˬ maˬ shawˇ ni bi pyeuꞈ-iˇ-eu meh.

Zaˬ miˬ zaˬ tiˬ gʼaˬ-euˬ jah-eu nui ma

(Maꞈtehˬ 15.21-28)

24Kʼoeˇ naˇ, Yeˬsuˇ kʼoeˇ gaˇ neh doˆ-iˇ-awˇ, Duˇlu meuˬ dawˬ peh jaˆ-eu miˇ kʼahˬ-ahˇ iˇ gʼeh-euˬ meh. Aˬ yawꞈ nymˇ tiˬ nymˇ-ahˇ uˇ-iˇ-awˇ, aˬ yawꞈ kʼoeˇ gaˇ jawˇ-eu gaˇ kawˆ tsawˇ haˬ tiˬ gʼaˬ-iˬ maˬ bi siˬ mawꞈ-a. Ehˇ kʼawꞈ, aˬ yawꞈ maˬ jawˇ zaꞈ nya-a. 25Nehꞈ yaw jawꞈ uˇ-eu aˬ buˇ tiˬ buˇ-euˬ aˬ ma tiˬ ma, Yeˬsuˇ kʼoeˇ gaˇ jawˇ-eu gaˇ kawˆ ya gaˬ ngeh, tiˬ poˆ tehꞈ-ehˇ oe-awˇ, aˬ yawꞈ-euˬ aˬ kuiˇ dawˬ peh awˆ byaˆ-euˬ meh. 26Zaˬ miˬ zaˬ kʼoeˇ gʼaˬ-aˬ, Suˇliˆ miˇ kʼahˬ Piˇniˇshaˆ meuˬ-ahˇ dehꞈ le-euˬ Heˬlaˬsaˇ tsawˇ jeuˬ lawˇ ciꞈ zaˬ pyeuꞈ-eu meh. Aˬ yawꞈ-euˬ aˬ buˇ laꞈ kʼoeˇ uˇ-eu nehꞈ-ahˇ teh doˆ nehˬ-eu gʼaˇ duˬ, Yeˬsuˇ-ahˇ aˬ yawꞈ shaˇ-euˬ meh. 27Ehˇ kʼawꞈ, Yeˬsuˇ aˬ yawꞈ-ahˇ ehˇ nehˬ-eu, “Zaˬ deuˬ-ahˇ tiˬ dehˆ jeˬ huˬ bi dzaˬ kaˇ-euˇ. Zaˬ dzaˬ-eu dzaˇ yuˇ-awˇ aˬ kuiˬ-ahˇ dzeh nehˬ-eu maˬ tsaˬ-aˇ.”

28Aˬ yawꞈ ehˇ-eu, “Sahˬpaˬ-oˇ, hawˬ jeh uˬ moˆ jawˇ-eu aˬ kuiˬ deuˬ kʼawꞈ, zaˬ neh dzaˬ dzeh dawˇ dzeh-euˬ deuˬ-ahˇ gʼoˆ dzaˬ-eu meh.”

29Kʼoeˇ ngeh, Yeˬsuˇ aˬ yawꞈ-ahˇ ehˇ nehˬ-eu, “Nawˇ teu loꞈ-ehˇ ehˇ gʼaˬ-euˬ miˇ neh, gʼoꞈ-iˇ-awˬ. Nawˬ buˇ-ahˇ uˇ-eu nehꞈ doˆ-iˇ gʼaˬ-euˬ gaˇ nawˇ ya mawˇ tehꞈ-a.”

30Aˬ yawꞈ iˇ kahˇ-ahˇ gʼoꞈ-iˇ ngeh, aˬ yawꞈ-euˬ aˬ buˇ yuꞈ zaˇ kʼoeˇ taˆ yuꞈ luꞈ-awˇ, nehꞈ kʼoeˇ mawˇ aˬ diˇ aˬ maˇ doˆ-iˇ dzeuˇ-euˬ gaˇ ya mawˇ-euˬ meh.

Naˬ bawˬ tiˬ gʼaˬ-ahˇ laˆ taˬ nehˬ-euˬ

31Kʼoeˇ naˇ, Duˇlu gahˬ kaˬ-ahˇ neh Yeˬsuˇ doˆ-iˇ-awˇ, Siˇdoˬ meuˬ-ahˇ neh Meuˬ tseˇ meuˬ miˇ kʼahˬ lehˇ kuˇ-eu paw iˇ gʼeh-awˇ, Gaˬliˬlehˇ lah-ahˇ iˇ doˆ-euˬ meh. 32Kʼoeˇ ngeh, naˬ bawˬ bawˬ-awˇ dawˬ maˬ ngehˬ lawˆ nya-eu tsawˇ haˬ tiˬ gʼaˬ-ahˇ Yeˬsuˇ jawˇ gaˇ aˬ cawˬ sheuˬ laꞈ-awˇ, Yeˬsuˇ neh aˬ laꞈ bi baꞈ daˆ-eu gʼaˇ duˬ shaˇ-euˬ meh. 33Tsawˇ haˬ kʼoeˇ gʼaˬ-ahˇ tehꞈ-ehˇ Yeˬsuˇ sheuˬ ceuˆ gʼeh-awˇ, naˬ bawˇ-ahˇ laꞈ noeˇ cawˬ ahˇ nehˬ-euˬ meh. Kʼoeˇ naˇ, duˬ kʼaˬ kʼa-awˇ mehˬ laˇ-ahˇ toeˬ lehꞈ nehˬ-euˬ meh. 34Kʼoeˇ naˇ, Yeˬsuˇ mˬ-ahˇ gʼawˇ leuˇ-awˇ, saꞈ saꞈ ma gʼawˇ ka-eu laꞈ kʼoeˇ, “Iˇ paˬ daˬ” lehˇ ehˇ-eu meh. Dawˬ tsuiꞈ-aˬ, “Pah laˇ-awˬ” lehˇ ehˇ mawꞈ-eu meh.

35Tiˬ poˆ tehꞈ-ehˇ tsawˇ haˬ kʼoeˇ gʼaˬ naˬ bawˇ gaˬ nya laˇ-euˬ uˬ taꞈ, mehˬ laˇ juˆ laˇ-awˇ, dawˬ ngehˬ lawˆ nya laˇ-euˬ meh. 36Gaˇ kawˆ kʼoeˇ aˬ cawˬ tiˬ gʼaˬ-ahˇ-iˬ maˬ ya ja nehˬ-eu gʼaˇ duˬ, tsawˇ haˬ kʼoeˇ deuˬ-ahˇ Yeˬsuˇ dawˬ biꞈ-euˬ meh. Ehˇ kʼawꞈ, aˬ yawꞈ ngehˬ-ehˇ laˆ tsoeˬ naˇ, aˬ yawꞈ maꞈ ngehˬ-ehˇ ja byah gʼeh-euˬ meh. 37Kʼoeˇ loꞈ-ehˇ ja gaˇ kʼaˇ ya gaˬ-euˬ tsawˇ haˬ dawˬ tawˆ luꞈ zahˬ dui dui leˇ-euˬ meh. Aˬ yawꞈ maꞈ ehˇ-eu, “A yawꞈ neh kʼaˇ mˇ-euˬ yawˬ jeˬ na luꞈ aˇ naˆ ni muiˬ-eu nga. Naˬ bawˬ deuˬ naˬ bawˇ gaˬ nya laˇ-awˇ, aˬ dzawˬ deuˬ dawˬ ngehˬ nya laˇ gaˇ keuˆ ni aˬ yawꞈ mˇ nya-euˬ nga.”

Currently Selected:

Maˬkuˆ 7: AHK

Highlight

Copy