Maˬkuˆ 10
10
Miˬ zaˬ kʼoꞈ-eu gaˇ kawˆ mehˬ nehˬ-euˬ
(Maꞈtehˬ 19.1-12; Luˇkaꞈ 16.18)
1Kʼoeˇ naˇ, jawˇ duˬ kʼoeˇ tsahˇ-ahˇ neh Yeˬsuˇ doˆ-iˇ-awˇ, Yuˇdaˆ miˇ kʼahˬ-ahˇ iˇ-awˇ, Yawˇdaˬ lawˇ baˬ tsehˆ-euˬ meh. Tsawˇ haˬ aˇ maꞈ maꞈ ma aˬ yawꞈ jawˇ gaˇ uiˬ le-awˇ, aˬ yawꞈ aˬ myah myah mehˬ-euˬ loꞈ-ehˇ, aˬ yawꞈ maꞈ-ahˇ mehˬ nehˬ tsoˆ nehˬ-euˬ meh. 2Paˬliˬsehˇ tiˬ paˆ na deuˬ aˬ yawꞈ jawˇ gaˇ laˇ-awˇ, aˬ yawꞈ-ahˇ lahˇ ju kʼmˇ mawꞈ-eu miˇ neh heu loꞈ-ehˇ naˇ haˬ-euˬ meh. “Tsawˇ haˬ tiˬ gʼaˬ yawˬ ha-euˬ miˬ zaˬ kʼoꞈ naˇ, zahˇ dawˬ kʼoꞈ dawˬ-ahˇ bahˬ ta loˇ.”
3Yeˬsuˇ ehˇ-eu, “Moˇseˬ neh naw maꞈ-ahˇ biꞈ taˬ-euˬ zahˇ dawˬ kʼoꞈ dawˬ aˬ joˆ-ehˇ jaˆ ta.”
4Aˬ yawꞈ maꞈ ehˇ-eu, “Miˬ zaˬ kʼoꞈ-eu sahˬ boꞈ tiˬ dzeh boꞈ nehˬ gʼaˬ naˇ, yawˬ ha-euˬ miˬ zaˬ-ahˇ kʼoꞈ-awˇ bi gʼoꞈ-iˇ nya meh lehˇ, Moˇseˬ neh ehˇ taˬ-euˬ jaˆ meh.”
5Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ nui ma gʼahˇ dui dui-awˇ, maˬ mehˬ maˬ tsoˆ paˇ nya-eu miˇ neh, naw maꞈ gʼaˇ duˬ Moˇseˬ neh zahˇ dawˬ kʼoꞈ dawˬ kʼoeˇ dawˬ boꞈ taˬ yaꞈ-euˬ meh. 6Ehˇ kʼawꞈ, Miˬyehˇ mˬ beh miˇ beh beh ngeh neh, ‘Tsawˇ haˬ zaˬ-ahˇ, kʼaˬ dzeˇ zaˬ hawˇ-eu zaˬ miˬ zaˬ beh-euˬ meh’ lehˇ, Jaˇliꞈ laꞈ kʼoeˇ ehˇ taˬ-euˬ meh. 7‘Kʼoeˇ baˬ da neh, kʼaˬ dzeˇ zaˬ-aˬ, yawˬ ha-euˬ aˬ da aˬ ma-ahˇ gʼawˬ-iˇ-awˇ, yawˬ ha-euˬ miˬ zaˬ nehˬ-ehˇ dehꞈ taꞈ-eu laꞈ kʼoeˇ, 8nyiˬ gʼaˬ-euˬ tiˬ shiˬ tiˬ shaˬ tehꞈ-ehˇ ya pyeuꞈ laˇ meh’ lehˇ ehˇ taˬ-euˬ meh. Kʼoeˇ miˇ neh, aˬ nyaꞈ-aˬ, nyiˬ gʼaˬ maˬ paˇ ngeuˇ meh. Tiˬ shiˬ tiˬ shaˬ tehꞈ meh. 9Miˬyehˇ neh yuˇ dzoeˇ taˬ-euˬ gaˇ, tsawˇ haˬ zaˬ maˬ ya laˆ gʼawˬ-a.”
10Aˬ yawꞈ maꞈ iˇ kahˇ-ahˇ gʼoꞈ keuˆ-iˇ ngeh, zaˬ lahˇ deuˬ Yeˬsuˇ-ahˇ gaˇ kawˆ kʼoeˇ naˇ haˬ-euˬ meh. 11Yeˬsuˇ ehˇ-eu, “Tsawˇ haˬ tiˬ gʼaˬ yawˬ ha-euˬ miˬ zaˬ-ahˇ kʼoꞈ-awˇ yawˬ gʼaˬ yawˬ sheuˬ paˇ naˇ, yawˬ ha-euˬ miˬ zaˬ-ahˇ bahˬ-eu jeˬ mˇ-euˬ meh. 12Kʼoeˇ loꞈ-ehˇ duˇ ni, zaˬ miˬ zaˬ tiˬ gʼaˬ yawˬ haˬ-euˬ kʼaˬ dzeˇ zaˬ-ahˇ kʼoꞈ-awˇ, yawˬ gʼaˬ yawˬ-ahˇ dahˬ dzaˬ paˇ-iˇ naˇ, yawˬ ha-euˬ kʼaˬ dzeˇ zaˬ-ahˇ bahˬ-eu jeˬ mˇ-euˬ meh.”
Zaˬ deuˬ-ahˇ Yeˬsuˇ dawˬ ngehˬ gʼeh nehˬ-euˬ
(Maꞈtehˬ 19.13-15; Luˇkaꞈ 18.15-17)
13Tsawˇ haˬ tiˬ paˆ na deuˬ, Yeˬsuˇ neh aˬ laꞈ bi baꞈ daˆ-eu gʼaˇ duˬ zaˬ yaw nyiˇ deuˬ sheuˬ-awˇ Yeˬsuˇ jawˇ gaˇ laˇ-euˬ meh. Ehˇ kʼawꞈ, zaˬ sheuˬ ha laˇ-euˬ tsawˇ haˬ kʼoeˇ deuˬ-ahˇ zaˬ lahˇ deuˬ neh dehˬ-euˬ meh. 14Kʼoeˇ loꞈ-ehˇ dehˬ gaˇ Yeˬsuˇ ya mawˇ ngeh, nui ma pehˇ laˇ-awˇ, zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh. “Zaˬ deuˬ-ahˇ maˬ laˆ tsoeˬ ni ngaˇ jawˇ gaˇ bi laˇ-awˬ. Aˬ jeˬ miˇ neh ehˇ naˇ, Miˬyehˇ Miˇkʼahˬ-aˬ, aˬ yawꞈ maꞈ loꞈ-ehˇ gʼeh-eu deuˬ-ahˇ oꞈ-eu meh. 15Zaˬ yaw nyiˇ tiˬ gʼaˬ loꞈ-ehˇ Miˬyehˇ Miˇkʼahˬ-ahˇ maˬ ha geuꞈ-eu tsawˇ haˬ aˬ geu gʼaˬ maˬ kaˬ, kʼoeˇ gaˇ maˬ ya uˇ leˇ-aˇ lehˇ, naw maꞈ-ahˇ ngaˇ maˇ jawˆ ni ehˇ-eu ma.” 16Kʼoeˇ naˇ, zaˬ yaw nyiˇ kʼoeˇ deuˬ-ahˇ aˬ yawꞈ ciˬ-awˇ, aˬ yawꞈ maꞈ kʼoeˇ taˆ aˬ laꞈ baꞈ daˆ-awˇ guiˬ lahˬ shaˇ nehˬ-euˬ meh.
Smˇ muiˬ smˇ baw hawˇ-eu Miˬyehˇ Miˇkʼahˬ
(Maꞈtehˬ 19.16-30; Luˇkaꞈ 18.18-30)
17Yeˬsuˇ gaˇ ma doˆ-iˇ-eu lehˇ luˆ-iˇ ngeh, tsawˇ haˬ tiˬ gʼaˬ cehˆ gʼeh laꞈ-awˇ, aˬ yawꞈ-euˬ mehˬ shi pawˬ tsuiꞈ pawˬ dmˬ dmˬ-awˇ ehˇ-eu, “Muiˬ-eu saˬ laˬ-oˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za nya ni, ngaˇ aˬ geu jeˬ ya mˇ ta.”
18Yeˬsuˇ ehˇ-eu, “Aˬ jeˬ miˇ neh nawˇ ngaˬ-ahˇ muiˬ-eu gʼaˬ lehˇ kuˇ te. Miˬyehˇ maˬ ngeuˇ naˇ, yaw muiˬ tiˬ gʼaˬ-iˬ maˬ jawˇ-a. 19Zahˇ dawˬ kʼoꞈ dawˬ heu deuˬ-ahˇ nawˇ siˬ nya meh. ‘Tsawˇ haˬ taˬ sehꞈ. Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Smˇ kʼoeˬ taˬ kʼoeˬ. Aˬ cawˬ gaˇ kawˆ maˬ ngeuˇ gaˇ keuˆ ni saˇ kiˇ taˬ kamˬ. Jaˬ myawꞈ taˬ myawꞈ. Yawˬ ha-euˬ aˬ da aˬ ma-ahˇ yaw zeu baw-awˬ’ lehˇ ehˇ taˬ-euˬ meh.”
20Tsawˇ haˬ kʼoeˇ gʼaˬ ehˇ-eu, “Saˬ laˬ-oˇ, zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ, nyiˇ ngeh neh ngaˇ naˇ haˬ geuꞈ-euˬ ma.”
21Yeˬsuˇ aˬ yawꞈ-ahˇ gʼawˬ shaˬ haw gaˬ-awˇ ehˇ-eu, “Nawˇ tiˬ jeˬ loˬ nga siˬ. Nawˇ kʼaˇ jaˆ-eu jeˬ dawˬ tawˆ luꞈ ahˬ-iˇ-awˇ, ahˬ za-euˬ pyuˇ kʼoeˇ, shaˬ zaˬ zahˬ zaˬ deuˬ-ahˇ biꞈ-awˬ. Mˬ kʼoeˇ taˆ nawˬ-euˬ pyuˇ shuiˇ myawˬ gahˬ jaˆ laˇ tehꞈ-a. Kʼoeˇ naˇ, gʼoꞈ kʼoꞈ laˇ-awˇ, ngaˬ-euˬ meh nah caw teh laˇ-awˬ.” 22Dawˬ kʼoeˇ dawˬ-ahˇ tsawˇ haˬ kʼoeˇ gʼaˬ ya gaˬ ngeh, myaˆ pyawˬ nyoeˬ-iˇ-awˇ, nui ma maˬ saˇ ni gʼoꞈ-iˇ-euˬ meh. Aˬ jeˬ miˇ neh ehˇ naˇ, aˬ yawꞈ smˇ muiˬ muiˬ dui dui-eu meh.
23Yeˬsuˇ aˬ yawꞈ-euˬ zaˬ lahˇ deuˬ jawˇ paw ciˬ pyawˇ-awˇ ehˇ-eu, “Smˇ muiˬ smˇ baw deuˬ Miˬyehˇ Miˇkʼahˬ-ahˇ uˇ leˇ-eu aˇ naˆ ni shaˬ-eu nga.”
24Dawˬ kʼoeˇ dawˬ-ahˇ ya gaˬ ngeh, zaˬ lahˇ deuˬ tsoˆ leˇ jiˇ-euˬ meh. Ehˇ kʼawꞈ, Yeˬsuˇ paˇ ehˇ-eu, “Ngaˬ-euˬ zaˬ deuˬ-oˇ, Miˬyehˇ Miˇkʼahˬ-ahˇ uˇ leˇ-eu aˇ naˆ ni shaˬ-eu nga. 25Smˇ muiˬ smˇ baw tiˬ gʼaˬ Miˬyehˇ Miˇkʼahˬ-ahˇ uˇ leˇ-eu-aˬ, law taw tiˬ mawˇ aˬ gʼawꞈ gʼawꞈ naˬ-ahˇ uˇ leˇ-eu naˆ maˬ tseˇ kʼaˆ dzehˬ-eu meh.”
26Dawˬ kʼoeˇ dawˬ-ahˇ aˬ yawꞈ maꞈ zahˬ dui dui leˇ-awˇ tiˬ gʼaˬ tiˇ gʼaˬ ehˇ-eu, “Toˆ-ehˇ ngeuˇ naˇ, ka kʼoꞈ-eu jeˬ-ahˇ za nya-eu tsawˇ haˬ aˬ suˇ gʼaˬ jawˇ nmˇ.”
27Yeˬsuˇ aˬ yawꞈ maꞈ-ahˇ haw tsoˆ-awˇ ehˇ nehˬ-eu, “Heu-aˬ, tsawˇ haˬ zaˬ jahˇ nya-eu jeˬ maˬ ngeuˇ-a. Ehˇ kʼawꞈ, Miˬyehˇ jahˇ nya meh. Miˬyehˇ maˬ jahˇ nya-eu tiˬ jeˬ-iˬ maˬ baw-a.”
28Kʼoeˇ ngeh, Beˬtuˆluˆ dawˬ ngehˬ laˇ-awˇ ehˇ-eu, “Haw sheˇ. Nga maꞈ kʼaˇ jaˆ-eu yawˬ jeˬ na luꞈ byehˇ dzeh yaꞈ jiˇ-awˇ, nawˬ-euˬ mehˬ nah caw teh laˇ-euˬ maˬ ngeuˇ nga loˇ.”
29Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˇ naw maꞈ-ahˇ maˇ jawˆ ni heu loꞈ-ehˇ ehˇ-eu ma. Ngaˬ-euˬ gʼaˇ duˬ hawˇ-eu Laˬ kʼaˬ cehˇ-eu Guiˬ lahˬ dawˬ gʼaˇ duˬ, yawˬ ha-euˬ nymˇ, mehˇ nmˇ, dmˇ ma, aˬ da, aˬ ma, aˬ buˇ aˬ li, myawˬ dahˬ yaˇ dahˬ, heu deuˬ-ahˇ byehˇ dzeh yaꞈ-euˬ tsawˇ haˬ aˬ geu gʼaˬ maˬ kaˬ, 30nymˬ-mˇ dehꞈ luꞈ-eu heu ziˇ laꞈ kʼoeˇ, nymˇ, mehˇ nmˇ, dmˇ ma, aˬ ma, aˬ buˇ aˬ li, myawˬ dahˬ yaˇ dahˬ heu deuˬ, tiˬ yaˇ bymˇ paˇ za kʼoꞈ tehꞈ-a. Kʼoeˇ nehˬ-ehˇ tiˬ kawˆ loꞈ-ehˇ, kʼehˬ-eu kʼaˆ-eu jeˬ-ahˇ kʼawꞈ ya daˬ tehꞈ-a. Aˬ kaˇ kaˇ ziˇ laꞈ kʼoeˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za tehꞈ-a. 31Ehˇ kʼawꞈ, nymˬ-mˇ aˬ cawˬ-euˬ mehˬ hu jawˇ luꞈ-eu tsawˇ haˬ gʼawˬ mya ni aˬ cawˬ-euˬ mehˬ nah ya jawˇ-awˇ, nymˬ-mˇ aˬ cawˬ-euˬ mehˬ nah jawˇ luꞈ-eu tsawˇ haˬ gʼawˬ mya ni aˬ cawˬ-euˬ mehˬ hu ya jawˇ tehꞈ-a.”
Yeˬsuˇ aˬ yawꞈ ya shiˇ-eu gaˇ kawˆ smˬ poˆ tiˬ poˆ paˇ ehˇ-eu
(Maꞈtehˬ 20.17-19; Luˇkaꞈ 18.31-34)
32Yeˬsuˇ hawˇ-eu a yawꞈ-euˬ zaˬ lahˇ deuˬ Yeˬluˇsaˬlehˬ meuˬ-ahˇ le-eu lehˇ, gaˇ pehˇ le luꞈ-eu meh. Yeˬsuˇ mehˬ hu paw cah-awˇ, jeˬ nah paw cah luꞈ-eu zaˬ lahˇ deuˬ-aˬ, kʼahˬ lahˇ lahˇ-ehˇ caw teh luꞈ-eu meh. Naˇ kʼah paw cah luꞈ-eu tsawˇ haˬ deuˬ-aˬ, guˆ-eu meh. Zaˬ lahˇ deuˬ-ahˇ Yeˬsuˇ tiˬ poˆ paˇ sheuˬ ceuˆ gʼeh-awˇ, aˬ yawꞈ-euˬ kʼoeˇ taˆ keuˆ le-eu lehˇ gʼeh-eu jeˬ dzawˇ nehˬ-euˬ meh. 33“Naˇ haˬ sheˇ. Aˬ dui maꞈ Yeˬluˇsaˬlehˬ meuˬ-ahˇ le luꞈ-eu ma. Kʼoeˇ gaˇ, Tsawˇhaˬ-euˬ Zaˬmaˇ-ahˇ, piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ-euˬ aˬ laꞈ laꞈ kʼoeˇ aˬ cawˬ a nehˬ-awˇ, aˬ yawꞈ ya shiˇ ni aˬ yawꞈ maꞈ yaˇ kʼaˬ daˇ tehꞈ-a. Kʼoeˇ naˇ, Miˬyehˇ-ahˇ maˬ siˬ nya-eu aˬ cawˬ tsawˇ jeuˬ-euˬ laꞈ-ahˇ a nehˬ tehꞈ-a. 34Aˬ cawˬ tsawˇ jeuˬ neh aˬ yawꞈ-ahˇ yehˬ bawˬ sehˇ lu-ehˇ bi ehˇ niˇ gʼa-awˇ, duˬ kʼaˬ bi kʼa daˆ-awˇ, yahˬ caˆ neh bi juiꞈ-awˇ, bi sehꞈ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ aˬ yawꞈ-ahˇ paˇ bi gʼoꞈ dehꞈ laˇ tehꞈ-a.”
Yaˬkoˆ hawˇ-eu Yoˇhaˬ nuiˇ duˬ shaˇ-eu
(Maꞈtehˬ 20.20-28)
35Kʼoeˇ naˇ, Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ nmˇ Yeˬsuˇ jawˇ gaˇ laˇ-awˇ ehˇ-eu, “Saˬ laˬ-oˇ, nga nyaꞈ nmˇ gʼaˇ duˬ nawˬ neh heu loꞈ-ehˇ bi jahˇ nehˬ mawꞈ nya.”
36Yeˬsuˇ aˬ nyaꞈ nmˇ-ahˇ ehˇ nehˬ-eu, “Naw nyaꞈ nmˇ gʼaˇ duˬ aˬ jeˬ bi jahˇ nehˬ mawꞈ-eu nya.”
37Aˬ nyaꞈ nmˇ ehˇ-eu, “Yaw shehꞈ kʼahˬ sehˇ huiˬ-eu Miˇ kʼahˬ laꞈ kʼoeˇ, nawˬ-euˬ dzoeˬ dzaˬ nuiˇ mahˬ kʼoeˇ taˆ nawˇ nuiˇ ngeh, nga nyaꞈ nmˇ-ahˇ nawˬ-euˬ aˇ maˇ paw tiˬ gʼaˬ hawˇ-eu, aˇ caˇ paw tiˬ gʼaˬ bi nuiˇ laꞈ.”
38Aˬ nyaꞈ nmˇ-ahˇ Yeˬsuˇ ehˇ-eu, “Naw nyaꞈ nmˇ shaˇ luꞈ-eu jeˬ-ahˇ naw nyaꞈ nmˇ maˬ siˬ nya-a. Ngaˇ ya dawˇ-eu shaˬ zahˬ naꞈ-eu kʼmˬ maˬ-ahˇ naw nyaꞈ nmˇdawˇ coeˇ ma loˇ. Ngaˇ baˇ tiˇ saˬ kamˬ-euˬ jeˬ-ahˇ naw nyaꞈ nmˇ kamˬ coeˇ ma loˇ.”
39Aˬ nyaꞈ nmˇ ehˇ-eu, “Kamˬ coeˇ ma.”
Yeˬsuˇ ehˇ-eu, “Ngaˇ ya dawˇ-eu kʼmˬ maˬ-ahˇ naw nyaꞈ nmˇ aˬ diˇ aˬ maˇ dawˇ-awˇ, ngaˬ neh baˇ tiˇ saˬ kamˬ-euˬ jeˬ naw nyaꞈ nmˇ aˬ diˇ aˬ maˇ kamˬ tehꞈ-a. 40Ehˇ kʼawꞈ, ngaˬ-euˬ aˇ maˇ paw hawˇ-eu aˇ caˇ paw bi nuiˇ-eu tsawˇ haˬ-ahˇ ngaˇ tseˇ geuꞈ-eu a kawˬ-aˬ maˬ jaˆ. Nuiˇ duˬ kʼoeˇ deuˬ-aˬ, Miˬyehˇ neh bi nuiˇ-eu lehˇ lehˬ hmˬ taˬ-euˬ tsawˇ haˬ deuˬ gʼaˇ duˬ meh.”
41Kʼoeˇ loꞈ-ehˇ ehˇ gaˇ zaˬ lahˇ nui deuˬ tseˇ gʼaˬ ya gaˬ ngeh, Yaˬkoˆ hawˇ-eu Yoˇhaˬ aˬ nyaꞈ nmˇ-ahˇ nui ma pehˇ-euˬ meh. 42Kʼoeˇ miˇ neh, aˬ yawꞈ maꞈ dawˬ tawˆ luꞈ-ahˇ Yeˬsuˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Aˬ cawˬ tsawˇ jeuˬ-euˬ sahˬ paˬ sahˬ ma deuˬ-aˬ, miˇ kʼahˬ zaˬ deuˬ kʼoeˇ taˆ zuiˆ-eu baoˬ jaˆ-awˇ, aˬ yuiꞈ aˬ tsu geuꞈ-awˇ uˆ lahˇ-eu deuˬ kʼawꞈ, yawˬ ha kʼaˇ noeˬ-euˬ loꞈ-ehˇ uˆ lah nya-eu baoˬ tiˬ byah jaˆ meh. 43Ehˇ kʼawꞈ, naw maꞈ kʼoeˇ loꞈ-ehˇ maˬ ya geuꞈ-a. Naw maꞈ laꞈ kʼoeˇ, aˬ cawˬ naˆ maˬ tseˇ huiˬ mawꞈ mahˇ mawꞈ-eu gʼaˬ-aˬ, aˬ cawˬ-euˬ myawˬ kʼehˇ ya gʼoˆ tehꞈ-a. 44Naw maꞈ laꞈ kʼoeˇ, aˬ cawˬ mehˬ hu jawˇ mawꞈ-eu gʼaˬ-aˬ, aˬ cawˬ-euˬ zaˬ kʼaˆ ya geuꞈ tehꞈ-a. 45Aˬ jeˬ miˇ neh ehˇ naˇ, Tsawˇhaˬ-euˬ Zaˬmaˇ kʼawꞈ, aˬ cawˬ neh bi mˇ cu-eu lehˇ oe-euˬ maˬ ngeuˇ-a. Aˬ cawˬ gʼaˇ duˬ mˇ le-euˬ uˬ taꞈ, tsawˇ haˬ gʼawˬ mya ni-ahˇ ka kʼoꞈ-eu gʼaˇ duˬ shiˇ dah-eu lehˇ oe-euˬ meh.”
Baˬtiˇmehˇ-ahˇ myaˆ nuiˆ bi mawˇ laˇ-euˬ
(Maꞈtehˬ 20.29-34; Luˇkaꞈ 18.35-43)
46Aˬ yawꞈ maꞈ Yeˬliˇkoˇ meuˬ-ahˇ iˇ keuˆ-euˬ meh. Kʼoeˇ naˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ tsawˇ haˬ aˇ maꞈ maꞈ ma nehˬ-ehˇ, Yeˬliˇkoˇ meuˬ-ahˇ neh paˆ doˆ-iˇ luꞈ ngeh, Tiˇmehˇ-euˬ aˬ li pyeuꞈ-eu Baˬtiˇmehˇ lehˇ myahˇ-euˬ myaˆ behꞈ behꞈ-eu hawˬ shaˇ shaˇ-eu tsawˇ ha tiˬ gʼaˬ, gaˇ ma gaˇ dzeˇ nuiˇ luꞈ-eu meh. 47Kʼoeˇ gaˇ iˇ luꞈ-eu kʼoeˇ gʼaˬ Naˬzaˬlehˇ tsawˇ haˬ Yeˬsuˇ pyeuꞈ-eu gaˇ kawˆ aˬ yawꞈ ya gaˬ ngeh, aˬ yawꞈ guˇ-awˇ ehˇ-eu, “Daˬbiˇ-euˬ Zaˬmaˇ Yeˬsuˇ-oˇ, ngaˬ-ahˇ gʼawˬ shaˬ gaˬ nehˬ laꞈ-awˬ.”
48Aˬ cawˬ gʼawˬ mya ni aˬ yawꞈ-ahˇ dehˬ-awˇ, ciˬ cuˇ ni jawˇ-awˬ lehˇ ehˇ nehˬ-euˬ meh. Ehˇ kʼawꞈ, aˬ yawꞈ maˬ naˇ haˬ ni, yaw beh naˆ maˬ tseˇ paˇ guˇ kʼaˆ laˇ-awˇ ehˇ-eu, “Daˬbiˇ-euˬ Zaˬmaˇ-oˇ, ngaˬ-ahˇ gʼawˬ shaˬ gaˬ nehˬ laꞈ-awˬ.”
49Kʼoeˇ ngeh, Yeˬsuˇ naˬ leˇ-awˇ, “Aˬ yawꞈ-ahˇ kuˇ laꞈ-awˬ” lehˇ ehˇ nehˬ-euˬ meh.
Aˬ yawꞈ maꞈ myaꞈ behꞈ kʼoeˇ gʼaˬ-ahˇ kuˇ-awˇ ehˇ nehˬ-eu, “Laˬ kʼaˬ cehˇ taˆ ni tuˇ-awˬ. Aˬ yawꞈ nawˬ-ahˇ kuˇ luꞈ ngaˇ.”
50Tsawˇ haˬ kʼoeˇ gʼaˬ pehˇ kʼahˬ biˬ dzeh-awˇ, tsawˬ tuˇ-awˇ Yeˬsuˇ jawˇ gaˇ laˇ-euˬ meh.
51Yeˬsuˇ aˬ yawꞈ-ahˇ ehˇ nehˬ-eu, “Nawˬ-euˬ gʼaˇ duˬ ngaˇ aˬ jeˬ bi jahˇ nehˬ mawꞈ-eu nya.”
Myaˆ behꞈ kʼoeˇ gʼaˬ ehˇ-eu, “Saˬ laˬ-oˇ, ngaˬ-euˬ myaˆ nuiˆ mawˇ laˇ ni bi jahˇ nehˬ mawꞈ miˇ-a.”
52Yeˬsuˇ ehˇ-eu, “Gʼoꞈ-iˇ-awˬ. Nawˬ-euˬ jah-eu nui ma neh nawˬ-ahˇ bi taˬ leˇ-euˬ meh.”
Tsawˇ haˬ kʼoeˇ gʼaˬ tiˬ poˆ tehꞈ-ehˇ myaˆ nuiˆ mawˇ laˇ-awˇ, Yeˬsuˇ-euˬ mehˬ nah caw teh gʼeh-euˬ meh.
Currently Selected:
Maˬkuˆ 10: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
