Maˬkuˆ 11

Yeˬsuˇ mahˬ tahˬ laˆ dziˬ-awˇ Yeˬluˇsaˬlehˬ meuˬ-ahˇ uˇ leˇ-euˬ

(Maꞈtehˬ 21.1-11; Luˇkaꞈ 19.28-40; Yoˇhaˬ 12.12-19)

1Yeˬluˇsaˬlehˬ meuˬ-ahˇ le keuˆ-eu dawˬ peh peh laˇ-awˇ, Behˬpaˇgeˬ pu hawˇ-eu Beˬtaˬniˇ pu dawˬ peh jaˆ-eu Saˬloˬ gawˬ jawˬ-ahˇ le keuˆ ngeh, Yeˬsuˇ aˬ yawꞈ-euˬ zaˬ lahˇ nyiˬ gʼaˬ-ahˇ mehˬ hu paw kʼehˇ gʼeh-euˬ meh. 2Zaˬ lahˇ kʼoeˇ nyiˬ gʼaˬ-ahˇ aˬ yawꞈ ehˇ nehˬ-eu, “Naw nyaꞈ-euˬ mehˬ hu paw jaˆ-eu pu-ahˇ le-awˬ. Naw nyaꞈ pu-ahˇ le uˇ-eu nehˬ-ehˇ, tsawˇ haˬ tiˬ gʼaˬ-iˬ maˬ dziˬ haw-euˬ mahˬ tahˬ laˆ zaˬ tiˬ mawˇ paꞈ tawꞈ taˬ-awˇ jawˇ gaˇ ya mawˇ tehꞈ-a. Aˇ caˆ tseuˆ puiˇ-awˇ heu gaˇ tsahˇ kʼoꞈ leꞈ-awˬ. 3‘Aˬ jeˬ miˇ neh teu loꞈ-ehˇ jahˇ te’ lehˇ, tsawˇ haˬ tiˬ gʼaˬ na naˇ haˬ laˇ naˇ, ‘Sahˬpaˬ loˬ-eu meh. Yaw kawˇ-ehˇ paˇ bi tsahˇ kʼoꞈ ha laˇ ma’ lehˇ ehˇ nawˬ-awˬ.”

4Aˬ yawꞈ nyaꞈ le ngeh, gaˇ ma dawˬ peh nymˇ tiˬ nymˇ-euˬ laˇ gʼoˆ-ahˇ paꞈ tawꞈ taˬ-euˬ mahˬ tahˬ laˆ zaˬ tiˬ mawˇ mawˇ-awˇ, aˇ caˆ tseuˆ puiˇ-euˬ meh. 5Kʼoeˇ ngeh, kʼoeˇ gaˇ yawꞈ luꞈ-eu tsawˇ haˬ deuˬ, ‘Naw nyaꞈ mahˬ tahˬ laˆ zaˬ-euˬ aˇ caˆ tseuˆ puiˇ-awˇ aˬ jeˬ jahˇ-eu gʼeh te” lehˇ ehˇ-eu meh.

6Yeˬsuˇ neh mehˬ nehˬ taˬ-euˬ loꞈ-ehˇ aˬ yawꞈ nyaꞈ ehˇ kʼoꞈ nehˬ ngeh, aˬ yawꞈ maꞈ maˬ laˆ tsoeˬ ni bi tsahˇ gʼeh-euˬ meh. 7Mahˬ tahˬ laˆ zaˬ kʼoeˇ mawˇ-ahˇ Yeˬsuˇ jawˇ gaˇ tsahˇ laꞈ-awˇ, aˬ yawꞈ maꞈ dm luꞈ-eu mehˬ tsoeˬ lehˆ daˬ-awˇ, Yeˬsuˇ bi dziˬ-euˬ meh. 8Tsawˇ haˬ gʼawˬ mya ni gaˇ ma-ahˇ mehˬ tsoeˬ lehˆ kʼawˬ-euˬ meh. Tiˬ paˆ na deuˬ-aˬ, deh ga-ahˇ dehꞈ-eu aˇ paꞈ miˇ buˬ kʼehꞈ-awˇ, gaˇ ma-ahˇ kʼawˬ nehˬ-euˬ meh. 9Mehˬ hu paw cah-eu tsawˇ haˬ deuˬ hawˇ-eu mehˬ nah paw cah-eu tsawˇ haˬ deuˬ heu loꞈ-ehˇ guˇ-eu meh. “Miˬyehˇ-ahˇ ja ceuˬ-awˬ.#11.9 ‘Miˬyehˇ-ahˇ ja ceuˬ-awˬ’ lehˇ ehˇ-eu heu tsahˇ-ahˇ, Jaˇliꞈ tiˬ paˆ na deuˬ laꞈ kʼoeˇ ‘Hoˬ saˬ naˬ’ lehˇ ehˇ taˬ-euˬ meh. Dawˬ tsuiꞈ tiˬ kawˆ meh. Sahˬpaˬ Miˬyehˇ-euˬ tsawˇ myahˇ uˬ moˆ oe-euˬ gʼaˬ-ahˇ Miˬyehˇ guiˬ lahˬ biꞈ luꞈ-uˇ. 10Aˬ dui-euˬ aˬ poeˬ sahˬ paˬ Daˬbiˇ-euˬ miˇkʼahˬ pyeuꞈ-eu, nymˬ-mˇ keuˆ le luꞈ-eu miˇ kʼahˬ heu kʼahˬ-ahˇ Miˬyehˇ guiˬ lahˬ biꞈ luꞈ-uˇ. Miˬyehˇ-ahˇ ja ceuˬ-awˬ.”

11Yeˬluˇsaˬlehˬ meuˬ-ahˇ Yeˬsuˇ uˇ leˇ-awˇ, Uˬ duˬ tahˬ nymˇ nymˇ ma-ahˇ le-awˇ, yawˬ jeˬ na luꞈ-ahˇ haw doe-euˬ meh. Ehˇ kʼawꞈ, uˬ ciꞈ ciꞈ le-euˬ miˇ neh, zaˬ lahˇ tseˇ nyiꞈ gʼaˬ sheuˬ-awˇ Beˬtaˬniˇ pu-ahˇ iˇ-euˬ meh.

Siˬ guˬ aˇ bawˇ-ahˇ Yeˬsuˇ yaˬ kʼehˇ yaˬ-euˬ

(Maꞈtehˬ 21.18,19)

12Yawˬ nah yawˬ, Beˬtaˬniˇpu-ahˇ neh aˬ yawꞈ maꞈ gʼoꞈ laˇ luꞈ ngeh, Yeˬsuˇ hawˬ mehꞈ mehꞈ laˇ-euˬ meh. 13Ui cuiˆ gaˇ mahˇ kaˬ gaˇ dehꞈ luꞈ-eu aˇ paꞈ tiˬ byah ni tsoꞈ-eu siˬ guˬ aˇ bawˇ tiˬ bawˇ mawˇ-awˇ, aˇ siˬ maˬ siˬ nga loˇ lehˇ haw-iˇ-euˬ meh. Aˬ yawꞈ iˇ keuˆ ngeh, siˬ guˬ aˇ siˬ siˬ yamˬ maˬ tsaˬ-eu miˇ neh, aˇ siˬ maˬ siˬ ni aˇ paꞈ tehꞈ-ehˇ tsoꞈ luꞈ gaˇ ya mawˇ-euˬ meh. 14“Tsawˇ haˬ tiˬ gʼaˬ-iˬ nawˬ-euˬ aˇ siˬ maˬ paˇ ya dzaˬ haw-aˇ” lehˇ, siˬ guˬ kʼoeˇ bawˇ-ahˇ Yeˬsuˇ ehˇ nehˬ-euˬ meh. Aˬ yawꞈ kʼoeˇ loꞈ-ehˇ ehˇ gaˇ aˬ yawꞈ-euˬ zaˬ lahˇ deuˬ gaˬ-euˬ meh.

Uˬ duˬ tahˬ nymˇ nymˇ ma-ahˇ Yeˬsuˇ laˆ muiˬ laˆ shawˇ-euˬ

(Maꞈtehˬ 21.12-17; Luˇkaꞈ 19.45-48; Yoˇhaˬ 2.13-22)

15Aˬ yawꞈ maꞈ Yeˬluˇsaˬlehˬ meuˬ-ahˇ le keuˆ ngeh, Uˬ duˬ tahˬ nymˇnymˇ ma-ahˇ Yeˬsuˇ uˇ leˇ-awˇ, kʼoeˇ gaˇ ahˬ taꞈ zeuˇ taꞈ luꞈ-eu tsawˇ haˬ dawˬ tawˆ luꞈ-ahˇ teh doˆ-euˬ meh. Pyuˇ dawˬ paˇ-eu tsawˇ haˬ deuˬ-euˬ hawˬ jeh hawˇ-eu, lawˇ gaˇ shehˇ gaˇ geuꞈ-eu yaˇ miˇ kʼaˬ kʼoeˬ ahˬ-eu tsawˇ haˬ deuˬ-euˬ nuiˇ mahˬ deuˬ-ahˇ, aˬ yawꞈ ngawˬ dzeh-euˬ meh. 16Uˬ duˬ tahˬ nymˇ nymˇ ma-euˬ lahˇ laꞈ kʼoeˇ, myawˬ tiˬ jeˬ-iˬ aˬ yawꞈ maˬ bi yuˇ tsehˆ-a. 17Aˬ yawꞈ maꞈ-ahˇ aˬ yawꞈ mehˬ nehˬ tsoˆ nehˬ-eu, “‘Ngaˬ-euˬ Uˬ duˬ tahˬ nymˇ nymˇ ma-ahˇ, tsawˇ jeuˬ dawˬ tawˆ luꞈ guiˬ lahˬ shaˇ-eu nymˇ lehˇ kuˇ tehꞈ-a’ lehˇ Miˬyehˇ neh ehˇ taˬ-euˬ, Jaˇliꞈ laꞈ kʼoeˇ boꞈ taˬ-euˬ maˬ ngeuˇ-a loˇ. Ehˇ kʼawꞈ, smˇ kʼoeˬ tahˇ joe deuˬ baˇ smˇ duˬ pyeuꞈ laˇ ni naw maꞈ jahˇ luꞈ-eu ngaˇ.”

18Piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ dawˬ kʼoeˇ dawˬ ya gaˬ ngeh, aˬ yawꞈ-ahˇ sehꞈ-eu gaˇ ma poˆ-euˬ meh. Aˬ jeˬ miˇ neh ehˇ naˇ, tsawˇ haˬ aˇ maꞈ dawˬ tawˆ luꞈ, aˬ yawꞈ neh mehˬ nehˬ tsoˆ nehˬ-euˬ gaˇ zahˬ dui dui leˇ-euˬ meh.

19Uˬ ciꞈ ciꞈ le ngeh, Yeˬsuˇ hawˇ-eu aˬ yawꞈ-euˬ zaˬ lahˇ deuˬ meuˬ-ahˇ neh doˆ-iˇ-euˬ meh.

Siˬ guˬ aˇ bawˇ kʼoeˇ bawˇ gaˇ kawˆ dzaw geuꞈ duˬ

(Maꞈtehˬ 21.20-27)

20Yawˬ nah yawˬ uˬ shawˬ yaw naꞈ-ehˇ, gaˇ ma kʼoeˇ kahˇ-ahˇ aˬ yawꞈ maꞈ paˇ oe ngeh, siˬ guˬ aˇ bawˇ kʼoeˇ bawˇ duˬ ciˇ-ahˇ keuˆ ni baw guˇ guˇ-iˇ taˬ-euˬ gaˇ ya mawˇ-euˬ meh. 21Beˬtuˆluˆ gaˇ kawˆ kʼoeˇ noeˬ doˆ laˇ-awˇ, Yeˬsuˇ-ahˇ ehˇ nehˬ-eu, “Saˬ laˬ-oˇ, haw sheˇ. Nawˬ neh yaˬ kʼehˇ yaˬ-euˬ siˬ guˬ aˇ bawˇ kʼoeˇ bawˇ baw guˇ guˇ-iˇ taˬ-euˬ nga.”

22Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬyehˇ-ahˇ jah-awˬ. 23Tsawˇ haˬ aˬ geu gʼaˬ maˬ kaˬ, nui ma poˆ poˆ laˆ laˆ-ehˇ maˬ gʼeh ni, yawˬ ha neh kʼaˇ ehˇ-euˬ loꞈ-ehˇ pyeuꞈ laˇ tehꞈ-a lehˇ maˇ maˇ ni jah-eu laꞈ kʼoeˇ, gawˬ jawˬ heu jawˬ-ahˇ ‘Tsawˬ diˇ leˇ-awˇ iˬ ma laˆ shaˆ-ahˇ ga puꞈ-iˇ-awˬ’ lehˇ ehˇ nehˬ naˇ, aˬ yawꞈ neh kʼaˇ ehˇ-euˬ loꞈ-ehˇ pyeuꞈ laˇ tehꞈ-a lehˇ, naw maꞈ-ahˇ ngaˇ maˇ jawˆ ni ehˇ-eu ma. 24Teu miˇ neh, naw maꞈ-ahˇ ngaˇ ehˇ nehˬ nyaˇ. Naw maꞈ tiˬ jeˬ paˬ za ni guiˬ lahˬ shaˇ ngeh, za ma lehˇ jah-awˇ shaˇ naˇ, naw maꞈ neh kʼaˇ shaˇ-euˬ jeˬ za tehꞈ-a. 25Naw maꞈ gawˬ yawꞈ yawꞈ-awˇ guiˬ lahˬ kʼaˇ shaˇ ngeh, tsawˇ haˬ tiˬ gʼa na-ahˇ iˬ baˇ taˬ luꞈ-eu jeˬ jaˆ naˇ, iˬ baˇ pyehˬ nehˬ-awˬ. Kʼoeˇ loꞈ-ehˇ jahˇ naˇ, mˬ kʼoeˇ taˆ jawˇ-eu naw maꞈ-euˬ Aˬda kʼawꞈ, naw maꞈ neh mˇ bahˬ laˆ bahˬ-euˬ jeˬ-ahˇ iˬ baˇ pyehˬ nehˬ laꞈ tehꞈ-a.”#11.25 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ heu hmˬ ahˇ-eu meh. 11.26: Ehˇ kʼawꞈ, naw maꞈ aˬ cawˬ-ahˇ iˬ baˇ maˬ pyehˬ nehˬ naˇ, mˬ kʼoeˇ taˆ jawˇ-eu naw maꞈ-euˬ Aˬda kʼawꞈ, naw maꞈ neh mˇ bahˬ laˆ bahˬ-euˬ jeˬ-ahˇ iˬ baˇ maˬ pyehˬ nehˬ laꞈ-aˇ. (Maꞈtehˬ 6.15-ahˇ haw-awˬ.)

Yeˬsuˇ-euˬ baoˬ gaˇ kawˆ naˇ haˬ-eu

(Maꞈtehˬ 21.23-27; Luˇkaꞈ 20.1-8)

27Aˬ yawꞈ maꞈ Yeˬluˇsaˬlehˬ meuˬ-ahˇ tiˬ poˆ paˇ laˇ keuˆ-euˬ meh. Yeˬsuˇ Uˬ duˬ tahˬ nymˇ nymˇ ma laꞈ kʼoeˇ cah luꞈ ngeh, piˇ ma aˬ yuiꞈ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, aˬ yuiꞈ aˬ tsu deuˬ aˬ yawꞈ jawˇ gaˇ laˇ-awˇ ehˇ-eu, 28“Nawˇ aˬ gaˇ-euˬ baoˬ-ahˇ gʼoe-awˇ teu loꞈ-ehˇ mˇ te. Aˬ suˇ gʼaˬ neh nawˬ-ahˇ baoˬ biꞈ taˬ ta.”

29Aˬ yawꞈ maꞈ-ahˇ Yeˬsuˇ ehˇ nehˬ-eu, “Ngaˇ gʼeh naw maꞈ-ahˇ tiˬ dawˬ naˇ haˬ la. Naw maꞈ ehˇ kʼoꞈ nehˬ laꞈ naˇ, ngaˇ aˬ gaˇ-euˬ baoˬ-ahˇ gʼoe-awˇ heu loꞈ-ehˇ mˇ luꞈ-eu gaˇ kawˆ, naw maꞈ-ahˇ ehˇ nehˬ ma. 30Yoˇhaˬ iˇ cuꞈ shawˇ-eu kʼoeˇ, aˬ gaˇ-euˬ baoˬ za-awˇ mˇ ta. Miˬyehˇ neh bi mˇ taˬ loˇ. Tsawˇ haˬ zaˬ neh bi mˇ taˬ loˇ.”

31Kʼoeˇ ngeh, aˬ yawꞈ maꞈ yaw kaˬ heu loꞈ-ehˇ ja ja-ehˇ shaˬ-euˬ meh. “Aˬ dui maꞈ aˬ joˆ-ehˇ ehˇ paˬ nga. ‘Miˬyehˇ neh bi mˇ-euˬ meh’ lehˇ aˬ dui maꞈ ehˇnaˇ, ‘Toˆ-ehˇ maˇ-iˬ, naw maꞈ aˬ jeˬ miˇ neh Yoˇhaˬ-ahˇ maˬ jah te’ lehˇ aˬ yawꞈ ehˇ laˇ tehꞈ-a. 32Tsawˇ haˬ neh bi mˇ-euˬ meh lehˇ paˇ ehˇ naˇ kʼawꞈ...” (Aˬ yawꞈ maꞈ tsawˇ haˬ aˇ maꞈ-ahˇ guˆ-eu meh. Aˬ jeˬ miˇ neh ehˇ naˇ, Yoˇhaˬ-aˬ, Miˬyehˇ gʼaˇ duˬ ngehˬ dah-eu tsawˇ haˬ meh lehˇ, yawˬ gʼaˬ na luꞈ jah duˬ taˬ-euˬ meh.) 33Kʼoeˇ miˇ neh, aˬ yawꞈ maꞈ Yeˬsuˇ-ahˇ ehˇ kʼoꞈ nehˬ-eu, “Nga maꞈ maˬ siˬ nya nya.”

Yeˬsuˇ aˬ yawꞈ maꞈ-ahˇ ehˇ nehˬ-eu, “Toˆ-ehˇ ngeuˇ naˇ, aˬ gaˇ-euˬ baoˬ-ahˇ gʼoe-awˇ ngaˇ heu loꞈ-ehˇ mˇ luꞈ-eu gaˇ kawˆ, naw maꞈ-ahˇ ngaˇ maˬ ehˇ nehˬ.”

Currently Selected:

Maˬkuˆ 11: AHK

Highlight

Copy