Maˬkuˆ 4
4
Siˬ yoeˬ sehˬ-eu gaˇ kawˆ yaw jeˬ ma jeˬ
(Maꞈtehˬ 13.1-9; Luˇkaꞈ 8.4-8)
1Lah lah dzeˇ, Yeˬsuˇ tiˬ poˆ paˇ mehˬ paˇ tsoˆ-euˬ meh. Aˬ yawꞈ jawˇ gaˇ uiˬ le-euˬ tsawˇ haˬ aˇ maꞈ myaˬ dui dui-eu miˇ neh, aˬ yawꞈ lawˬ laꞈ kʼoeˇ uˇ-iˇ-awˇ nuiˇ-euˬ meh. Lawˬ kʼoeˇ laˇ lah kʼoeˇ taˆ jaˆ-awˇ, tsawˇ haˬ aˇ maꞈ lah lah dzeˇ yawꞈ luꞈ-eu meh. 2Aˬ yawꞈ yaw jeˬ ma jeˬ ja ja-ehˇ, aˬ yawꞈ maꞈ-ahˇ gʼawˬ mya jeˬ heu loꞈ-ehˇ mehˬ nehˬ-euˬ meh.
3“Naˇ haˬ sheˇ. Tsawˇ haˬ tiˬ gʼaˬ siˬ yoeˬ sehˬ-iˇ-euˬ meh. 4Aˬ yawꞈ siˬ yoeˬ sehˬ ngeh, siˬ yoeˬ tiˬ paˆ na deuˬ gaˇ ma-ahˇ ga-iˇ-awˇ, aˇ jiˇ oe-awˇ gʼoˆ dzaˬ jiˇ-euˬ meh. 5Siˬ yoeˬ tiˬ paˆ na deuˬ-aˬ, miˇ tsaˬ baˬ-eu kʼaˬ lo lo yaˇ-ahˇ ga-iˇ-awˇ, miˇ tsaˬ yaw baˬ miˇ neh aˇ ji ji doˆ laˇ-eu yaw kawˇ meh. 6Ehˇ kʼawꞈ, nahˇ ma doˆ laˇ-awˇ, aˇ ji kʼoeˇ deuˬ-ahˇ lawꞈ zaw ngeh, ciˇ ka maˬ naꞈ-eu miˇ neh, nyoeˬ-iˇ koˆ-iˇ-euˬ meh. 7Siˬ yoeˬ tiˬ paˆ na deuˬ-aˬ, aˬ gah gah yaˇ-ahˇ ga-iˇ-awˇ, aˬ gah baw duˆ neh bi uˆ tehˬ-euˬ miˇ neh, cehˇnmˇ maˬ nmˇ le nya-a. 8Siˬ yoeˬ tiˬ paˆ na deuˬ-aˬ, miˇ tsaˬ miˇ muiˬ muiˬ gaˇ ga-iˇ-awˇ, aˇ ji ji laˇ mehˇ laˇ-awˇ, loˆ dui dui le-euˬ miˇ neh, smˬ tseˇ bymˇ, koꞈ tseˇ bymˇ, tiˬ yaˇ bymˇ za le-euˬ meh. 9Yeˬsuˇ ehˇ-eu, “Naˬ bawˇ kʼaˇ tsoꞈ-eu deuˬ naˇ haˬ-awˬ.”
Aˬ jeˬ miˇ neh yaw jeˬ ma jeˬ ya ja mehˬ ta
(Maꞈtehˬ 13.10-17; Luˇkaꞈ 8.9,10)
10Yeˬ suˇ tiˬ gʼaˬ tehꞈ-ehˇ jawˇ luꞈ ngeh, aˬ yawꞈ dawˬ mehˬ mehˬ gaˇ ya gaˬ-euˬ tsawˇ haˬ tiˬ paˆ na deuˬ, zaˬ lahˇ tseˇ nyiꞈ gʼaˬ nehˬ-ehˇ aˬ yawꞈ jawˇ gaˇ laˇ-awˇ, yaw jeˬ ma jeˬ ja mehˬ-euˬ gaˇ kawˆ dawˬ tsuiꞈ naˇ haˬ laˇ-euˬ meh. 11Miˬyehˇ Miˇkʼahˬ gaˇ kawˆ aˬ cawˬ maˬ gʼoˆ siˬ maˬ gʼoˆ shaw nya-eu zaꞈ taˬ-euˬ jeˬ-ahˇ gʼoˆ shaw nya-eu tsawˇ gahˇ, naw maꞈ-ahˇ biꞈ taˬ gʼaˬ-euˬ meh. Ehˇ kʼawꞈ, laꞈ nyiˇ paw-euˬ tsawˇ haˬ deuˬ gʼaˇ duˬ-aˬ, kʼaˇ mehˬ nehˬ-euˬ yawˬ jeˬ na luꞈ, yaw jeˬ ma jeˬ ja mehˬ nehˬ-euˬ loꞈ-ehˇ tehꞈ-ehˇ pyeuꞈ-awˇ, dawˬ tsuiꞈ maˬ siˬ nya-a. 12Aˬ jeˬ miˇ neh ehˇ naˇ,
‘Mawˇ-euˬ nui paw mawˇ kʼawꞈ,
yawꞈ maꞈ maˬ siˬ nya-ehˇ;
gaˬ-euˬ nui paw gaˬ kʼawꞈ,
yawꞈ maꞈ maˬ gʼoˆ shaw-a.
Mawˇ-euˬ siˬ duˬ leˇ-awˇ,
gaˬ-euˬ gʼoˆ shaw nmˇ-aˬ,
Miˬyehˇ jawˇ paw pyawˇ-awˇ,
yawꞈ maꞈ gʼoꞈ kʼoꞈ leˇ-awˇ,
yawꞈ maꞈ-euˬ iˬ baˇ-ahˇ,
Miˬyehˇ pyehˬ nehˬ tehꞈ-a.”’
Siˬ yoeˬ sehˬ-eu gaˇ kawˆ-euˬ dawˬ tsuiꞈ ja mehˬ nehˬ-euˬ
(Maꞈtehˬ 13.18-23; Luˇkaꞈ 8.11-15)
13Kʼoeˇ naˇ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Yaw jeˬ ma jeˬ heu hmˬ naw maꞈ-ahˇ maˬ gʼoˆ shaw laˇ nya loˇ. Toˆ-ehˇ ngeuˇ naˇ, yaw jeˬ ma jeˬ kʼaˇ ja mehˬ-euˬ dawˬ tawˆ luꞈ-ahˇ naw maꞈ aˬ joˆ-ehˇ gʼoˆ shaw nya nmˇ. 14Siˬ yoeˬ sehˬ-eu gʼaˬ Miˬyehˇ dawˬ kawˬ sehˬ-euˬ meh. 15Tsawˇ haˬ tiˬ paˆ na deuˬ-aˬ, gaˇ ma-ahˇ ga-iˇ-euˬ siˬ yoeˬ-ahˇ duˇ-eu meh. Aˬ yawꞈ maꞈ Miˬyehˇ dawˬ kawˬ-ahˇ ya gaˬ-euˬ nehˬ-ehˇ, nehꞈ Saˬdaˬ oe-awˇ gʼoˆ dzeh-euˬ meh. 16Tsawˇ haˬ tiˬ paˆ na deuˬ-aˬ, kʼaˬ lo lo yaˇ-ahˇ ga-iˇ-euˬ siˬ yoeˬ-ahˇ duˇ-eu meh. Miˬyehˇ dawˬ kawˬ-ahˇ aˬ yawꞈ maꞈ ya gaˬ-euˬ nehˬ-ehˇ, tiˬ poˆ tehꞈ-ehˇ laˬ kʼaˬ tiˬ cehˇ ha geuꞈ-euˬ meh. 17Ehˇ kʼawꞈ, ciˇ ka maˬ naꞈ-eu miˇ neh, gʼawˬ myahˇ ni maˬ gmˬ-a. Kʼoeˇ miˇ neh, Miˬyehˇ dawˬ kawˬ-ahˇ ha geuꞈ-euˬ baˬ da neh shaˬ-eu zahˬ-eu jeˬ hawˇ-eu kʼehˬ-eu kʼaˆ-eu jeˬ-ahˇ ya tahˬ puˬ ngeh, tiˬ poˆ tehꞈ-ehˇ coˬ-iˇ-eu meh. 18Tsawˇ haˬ tiˬ paˆ na deuˬ-aˬ, aˬ gah gah yaˇ-ahˇ ga-iˇ-euˬ siˬ yoeˬ-ahˇ duˇ-eu meh. Aˬ yawꞈ maꞈ-aˬ, Miˬyehˇ dawˬ kawˬ-ahˇ ya gaˬ-euˬ tsawˇ haˬ deuˬ meh. 19Ehˇ kʼawꞈ, yaw dehꞈ dehꞈ-eu gaˇ kawˆ kʼahˬ lahˇ-eu jeˬ, pyuˇ shuiˇ myawˬ gahˬ-ahˇ gaˬ-eu jeˬ hawˇ-eu, miˇ tsaˬ kʼoeˇ taˆ nui kʼahˇ kʼaˇ jaˆ-eu jeˬ dawˬ tawˆ luꞈ keuˆ le teuˇ le ngeh, Miˬyehˇ-euˬ dawˬ kawˬ-ahˇ uˆ tehˬ-awˇ, aˇ siˬ maˬ siˬ le nya-a. 20Tsawˇ haˬ tiˬ paˆ na deuˬ-aˬ, miˇ tsaˬ miˇ muiˬ muiˬ gaˇ ga-iˇ-euˬ siˬ yoeˬ-ahˇ duˇ-eu meh. Aˬ yawꞈ maꞈ Miˬyehˇ dawˬ kawˬ-ahˇ ya gaˬ-awˇ ha geuꞈ-euˬ loꞈ-ehˇ, aˇ siˬ siˬ le-eu meh. Tiˬ paˆ na deuˬ smˬ tseˇ bymˇ, tiˬ paˆ na deuˬ koꞈ tseˇ bymˇ, tiˬ paˆ na deuˬ tiˬ yaˇ bymˇ siˬ le-eu meh.”
Tsiˇ kʼmˬ doꞈ-awˇ kʼaˆ puˬ moꞈ tsahˬ-eu
(Luˇkaꞈ 8.16-18)
21Aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Tsiˇ kʼmˬ doꞈ-awˇ kʼaˆ puˬ moꞈ tsahˬ-eu tsawˇ ha jawˇ tehꞈ-a loˇ. Maˬ ngeuˇ naˇ, ja ciˬ uˬ moˆ ciˬ ahˇ taˬ tehꞈ-a loˇ. 22Kʼaˇ zaꞈ taˬ-euˬ yawˬ jeˬ na luꞈ bya cehˆ ni gʼeh gaˇ yuˇ doˆ laꞈ-awˇ, kʼaˇ dehˬ kaˬ taˬ-euˬ yaw jeˬ na luꞈ bya cehˆ ni pah dzeh nehˬ tehꞈ-a. 23Naˬ bawˇ kʼaˇ tsoꞈ-eu tsawˇ haˬ deuˬ naˇ haˬ-awˬ.”
24Aˬ yawꞈ maꞈ-ahˇ aˬ yawꞈ heu loꞈ-ehˇ paˇ ehˇ nehˬ-euˬ meh. “Kʼaˇ ya gaˬ-euˬ yawˬ jeˬ na luꞈ-ahˇ yaw muiˬ paˬ-ehˇ noeˬ gahˇ-awˇ naˇ haˬ geuꞈ-awˬ. Naw maꞈ neh aˬ cawˬ-ahˇ kʼaˇ jahˇ nehˬ-euˬ loꞈ-ehˇ, naw maꞈ-ahˇ Miˬyehˇ jahˇ kʼoꞈ nehˬ laꞈ tehꞈ-a. Kʼoeˇ naˆ maˬ tseˇ kʼawꞈ, naw maꞈ-ahˇ paˇ jahˇ kʼoꞈ nehˬ laꞈ tehꞈ-a. 25Jaˆ-eu tsawˇ haˬ-ahˇ paˇ biꞈ lahˬ nehˬ-awˇ, maˬ jaˆ-eu tsawˇ haˬ-ahˇ-aˬ, maˬ jaˆ kʼaˇ jaˆ-eu dawˬ tawˆ luꞈ yuˇ jiˇ nehˬ tehꞈ-a.”
Siˬ yoeˬ dehꞈ doˆ laˇ-eu gaˇ kawˆ yaw jeˬ ma jeˬ
26Yeˬsuˇ heu loꞈ-ehˇ paˇ ehˇ-eu meh. “Miˬyehˇ Miˇkʼahˬ-aˬ, heu gaˇ duˇ-eu meh. Tsawˇ haˬ tiˬ gʼaˬ deh yaˇ-ahˇ siˬ yoeˬ sehˬ-euˬ meh. 27Ciꞈ le naˇ yuꞈ, bya laˇ naˇ tuˇ tuˇ-ehˇ jawˇ luꞈ ngeh, siˬ yoeˬ kʼoeˇ aˇ ji ji laˇ-awˇ huiˬ laˇ luꞈ-eu meh. Ehˇ kʼawꞈ, aˬ joˆ-ehˇ ji laˇ-awˇ huiˬ laˇ luꞈ-eu gaˇ kawˆ aˬ yawꞈ maˬ siˬ nya-a. 28Miˇ tsaˬ neh aˇ bawˬ bi mehˇ laˇ-awˇ, cehˇ nmˇ bi nmˇ le-eu meh.Yaw beh gʼo doˆ doˆ laˇ-awˇ, cehˇ nmˇ nmˇ le gʼaˬ ngeh, cehˇ iˬ maˇ le-awˇ, ga gʼm-iˇ-eu meh. 29Cehˇ myah laˇngeh, tsawˇ haˬ kʼoeˇ gʼaˬ yehˬ kʼoꞈ yuˇ-awˇ cehˇ ehˬ-eu meh. Aˬ jeˬ miˇ neh ehˇ naˇ, cehˇ yehˬ yamˬ tsaˬ laˇ-euˬ meh.”
Gʼawˬ paˆ aˇ nuiˆ gaˇ kawˆ yaw jeˬ ma jeˬ
(Maꞈtehˬ 13.31,32,34; Luˇkaꞈ 13.18,19)
30Yeˬsuˇ ehˇ-eu, “Miˬyehˇ Miˇkʼahˬ aˬ jeˬ-ahˇ shaˇ cehˆ haw paˬ nga. Yaw jeˬ ma jeˬ aˬ geu hmˬ-ahˇ gʼoe-awˇ jaˬ mehˬ paˬ nga. 31Miˬyehˇ Miˬkʼahˬ-aˬ, gʼawˬ paꞈ aˇ nuiˆ#4.31 Gʼawˬ paˆ aˇ nuiˆ heu jeˬ-euˬ gaˇ kawˆ, Maꞈtehˬ 13.32-ahˇ haw-awˬ. -ahˇ duˇ-eu meh. Gʼawˬ paꞈ aˇ nuiˆ kʼoeˇ-ahˇ miˇ tsaˬ kʼoeˇ taˆ sehˬ ngeh, siˬ yoeˬ nuiˆ yoeˬ dawˬ tawˆ luꞈ laꞈ kʼoeˇ aˬ cawˬ naˆ maˬ tseˇ nyiˇ-eu jeˬ pyeuꞈ-eu meh. 32Ehˇ kʼawꞈ, dehꞈ laˇ mehˇ laˇ ngeh, sahˬ lahˬ dawˬ tawˆ luꞈ naˆ maˬ tseˇ huiˬ-eu meh. Uˬ pyaˬ uˬ laꞈ sahˇ laˇ-awˇ, kʼoeˇ taˆ zaw-eu aˇ jiˇ deuˬ naˇ shmˇ laꞈ kʼoeˇ bahˬ bahˬ le-eu meh.”
33Yeˬsuˇ-aˬ, kʼoeˇ loꞈ-ehˇ gʼeh-eu yaw jeˬ ma jeˬ ja ja-ehˇ, aˬ yawꞈ maꞈ kʼaˇ gʼoˆ shaw nya gaˇ keuˆ ni Miˬyehˇ dawˬ kawˬ mehˬ nehˬ-euˬ meh. 34Yaw jeˬ ma jeˬ maˬ ja ni maˬ mehˬ nehˬ-a. Ehˇ kʼawꞈ, aˬ yawꞈ-euˬ zaˬ lahˇ deuˬ nehˬ-ehˇ tehꞈ-ehˇ jawˇ ngeh, gaˇ kawˆ koeˇ deuˬ-euˬ dawˬ tsuiꞈ dawˬ tawˆ luꞈ, yaw muiˬ paˬ-ehˇ ja mehˬ nehˬ-euˬ meh.
Yeˬsuˇ jaˬ lehˇ lehˇ ma-ahˇ bi naˬ leˇ-euˬ
(Maꞈtehˬ 8.23-27; Luˇkaꞈ 8.22-25)
35Kʼoeˇ ngeh nah uˬ ciꞈ uˬ taw paw, “Lah nui baˬ-ahˇ tsehˆ-iˇ kaˇ-euˇ” lehˇ, zaˬ lahˇ deuˬ-ahˇ Yeˬsuˇ ehˇ nehˬ-euˬ meh. 36Kʼoeˇ naˇ, aˬ yawꞈ maꞈ tsawˇ haˬ aˇ maꞈ maꞈ ma-ahˇ gʼawˬ-iˇ-awˇ, yeˬsuˇ nuiˇ luꞈ-eu lawˬ kʼoeˇ laˇ laꞈ kʼoeˇ zaˬ lahˇ deuˬ uˇ-i-awˇ, Yeˬsuˇ-ahˇ sheuˬ-awˇ doˆ-iˇ-euˬ meh. Lawˬ nui deuˬ kʼawꞈ, aˬ yawꞈ maꞈ nehˬ-ehˇ iˇ-euˬ meh. 37Ja pyuˬ ni jaˬ lehˇ lehˇ ma baw laˇ-awˇ, iˇ luˆ yaw kʼaˆ-ehˇ dzeh-eu miˇ neh, lawˬ laꞈ kʼoeˇ iˇ cuꞈ dahˬ byah laˇ luꞈ-eu meh. 38Yeˬsuˇ-aˬ, lawˬ-euˬ naˇ kʼah paw uˬ gʼmˬ gʼmˬ-awˇ yuꞈ kʼaˆ taˬ-euˬ meh. Zaˬ lahˇ deuˬ aˬ yawꞈ-ahˇ laˆ noeˬ-awˇ, “Saˬ laˬ-oˇ, nga maꞈ shiˇ jiˇ-eu keuˆ laˇ-euˬ nawˬ-ahˇ kʼahˬ maˬ lahˇ nya loˇ” lehˇ ehˇ nehˬ-euˬ meh.
39Yeˬsuˇ tuˇ laˇ-awˇ, jaˬ lehˇ-ahˇ “Ciˬ cuˇ ni jawˇ-awˬ” lehˇ dehˬ-awˇ, iˇ luˆ-ahˇ “Naˬ leˇ-awˬ” lehˇ ehˇ nehˬ ngeh, jaˬ lehˇ lehˇ ma baw-eu naˬ leˇ-awˇ, ciˬ cuˇ ni pyeuꞈ-iˇ-euˬ meh. 40Kʼoeˇ naˇ, zaˬ lahˇ deuˬ-ahˇ Yeˬsuˇ ehˇ nehˬ-eu, “Aˬ jeˬ miˇ neh naw maꞈ teu naˆ naˆ-ehˇ guˆ-eu nya. Jah-eu nui ma maˬ ahˇ te siˬ loˇ.”
41Ehˇ kʼawꞈ, aˬ yawꞈ maꞈ guˆ dui dui-iˇ-awˇ tiˬ gʼaˬ tiˇ gʼaˬ ehˇ-eu, “Tsawˇ haˬ teu gʼaˬ aˬ joˆ-ehˇ gʼeh-eu tsawˇ haˬ nga. Jaˬ lehˇ hawˇ-eu iˇ luˆ-ahˇ keuˆ ni aˬ yawꞈ-euˬ dawˬ naˇ haˬ-eu nga laˬ.”
Currently Selected:
Maˬkuˆ 4: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
