Maˬkuˆ 5

Nehꞈ uˇ-eu tsawˇ haˬ tiˬ gʼaˬ-ahˇ Yeˬsuˇ laˆ taˬ nehˬ-euˬ

(Maꞈtehˬ 8.28-34; Luˇkaꞈ 8.26-39)

1Yeˬsuˇ hawˇ-eu aˬ yawꞈ-euˬ zaˬ lahˇ deuˬ, Gaˬliˬlehˇ lah nui baˬ paw jaˆ-eu Geˬlaˬsaˬ miˇ kʼahˬ-ahˇ iˇ keuˆ-euˬ meh. 2Yeˬsuˇ lawˬ-euˬ laꞈ nyiˇ doˆ le-euˬ nehˬ-ehˇ, lmˬ bymˇ lo kʼahˬ-ahˇ jawˇ-eu doˆ le-euˬ nehꞈ uˇ-eu tsawˇ haˬ tiˬ gʼaˬ-ahˇ tahˬ puˬ-euˬ meh. 3Tsawˇ haˬ kʼoeˇ gʼaˬ lmˬ bymˇ lo kʼahˬ-ahˇ tehꞈ-ehˇ jawˇ-awˇ, tsawˇ haˬ tiˬ gʼaˬ-iˬ aˬ yawꞈ-ahˇ shmˇ caˆ maˬ paꞈ tawꞈ ziꞈ nya-a. 4Aˬ yawꞈ-ahˇ shmˇ caˆ neh kuiˇ cuꞈ laꞈ cuꞈ gʼawˬ mya poˆ cuꞈ-euˬ meh. Ehˇ kʼawꞈ, yawˬ poˆ na luꞈ shmˇ caˆ kʼoeˇ-ahˇ aˬ yawꞈ teuˆ tsehˆ-euˬ meh. Aˬ yawꞈ gʼaˬ kʼaˆ dui dui-awˇ, tsawˇ haˬ tiˬ gʼaˬ-iˬ aˬ yawꞈ-ahˇ maˬ laˆ yah nya-a. 5Uˬ ciꞈ nah gʼahˇ maˬ ehˇ, lmˬ bymˇ hawˇ-eu gawˬ jawˬ doe ni guˇ guˇ-ehˇ cah-awˇ, kʼaˬ lo lo ceh neh yawˬ ha-euˬ gʼawˇ mawˇ-ahˇ kahˬ paˆ kahˬ shaˆ-eu meh.

6Aˬ yawꞈ ui cuiˆ gaˇ mahˇ kaˬ gaˇ neh Yeˬsuˇ-ahˇ haw mawˇ-awˇ, Yeˬsuˇ mehˬ shi cehˆ gʼeh-awˇ pawˬ tsuiꞈ pawˬ dmˬ dmˬ-euˬ meh. 7Kʼoeˇ naˇ, yaw kʼaˆ-ehˇ guˇ-awˇ ehˇ-eu, “Dawˬ tawˆ kʼoeˇ taˆ Huiˬ dui dui-eu Miˬyehˇ-euˬ Zaˬmaˇ-oˇ. Nawˇ ngaˬ-ahˇ aˬ jeˬ taꞈ te. Ngaˬ-ahˇ taˬ kʼehˬ nehˬ laꞈ lehˇ, Miˬyehˇ mehˬ shi nawˬ-ahˇ ngaˇ shaˇ-eu ma.” 8Aˬ jeˬ miˇ neh ehˇ naˇ, “Nehꞈ yaw jawꞈ-oˇ, tsawˇ haˬ heu gʼaˬ-euˬ laꞈ kʼoeˇ neh doˆ le-awˬ” lehˇ, aˬ yawꞈ-ahˇ Yeˬsuˇ ehˇ nehˬ-euˬ meh.

9Yeˬsuˇ ehˇ-eu, “Nawˬ-euˬ tsawˇ myahˇ aˬ joˆ-ehˇ myahˇ teˬ.”

Aˬ yawꞈ ehˇ-eu, “Nga maꞈ yaw myaˬ miˇ neh, ‘Yehˇyehˇmaꞈ’ lehˇ myahˇ-euˬ ma.” 10Kʼoeˇ naˇ, nehꞈ yaw jawꞈ kʼoeˇ deuˬ-ahˇ miˇ kʼahˬ kʼoeˇ kʼahˬ-euˬ laꞈ nyiˇ maˬ bi teh dzeh-eu gʼaˇ duˬ, Yeˬsuˇ-ahˇ aˬ yawꞈ shaˇ dui dui-eu meh.

11Aˬ yawꞈ maꞈ jawˇ-eu gawˬ jawˬ baˬ gʼa-ahˇ, myaˬ dui dui-eu aˬ zaꞈ tiˬ maꞈ gaˆ luꞈ-eu meh. 12“Nga maꞈ-ahˇ aˬ zaꞈ kʼoeˇ deuˬ laꞈ kʼoeˇ bi uˇ-iˇ laꞈ” lehˇ, nehꞈ yaw jawꞈ kʼoeˇ deuˬ Yeˬsuˇ-ahˇ shaˇ-euˬ meh. 13Nehꞈ yaw jawꞈ kʼoeˇ deuˬ-ahˇ Yeˬsuˇ pyehˬ doˆ nehˬ ngeh, aˬ yawꞈ maꞈ doˆ-iˇ-awˇ, aˬ zaꞈ kʼoeˇ deuˬ-ahˇ uˇ-iˇ-euˬ meh. Kʼoeˇ ngeh jawˇ, nyiˬ heˇ mawˇ ehˇ gʼaˬ ni byah-eu aˬ zaꞈ zaꞈ maꞈ kʼoeˇ maꞈ, gawˬ jawˬ baˬ gʼa yaw shaˬ-ahˇ sehˇ ka gʼeh-awˇ, lah-ahˇ ga puꞈ sehꞈ jiˇ-euˬ meh.

14Aˬ zaꞈ bo luꞈ-eu tsawˇ haˬ deuˬ cehˆ kʼoꞈ gʼeh-awˇ, meuˬ doe ni pu doe ni, gaˇ kawˆ kʼoeˇ ja byah-iˇ-euˬ meh. Kʼoeˇ naˇ, pyeuꞈ laˇ-euˬ gaˇ kawˆ kʼoeˇ-ahˇ haw duˬ-eu lehˇ, tsawˇ haˬ gʼawˬ mya ni laˇ-euˬ meh. 15Aˬ yawꞈ maꞈ Yeˬsuˇ jawˇ gaˇ laˇ keuˆ ngeh, yaw beh nehꞈ yaw jawꞈ uˇ-euˬ tsawˇ haˬ kʼoeˇ gʼaˬ paˇ muiˬ kʼoꞈ laˇ-awˇ, mehˬ tsoeˬ yaw muiˬ-ehˇ dm-awˇ nuiˇ luꞈ gaˇ ya mawˇ-awˇ, guˆ dui dui-iˇ-euˬ meh. 16Kʼoeˇ gaˇ kʼaˇ ya mawˇ-euˬ tsawˇ haˬ deuˬ, nehꞈ yaw jawꞈ uˇ-euˬ tsawˇ haˬ kʼoeˇ gʼaˬ aˬ joˆ-ehˇ pyeuꞈ laˇ-euˬ gaˇ kawˆ hawˇ-eu, aˬ zaꞈ kʼoeˇ deuˬ aˬ joˆ-ehˇ gʼeh-euˬ gaˇ kawˆ, aˬ cawˬ-ahˇ ja mehˬ nehˬ-euˬ meh.

17Kʼoeˬ naˇ, aˬ yawꞈ maꞈ jawˇ-eu miˇ kʼahˬ-ahˇ neh doˆ-iˇ nehˬ laꞈ lehˇ, aˬ yawꞈ maꞈ Yeˬsuˇ-ahˇ shaˇ-euˬ meh. 18Yeˬsuˇ lawˬ laꞈ kʼoeˇ uˇ-iˇ luꞈ ngeh, nehꞈ yaw jawꞈ uˇ-euˬ tsawˇ haˬ kʼoeˇ gʼaˬ ehˇ-eu, “Ngaˬ-ahˇ nawˬ nehˬ-ehˇ bi jawˇ le laꞈ.” 19Ehˇ kʼawꞈ, Yeˬsuˇ aˬ yawꞈ-ahˇ ehˇ nehˬ-eu, “Iˇ kahˇ-ahˇ nawˬ-euˬ tsawˇ jeuˬ tsawˇ ca jawˇ gaˇ gʼoꞈ-iˇ-awˇ, Sahˬpaˬ Miˬyehˇ neh nawˬ-euˬ gʼaˇ duˬ aˇ naˆ ni mˇ nehˬ laꞈ-euˬ gaˇ kawˆ hawˇ-eu, nawˬ-ahˇ aˇ naˆ ni gʼawˬ shaˬ gaˬ-euˬ gaˇ kawˆ dzawˇ nehˬ-iˇ-awˬ.”

20Kʼoeˇ naˇ, tsawˇ haˬ kʼoeˇ gʼaˬ Meuˬ tseˇ meuˬ miˇ kʼahˬ lehˇ kuˇ-eu miˇ kʼahˬ doe ni iˇ-awˇ, aˬ yawꞈ gʼaˇ duˬ Yeˬsuˇ aˇ naˆ ni mˇ nehˬ-euˬ gaˇ kawˆ ja mehˬ-iˇ-euˬ meh. Gaˇ kawˆ kʼoeˇ kʼaˇ yaˬ gaˬ-euˬ tsawˇ haˬ dawˬ tawˆ luꞈ zahˬ dui dui leˇ-euˬ meh.

Yaˬiˇluˆ-euˬ aˬ buˇ hawˇ-eu Yeˬsuˇ-euˬ pehˇ kʼahˬ-ahˇ toeˬ ciˆ-euˬ zaˬ miˬ zaˬ

(Maꞈtehˬ 9.18-26; Luˇkaꞈ 8.40-56)

21Lah nui baˬ paw Yeˬsuˇ paˇ gʼoꞈ tsehˆ-iˇ-euˬ meh. Lah lah dzeˇ, aˬ yawꞈ-euˬ dawˬ peh tsawˇ haˬ aˇ maꞈ maꞈ ma uiˬ le-euˬ meh. 22Uˬ duˬ tahˬ nymˇ laꞈ kʼoeˇ aˬ yuiꞈ aˬ tsu geuꞈ luꞈ-eu Yaˬiˇluˆ lehˇ myahˇ-euˬ tsawˇ haˬ tiˬ gʼaˬ oe-awˇ, Yeˬsuˇ-ahˇ ya mawˇ ngeh, Yeˬsuˇ-euˬ aˬ kuiˇ dawˬ pah aˬ yawꞈ awˆ byaˆ-euˬ meh. 23Yeˬsuˇ-ahˇ aˬ yawꞈ shaˇ dui dui-awˇ ehˇ-eu, “Ngaˬ buˇ shiˇ taw tehˬ ni naˇ luꞈ-eu meh. Aˬ yawꞈ jawˇ saˇ doˆ laˇ-awˇ yaw dehꞈ ya dehꞈ ni, aˬ yawꞈ koeˇ taˆ nawˬ-euˬ aˬ laꞈ tiˬ poˆ baꞈ daˆ nehˬ laˇ-awˬ.”

24Kʼoeˇ ngeh, Yaˬiˇluˆ-euˬ mehˬ nah Yeˬsuˇ caw teh gʼeh-euˬ meh. Yeˬsuˇ-euˬ mehˬ nah caw teh luꞈ-eu tsawˇ haˬ aˇ maꞈ myaˬ dui dui-eu miˇ neh, aˬ yawꞈ-euˬ tiˬ jawˬ tsawˇ haˬ maˬ tahˬ paˆ coeˇ ni cah luꞈ-eu meh.

25Tseˇ nyiꞈ kʼoꞈ keuˆ ni shiˬ doˆ-eu naˇ gawˇ-ahˇ maˬ tsehˆ leˇ ni ya daˬ luꞈ-eu zaˬ miˬ zaˬ tiˬ gʼaˬ jawˇ-eu meh. 26Jaˇˆ gʼaˬ laˆ saˆ-eu saˬ laˬ gʼoˬ gʼawˬ mya gʼaˬ neh bi laˆ saˆ-awˇ, kʼaˇ jaˆ-eu jeˬ dawˬ tawˆ luꞈ ahˬ dzeh-awˇ laˆ saˆ jiˇ-euˬ kʼawꞈ, maˬ taˬ leˇ-eu uˬ taꞈ, paˇ naˇ dzehˬ laˇ-euˬ meh. 27Yeˬsuˇ-euˬ gaˇ kawˆ aˬ yawꞈ ya gaˬ taˬ-euˬ miˇ neh, tsawˇ haˬ aˇ maꞈ yaw kaˬ-ahˇ Yeˬsuˇ-euˬ mehˬ nah caw teh miˇ leˇ-awˇ, Yeˬsuˇ-euˬ pehˇ kʼahˬ pehˇ dahˬ-ahˇ toeˬ ciˆ-euˬ meh. 28“Aˬ yawꞈ-euˬ pehˇ kʼahˬ-ahˇ tehꞈ-ehˇ ngaˇ ya toeˬ ciˆ kʼawꞈ, ngaˬ-euˬ naˇ gawˇ heu taˬ leˇ ma” lehˇ, zaˬ miˬ zaˬ kʼoeˇ gʼaˬ yawˬ haˇ yawˬ ha ehˇ-eu meh.

29Yeˬsuˇ-euˬ pehˇ kʼahˬ-ahˇ aˬ yawꞈ toeˬ ciˆ-euˬ nehˬ-ehˇ, aˬ yawꞈ shiˬ doˆ luꞈ-eu tiˬ poˆ tehꞈ-ehˇ tsiˇ leˇ-awˇ, aˬ yawꞈ-euˬ naˇ gawˇ taˬ leˇ-euˬ gaˇ kawˆ, gʼawˇ mawˇ laꞈ kʼoeˇ siˬ duˬ leˇ-euˬ meh. 30Yeˬsuˇ-aˬ, aˬ yawꞈ-euˬ laꞈ kʼoeˇ ahˇ-eu naˇ gawˇ bi taˬ leˇ-eu baoˬ doˆ-iˇ-euˬ aˬ yawꞈ-ahˇ siˬ leˇ-awˇ, tsawˇ haˬ aˇ maꞈ maꞈ ma gʼahˇ ceh naˇ kʼah paw zeuˆ pyawˇ-awˇ ehˇ-eu, “Ngaˬ-euˬpehˇ kʼahˬ-ahˇ toeˬ ciˆ-euˬ aˬ suˇ gʼaˬ-a.”

31Zaˬ lahˇ deuˬ aˬ yawꞈ-ahˇ ehˇ-eu, “Tsawˇ haˬ teu myaˆ myaˆ-ehˇ nawˇ jawˇ gaˇ tah uˇ laˇ luꞈ-eu nawˇ mawˇ luꞈ kʼawꞈ, nawˬ-euˬ pehˇ kʼahˬ-ahˇ toeˬ ciˆ-euˬ aˬ suˇ gʼaˬ-a lehˇ, aˬ joˆ-ehˇ paˇ naˇ haˬ te.”

32Ehˇ kʼawꞈ, aˬ yawꞈ-euˬ pehˇ kʼahˬ-ahˇ toeˬ ciˆ-euˬ gʼaˬ-ahˇ ya mawˇ ni, Yeˬsuˇ jawˬ jawˬ-ehˇ haw-euˬ meh. 33Zaˬ miˬ zaˬ kʼoeˇ gʼaˬ aˬ yawꞈ-euˬ gʼawˇ mawˇ aˬ joˆ-ehˇ pyeuꞈ laˇ-euˬ siˬ leˇ-euˬ loꞈ-ehˇ, guˆ-awˇ yaw dzuˬ dzuˬ-eu laꞈ kʼoeˇ doˆ laˇ-awˇ, Yeˬsuˇ-euˬ aˬ kuiˇ dawˬ pah ga byaˆ-awˇ, gaˇ kawˆ dawˬ tawˆ luꞈ dawˇ coe ni ehˇ doˆ nehˬ-euˬ meh. 34Yeˬsuˇ aˬ yawꞈ-ahˇ ehˇnehˬ-eu, “Ngaˬ buˇ-oˇ. Nawˬ-euˬ jah-eu nui ma nawˬ-ahˇ bi taˬ leˇ-euˬ meh. Nui ma saˇ lehˆ ni gʼoꞈ-iˇ-awˬ. Nawˬ-euˬ naˇ gawˇ teu tiˬ jawˇ-iˬ maˬ paˇ naˇ poˆ laˇ-aˇ.”

35Yeˬsuˇ kʼoeˇ loꞈ-ehˇ ehˇ luꞈ ngeh, Yaˬiˇluˆ-euˬ nymˇ-ahˇ neh tsawˇ haˬ tiˬ deuˬ laˇ-awˇ, “Nawˬ buˇ shiˇ tsehˆ gʼaˬ-euˬ meh. Saˬ laˬ-ahˇ taˬ paˇ laˆ bahˬ hawˇ-awˬ” lehˇ, Yaˬiˇluˆ-ahˇ ehˇ gaˬ laˇ-euˬ meh.

36Tsawˇ haˬ kʼoeˇ deuˬ kʼoeˇ loꞈ-ehˇ ehˇ gaˇ Yeˬsuˇ maˬ naˇ haˬ ni, “Kʼahˬ taˬ lahˇ. Jah-eu nui ma ahˇ naˇ gʼaˬ-aˇ” lehˇ, Yaˬiˇluˆ-ahˇ ehˇ nehˬ-euˬ meh. 37Kʼoeˇ naˇ, Beˬtuˆluˆ hawˇ-eu, Yaˬkoˆ, Yoˇhaˬ aˬ nyaꞈ nmˇ maˬ ngeuˇ naˇ, aˬ cawˬ tiˬ gʼaˬ-iˬ aˬ yawꞈ mehˬ nah maˬ bi caw teh laˇ ni bi jawˇ yaꞈ-euˬ meh. 38Uˬ duˬ tahˬ nymˇ laꞈ kʼoeˇ aˬ yuiꞈ aˬ tsu geuꞈ luꞈ-eu Yaˬiˇluˆ-euˬ nymˇ-ahˇ aˬ yawꞈ maꞈ iˇ keuˆ ngeh, tsawˇ ngoeˇ ngoeˇ-ehˇ bahˬ gʼa lawꞈ gʼa luꞈ gaˇ Yeˬsuˇ ya mawˇ-euˬ meh. 39Yeˬsuˇ laꞈ kʼoeˇ uˇ leˇ-awˇ aˬ yawꞈ maꞈ-ahˇ ehˇ nehˬ-eu, “Naw maꞈ aˬ jeˬ miˇ neh ngoeˇ ngoeˇ-ehˇ bahˬ gʼaˬ luꞈ te. Zaˬ heu gʼaˬ shiˇ-euˬ maˬ ngeuˇ-a. Yuꞈ kʼaˆ taˬ-euˬ meh.”

40Kʼoeˇ ngeh, aˬ yawꞈ maꞈ Yeˬsuˇ-ahˇ uiˇ-eu meh. Aˬ yawꞈ maꞈ dawˬ tawˆ luꞈ-ahˇ Yeˬsuˇ teh doˆ jiˇ-awˇ, zaˬ kʼoeˇ gʼaˬ-euˬ aˬ ma hawˇ-eu, zaˬ lahˇ kʼoeˇ smˇ gʼaˬ-ahˇ tehꞈ-ehˇ sheuˬ-awˇ, zaˬ kʼoeˇ gʼaˬ baꞈ taˬ-euˬ lawˆ-ahˇ uˇ leˇ-euˬ meh. 41Aˬ buˇ kʼoeˇ gʼaˬ-euˬ aˬ laꞈ-ahˇ Yeˬsuˇ nyehꞈ tehˬ-awˇ, “Daˬ liˇ daˬ guˇ miˇ” lehˇ ehˇ nehˬ-euˬ meh. Dawˬ tsuiꞈ-aˬ, “Aˬ buˇ zaˬ-oˇ, tuˇ-awˬ lehˇ ngaˇ nawˬ-ahˇ ehˇ-eu ma” lehˇ ehˇ mawꞈ-eu meh.

42Aˬ buˇ kʼoeˇ gʼaˬ ja pyuˬ ni tuˇ laˇ-awˇ, gaˇ ma cah-euˬ meh. Aˬ yawꞈ-euˬ aˇ kʼoꞈ tseˇ nyiꞈ kʼoꞈ byah-eu meh. Kʼoeˇ loꞈ-ehˇ pyeuꞈ laˇ-euˬ gaˇ ya mawˇ ngeh, aˬ yawꞈ maꞈ zahˬ leˇ jiˇ-euˬ meh. 43Gaˇ kawˆ kʼoeˇ aˬ cawˬ maˬ bi siˬ ni yahˇ-eu gʼaˇ duˬ, aˬ yawꞈ maꞈ-ahˇ Yeˬsuˇ yaw kʼaˆ kʼaˆ-ehˇ ehˇ nehˬ-euˬ meh. Kʼoeˇ naˇ, “Aˬ buˇ-ahˇ tiˬ jeˬ paˬ bi dzaˬ-awˬ” lehˇ, aˬ yawꞈ maꞈ-ahˇ Yeˬsuˇ ehˇ nehˬ-euˬ meh.

Currently Selected:

Maˬkuˆ 5: AHK

Highlight

Copy