Maˬkuˆ 3

Aˬ laꞈ tiˬ pyawˬ shiˇ-euˬ tsawˇ haˬ tiˬ gʼaˬ

(Maꞈtehˬ 12.9-14; Luˇkaꞈ 6.6-11)

1Kʼoeˇ naˇ, Yeˬsuˇ uˬ duˬ tahˬ nymˇ-ahˇ le-euˬ meh. Aˬ laꞈ tiˬ pyawˬ shiˇ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. 2Jawˇ nah ngeh nah tsawˇ haˬ kʼoeˇ gʼaˬ-ahˇ Yeˬsuˇ laˆ taˬ nehˬ nga loˇ lehˇ haw duˬ-awˇ, Yeˬsuˇ-euˬ yaw lehˬ poˆ-eu lehˇ noeˬ gahˇ taˬ-euˬ tsawˇ haˬ tiˬ deuˬ kʼawꞈ, kʼoeˇ gaˇ jawˇ-eu meh. 3Aˬ laꞈ tiˬ pyawˬ shiˇ-euˬ tsawˇ haˬ kʼoeˇ gʼaˬ-ahˇ, “Mehˬ shi paw doˆ laˇ-awˬ” lehˇ, Yeˬsuˇ ehˇ nehˬ-euˬ meh. 4Kʼoeˇ naˇ, tsawˇ haˬ kʼoeˇ deuˬ-ahˇ aˬ yawꞈ naˇ haˬ-eu, “Jawˇ nah ngeh nah Zahˇ dawˬ kʼoꞈ dawˬ aˬ dui-ahˇ aˬ geu jeˬ bi mˇ laꞈ taˬ. Yaw muiˬ jeˬ bi mˇ laꞈ taˬ loˇ. Maˬ muiˬ-eu jeˬ bi maˇ laꞈ taˬ loˇ. Aˬ cawˬ-euˬ saꞈ laˇ-ahˇ ka kʼoꞈ-eu jeˬ bi mˇ laꞈ taˬ loˇ. Aˬ cawˬ-ahˇ sehꞈ-eu jeˬ bi mˇ laꞈ taˬ loˇ.”

Ehˇ kʼawꞈ, tsawˇ haˬ kʼoeˇ deuˬ dawˬ maˬ tmˇ-a.

5Tsawˇ haˬ kʼoeˇ deuˬ-ahˇ Yeˬsuˇ haw-awˇ nui ma pehˇ-eu meh. Ehˇ kʼawꞈ, aˬ yawꞈ maꞈ nui ma gʼahˇ-awˇ lehˬ dui dui gaˇ aˬ yawꞈ gʼawˬ shaˬ gaˬ-euˬ meh. Kʼoeˇ naˇ, tsawˇ haˬ kʼoeˇ gʼaˬ-ahˇ “Aˬ laꞈ cawˬ ja-awˬ” lehˇ Yeˬsuˇ ehˇ nehˬ-awˇ, aˬ yawꞈ aˬ laꞈ caw ja ngeh, laꞈ shiˇ shiˇ-eu taˬ leˇ-euˬ meh. 6Kʼoeˇ ngeh, Paˬliˬsehˇ deuˬ uˬ duˬ tahˬ nymˇ laꞈ kʼoeˇ neh doˆ-iˇ-awˇ, Heˬloˆ aˇ muˇ#3.6 ‘Heˬloˆ aˇ muˇ’ lehˇ ehˇ-eu-aˬ, sahˬ paˬ Heˬloˆ-ahˇ nui ma gm-awˇ, Yeˬsuˇ-ahˇ muiˇ-eu aˇ muˇ tiˬ muˇ meh. laꞈ kʼoeˇ uˇ-eu tsawˇ haˬ deuˬ nehˬ-ehˇ tahˬ dzoeˇ-awˇ, Yeˬsuˇ-ahˇ sehꞈ-eu gʼaˇ duˬ bawˬ dzaˬ-euˬ meh.

Lah lah dzeˇ uiˬ le-euˬ tsawˇ haˬ aˇ maꞈ

7Yeˬsuˇ hawˇ-eu aˬ yawꞈ-euˬ zaˬ lahˇ deuˬ Gaˬliˬlehˇ lah-ahˇ iˇ-euˬ meh. Gaˬliˬlehˇ miˇ kʼahˬ hawˇ-eu Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ, baˬ maꞈ puˇ jeˬ-ahˇ aˬ yawꞈ maꞈ-euˬ mehˬ nah caw teh-eu meh. 8Iˇduˇmehˇ miˇ kʼahˬ-ahˇ jawˇ-eu tsawˇ haˬ deuˬ, Yawˇdaˬ lawˇ baˬ nahˇ ma doˆ kʼehˬ paw kʼahˬ-ahˇ jawˇ-eu tsawˇhaˬ deuˬ hawˇ-eu, Duˇlu meuˬ hawˇ-eu Siˇdoˬ meuˬ-euˬ gahˬ kaˬ-ahˇ jawˇ-eu tsawˇ haˬ deuˬ kʼawꞈ caw teh luꞈ-eu meh. Yeˬsuˇ neh mˇ-euˬ gaˇ deuˬ gaˇ kawˆ aˬ yawꞈ maꞈ ya gaˬ-euˬ miˇ neh, Yeˬsuˇ jawˇ gaˇ aˬ yawꞈ maꞈ oe-euˬ meh. 9Tsawˇ haˬ aˇ maꞈ kʼoeˇ myaˬ dui dui-eu miˇ neh, aˬ yawꞈ-ahˇ tahˬ tehˬ laˇ gaˇ guˆ-awˇ, aˬ yawꞈ-euˬ gʼaˇ duˬ lawˬ tiˬ laˇ lehˬ hmˬ taˬ-awˬ lehˇ, zaˬ lahˇ deuˬ-ahˇ aˬ yawꞈ ehˇ nehˬ-euˬ meh. 10Aˬ jeˬ miˇ neh ehˇ naˇ, tsawˇ haˬ gʼawˬ mya ni-ahˇ aˬ yawꞈ naˇ gawˇ laˆ taˬ nehˬ haw-euˬ miˇ neh, naˇ-eu tsawˇ haˬ dawˬ tawˆ luꞈ, aˬ yawꞈ-ahˇ toeˬ ciˆ-eu lehˇ tahˬ tahˬ-ehˇ oe luꞈ-eu meh. 11Nehꞈ yaw jawꞈ uˇ-eu tsawˇ haˬ deuˬ aˬ yawꞈ-ahˇ kʼaˇ mawˇ le ngeh, aˬ yawꞈ-euˬ mehˬ shi ga byaˆ-awˇ, “Nawˇ-aˬ, Miˬyehˇ-euˬ Zaˬmaˇ meh” lehˇ guˇ-eu meh.

12Aˬ yawꞈ aˬ suˇ gʼaˬ pyeuꞈ-eu gaˇ kawˆ aꞈ cawˬ-ahˇ maˬ ehˇ mehˬ-eu gʼaˇ duˬ, nehꞈ yaw jawꞈ kʼoeˇ deuˬ-ahˇ Yeˬsuˇ yaw kʼaˆ kʼaˆ-ehˇ dawˬ biꞈ-euˬ meh.

Gʼaˬ kʼehˇ tseˇ nyiꞈ gʼaˬ-ahˇ tseˇ doˆ-euˬ

(Maꞈtehˬ 10.1-4; Luˇkaꞈ 6.12-16)

13Kʼoeˇ naˇ, Yeˬsuˇ gawˬ jawˬ-ahˇ daˆ leˇ-awˇ, aˬ yawꞈ nui ma tsaˬ-eu tsawˇ haˬ deuˬ-ahˇ kuˇ ngeh, aˬ yawꞈ maꞈ aˬ yawꞈ jawˇ gaˇ laˇ-euˬ meh. 14Aˬ yawꞈ nehˬ-ehˇ bi jawˇ-eu gʼaˇ duˬ hawˇ-eu, dawˬ mehˬ bi mehˬ-iˇ-eu gʼaˇ duˬ, tsawˇ haˬ tseˇ nyiꞈ gʼaˬ-ahˇ aˬ yawꞈ tseˇ doˆ-awˇ, gʼaˬ kʼehˇ lehˇ myahˇ nehˬ-euˬ meh. 15Aˬ yawꞈ maꞈ-ahˇ, nehꞈ teh doˆ nya-eu baoˬ biꞈ nehˬ-euˬ meh.

16Yeˬsuˇ neh tseˇ doˆ-euˬ tsawˇ haˬ kʼoeˇ tseˇ nyiꞈ gʼaˬ-aˬ, heu deuˬ meh. Yeˬsuˇ neh Beˬtuˆluˆ lehˇ myahˇ nehˬ-euˬ Siˇmoˬ, 17“Mˬ jeˬ tsawˬ tehˆ-euˬ zaˬ deuˬ” lehˇ dawˬ tsuiꞈ ehˇ mawꞈ-eu tsawˇ myahˇ pyeuꞈ-eu “Bawˇneˬgehˇ” lehˇ myahˇ nehˬ-euˬ Zeˬbeˬdehˇ-euˬ aˬ li Yaˬkoˆ hawˇ-eu Yoˇhaˬ aˬ nyaꞈ nmˇ, 18Aˬdehˬlehˬ, Piˇliˇpuˆ, Baˬtawˇlaˬmehˇ, Maꞈtehˬ, Toˇmaˆ, Aˬlaˬpehˇ-euˬ aˬ li Yaˬkoˆ, Taˬdehˇ, Kaˬnaˬniˇ aˇ muˇ#3.18 ‘Kaˬnaˬniˇ aˇ muˇ’ lehˇ ehˇ-eu dawˬ tsuiꞈ, Maꞈtehˬ 10.4-ahˇ haw-awˬ. laꞈ kʼoeˇ uˇ-eu Siˇmoˬ hawˇ-eu, 19aˇ nah Yeˬsuˇ-ahˇ ahˬ dzaˬ-euˬ gʼaˬ pyeuꞈ-eu Yuˇdaˆ Iˇsaˬgaˬliˬoˆ heu deuˬ meh.

Yeˬsuˇ hawˇ-eu Beˬlaˇzeˬbuˇlaˆ

(Maꞈtehˬ 12.23-32; Luˇkaꞈ 11.14-33; 12.10)

20Kʼoeˇ naˇ, Yeˬsuˇ iˇ kahˇ-ahˇ gʼoꞈ-iˇ-euˬ meh. Tsawˇ haˬ aˇ maꞈ maꞈ ma paˇ uiˬ laˇ-euˬ miˇ neh, Yeˬsuˇ hawˇ-eu aˬ yawꞈ-euˬ zaˬ lahˇ deuˬ hawˬ dzaˬ-eu maˬ dah-a. 21Yeˬsuˇ-euˬ aˬ yuiꞈ aˬ nyiˇ deuˬ gaˇ kawˆ kʼoeˇ ya gaˬ ngeh, Yeˬsuˇ-ahˇ sheuˬ kʼoꞈ laˬ-iˇ-eu lehˇ iˇ-euˬ meh. Aˬ jeˬ miˇ neh ehˇ naˇ, “Yeˬsuˇ tsawˇ uˬ uˬ-iˇ-euˬ ngaˇ” lehˇ tsawˇ haˬ kʼoeˇ deuˬ ehˇ luꞈ-eu meh.

22Yeˬluˇsaˬlehˬ meuˬ-ahˇ neh oe-euˬ Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ-aˬ, “Aˬ yawꞈ-euˬ laꞈ kʼoeˇ Beˬlaˇzeˬbuˇlaˆ uˇ-eu nga. Nehꞈ sahˬ paˬ neh aˬ yawꞈ-ahˇ nehꞈ teh doˆ nya-eu baoˬ biꞈ taˬ-euˬ nga” lehˇ ehˇ-eu meh. 23Kʼoeˇ miˇ neh, aˬ yawꞈ maꞈ-ahˇ Yeˬsuˇ kuˇ-awˇ, yaw jeˬ ma jeˬ ja mehˬ-eu laꞈ kʼoeˇ, heu loꞈ-ehˇ ehˇ nehˬ-euˬ meh. “Nehꞈ Saˬdaˬ yawˬ haˇ yawˬ ha aˬ joˆ-ehˇ teh doˆ nya ta. 24Miˇ kʼahˬ tiˬ kʼahˬ laꞈ kʼoeˇ aˇ muˇ gʼawˬ mya muˇ muˇ paˆ-awˇ guiˇ deuˆ naˇ, miˇ kʼahˬ kʼoeˇ kʼahˬ maˬ ziꞈ-aˇ. 25Nymˇ jiˇ tiˬ jiˇ laꞈ kʼoeˇ aˇ muˇ gʼawˬ mya muˇ muˇ-awˇ ceh dzaˬ naˇ, nymˇ jiˇ pyaˆ-iˇ tehꞈ-a. 26Kʼoeˇ loꞈ-ehˇ duˇ ni, nehꞈ Saˬdaˬ-euˬ miˇ kʼahˬ laꞈ kʼoeˇ aˇ muˇ muˇ paˆ naˇ, maˬ ziꞈ ni cawˆ-iˇ-awˇ, byoˆ-iˇ tehꞈ-a.

27“Tsawˇ haˬ tiˬ gʼaˬ-iˬ gʼaˬ kʼaˆ aˬ da-euˬ nymˇ-ahˇ uˇ leˇ-awˇ, aˬ yawꞈ-euˬ myawˬ gahˬ maˬ yuˇ geuꞈ leˇ nya-a. Gʼaˬ kʼaˆ aˬ da kʼoeˇ gʼaˬ-ahˇ jeˬ huˬ paꞈ tawꞈ gʼaˬ miˇ tsa tehꞈ-ehˇ, aˬ yawꞈ-euˬ nymˇ-ahˇ jaˆ-eu myawˬ gahˬ deuˬ yuˇ geuꞈ nya-eu meh.

28“Ngaˇ naw maꞈ-ahˇ maˇ maˇ ni ehˇ nehˬ nyaˇ. Tsawˇ haˬ zaˬ neh mˇ-euˬ iˬ baˇ dawˬ tawˆ luꞈ hawˇ-eu, yehˬ bawˬ sehˇ lu-ehˇ kʼaˇ ehˇ-euˬ yawˬ jeˬ na luꞈ-ahˇ Miˬ yehˇ iˬ baˇ pyehˬ nehˬ nya tehꞈ-a. 29Ehˇ kʼawꞈ, Muiˬ-eu shawˇ-eu Yaw sahˇ Miˬyehˇ-ahˇ yeˬ bawˬ sehˇ lu-ehˇ ehˇ-eu jeˬ-ahˇ tiˬ jawˇ-iˬ iˬ baˇ maˬ pyehˬ nehˬ-a. Aˬ jeˬ miˇ neh ehˇ naˇ, kʼoeˇ loꞈ-ehˇ ehˇ-eu-aˬ, mˬ maˬ maˬ byaˆ zaˇ ziˇ gmˬ-eu iˬ baˇ mˇ gaˇ duˇ-eu meh.” 30Tsawˇ haˬ tiˬ paˆ na deuˬ Yeˬsuˇ-ahˇ nehꞈ uˇ-eu tsawˇ haˬ nga lehˇ ehˇ-eu miˇ neh, Yeˬsuˇ kʼoeˇ loꞈ-ehˇ ehˇ-eu jeˬ pyeuꞈ-eu meh.

Yeˬsuˇ-euˬ aˬ ma hawˇ-eu mehˇ nmˇ deuˬ

(Maꞈtehˬ 12.46-50; Luˇkaꞈ 8.19-21)

31Kʼoeˇ naˇ, Yeˬsuˇ-euˬ aˬ ma hawˇ-eu mehˇ nmˇ deuˬ oe keuˆ-euˬ meh. Aˬ yawꞈ maꞈ nymˇ laꞈ nyiˇ yawꞈ-awˇ,Yeˬsuˇ-ahˇ bi kuˇ doˆ laˬ leˇ-euˬ meh. 32Yeˬsuˇ-euˬ tiˬ jawˬ tsawˇ haˬ aˇ maꞈ tiˬ byah ni nuiˇ luꞈ-eu meh. Aˬ yawꞈ maꞈ aˬ yawꞈ-ahˇ ehˇ-eu, “Haw sheˇ. Nawˬ ma hawˇ-eu nawˬ-euˬ mehˇ nmˇ deuˬ, nawˬ-euˬ dmˇ ma deuˬ, nawˬ-ahˇ mawˇ mawꞈ nya lehˇ laꞈ nyiˇ dawˬ luꞈ meh.”

33Yeˬsuˇ ehˇ-eu, “Ngaˬ ma hawˇ-eu ngaˬ-euˬ mehˇ nmˇ deuˬ aˬ suˇ gʼaˬ-a.” 34Aˬ yawꞈ-euˬ tiˬ jawˬ nuiˇ luꞈ-eu tsawˇ haˬ deuˬ jawˇ paw aˬ yawꞈ ciˬ pyawˇ doe-awˇ ehˇ-eu, “Haw-awˬ. Tsawˇ haˬ heu deuˬ ngaˬ ma hawˇ-eu ngaˬ-euˬ mehˇ nmˇ deuˬ ma. 35Miˬyehˇ nui ma tsaˬ-eu jeˬ kʼaˇ mˇ-eu tawˇ ha deuˬ-aˬ, ngaˬ-euˬ mehˇ nmˇ, ngaˬ-euˬ dmˇ ma hawˇ-eu ngaˬ-euˬ aˬ ma ma.”

Currently Selected:

Maˬkuˆ 3: AHK

Highlight

Copy