Maꞈtehˬ 21

Yeˬsuˇ Yeˬluˇsaˬlehˬ meuˬ-ahˇ uˇ leˇ-euˬ

(Maˬkuˆ 11.1-11; Luˇkaꞈ 19.28-40; Yoˇhaˬ 12.12-19)

1Yeˬsuˇ hawˇ-eu aˬ yawꞈ-euˬ zaˬ lahˇ deuˬ Yeˬluˇsaˬlehˬ meuˬ dawˬ peh cah keuˆ laꞈ-awˇ, Saˬloˬ gawˬ jawˬ-ahˇ jaˆ-eu Behˬpaˇgeˬ pu-ahˇ laˇ keuˆ luꞈ ngeh, zaˬ lahˇ nyiˬ gʼaˬ-ahˇ Yeˬsuˇ kʼehˇ-awˇ, mehˬ hu paw bi le-euˬ meh. 2Zaˬ lahˇ kʼoeˇ nyiˬ gʼaˬ-ahˇ, aˬ yawꞈ heu loꞈ-ehˇ ehˇ nehˬ-euˬ meh. “Naw nyaꞈ-euˬ mehˬ hu jaˆ-eu pu kʼoeˇ pu-ahˇ le-awˬ. Mahˬ tahˬ laˆ tiˬ ma paꞈ tawꞈ taˬ-awˇ, mahˬ tahˬ laˆ zaˬ dawˬ peh jawˇ luꞈ gaˇ ya mawˇ tehꞈ-a. Aˇ caˆ puiˇ-awˇ, ngaˇ jawˇ gaˇ tsahˇ laꞈ-awˬ. 3Tsawˇ haˬ tiˬ gʼaˬ na tiˬ jeˬ paˬ ehˇ laˇ naˇ, ‘Sahˬpaˬ#21.3 Yeˬsuˇ neh yawˬ haˇ yawˬ ha ʼSahˬpaˬʼ lehˇ kuˇ-euˬ-aˬ, Jaˇliꞈ dmˬ lah ni laꞈ kʼoeˇ, heu tsahˇ-ahˇ ahˇ-eu tehꞈ meh. loˬ-eu meh’ lehˇ ehˇ nehˬ-awˬ. Kʼoeˇ loꞈ-ehˇ ehˇ nehˬ naˇ, dawˬ poˆ maˬ poˆ ni yaw kawˇ-ehˇ bi tsahˇ laꞈ tehꞈ-a.”

4Miˬyehˇ gʼaˇ duˬ ngehˬ dah-eu tsawˇ haˬ neh ehˇ taˬ-euˬ dawˬ heu deuˬ byah laˇ ni, kʼoeˇ loꞈ-ehˇ pyeuꞈ laˇ-euˬ meh.

5“Haw yawˬ, nawˬ-euˬ sahˬ paˬ,

nawˇ jawˇ gaˇ oe meh lehˇ,

Ziˇoˬ-ahˇ ehˇ gaˬ-awˬ.

Aˬ yawꞈ nui nahˬ nui yu ahˇ-awˇ,

mahˬ tahˬ laˆ-ahˇ dziˬ-awˇ oe meh.

Tahˬ laˆ mahˬ ma-euˬ zaˬ pyeuꞈ-eu,

tahˬ laˆ zaˬ-ahˇ dziˬ leꞈ-euˬ meh.”

6Zaˬ lahˇ kʼoeˇ nyiˬ gʼaˬ le-awˇ, Yeˬsuˇ neh ehˇ nehˬ-euˬ loꞈ-ehˇ jahˇ leˇ-euˬ meh. 7Mahˬ tahˬ laˆ kʼoeˇ nyiˬ ma zaˬ-ahˇ aˬ yawꞈ maꞈ tsahˇ leꞈ-awˇ, nyiˬ mawˬ luꞈ kʼoeˇ taˆ mehˬ tsoeˬ lehˆ kʼawˬ daˆ nehˬ-awˇ, Yeˬsuˇ bi dziˬ-euˬ meh. 8Tsawˇ haˬ gʼawˬ mya ni gaˇ ma-ahˇ mehˬ tsoeˬ lehˆ kʼawˬ-awˇ, tiˬ paˆ na deuˬ aˇ bawˇ uˬ pyaˬ ngawˬ kʼehꞈ-awˇ, gaˇ ma-ahˇ kʼawˬ nehˬ-euˬ meh. 9Yeˬsuˇ-euˬ mehˬ hu paw hawˇ-eu, mehˬ nah paw cah luꞈ-eu tsawˇ haˬ aˇ maꞈ kʼoeˇ deuˬ, heu loꞈ-ehˇ guˇ-eu meh. “Daˬbiˇ-euˬ Zaˬmaˇ-ahˇ ja ceuˬ-awˬ. SahˬpaˬMiˬyehˇ-euˬ tsawˇ myahˇ uˬ moˆ oe-euˬ gʼaˬ-ahˇ, Miˬyehˇ guiˬ lahˬ biꞈ luꞈ-uˇ. Miˬyehˇ-ahˇ jaˬ ceuˬ-awˬ.”

10Yeˬsuˇ Yeˬluˇsaˬlehˬ meuˬ-ahˇ uˇ leˇ ngeh, meuˬ meuˬ lah-ehˇ lawꞈ gʼa-awˇ ehˇ-eu, “Tsawˇ haˬ teu gʼaˬ aˬ suˇ gʼaˬ-a.”

11Tsawˇ haˬ aˇ maꞈ kʼoeˇ maꞈ ehˇ kʼoꞈ nehˬ-eu, “Tsawˇ haˬ heu gʼaˬ-aˬ, Yeˬsuˇ lehˇ kuˇ-eu, Gaˬliˬlehˇ miˇ kʼahˬ Naˬzaˬlehˇ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ meh.”

Yeˬsuˇ Uˬ duˬ tahˬ nymˇ nymˇ ma-ahˇ laˆ muiˬ laˆ shawˇ-euˬ

(Maˬkuˆ 11.15-19; Luˇkaꞈ 19.45-48; Yoˇhaˬ 2.13-22)

12Uˬ duˬ tahˬ nymˇ nymˇ ma laꞈ kʼoeˇ Yeˬsuˇ uˇ leˇ-awˇ, ahˬ taꞈ zeuˇ taꞈ luꞈ-eu tsawˇ haˬ dawˬ tawˆ luꞈ-ahˇ teh doˆ-euˬ meh. Pyuˇ dawˬ paˇ-eu tsawˇ haˬ deuˬ-euˬ hawˬ jeh hawˇ-eu, lawˇ-eu shehˇ-eu yaˇ miˇ kʼaˬ kʼoeˬ ahˬ-eu tsawˇ haˬ deuˬ-euˬ nuiˇ mahˬ deuˬ, aˬ yawꞈ ngawˬ dzeh nehˬ-euˬ meh. 13Tsawˇ haˬ kʼoeˇ deuˬ-ahˇ aˬ yawꞈ ehˇ nehˬ-eu, “‘Ngaˬ-euˬ Uˬ duˬ tahˬ nymˇ nymˇ ma-ahˇ guiˬ lahˬ shaˇ-eu nymˇ lehˇ kuˇ tehꞈ-a’ lehˇ, Miˬyehˇ neh ehˇ taˬ-euˬ gaˇ kawˆ Jaˇliꞈ laꞈ kʼoeˇ boꞈ taˬ-euˬ meh. Ehˇ kʼawꞈ, Uˬ duˬ tahˬ nymˇ nymˇ ma heu smˇ kʼoeˬ tahˇ joe-euˬ baˇ shmˇ duˬ pyeuꞈ-iˇ ni naw maꞈ jahˇ luꞈ-eu ngaˇ.”

14Myaˆ behꞈ hawˇ-eu kuiˇ shiˇ laꞈ shiˇ deuˬ Uˬ duˬ tahˬ nymˇ nymˇ ma-ahˇ Yeˬsuˇ jawˇ gaˇ laˇ-awˇ bi laˆ taˬ-euˬ meh. 15Yeˬsuˇ zahˬ leˇ paˬ-ehˇ gʼeh-eu jeˬ mˇ-awˇ, “Daˬbiˇ-euˬ Zaˬmaˇ-ahˇ ja ceuˬ-awˬ” lehˇ zaˬ deuˬ guˇ luꞈ gaˇ, piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ ya mawˇ ngeh, nui ma pehˇ laˇ-euˬ meh. 16Kʼoeˇ miˇ neh, aˬ yawꞈ maꞈ Yeˬsuˇ-ahˇ ehˇ-eu, “Zaˬ teu deuˬ aˬ jeˬ guˇ luꞈ-eu nawˬ-ahˇ maˬ gaˬ laˇ nya loˇ.”

Yeˬsuˇ ehˇ-eu, “Ngaˇ gaˬ luꞈ ma. ‘Zaˬ yaw nyiˇ deuˬ hawˇ-eu zaˬ nahˬ deuˬ tiˬ byah tiˬ loꞈ ja ceuˬ nya laˇ ni, nawˇ mehˬ nehˬ tsoˆ nehˬ-euˬ meh’ lehˇ ehˇ taˬ-euˬ jaˇ liꞈ dawˬ kawˬ-ahˇ naw maꞈ tiˬ poˆ-iˬ maˬ gui haw-aˬ loˇ.”

17Kʼoeˇ naˇ, aˬ yawꞈ maꞈ jawˇ gaˇ neh Yeˬsuˇ doˆ-iˇ-awˇ, Yeˬluˇsaˬlehˬ meuˬ-ahˇ neh Beˬtaˬniˇ pu-ahˇ iˇ-awˇ, kʼoeˇ gaˇ uˬ ciꞈ yaꞈ-euˬ meh.

Siˬ guˬ aˇ bawˇ-ahˇ yaˬ kʼehˇ yaˬ-euˬ

(Maˬkuˆ 11.12-14,20-24)

18Yawˬ nah yawˬ uˬ shawˬ yaw naꞈ-ehˇ, Yeˬluˇsaˬlehˬ meuˬ-ahˇ Yeˬsuˇ gʼoꞈ leˇ ngeh, hawˬ mehꞈ mehꞈ laˇ-euˬ meh. 19Gaˇ ma gaˇ dzeˇ dehꞈ-eu siˬ guˬ aˇ bawˇ tiˬ bawˇ mawˇ-awˇ haw-iˇ ngeh, aˇ siˬ maˬ siˬ ni aˇ paꞈ tehꞈ-ehˇ mehˇ luꞈ gaˇ ya mawˇ-euˬ meh. “Aˬ kaˇ naˇ, nawˇ aˇ siˬ tiˬ jawˇ-iˬ maˬ paˇ siˬ le-aˇ” lehˇ, siˬ guˬ aˇ bawˇ kʼoeˇ bawˇ-ahˇ Yeˬsuˇ ehˇ nehˬ ngeh, aˇ bawˇ kʼoeˇ tiˬ poˆ tehꞈ-ehˇ nyoeˬ-iˇ koˆ-iˇ-euˬ meh.

20Zaˬ lahˇ deuˬ kʼoeˇ gaˇ ya mawˇ ngeh, zahˬ dui dui leˇ-awˇ ehˇ-eu, “Siˬ guˬ aˇ bawˇ teu bawˇ nyoeˬ-iˇ kʼoˆ-iˇ-eu aˇ naˆ naˆ-ehˇ kawˇ-eu nga.”

21Yeˬsuˇ ehˇ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Naw maꞈ jah-eu nui ma ahˇ-awˇ, poˆ poˆ laˆ laˆ-ehˇ maˬ noeˬ naˇ, ngaˬ neh siˬ guˬ aˇ bawˇ heu bawˇ-ahˇ jahˇ nehˬ-euˬ loꞈ-ehˇ, naw maꞈ kʼawꞈ jahˇ nya tehꞈ-a. Kʼoeˇ naˆ tehꞈ-ehˇ maˬ ngeuˇ-a siˬ. Gawˬ jawˬ heu jawˬ-ahˇ ‘Teuˆ diˇ laˇ-awˇ iˬ ma laˆ shaˆ-ahˇ ga puꞈ-iˇ-awˬ’ lehˇ naw maꞈ ehˇ nehˬ ngeh, gawˬ jawˬ heu jawˬ iˬ ma laˆ shaˆ-ahˇ ga puꞈ-iˇ tehꞈ-a. 22Naw maꞈ jah-eu nui ma ahˇ naˇ, naw maꞈ guiˬ lahˬ kʼaˇ shaˇ-eu jeˬ za tehꞈ-a.”

Yeˬsuˇ-euˬ baoˬ gaˇ kawˆ haˬ-eu

(Maˬkuˆ 11.27-33; Luˇkaꞈ 20.1-8)

23Yeˬsuˇ Uˬ duˬ tahˬ nymˇ nymˇ ma-ahˇ gʼoꞈ uˇ leˇ-awˇ mehˬ luꞈ tsoˆ luꞈ ngeh, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ aˬ yawꞈ jawˇ gaˇ laˇ-awˇ ehˇ-eu, “Nawˇ aˬ gaˇ-euˬ baoˬ-ahˇ gʼoe-awˇ teu loꞈ-ehˇ mˇ te. Aˬ suˇ gʼaˬ neh nawˬ-ahˇ baoˬ biꞈ laꞈ taˬ.”

24Aˬ yawꞈ maꞈ-ahˇ Yeˬsuˇ ehˇ nehˬ-eu, “Ngaˇ gʼeh naw maꞈ-ahˇ tiˬ dawˬ naˇ haˬ la. Ngaˬ neh naˇ haˬ-euˬ dawˬ-ahˇ naw maꞈ ehˇ kʼoꞈ nehˬ laꞈ naˇ, ngaˇ aˬ gaˇ-euˬ baoˬ-ahˇ gʼoe-awˇ heu loꞈ-ehˇ mˇ luꞈ-eu gaˇ kawˆ, naw maꞈ-ahˇ ngaˇ ehˇ nehˬ ma. 25Yoˇhaˬ iˇ cuꞈ shawˇ-eu kʼoeˇ, aˬ gaˇ-euˬ baoˬ za-awˇ shawˇ ta. Miˬyehˇ neh bi shawˇ taˬ loˇ. Tsawˇ haˬ neh bi shawˇ taˬ loˇ.”

Kʼoeˇ ngeh, aˬ yawꞈ maꞈ yaw kaˬ heu loꞈ-ehˇ ja-eu meh. “Aˬ dui maꞈ aˬ joˆ-ehˇ ehˇ paˬ nga. ‘Miˬyehˇ neh bi shawˇ-euˬ meh’ lehˇ ehˇ naˇ, ‘Toˆ-ehˇ maˇ-iˬ, naw maꞈ aˬ jeˬ miˇ neh Yoˇhaˬ-ahˇ maˬ jah te’ lehˇ aˬ yawꞈ ehˇ laˇ tehꞈ-a. 26‘Tsawˇ haˬ neh bi shawˇ-euˬ meh’ lehˇ paˇ ehˇ lawˬ naˇ kʼawꞈ, tsawˇ haˬ aˇ maꞈ kʼoeˇ deuˬ-ahˇ aˬ dui guˆ paˬ-ehˇ paˇ gʼeh-eu meh. Aˬ jeˬ miˇ neh ehˇ naˇ, Yoˇhaˬ-aˬ, Miˬyehˇ gʼaˇ duˬ ngehˬ dah-eu tsawˇ haˬ meh lehˇ aˬ yawꞈ maꞈ jah duˬ taˬ-euˬ meh.” 27Kʼoeˇ miˇ neh, aˬ yawꞈ maꞈ Yeˬsuˇ-ahˇ ehˇ kʼoꞈ nehˬ-eu, “Nga maꞈ maˬ siˬ nya nya.”

Aˬ yawꞈ maꞈ-ahˇ Yeˬsuˇ ehˇ nehˬ-eu,“Toˆ-ehˇ ngeuˇ naˇ, ngaˇ aˬ gaˇ-euˬ baoˬ-ahˇ gʼoe-awˇ heu loꞈ-ehˇ mˇ luꞈ-eu gaˇ kawˆ, naw maꞈ-ahˇ ngaˇ maˬ ehˇ nehˬ.”

Mehˇ nmˇ nyiˬ gʼaˬ gaˇ kawˆ yaw jeˬ ma jeˬ

28Yeˬsuˇ paˇ ehˇ-eu, “Naw maꞈ aˬ joˆ-ehˇ noeˬ-eu nya. Tsawˇ haˬ tiˬ gʼaˬ aˬ li nyiˬ li jawˇ-eu meh. Aˬ li aˬ yuiꞈ gʼaˬ jawˇ gaˇ aˬ yawꞈ iˇ-awˇ, ‘Aˬ li-oˇ, iˬ nah aˬ gaꞈ yaˇ kmˇ-ahˇ gaˇ mˇ-iˇ de’ lehˇ kʼehˇ-euˬ meh. 29Aˬ li kʼoeˇ li, ‘Ngaˇ maˬ iˇ’ lehˇ ehˇ-eu meh. Ehˇ kʼawꞈ, aˬ yawꞈ noeˬ paˇ-awˇ, mˇ-iˇ-euˬ meh. 30Kʼoeˇ naˇ, aˬ li aˬ nyiˇ gʼaˬ jawˇ gaˇ aˬ yawꞈ paˇ iˇ-awˇ, aˬ yuiꞈ gʼaˬ-ahˇ kʼehˇ-euˬ loꞈ-ehˇ kʼehˇ-iˇ ngeh, ‘Ngaˇ iˇ ma da-oˇ’ lehˇ ehˇ-eu meh. Ehˇ kʼawꞈ, maˬ iˇ ni jawˇ-euˬ meh. 31Aˬ li kʼoeˇ nyiˬ li, aˬ geu gʼaˬ aˬ da-euˬ nui kʼahˇ mˇ-euˬ nga.”

Aˬ yawꞈ maꞈ ehˇ-eu, “Aˬ yuiꞈ gʼaˬ meh.”

Aˬ yawꞈ maꞈ-ahˇ Yeˬsuˇ ehˇ nehˬ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Kawˬ taꞈ-eu tsawˇ haˬ deuˬ hawˇ-eu meh maˬ laˇ deuˬ, naw maꞈ-euˬ aˬ hu Miˬyehˇ Miˇkʼahˬ-ahˇ ya uˇ leˇ meh. 32Aˬ jeˬ miˇ neh ehˇ naˇ, Yoˇhaˬ naw maꞈ jawˇ gaˇ oe-awˇ, yaw tsaˬ yaw dawˇ gaˇ ma mehˬ nehˬ le-euˬ kʼawꞈ, naw maꞈ aˬ yawꞈ-ahˇ maˬ jah-a. Ehˇ kʼawꞈ, kawˬ taꞈ-eu tsawˇ haˬ deuˬ hawˇ-eu meh maˬ laˇ deuˬ, aˬ yawꞈ-ahˇ jah-euˬ meh. Aˬ yawꞈ maꞈ kʼoeˇ loꞈ-ehˇ jah gaˇ naw maꞈ ya mawˇ kʼawꞈ, naw maꞈ nui ma maˬ paˇ-ehˇ, aˬ yawꞈ-ahˇ maˬ jah-a.

Aˬ gaꞈ yaˇ kmˇ mˇ paˆ paˆ-eu deuˬ gaˇ kawˆ yaw jeˬ ma jeˬ

(Maˬkuˆ 12.1-12; Luˇkaꞈ 20.9-19)

33Yeˬsuˇ ehˇ-eu, “Yaw jeˬ ma jeˬ yawˬ hmˬ yawˬ-ahˇ paˇ naˇ haˬ sheˇ. Baw leˬ tiˬ gʼaˬ jawˇ-eu meh. Aˬ yawꞈ aˬ gaꞈ gaꞈ yaˇ tiˬ yaˇ yaˇ-awˇ, yaˇ kmˇ mˇ jawˬ-awˇ, aˬ gaꞈ dzaˇ uiˇ nawˬ-eu duˬ kʼahˬ kʼahˬ-awˇ, loꞈ-eu nymˇ goˇ tiˬ nymˇ tsoˆ taˬ-euˬ meh. Kʼoeˇ naˇ, yaˬ kmˇ mˇ-eu deuˬ-ahˇ mˇ paˆ bi paˆ yaꞈ-awˇ, yawˬ kʼahˬ yawˬ miˇ yawˬ-ahˇ iˇ-euˬ meh. 34Aˬ gaꞈ aˇ siˬ pyaˆ yamˬ tsaˬ laˇ ngeh, yaˇ kmˇ mˇ paˆ paˆ-eu deuˬ jawˇ gaˇ aˬ yawꞈ-euˬ zaˬ kʼaˆ deuˬ-ahˇ kʼehˇ gʼeh-awˇ, aˬ yawꞈ-ahˇ oꞈ-eu aˬ gaꞈ aˇ siˬ bi pi laˬ-iˇ-euˬ meh. 35Aˬ gaꞈ yaˇ kmˇ mˇ paˆ paˆ-eu deuˬ neh aˬ yawꞈ-euˬ zaˬ kʼaˆ kʼoeˇ deuˬ-ahˇ nyehꞈ-awˇ, tiˬ gʼaˬ-ahˇ diˬ-awˇ, tiˬ gʼaˬ-ahˇ sehꞈ-awˇ, tiˬ gʼaˬ-ahˇ kʼaˬ lo neh biˬ-euˬ meh. 36Aˬ gaꞈ yaˇ kmˇ-euˬ yaw sahˇ kʼoeˇ gʼaˬ, yaw beh poˆ myaˆ maˬ tseˇ zaˬ kʼaˆ paˇ kʼehˇ gʼeh-euˬ meh. Kʼoeˇ ngeh poˆ kʼawꞈ, aˬ yawꞈ maꞈ neh yaw beh poˆ loꞈ-ehˇ paˇ bi jahˇ-euˬ meh. 37Aˇ saˬ saˬ ngeh poˆ jawˇ, ‘Ngaˬ li-ahˇ maˇ diˇ-aˬ, aˬ yawꞈ maꞈ yaw zeu baw-eu yaw duˬ baw tehꞈ-a’ lehˇ ehˇ-awˇ, aˬ yawꞈ-euˬ aˬ li-ahˇ kʼehˇ gʼeh-euˬ meh. 38Ehˇ kʼawꞈ, aˬ gaꞈ yaˇ kmˇ mˇ paˇ paˆ-eu deuˬ aˬ li kʼoeˇ gʼaˬ-ahˇ ya mawˇ ngeh, heu loꞈ-ehˇ ehˇ-eu meh. ‘Heu gʼaˬ-aˬ, aˬ gaꞈ yaˇ kmˇ yaw sahˇ-euˬ aˬ li ngaˇ. Oe-awˬ, aˬ yawꞈ-ahˇ sehꞈ kaˇ-euˇ. Aˬ yawꞈ-ahˇ oꞈ-eu jeˬ biˇ deuˬ aˬ dui maꞈ za tehꞈ-a.’ 39Kʼoeˇ naˇ, aˬ yawꞈ maꞈ aˬ yawꞈ-ahˇ nyehꞈ-awˇ, aˬ gaꞈ yaˇ kmˇ laꞈ nyiˇ biˬ doˆ-awˇ sehꞈ-euˬ meh.

40Aˬ gaꞈ yaˇ kmˇ-euˬ yaw sahˇ kʼoeˇ gʼaˬ oe ngeh jawˇ, yaˇ kmˇ mˇ-eu kʼoeˇ deuˬ-ahˇ aˬ joˆ-ehˇ jahˇ nehˬ nmˇ.” 41Aˬ yawꞈ maꞈ ehˇ-eu, “Haiˬ-eu tsawˇ haˬ kʼoeˇ deuˬ-ahˇ aˬ yawꞈ sehꞈ-eu yaw duˬ baw tehꞈ-a. Kʼoeˇ naˇ, aˇ yamˬ tsaˬ laˇ ngeh yaw sahˇ gʼaˬ-ahˇ oꞈ-eu shaˬ bymˇ biꞈ kʼoꞈ-eu siˬ nya-eu aˬ gaꞈ yaˇ kmˇ mˇ paˆ paˆ-eu tsawˇ haˬ yawˬ deuˬ yawˬ-ahˇ, aˬ gaꞈ yaˇ kmˇ paˇ bi mˇ paˆ tehꞈ-a.”

42Aˬ yawꞈ maꞈ-ahˇ Yeˬsuˇ ehˇ nehˬ-eu, “Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ naw maꞈ tiˬ jawˇ-iˬ maˬ gui haw-aˬ loˇ.

‘Nymˇ gawˬ-eu deuˬ maˬ geuꞈ nahˇ-ehˇ,

baꞈ dzeh taˬ-euˬ kʼaˬ lo kʼoeˇ siˬ,

kʼaˬ lo dawˬ tawˆ maˬ tseˇ poeˬ-eu,

laꞈ coeˇ lo ziꞈ pyeuꞈ laˇ-euˬ meh.

SahˬpaˬMiˬyehˇ neh jahˇ-euˬ kʼoeˇ,

aˇ naˆ ni zahˬ leˇ duˬ jaˆ nga.’

43“Kʼoeˇ miˇ neh, naw maꞈ-ahˇ ngaˇ ehˇ nehˬ nyaˇ. Miˬyehˇ Miˇkʼahˬ naw maꞈ-euˬ laꞈ-ahˇ neh yuˇ doˆ-awˇ, yaw tsaˬ yaw dawˇ jeˬ mˇ-eu tsawˇ jeuˬ tiˬ jeuˬ-ahˇ a nehˬ tehꞈ-a.”#21.43 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ heu hmˬ ahˇ-eu meh. 21.44: Kʼaˬ lo heu siˬ kʼoeˇ taˆ kʼaˇ ga daˆ-euˬ tsawˇ haˬ deuˬ, ga paˆ ga shaˆ jiˇ-awˇ, kʼaˬ lo heu siˬ neh kʼaˇ bi ga daˆ-euˬ tsawˇ haˬ deuˬ, meuˇ-iˇ loeˇ-iˇ tehꞈ-a.

45Piˇ ma aˬ yuiꞈ deuˬ hawˇ-eu Paˬliˬsehˇ deuˬ, Yeˬsuˇ yaw jeˬ ma jeˬ ja gaˇ gaˬ-awˇ, aˬ yawꞈ maꞈ gaˇ kawˆ ehˇ-eu nya lehˇ noeˬ siˬ-euˬ meh. 46Kʼoeˇ miˇ neh, aˬ yawꞈ maꞈ aˬ yawꞈ-ahˇ nyehꞈ-eu lehˇ leh jeh-euˬ meh. Ehˇ kʼawꞈ, Yeˬsuˇ-ahˇ Miˬyehˇ gʼaˇ duˬ ngehˬ dah-eu tsawˇ haˬ meh lehˇ jah luꞈ-eu tsawˇ haˬ aˇ maꞈ kʼoeˇ deuˬ-ahˇ aˬ yawꞈ maꞈ guˆ-eu meh.

Currently Selected:

Maꞈtehˬ 21: AHK

Highlight

Copy