Maꞈtehˬ 20

Aˬ gaꞈ yaˇ kmˇ-ahˇ gaˇ mˇ-eu deuˬ gaˇ kawˆ

1“Mˬtaˆ Miˇkʼahˬ-aˬ, heu gaˇ duˇ leˇ-eu meh. Tsawˇ haˬ tiˬ gʼaˬ uˬ shawˬ yaw naꞈ-ehˇ doˆ-iˇ-awˇ, aˬ yawꞈ-euˬ aˬ gaꞈ yaˇ kmˇ laꞈ kʼoeˇ gaˇ bi mˇ-eu tsawˇ haˬ poˆ-iˇ-euˬ meh. 2Tiˬ nah mˇ-euˬ gʼaˬ gaˇ poeˬ pyuˇ maˇ byaˆ tiˬ byaˆ biꞈ ma lehˇ ja tsaˬ-awˇ, aˬ gaꞈ yaˇ kmˇ laꞈ kʼoeˇ gaˇ bi mˇ-iˇ-euˬ meh. 3Aˬ cawˬ yaˇ smˇ iˇ tsiˇ jiˇ ngeh yamˬ-ahˇ, lehˆ lehˆ kawˆ paw aˬ yawꞈ paˇ iˇ haw ngeh, gaˇ mˇ-eu maˬ jaˆ-ehˇ yawꞈ luꞈ-eu tsawˇ haˬ tiˬ deuˬ-ahˇ aˬ yawꞈ mawˇ-euˬ meh. 4‘Naw maꞈ gʼeh ngaˬ-euˬ aˬ gaꞈ yaˇ kmˇ laꞈ kʼoeˇ gaˇ mˇ-iˇ-awˬ. Gʼaˬ gaˇ poeˬ haw tsaˬ nehˬ ma’ lehˇ, tsawˇ haˬ kʼoeˇ deuˬ-ahˇ aˬ yawꞈ ehˇ nehˬ ngeh, aˬ yawꞈ maꞈ iˇ-awˇ gaˇ mˇ-iˇ-euˬ meh. 5Nah loˆ ceh laˇ ngeh tiˬ poˆ hawˇ-eu, nahˇ ma ga kʼaˇ-iˇ ngeh tiˬ poˆ aˬ yawꞈ paˇ iˇ-awˇ, tsawˇ haˬ paˇ kʼehˇ lahˬ-iˇ-awˇ, aˬ gaꞈ yaˇ kmˇ-ahˇ gaˇ bi mˇ-iˇ-euˬ meh. 6Uˬ ciꞈ paw kuiˬ dzaˇ zaꞈ dzaˇ biꞈ yamˬ keuˆ laˇ ngeh, lehˆ lehˆ kawˆ-ahˇ aˬ yawꞈ tiˬ poˆ paˇ iˇ-awˇ, tsawˇ haˬ tiˬ deuˬ gaˇ mˇ-eu maˬ jaˆ-ehˇ yawꞈ luꞈ gaˇ paˇ ya mawˇ-euˬ meh. ‘Aˬ jeˬ miˇ neh naw maꞈ nah ga-ehˇ tiˬ jeˬ-iˬ maˬ mˇ ni jawˇ te’ lehˇ aˬ yawꞈ naˇ haˬ-euˬ meh. 7‘Tsawˇ haˬ tiˬ gʼaˬ-iˬ nga maꞈ-ahˇ gaˇ bi mˇ-eu lehˇ maˬ poˆ le-euˬ miˇ neh, heu loꞈ-ehˇ jawˇ luꞈ-eu ma’ lehˇ aˬ yawꞈ maꞈ ehˇ-eu meh. ‘Toˆ-ehˇ ngeuˇ naˇ, naw maꞈ jiˇ ngaˬ-euˬ aˬ gaꞈ yaˇ kmˇ-ahˇ iˇ-awˇ gaˇ mˇ-iˇ-awˬ’ lehˇ, tsawˇ haˬ kʼoeˇ deuˬ-ahˇ aˬ yawꞈ ehˇ nehˬ-euˬ meh.

8“Uˬ ciꞈ ciꞈ le ngeh, aˬ gaꞈ yaˇ kmˇ-euˬ yaw sahˇ gʼaˬ, aˬ gaꞈ yaˇ kmˇ laꞈ kʼoeˇ gaˇ mˇ gaˇ aˬ yuiꞈ geuꞈ-awˇ bi haw bi pyaˆ-euˬ gʼaˬ-ahˇ kuˇ-awˇ ehˇ nehˬ-eu, ‘Gaˇ mˇ le-euˬ tsawˇ haˬ deuˬ-ahˇ kuˇ-awˇ gʼaˬ gaˇ poeˬ biꞈ nehˬ-awˬ. Jeˬ nah nah saˬ mˇ le-euˬ deuˬ-ahˇ jeˬ huˬ biꞈ-awˇ, jeˬ hu hu saˬ mˇ le-euˬ deuˬ-ahˇ biꞈ saˬ saˬ-awˬ.’ 9Uˬ ciꞈ paw kuiˬ dzaˇ zaꞈ dzaˇ biꞈ ngeh yamˬ-ahˇ hawˇ-eu mˇ le-euˬ deuˬ-ahˇ, tiˬ gʼaˬ-ahˇ pyuˇ maˇ byaˆ tiˬ byaˆ biꞈ-euˬ meh. 10Aˬ cawˬ jeˬ hu mˇ le-euˬ deuˬ gʼaˬ gaˇ poeˬ yuˇ-eu lehˇ laˇ ngeh, aˬ yawꞈ maꞈ aˬ cawˬ myaˆ maˬ tseˇ za dzehˬ tehꞈ-a lehˇ noeˬ-euˬ meh. Ehˇ kʼawꞈ, aˬ yawꞈ maꞈ gʼeh, tiˬ gʼaˬ-euˬ pyuˇ maˇ byaˆ tiˬ byaˆ za-euˬ tehꞈ meh. 11Aˬ yawꞈ maꞈ-ahˇ gʼaˬ gaˇ poeˬ biꞈ nehˬ ngeh, aˬ gaꞈ yaˇ kmˇ yaw sahˇ gʼaˬ-ahˇ aˬ yawꞈ maꞈ gʼawˬ mya jeˬ toˇ-eu meh. 12‘Jeˬ nah nah saˬ oe-awˇ mˇ le-euˬ deuˬ naˬ liˬ tiˬ laꞈ mˇ-euˬ tehꞈ meh. Nga maꞈ-aˬ, nah ga-ehˇ nahˇ tsaˇ lawꞈ lawꞈ-ehˇ mˇ-euˬ ma. Ehˇ kʼawꞈ, nawˇ gʼaˬ gaˇ poeˬ biꞈ laꞈ ngeh, tiˬ kawˆ myaˆ ni tehꞈ-ehˇ biꞈ laꞈ-eu nga’ lehˇ ehˇ-eu meh.

13“Tsawˇ haˬ kʼoeˇ deuˬ laꞈ kʼoeˇ tiˬ gʼaˬ-ahˇ, aˬ gaꞈ yaˇ kmˇ yaw sahˇ gʼaˬ heu loꞈ-ehˇ ehˇ kʼoꞈ nehˬ-euˬ meh. ‘Naw maꞈ-ahˇ ngaˇ mehˇ shuiˇ shuiˇ-euˬ maˬ ngeuˇ. Tiˬ nah-euˬ gʼaˬ gaˇ poeˬ pyuˇ maˇ byaˆ tiˬ byaˆ sawˇ-awˇ mˇ-eu gʼaˇ duˬ naw maꞈ nui ma tsaˬ-euˬ meh. 14Nymˬ-mˇ naw maꞈ-euˬ gʼaˬ gaˇ poeˬ yuˇ-awˇ gʼoꞈ-iˇ-awˬ. Mˇ saˬ saˬ le-euˬ tsawˇ haˬ heu deuˬ-ahˇ kʼawꞈ, naw maꞈ-ahˇ biꞈ-euˬ myaˆ ni ngaˇ biꞈ mawꞈ-eu nui ma ahˇ-eu ma. 15Ngaˬ-euˬ pyuˇ ngaˇ noeˬ-euˬ loꞈ-ehˇ maˬ biꞈ kʼmˬ ta loˇ. Ngaˇ aˬ cawˬ-ahˇ gʼawˬ mya ni biꞈ mawꞈ-eu nui ma ahˇ gaˇ naw maꞈ myaˆ naˆ-eu nya loˇ’ lehˇ ehˇ nehˬ-euˬ meh.

16“Kʼoeˇ gaˇ duˇ ni, heu ziˇ-ahˇ aˬ cawˬ mehˬ hu jawˇ-eu tsawˇ haˬ-aˬ, aˬ kaˇ kaˇ ziˇ-ahˇ aˬ cawˬ mehˬ nah ya jawˇ-awˇ, heu ziˇ-ahˇ aˬ cawˬ mehˬ nah jawˇ-eu tsawˇ haˬ-aˬ, aˬ kaˇ kaˇ ziˇ-ahˇ aˬ cawˬ mehˬ hu ya jawˇ tehꞈ-a.”

Yeˬsuˇ aˬ yawꞈ ya shiˇ-eu gaˇ kawˆ smˬ poˆ tiˬ poˆ paˇ ehˇ-eu

(Maˬkuˆ 10.32-34; Luˇkaꞈ 18.31-34)

17Yeˬsuˇ Yeˬluˇsaˬlehˬ meuˬ-ahˇ le luꞈ ngeh, aˬ yawꞈ-euˬ zaˬ lahˇ deuˬ-ahˇ sheuˬ ceuˆ-awˇ cah-eu laꞈ kʼoeˇ, aˬ cawˬ maˬ bi gaˬ ni heu loꞈ-ehˇ ehˇ nehˬ-euˬ meh. 18“Naˇ haˬ sheˇ. Aˬ dui maꞈ Yeˬluˇsaˬlehˬ meuˬ-ahˇ le luꞈ-eu ma. Kʼoeˇ gaˇ, Tsawˇhaˬ-euˬ Zaˬmaˇ-ahˇ, piˇ ma aˬ yuiꞈ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ-euˬ aˬ laꞈ laꞈ kʼoeˇ aˬ cawˬ a nehˬ-awˇ, aˬ yawꞈ ya shiˇ ni aˬ cawˬ yaˇ kʼaˬ daˇ tehꞈ-a. 19Kʼoeˇ naˇ, Miˬyehˇ-ahˇ maˬ siˬ nya-eu aˬ cawˬ tsawˇ jeuˬ-euˬ aˬ laꞈ laꞈ kʼoeˇ a nehˬ-awˇ, aˬ yawꞈ-ahˇ yehˬ bawˬ sehˇ lu-ehˇ bi ehˇ niˇ gʼa-awˇ, yahˬ caˆ neh bi juiꞈ-awˇ, laꞈ yaꞈ kʼoeˇ taˆ bi taꞈ sehꞈ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ aˬ yawꞈ-ahˇ paˇ bi gʼoꞈ dehꞈ laˇ tehꞈ-a.”

Yaˬkoˆ hawˇ-eu Yoˇhaˬ-euˬ aˬ ma nuiˇ duˬ shaˇ-euˬ

(Maˬkuˆ 10.35-45)

20Kʼoeˇ naˇ, Zeˬbeˬdehˇ-euˬ miˬ zaˬ-aˬ, aˬ yawꞈ-euˬ aˬ li nyiˬ li sheuˬ-awˇ, aˬ nyaꞈ nmˇ gʼaˇ duˬ tiˬ jeˬ paˬ shaˇ-eu lehˇ, Yeˬsuˇ-euˬ mehˬ shi pawˬ tsuiꞈ pawˬ dmˬ dmˬ-euˬ meh.

21Yeˬsuˇ aˬ yawꞈ-ahˇ ehˇ nehˬ-eu, “Nawˇ aˬ jeˬ shaˇ mawꞈ te.”

Aˬ yawꞈ ehˇ-eu, “Nawˇ sahˬ paˬ keuˆ leˇ ngeh, ngaˬ li heu nyiˬ li-ahˇ, nawˬ-euˬ aˇ maˇ paw tiˬ gʼaˬ bi nuiˇ-awˇ, aˇ caˇ paw tiˬ gʼaˬ bi nuiˇ ma lehˇ, ngaˬ-ahˇ tiˬ poˆ ehˇ tsehˆ nehˬ laꞈ-awˬ.”

22Aˬ nyaꞈ nmˇ-ahˇ Yeˬsuˇ ehˇ nehˬ-eu, “Naw nyaꞈ nmˇ shaˇ-eu jeˬ-ahˇ naw nyaꞈ nmˇ maˬ siˬ nya-a. Ngaˇ dawˇ-eu lehˇ gʼeh-eu shaˬ zahˬ naꞈ-eu kʼmˬ maˬ-ahˇ naw nyaꞈ nmˇ dawˇ coeˇ ma loˇ.”

Aˬ nyaꞈ nmˇ ehˇ-eu, “Dawˇ coeˇ ma.”

23Yeˬsuˇ ehˇ-eu, “Naw nyaꞈ nmˇ ngaˬ-euˬ kʼmˬ maˬ-ahˇ aˬ diˇ aˬ maˇ dawˇ tehꞈ-a. Ehˇ kʼawꞈ, ngaˬ-euˬ aˇ maˇ paw hawˇ-eu aˇ caˇ paw bi nuiˇ-eu tsawˇ haˬ-ahˇ ngaˇ tseˇ geuꞈ-eu aˬ kawˬ-aˬ maˬ jaˆ. Nuiˇ duˬ kʼoeˇ deuˬ-aˬ, ngaˬ Da neh lehˬ hmˬ taˬ-euˬ tsawˇ haˬ deuˬ gʼaˇ duˬ meh.”

24Kʼoeˇ loꞈ-ehˇ ehˇ gaˇ zaˬ lahˇ nui deuˬ tseˇ gʼaˬ ya gaˬ ngeh, aˬ nyaꞈ nmˇ-ahˇ nui ma pehˇ-eu meh. 25Kʼoeˇ miˇ neh, aˬ yawꞈ maꞈ dawˬ tawˆ luꞈ-ahˇ Yeˬsuˇ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Aˬ cawˬ tsawˇ jeuˬ-euˬ sahˬ paˬ sahˬ ma deuˬ-aˬ, miˇ kʼahˬ zaˬ deuˬ kʼoeˇ taˆ zuiˆ-eu baoˬ jaˆ-awˇ, aˬ yuiꞈ aˬ tsu geuꞈ-awˇ uˆ lahˇ-eu deuˬ kʼawꞈ, yawˬ ha kʼaˇ noeˬ-euˬ loꞈ-ehˇ uˆ lahˇ-eu baoˬ tiˬ byah ni jaˆ meh. 26Ehˇ kʼawꞈ, naw maꞈ kʼoeˇ loꞈ-ehˇ maˬ ya geuꞈ-a. Naw maꞈ laꞈ kʼoeˇ, aˬ cawˬ naˆ maˬ tseˇ huiˬ mawꞈ mahˇ mawꞈ-eu gʼaˬ-aˬ, aˬ cawˬ-euˬ myawˬ kʼehˇ ya gʼoˆ tehꞈ-a. 27Naw maꞈ laꞈ kʼoeˇ aˬ cawˬ kʼoeˇ taˆ aˬ yuiꞈ aˬ tsu geuꞈ mawꞈ-eu gʼaˬ-aˬ, aˬ cawˬ-euˬ zaˬ kʼaˆ ya geuꞈ tehꞈ-a. 28Tsawˇhaˬ-euˬ Zaˬmaˇ kʼawꞈ, aˬ cawˬ neh bi mˇ cu-eu gʼaˇ duˬ oe-euˬ maˬ ngeuˇ-a. Aˬ cawˬ gʼaˇ duˬ mˇ le-euˬ uˬ taꞈ, tsawˇ haˬ gʼawˬ mya ni-ahˇ ka kʼoꞈ-eu gʼaˇ duˬ shiˇ dah le-eu lehˇ oe-euˬ meh.”

Myaˆ behꞈ nyiˬ gʼaˬ-ahˇ Yeˬsuˇ laˆ taˬ nehˬ-euˬ

(Maˬkuˆ 10.46-52; Luˇkaꞈ 18.35-43)

29Yeˬsuˇ hawˇ-eu aˬ yawꞈ-euˬ zaˬ lahˇ deuˬ Yeˬliˇkoˇ meuˬ-ahˇ neh doˆ-iˇ ngeh, aˬ yawꞈ maꞈ-euˬ mehˬ nah tsawˇ haˬ aˇ maꞈ maꞈ ma caw teh luꞈ-eu meh. 30Gaˇ ma gaˇ dzeˇ nuiˇ luꞈ-eu myaˆ behꞈ nyiˬ gʼaˬ, Yeˬsuˇ iˇ luꞈ-eu teˇ saˇ gaˬ-awˇ, “Daˬbiˇ-euˬ Zaˬmaˇ-oˇ, nga nyaꞈ-ahˇ gʼawˬ shaˬ gaˬ nehˬ laꞈ-awˬ” lehˇ guˇ-eu meh.

31Tsawˇ haˬ aˇ maꞈ maꞈ ma kʼoeˇ deuˬ aˬ yawꞈ nyaꞈ-ahˇ dehˬ-awˇ, ciˬ cuˇ ni jawˇ-awˬ lehˇ ehˇ nehˬ-euˬ meh. Ehˇ kʼawꞈ, aˬ yawꞈ nyaꞈ maˬ naˇ haˬ-ehˇ, “Daˬbiˇ-euˬ Zaˬmaˇ-oˇ, nga nyaꞈ-ahˇ gʼawˬ shaˬ gaˬ nehˬ laꞈ-awˬ” lehˇ, yaw beh poˆ naˇ maˬ tseˇ guˇ kʼaˆ laˇ-euˬ meh.

32Yeˬsuˇ naˬ leˇ-awˇ, aˬ yawꞈ nyaꞈ-ahˇ kuˇ-awˇ ehˇ nehˬ-eu, “Naw nyaꞈ gʼaˇ duˬ ngaˇ aˬ jeˬ bi jahˇ nehˬ mawꞈ-eu nya.”

33Aˬ yawꞈ nyaꞈ ehˇ-eu, “Sahˬpaˬ-oˇ, nga nyaꞈ-euˬ myaˆ nuiˆ mawˇ laˇ ni bi jahˇ nehˬ mawꞈ miˇ-a.”

34Aˬ yawꞈ nyaꞈ-ahˇ Yeˬsuˇ gʼawˬ shaˬ haw gaˬ-awˇ, myaˆ nuiˆ-ahˇ toeˬ ciˆ nehˬ ngeh, aˬ yawꞈ nyaꞈ-euˬ myaˆ nuiˆ tiˬ poˆ tehꞈ-ehˇ mawˇ laˇ-awˇ, aˬ yawꞈ-euˬ mehˬ nah caw teh gʼeh-euˬ meh.

Currently Selected:

Maꞈtehˬ 20: AHK

Highlight

Copy