Maꞈtehˬ 22

Oeˇ mˇ baˇ-eu gaˇ kawˆ yaw jeˬ ma jeˬ

(Luˇkaꞈ 14.15-24)

1Yeˬsuˇ yaw jeˬ ma jeˬ ja-awˇ, aˬ yawꞈ maꞈ-ahˇ heu loꞈ-ehˇ paˇ ehˇ nehˬ-euˬ meh. 2“Mˬtaˆ Miˇkʼahˬ-aˬ, heu loꞈ-ehˇ duˇ-eu meh. Sahˬ paˬ tiˬ gʼaˬ aˬ yawꞈ-euˬ aˬ li oeˇ mˇ baˇ-eu bawˬ-iˬ gʼeh-eu gʼaˇ duˬ, lehˬ hmˬ-euˬ meh. 3Aˬ yawꞈ-euˬ zaˬ kʼaˆ deuˬ-ahˇ pyehˬ gʼeh-awˇ, oeˇ mˇ baˇ-eu bawˬ-iˬ-ahˇ bi laˇ-eu gʼaˇ duˬ kuˇ taˬ-euˬ tsawˇ haˬ deuˬ-ahˇ bi kuˇ laˬ-iˇ-euˬ meh. Ehˇ kʼawꞈ, aˬ yawꞈ maꞈ maˬ laˇ-a. 4Zaˬ kʼaˆ yawˬ deuˬ yawˬ-ahˇ aˬ yawꞈ paˇ pyehˬ gʼeh-awˇ, ‘Dzaˬ byawˇ lehˬ hmˬ dah taˬ-euˬ ma. Mawˇ neˇ mawˇ gaw deuˬ hawˇ-eu, cu tsuˇ taˬ-euˬ jeˬ zaˬ deuˬ sehꞈ-awˇ, yawˬ jeˬ na luꞈ laˆ dah jiˇ taˬ-euˬ ma. Oeˇ mˇ baˇ-eu bawˬ-iˬ-ahˇ laˇ-awˬ’ lehˇ paˇ bi kuˇ-iˇ-euˬ meh. 5Ehˇ kʼawꞈ, kuˇ taˬ-euˬ tsawˇ haˬ kʼoeˇ deuˬ kuˇ-euˬ gaˇ tiˬ pawꞈ-iˬ maˬ taˬ huiˬ ni, tiˬ paˆ na deuˬ yaˇ ngeh iˇ-awˇ, tiˬ paˆ na deuˬ jeˬ gaꞈ gaꞈ-iˇ-euˬ meh. 6Tiˬ paˆ na deuˬ-aˬ, aˬ yawꞈ-euˬ zaˬ kʼaˆ kʼoeˇ deuˬ-ahˇ nyehꞈ-awˇ, yehˬ bawˬ sehˇ lu-ehˇ jahˇ-awˇ sehꞈ-euˬ meh. 7Kʼoeˇ ngeh jawˇ, sahˬ paˬ kʼoeˇ gʼaˬ nui ma pehˇ laˇ-awˇ, aˬ yawꞈ-euˬ guiˇ maꞈ pyehˬ gʼeh-awˇ, aˬ yawꞈ-euˬ zaˬ kʼaˆ deuˬ-ahˇ sehꞈ-euˬ tsawˇ haˬ kʼoeˇ deuˬ-ahˇ bi sehꞈ-awˇ, aˬ yawꞈ maꞈ-euˬ meuˬ-ahˇ miˬ dzaˬ bi keuˬ dzeh-euˬ meh. 8Kʼoeˇ naˇ, aˬ yawꞈ-euˬ zaˬ kʼaˆ deuˬ-ahˇ aˬ yawꞈ ehˇ nehˬ-eu, ‘Oeˇ mˇ baˇ-eu dah laˇ-euˬ meh. Ehˇ kʼawꞈ, kuˇ taˬ-euˬ tsawˇ haˬ deuˬ oeˇ mˇ baˇ-eu bawˬ-iˬ heu-ahˇ laˇ-eu maˬ geuˇ nga. 9Kʼoeˇ miˇ neh, gaˇ jawˬ doe ni iˇ-awˇ, kʼaˇ mawˇ le-eu tsawˇ haˬ deuˬ-ahˇ, oeˇ mˇ baˇ-eu bawˬ-iˬ gʼeh gaˇ laˇ-awˬ lehˇ kuˇ laˬ-iˇ-awˬ.’ 10Kʼoeˇ ngeh, zaˬ kʼaˆ deuˬ gaˇ jawˬ doe ni iˇ-awˇ, kʼaˇ tahˬ puˬ le-eu tsawˇ haˬ deuˬ-ahˇ, tsawˇ muiˬ tsawˇ doeˇ maˬ tseˇ ni, oeˇ mˇ baˇ-eu sehˬ gʼawˆ tiˬ byah ni kuˇ uiˬ laꞈ-euˬ meh.

11“Sahˬ paˬ kʼoeˇ gʼaˬ uˇ le-awˇ, daˬ yah deuˬ-ahˇ haw le ngeh, oeˇ mˇ baˇ gaˇ laˇ ngeh ya dm-eu mehˬ tsoeˬ maˬ dm taˬ-euˬ tsawˇ haˬ tiˬ gʼaˬ-ahˇ haw mawˇ-euˬ meh. 12‘Cawˬ-oˇ, oeˇ mˇ baˇ gaˇ kʼaˇ laˇ-eu tsawˇ haˬ deuˬ ya dm-eu mehˬ tsoeˬ maˬ dm ni, nawˇ heu gaˇ aˬ joˆ-ehˇ laˇ uˇ-awˇ jawˇ te’ lehˇ sahˬ paˬ aˬ yawꞈ-ahˇ naˇ haˬ kʼawꞈ, tsawˇ haˬ kʼoeˇ gʼaˬ dawˬ maˬ tmˇ-a. 13‘Aˬ yawꞈ-ahˇ kuiˇ cuꞈ laꞈ cuˬ cuꞈ-awˇ, laꞈ nyiˇ paw yaw zahˇ-ahˇ baꞈ dzeh-awˬ. Kʼoeˇ gaˇ aˬ yawꞈ ngoeˇ ngoeˇ-ehˇ, seuˬ teuꞈ teuꞈ-ehˇ shaˬ luꞈ-uˇ.’ lehˇ, zaˬ kʼaˆ kʼoeˇ deuˬ-ahˇ sahˬ paˬ ehˇ nehˬ-euˬ meh. 14“Kuˇ-euˬ tsawˇ haˬ yaw myaˬ kʼawꞈ, tseˇ doˆ-euˬ tsawˇ haˬ ui cuiˆ tehꞈ meh.”

Kawˬ doˆ-eu gaˇ kawˆ Yeˬsuˇ-ahˇ naˇ haˬ-eu

(Maˬkuˆ 12.13-17; Luˇkaꞈ 20.20-26)

15Kʼoeˇ naˇ, Paˬliˬsehˇ deuˬ doˆ-iˇ-awˇ, Yeˬsuˇ dawˬ bi ngehˬ bahˬ ni, dawˬ lahˇ ju kʼmˇ-eu gʼaˇ duˬ bawˬ dzaˬ-euˬ meh. 16Aˬ yawꞈ maꞈ-euˬ zaˬ lahˇ tiˬ paˆ na deuˬ hawˇ-eu, Heˬloˆ aˇ muˇ#22.16 ‘Heˬloˆ aˇ muˇ’ lehˇ ehˇ-eu-aˬ, sahˬ paˬ Heˬloˆ-ahˇ nui ma gm-awˇ, Yeˬsuˇ-ahˇ muiˇ-eu aˇ muˇ tiˬ muˇ-euˬ tsawˇ myahˇ meh. -ahˇ uˇ-eu tsawˇ haˬ tiˬ paˆ na deuˬ-ahˇ, Yeˬsuˇ jawˇ gaˇ aˬ yawꞈ maꞈ pyehˬ gʼeh-euˬ meh. Aˬ yawꞈ maꞈ ehˇ-eu, “Saˬ laˬ-oˇ, nawˇ-aˬ, dawˇ coe ni ehˇ-eu tsawˇ haˬ meh lehˇ nga maꞈ siˬ nya ma. Tsawˇ haˬ zaˬ-euˬ myaˆ pyawˬ-ahˇ nawˇ maˬ haw-eu uˬ taꞈ, aˬ cawˬ noeˬ doeˇ laˇ gaˇ nawˇ maˬ yahˇ ni, tsawˇ haˬ zaˬ gʼaˇ duˬ Miˬyehˇ-euˬ nui kʼahˇ aˬ joˆ-ehˇ jaˆ-eu gaˇ kawˆ, dawˇ coe ni mehˬ-eu meh. 17Teu miˇ neh, nawˇ aˬ joˆ-ehˇ noeˬ-eu gaˇ kawˆ nga maꞈ-ahˇ tiˬ poˆ ehˇ nehˬ laꞈ sheˇ. Loˇmaˆ sahˬ paˬ-ahˇ kawˬ doˆ nehˬ-eu kʼoeˇ, aˬ dui-euˬ Zahˇ dawˬ kʼoꞈ dawˬ-ahˇ bahˬ meh loˇ, maˬ bahˬ-a loˇ.”

18Ehˇ kʼawꞈ, aˬ yawꞈ maꞈ yaw doeˇ jahˇ mawꞈ-eu nui ma laꞈ gʼoꞈ ahˇ gaˇ Yeˬsuˇ siˬ nya-awˇ ehˇ-eu, “Awꞈ-aꞈ tahˬ kʼoˬ-ahˇ duˇ-eu tsawˇ haˬ#22.18 ‘Awꞈ-aꞈ tahˬ kʼoˬ-ahˇ duˇ-eu tsawˇ haˬ’ lehˇ ehˇ-eu dawˬ tsuiꞈ 6.3-ahˇ haw-awˬ. deuˬ-oˇ, aˬ jeˬ miˇ neh naw maꞈ ngaˬ-ahˇ lahˇ ju kʼmˇ paꞈ-eu lehˇ leh jeh te. 19Kawˬ taꞈ gaˇ biꞈ-eu pyuˇ maˇ byaˆ tiˬ byaˆ hehˇ laꞈ haw sheˇ.”

Kʼoeˇ ngeh, aˬ yawꞈ maꞈ aˬ yawꞈ-ahˇ pyuˇ maˇ byaˆ tiˬ byaˆ biꞈ nehˬ-euˬ meh.

20Aˬ yawꞈ maꞈ-ahˇ aˬ yawꞈ ehˇ-eu, “Heu gaˇ ahˇ-eu heu aˬ suˇ gʼaˬ-euˬ aˇ baˇ nga. Heu gaˇ boꞈ taˬ-euˬ heu aˬ suˇ gʼaˬ-euˬ tsawˇ myahˇ nga.”

21Aˬ yawꞈ maꞈ ehˇ-eu, “Loˇmaˆ sahˬ paˬ-euˬ aˇ baˇ hawˇ-eu tsawˇ myahˇ nga.”

Yeˬsuˇ aˬ yawꞈ maꞈ-ahˇ ehˇ nehˬ-eu, “Toˆ-ehˇ ngeuˇ naˇ, Loˇmaˆ sahˬ paˬ-euˬ myawˬ Loˇmaˆ sahˬ paˬ-ahˇ biꞈ-awˇ, Miˬyehˇ-euˬ myawˬ Miˬyehˇ-ahˇ biꞈ-awˬ.”

22Dawˬ kʼoeˇ dawˬ-ahˇ aˬ yawꞈ maꞈ ya gaˬ ngeh, zahˬ leˇ jiˇ-awˇ, Yeˬsuˇ jawˇ gaˇ neh doˆ-iˇ-euˬ meh.

Gʼoꞈ dehꞈ laˇ-eu gaˇ kawˆ Yeˬsuˇ-ahˇ naˇ haˬ-euˬ

(Maˬkuˆ 12.18-27; Luˇkaꞈ 20.27-40)

23Kʼoeˇ ngeh nah, shiˇ-euˬ tsawˇ haˬ deuˬ maˬ gʼoꞈ dehꞈ laˇ nya-aˇ lehˇ ehˇ-eu Saˬduˬgehˇ deuˬ Yeˬsuˇ jawˇ gaˇ laˇ-awˇ, heu loꞈ-ehˇ naˇ haˬ-euˬ meh. 24“Saˬ laˬ-oˇ, Moˇseˬ neh ehˇ taˬ-euˬ heu loꞈ-ehˇ jaˆ-eu meh. ‘Tsawˇ haˬ tiˬ gʼaˬ zaˬ maˬ jawˇ le mi naˆ-ehˇ shiˇ naˇ, aˬ yawꞈ-euˬ tsuiꞈ maˬ ya bi dahˬ-iˇ-eu gʼaˇ duˬ, aˬ yawꞈ-euˬ miˬ zaˬ-ahˇ aˬ yawꞈ-euˬ aˬ nyiˇ paˇ ya bi sheuˬ meh’ lehˇ ehˇ taˬ-euˬ meh. 25Nga maꞈ nehˬ-ehˇ mehˇ nmˇ shiꞈ gʼaˬ jawˇ-eu meh. Aˬ yuiꞈ yuiꞈ saˬ gʼaˬ miˬ zaˬ sheuˬ-awˇ, zaˬ maˬ jawˇ le mi naˆ-ehˇ shiˇ-euˬ meh. Kʼoeˇ naˇ, aˬ nyiˇ gʼaˬ aˬ yawꞈ-euˬ miˬ zaˬ-ahˇ paˇ sheuˬ-euˬ meh. 26Kʼoeˇ gʼaˬ kʼawꞈ, zaˬ maˬ jawˇ le mi naˆ-ehˇ paˇ shiˇ-euˬ meh. Mehˇ nmˇ tiˬ gʼaˬ saˇ-iˬ tiˬ gʼaˬ, shiꞈ gʼaˬ-ahˇ keuˆ ni kʼoeˇ loꞈ-ehˇ shiˇ jiˇ-euˬ meh. 27Aˇ saˬ saˬ laˇ ngeh, zaˬ miˬ zaˬ kʼoeˇ gʼaˬ kʼawꞈ shiˇ-euˬ meh. 28Shiˇ-euˬ tsawˇ haˬ deuˬ gʼoꞈ dehꞈ laˇ ngeh nah, shiꞈ mehˇ nmˇ luꞈ-ahˇ dahˬ dzaˬ-iˇ-euˬ zaˬ miˬ zaˬ kʼoeˇ gʼaˬ, aˬ geu gʼaˬ-euˬ miˬ zaˬ geuꞈ nmˇ.”

29Aˬ yawꞈ maꞈ-ahˇ Yeˬsuˇ ehˇ nehˬ-eu, “Naw maꞈ lehˬ dui dui meh. Aˬ jeˬ miˇ neh ehˇ naˇ, naw maꞈ Jaˇliꞈ maˬ siˬ nya-a. 30Shiˇ-euˬ tsawˇ haˬ dawˬ tawˆ luꞈ gʼoꞈ dehꞈ laˇ ngeh nah, mˬ taˆ gʼaˬ kʼehˇ loꞈ-ehˇ pyeuꞈ-awˇ, sheuˬ dahˬ dzaˬ-eu maˬ paˇ baw meh. 31Shiˇ-euˬ tsawˇ haˬ deuˬ gʼoꞈ dehꞈ laˇ-eu gaˇ kawˆ-ahˇ taꞈ leˇ-awˇ, Miˬyehˇ neh naw maꞈ-ahˇ ehˇ taˬ-euˬ dawˬ, naw maꞈ tiˬ jawˇ-iˬ maˬ gui haw-aˬ loˇ. 32‘Ngaˇ-aˬ, Aˬbyaˬhaˬ-euˬ Miˬyehˇ, Iˇtsaˆ-euˬ Miˬyehˇ, Yaˬkoˆ-euˬ Miˬyehˇ ma’ lehˇ, aˬ yawꞈ ehˇ-eu meh. Aˬ yawꞈ-aˬ, dehꞈ luꞈ-eu tsawˇ haˬ deuˬ-euˬ Miˬyehˇ meh. Shiˇ-euˬ tsawˇ haˬ deuˬ-euˬ Miˬyehˇ maˬ ngeuˇ-a.”

33Yeˬsuˇ kʼoeˇ loꞈ-ehˇ ehˇ gaˇ tsawˇ haˬ aˇ maꞈ maꞈ ma ya gaˬ ngeh, aˬ yawꞈ mehˬ nehˬ tsoˆ nehˬ gaˇ zahˬ dui dui leˇ-euˬ meh.

Zahˇ dawˬ kʼoꞈ dawˬ huiˬ dzehˬ-eu dawˬ

(Maˬkuˆ 12.28-34; Luˇkaꞈ 10.25-28)

34Yeˬsuˇ-euˬ mehˬ shi Saˬduˬgehˇ deuˬ dawˬ maˬ ngehˬ doˆ nya-ehˇ ciˬ cuˇ ni pyeuꞈ-iˇ jiˇ-euˬ gaˇ kawˆ Paˬliˬsehˇ deuˬ ya gaˬ ngeh, cawˬ gm-awˇ oe-euˬ meh. 35Aˬ yawꞈ maꞈ-euˬ aˇ muˇ laꞈ kʼoeˇ ahˇ-eu Zahˇ dawˬ kʼoꞈ dawˬ mehˬ-eu saˬ laˬ tiˬ gʼaˬ, Yeˬsuˇ dawˬ bi ngehˬ bahˬ ni, dawˬ lahˇ ju kʼmˇ-eu lehˇ leh jeh-eu meh. 36Aˬ yawꞈ ehˇ-eu, “Saˬ laˬ-oˇ, Zahˇ dawˬ kʼoꞈ dawˬ dawˬ tawˆ luꞈ laꞈ kʼoeˇ, aˬ cawˬ naˆ maˬ tseˇ huiˬ dzehˬ-eu aˬ geu dawˬ-a.”

37Yeˬsuˇ ehˇ-eu, “‘Nawˬ-euˬ nui ma dawˬ tawˆ luꞈ, nawˬ-euˬ saꞈ laˇ dawˬ tawˆ luꞈ, nawˬ-euˬ nui noeˬ nui duˇ dawˬ tawˆ luꞈ, nawˬ-euˬ Miˬyehˇ pyeuꞈ-eu SahˬpaˬMiˬyehˇ-ahˇ gaˬ-awˬ.’ 38Dawˬ heu dawˬ-aˬ, aˬ cawˬ naˆ maˬ tseˇ huiˬ-eu zahˇ dawˬ kʼoꞈ dawˬ yaw beh dawˬ meh. 39Aˬ cawˬ naˆ maˬ tseˇ huiˬ-eu nyiˬ dawˬ tiˬ dawˬ-aˬ, ‘Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ’ lehˇ ehˇ-eu kʼoeˇ dawˬ meh. 40Moˇseˬ-euˬ Zahˇ dawˬ kʼoꞈ dawˬ dawˬ tawˆ luꞈ hawˇ-eu, Miˬyehˇ gʼaˇ duˬ ngehˬ dah-eu deuˬ neh kʼaˇ mehˬ kʼaˇ tsoˆ-euˬ dawˬ tawˆ luꞈ, zahˇ dawˬ kʼoꞈ dawˬ heu nyiˬ dawˬ laꞈ kʼoeˇ ahˇ leˇ jiˇ-euˬ meh.”

Ka li aˬ suˇ gʼaˬ-a

(Maˬkuˆ 12.35-37; Luˇkaꞈ 20.41-44)

41Paˬliˬsehˇ deuˬ uiˬ leˇ-awˇ jawˇ gaˇ, Yeˬsuˇ heu loꞈ-ehˇ naˇ haˬ-euˬ meh. 42“Ka li gaˇ kawˆ naw maꞈ aˬ joˆ-ehˇ noeˬ te. Aˬ suˇ gʼaˬ-euˬ zaˬ nga lehˇ noeˬ te.” Aˬ yawꞈ maꞈ ehˇ-eu, “Daˬbiˇ-euˬ aˬ li meh.”

43Yeˬsuˇ ehˇ-eu, “Toˆ-ehˇ ngeuˇ naˇ, aˬ yawꞈ-ahˇ ‘Sahˬpaˬ’ lehˇ kuˇ-eu gʼaˇ duˬ, aˬ jeˬ miˇ neh Yaw sahˇ Miˬyehˇ neh Daˬbiˇ-ahˇ bi noeˬ doˆ-awˇ, heu loꞈ-ehˇ bi ehˇ-euˬ ta.

44‘Nawˬ-ahˇ muiˇ-eu tsawˇ haˬ deuˬ-ahˇ,

nawˬ-euˬ aˬ kuiˇ pehˬ zaˬ uˬ moˆ,

ngaˇ maˬ nyehꞈ uiˬ jiˇ kʼoeˇ keuˆ ni,

ngaˬ-euˬ aˇ maˇ paw nuiˇ-awˬ lehˇ,

Ngaˬ-euˬ Sahˬ paˬ kuˇ hawˇ kamˇ-ahˇ,

Sahˬ paˬ Miˬyehˇ ehˇ nehˬ-euˬ meh.’

45Kʼoeˇ miˇ neh, Daˬbiˇ-euˬ mawˇ do aˬ yawꞈ-ahˇ ‘Sahˬpaˬ’ lehˇ kuˇ-euˬ ngeuˇ naˇ, Daˬbiˇ-euˬ zaˬ aˬ joˆ-ehˇ pyeuꞈ nya ta.”

46Kʼoeˇ ngeh, tsawˇ haˬ tiˬ gʼaˬ-iˬ Yeˬsuˇ-ahˇ dawˬ maˬ ngehˬ kʼoꞈ nya ni tsoˆ leˇ jiˇ-euˬ meh. Kʼoeˇ ngeh nah neh naˇ, tsawˇ haˬ tiˬ gʼaˬ-iˬ aˬ yawꞈ-ahˇ dawˬ tiˬ dawˬ-iˬ maˬ paˇ naˇ haˬ leˇ peuˬ ni pyeuꞈ-iˇ-euˬ meh.

Currently Selected:

Maꞈtehˬ 22: AHK

Highlight

Copy