Yaˬkoˆ 3

Mehˬ laˇ

1Aˬ yuiꞈ aˬ nyiˇ Ka li zaˬ deuˬ-oˇ, naw maꞈ mehˬ-eu tsoˆ-eu saˬ laˬ gʼawˬ mya gʼaˬ geuꞈ-eu maˬ tsaˬ-a. Naw maꞈ siˬ nya-eu loꞈ-ehˇ, mehˬ-eu tsoˆ-eu saˬ laˬ deuˬ-aˬ, aˬ cawˬ naˆ maˬ tseˇ bi pyehˆ tseˇ-awˇ yaˇ kʼaˬ daˇ nehˬ gaˇ ya daˬ tehꞈ-a. 2Aˬ dui dawˬ tawˆ luꞈ tiˬ kʼehˬ maˬ taˬ ni mˇ lehˬ-eu meh. Ehˇ kʼawꞈ, tsawˇ haˬ tiˬ gʼaˬ na ngehˬ lehˬ tmˇ lehˬ-eu maˬ baw naˇ, byah-eu loꞈ-eu tsawˇ haˬ pyeuꞈ-awˇ, yawˬ ha-euˬ nui ma gʼawˇ mawˇ dawˬ tawˆ luꞈ-ahˇ yaw muiˬ paˬ-ehˇ gʼaˬ leˇ-eu tsawˇ haˬ pyeuꞈ-eu meh. 3Aˬ dui-euˬ dawˬ gʼoˆ bi gʼoˆ-eu gʼaˇ duˬ, mahˬ-ahˇ mahˬ kawꞈ dawˆ-awˇ, aˬ dui kʼaˇ bi iˇ mawꞈ-eu paw bi iˇ-eu meh. 4Saˇ baoˬ gaˇ kawˆ shaˇ noeˬ haw sheˇ. Saˇ baoˬ kʼoeˇ huiˬ dui dui-awˇ, gʼaˬ kʼaˆ dui dui-eu jaˬ lehˇ neh bi baw gʼeh-euˬ kʼawꞈ, daˇ laˆ laˆ zaˬ tiˬ hmˬ neh yeuꞈ pyawˇ nya-awˇ, saˇ baoˬ teh-eu gʼaˬ kʼaˇ bi iˇ mawꞈ-eu paw bi iˇ nya-eu meh. 5Kʼoeˇ gaˇ duˇ ni, mehˬ laˇ-aˬ, nyiˇ dui dui kʼawꞈ, huiˬ dui dui-eu gaˇ kawˆ deuˬ-ahˇ kʼahˬ sehˇ jehˆ nya-eu meh.

Huiˬ dui dui-eu aˇ bawˇ sahˬ kʼaˆ kʼaˆ ma-ahˇ miˬ dzaˬ miˬ dzuiꞈ tiˬ dzuiꞈ neh bi puiˆ dzeh nya gaˇ shaˇ noeˬ haw sheˇ. 6Mehˬ laˇ-aˬ, miˬ dzaˬ-ahˇ duˇ-eu meh. Mehˬ laˇ kʼoeˇ-aˬ, aˬ dui-euˬ gʼawˇ mawˇ laꞈ kʼoeˇ jaˆ-eu haiˬ-eu miˇ kʼahˬ tiˬ kʼahˬ pyeuꞈ-awˇ, aˬ dui-euˬ nui ma gʼawˇ mawˇ dawˬ tawˆ luꞈ laꞈ kʼoeˇ yaw haiˬ jeˬ bi byah laˇ-eu meh. Mehˬ laˇ kʼoeˇ-aˬ, shiˬ buiˇ lah ma-ahˇ doꞈ-eu miˬ dzaˬ yuˇ-awˇ, aˬ dui yaw dehꞈ dehꞈ-eu jeˬ dawˬ tawˆ luꞈ-ahˇ bi puiˆ dzaˬ-eu meh. 7Tsawˇ haˬ zaˬ-aˬ, jeˬ zaˬ aˇ jiˇ dawˬ tawˆ luꞈ-ahˇ laˆ yah nya-eu meh. Bawˇ tsahˬ jeˬ zaˬ deuˬ, aˇ jiˇ deuˬ, miˇ tsa joe joe-ehˇ cah-eu jeˬ zaˬ deuˬ hawˇ-eu, ngaˬ shaˬ ngaˬ deˇ deuˬ-ahˇ laˆ yah-awˇ cu geuꞈ nya-eu meh. 8Ehˇ kʼawꞈ, tsawˇ haˬ tiˬ gʼaˬ-iˬ mehˬ laˇ-ahˇ maˬ laˆ yah nya-a. Mehˬ laˇ-aˬ, maˬ nyehꞈ gʼaˬ nya-eu yaw haiˬ jeˬ pyeuꞈ-awˇ, doꞈ tiˬ byah ni ahˇ-eu meh. 9Aˬda pyeuꞈ-eu Sahˬpaˬ Miˬyehˇ-euˬ guiˬ lahˬ-ahˇ mehˬ laˇ neh aˬ dui ja ceuˬ-eu loꞈ-ehˇ, Miˬyehˇ-euˬ aˇ gʼehˇ-ahˇ duˇ ni beh taˬ-euˬ tsawˇ haˬ zaˬ deuˬ-ahˇ kʼawꞈ, mehˬ laˇ neh aˬ dui yaˬ kʼehˇ yaˬ-eu meh. 10Guiˬ lahˬ-ahˇ ja ceuˬ-eu dawˬ maˬ ehˇ, yaˬ kʼehˇ yaˬ-eu dawˬ maˬ ehˇ, kʼaˬ meh mehˬ boeˬ-ahˇ neh tehꞈ-ehˇ doˆ laˇ-eu meh. Aˬ yuiꞈ aˬ nyiˇ Ka li zaˬ deuˬ-oˇ, kʼoeˇ loꞈ-ehˇ bi gʼeh-eu maˬ tsaˬ-a. 11Iˇ cuꞈ iˇ byoe tiˬ byoe-ahˇ tehꞈ-ehˇ i cuꞈ yaw kuiˇ hawˇ-eu iˇ cuꞈ yaw kʼaˬ maˬ doˆ laˇ-a. 12Aˬ yuiꞈ aˬ nyiˇ Ka li zaˬ deuˬ-oˇ, siˬ guˬ aˇ bawˇ-ahˇ saˬ loˬ aˇ siˬ maˬ siˬ le nya-a. Aˬ gaꞈ baw duˆ-ahˇ siˬ guˬ aˇ siˬ maˬ siˬ le nya-a. Saˬ deuꞈ kuiˇ-eu iˇ cuꞈ doˆ-eu cuˬ-ahˇ iˇ cuꞈ yaw kuiˇ maˬ doˆ laˇ nya-a.

Mˬ-ahˇ neh doˆ le-euˬ zaˬ siˬ tsawˇ gahˇ

13Naw maꞈ laꞈ kʼoeˇ, tsawˇ gahˇ ahˇ-awˇ siˬ-eu nya-eu tsawˇ haˬ jawˇ te loˇ. Muiˬ-eu dehꞈ-eu jawˇ-eu jeˬ laꞈ kʼoeˇ maˬ ehˇ, nui nahˬ nui yu hawˇ-eu nui gahˇ neh mˇ doˆ shaˇ doˆ laꞈ-eu muiˬ-eu gaˇ deuˬ laꞈ kʼoeˇ maˬ ehˇ, zaˬ siˬ tsawˇ gahˇ kʼoeˇ bi doˆ laˇ-awˬ. 14Ehˇ kʼawꞈ, myaˆ naˆ-eu jeˬ, aˬ cawˬ-ahˇ nui ma naˇ-eu jeˬ hawˇ-eu, yawˬ ha-euˬ gʼaˇ duˬ tehꞈ-ehˇ shaˇ noeˬ-eu jeˬ naw maꞈ-euˬ nui ma laꞈ kʼoeˇ ahˇ naˇ, zaˬ siˬ tsawˇ gahˇ ahˇ ma lehˇ kʼahˬ sehˇ jehˆ-awˇ yaw tsaˬ yaw dawˇ jeˬ-ahˇ taˬ mˇ bahˬ. 15Kʼoeˇ loꞈ-ehˇ gʼeh-eu zaˬ siˬ tsawˇ gahˇ-aˬ, mˬ-ahˇ eh doˆ le-euˬ jeˬ maˬ ngeuˇ-a. Kʼoeˇ-aˬ, miˇ tsaˬ heu-ahˇ taꞈ-eu zaˬ siˬ tsawˇ gahˇ pyeuꞈ-awˇ, guiˬ lahˬ saꞈ laˇ-ahˇ taꞈ-eu jeˬ maˬ ngeuˇ-ehˇ, nehꞈ-ahˇ taꞈ-eu jeˬ pyeuꞈ-eu meh. 16Myaˆ naˆ-eu jeˬ hawˇ-eu yawˬ ha gʼaˇ duˬ tehꞈ-ehˇ shaˇ noeˬ-eu jeˬ kʼaˇ jaˆ gaˇ, maˬ tsaˬ maˬ dzoeˇ leˇ-eu jeˬ hawˇ-eu yaw haiˬ gʼawˬ mya jeˬ jaˆ-eu meh. 17Ehˇ kʼawꞈ, mˬ-ahˇ neh doˆ le-euˬ zaˬ siˬ tsawˇ gahˇ gaˇ kawˆ ya ehˇ naˇ, yaw beh tiˬ jeˬ-aˬ, muiˬ-eu shawˇ-eu jeˬ meh. Kʼoeˇ jiˇ naˇ, tsaˬ leˇ dzoeˇ leˇ-eu, nui nahˬ nui yu ahˇ-eu, bya cehˆ ni cawˬ cawˬ taꞈ-eu heu deuˬ meh. Gʼawˬ shaˬ gaˬ-eu nui ma tiˬ byah ni ahˇ-awˇ, yaw muiˬ jeˬ mˇ doˆ shaˇ doˆ laꞈ-eu meh. Myaˆ pyawˬ huiˬ nyiˇ maˬ tseˇ-eu uˬ taꞈ, nui ma laꞈ gʼoꞈ maˬ baw-a. 18Tsaˬ leˇ dzoeˇ leˇ ni mˇ-eu tsawˇ haˬ deuˬ neh tsaˬ leˇ dzoeˇ leˇ-eu siˬ yoeˬ sehˬ-euˬ gaˇ, yaw tsaˬ yaw dawˇ jeˬ ya yehˬ-eu meh.

Currently Selected:

Yaˬkoˆ 3: AHK

Highlight

Copy