Yaˬkoˆ 2

Myaˆ pyawˬ huiˬ nyiˇ maˬ tseˇ ni yahˇ-awˬ

1Aˬ yuiꞈ aˬ nyiˇ ka li zaˬ deuˬ-oˇ, yaw shehꞈ kʼahˬ sehˇ huiˬ-eu Sahˬpaˬ pyeuꞈ-eu aˬ dui-euˬ Sahˬpaˬ Yeˬsuˇ Ka li-ahˇ jah-eu aˬ dui-aˬ, aˬ cawˬ-ahˇ kʼoeˇ taˆ paw haw-awˇ myaˆ pyawˬ huiˬ nyiˇ maˬ ya tseˇ-a. 2Naw maꞈ uˬ duˬ tahˬ-eu lehˇ uiˬ leˇ ngeh, shuiˇ laꞈ behˬ behˬ-awˇ mehˬ tsoeˬ yaw muiˬ dm luꞈ-eu smˇ muiˬ smˇ baw ti gʼaˬ hawˇ-eu, mehˬ tsoeˬ yaw cehˇ yaw ju-ehˇ dm luꞈ-eu iˇ shaˬ iˇ taw tiˬ gʼaˬ laˇ-euˬ ehˇ-awˬ. 3Mehˬ tsoeˬ yaw muiˬ dm luꞈ-eu gʼaˬ-ahˇ naw maꞈ yaw zeu baw dzehˬ-eu laꞈ kʼoeˇ, “Nuiˇ duˬ yaw muiˬ heu tsahˇ-ahˇ nuiˇ laˇ-awˬ” lehˇ ehˇ nehˬ-awˇ, iˇ shaˬ zaˬ kʼoeˇ gʼaˬ-ahˇ-aˬ, “Kʼoeˇ gaˇ yawꞈ-awˬ. Maˬ ngeuˇ naˇ, heu gaˇ ngaˬ-euˬ aˬ kuiˇ dawˬ peh miˇ tsa nuiˇ laˇ-awˬ” lehˇ naw maꞈ ehˇ nehˬ-euˬ ehˇ-awˬ. 4Kʼoeˇ-aˬ, naw maꞈ yaw kaˬ myaˆ pyawˬ huiˬ nyiˇ tseˇ-awˇ, nui ma maˬ sui maˬ dawˇ-eu laꞈ kʼoeˇ aˬ cawˬ-ahˇ noeˬ doeˇ-eu jeˬ pyeuꞈ-eu meh.

5Ngaˇ gaˬ-euˬ aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ gaˇ naˇ haˬ sheˇ. Jah-eu jeˬ laꞈ kʼoeˇ smˇ muiˬ muiˬ-eu tsawˇ haˬ pyeuꞈ laˇ-awˇ, Miˬyehˇ-ahˇ gaˬ-eu tsawˇ haˬ deuˬ-ahˇ biꞈ-eu gʼaˇ duˬ aˬ yawꞈ neh saˇ jaˇ dzaˬ taˬ-euˬ miˇ kʼahˬ-ahˇ bi uˇ leˇ-eu lehˇ, miˇ tsaˬ heu kʼoeˇ taˆ dehꞈ luꞈ-eu shaˬ-eu zahˬ-eu tsawˇ haˬ deuˬ-ahˇ Miˬyehˇ neh tseˇ doˆ taˬ-euˬ meh. 6Ehˇ kʼawꞈ, shaˬ-eu zahˬ-eu tsawˇ haˬ deuˬ-ahˇ naw maꞈ yaw zeu maˬ baw-a. Naw maꞈ-euˬ kʼoeˇ taˆ nawˬ tehˬ-awˇ naw maꞈ-ahˇ yaˇ kʼaˬ daˇ duˬ-ahˇ sheuˬ gʼeh-eu kʼoeˇ, aˬ suˇ gʼaˬ-a. Smˇ muiˬ smˇ baw deuˬ maˬ ngeuˇ-a loˇ. 7Naw maꞈ-ahˇ biꞈ taˬ-euˬ tsawˇ myahˇ yaw muiˬ-ahˇ yehˬ bawˬ sehˇ lu-ehˇ ehˇ-eu deuˬ-aˬ, smˇ muiˬ smˇ baw kʼoeˇ deuˬ meh.

8“Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ” lehˇ Jaˇliꞈ laꞈ kʼoeˇ ehˇ taˬ-euˬ Miˬyehˇ Miˇkʼahˬ-ahˇ taꞈ-eu zahˇdawˬ kʼoꞈ dawˬ kʼoeˇ dawˬ-ahˇ naw maꞈ naˇ haˬ geuꞈ naˇ, tsaˬ-eu jeˬ-ahˇ naw maꞈ mˇ-eu meh. 9Ehˇ kʼawꞈ, naw maꞈ kʼoeˇ taˆ paw tehꞈ-ehˇ haw-awˇ myaˆ pyawˬ huiˬ nyiˇ tseˇ naˇ, ‘Iˬ baˇ mˇ-eu jeˬ pyeuꞈ-awˇ, zahˇ dawˬ kʼoꞈ dawˬ-ahˇ bahˬ-eu tsawˇ haˬ pyeuꞈ-eu meh’ lehˇ, Zahˇ dawꞈ kʼoꞈ dawˬ laꞈ kʼoeˇ pah mehˬ taˬ-euˬ meh. 10Tsawˇ haˬ aˬ geuˬ gʼaˬ maˬ kaˬ, zahˇ dawˬ kʼoꞈ dawˬ dawˬ tawˆ luꞈ-ahˇ caw teh luꞈ kʼawꞈ, tiˬ dawˬ-ahˇ mˇ bahˬ naˇ, dawˬ tawˆ luꞈ-ahˇ mˇ bahˬ-euˬ jeˬ pyeuꞈ-eu meh. 11Aˬ jeˬ miˇ neh ehˇ naˇ, “Aˬ cawˬ-euˬ miˬ sawˇ yo zaˬ-ahˇ maˬ ya bahˬ maˬ ya muˆ-a” lehˇ ehˇ-eu hawˇ-eu, “Tsawˇ haˬ-ahˇ maˬ ya sehꞈ-a” lehˇ ehˇ-eu kʼoeˇ-aˬ, aˬ yawꞈ tiˬ gʼaˬ neh ehˇ-euˬ dawˬ meh. Aˬ cawˬ-euˬ miˬ sawˇ yo zaˬ-ahˇ nawˇ maˬ bahˬ maˬ muˆ-euˬ kʼawꞈ, tsawˇ haˬ sehꞈ naˇ, zahˇ dawˬ kʼoꞈ dawˬ-ahˇ mˇ bahˬ-euˬ meh. 12Aˬ dui-ahˇ bi buˬ-iˇ laꞈ-euˬ zahˇ dawˬ kʼoꞈ dawˬ kʼoeˇ neh yaˇ kʼaˬ ya bi daˇ meh lehˇ siˬ nya-eu tsawˇ haˬ loꞈ-ehˇ ngehˬ-awˬ tmˇ-awˬ, mˇ-awˬ shaˇ-awˬ. 13Aˬ cawˬ-ahˇ gʼawˬ shaˬ maˬ gaˬ nehˬ-eu tsawˇ haˬ-ahˇ Miˬyehˇ gʼawˬ shaˬ maˬ gaˬ ni yaˇ kʼaˬ daˇ tehꞈ-a. Ehˇ kʼawꞈ, gʼawˬ shaˬ gaˬ-eu jeˬ-aˬ, yaˇ kʼaˬ daˇ-eu jeˬ-ahˇ gʼaˬ leˇ nya-eu meh.

Jah-eu hawˇ-eu mˇ-eu shaˇ-eu

14Aˬ yuiꞈ aˬ nyiˇ Ka li zaˬ deuˬ-oˇ, tsawˇ haˬ tiˬ gʼaˬ na jah ma lehˇ ehˇ kʼawꞈ, maˬ mˇ maˬ shaˇ naˇ, aˬ jeˬ gaˇ dahˇ tsoeˬ nmˇ. Jah-eu kʼoeˇ neh aˬ yawꞈ-ahˇ ka kʼoꞈ nehˬ nya tehꞈ-a loˇ. 15Aˬ yuiꞈ aˬ nyiˇ Ka li zaˬ deuˬ laꞈ kʼoeˇ, kʼaˬ dzeˇ zaˬ maˬ ehˇ, zaˬ miˬzaˬ maˬ ehˇ, tiˬ gʼaˬ na dm gʼaˬ dm lmˇ hawˇ-eu dzaˬ dzaˬ dawˇ dawˇ maˬ jaˆ ni shaˬ luꞈ-eu ehˇ-awˬ. 16Naw maꞈ aˬ yawꞈ-ahˇ kʼaˇ loˬ-eu jeˬ maˬ caw ba nehˬ ni, “Miˬyehˇ guiˬ lahˬ biꞈ luꞈ-uˇ. Yaw lmˇ lmˇ-ehˇ jawˇ-awˇ tiˬ dehˆ dzaˬ-awˬ dawˇ-awˬ” lehˇ ehˇ nehˬ naˇ, naw maꞈ ehˇ-eu kʼoeˇ aˬ jeˬ gaˇ dahˇ tsoeˬ nmˇ. 17Kʼoeˇ miˇ neh, jah-eu jeˬ-aˬ, mˇ-eu shaˇ-eu jeˬ maˬ ahˇ naˇ, shiˇtaˬ-euˬ gaˇ duˇ-eu meh.

18“Tiˬ gʼaˬ-ahˇ jah-eu jeˬ oꞈ-awˇ, tiˬ gʼaˬ-ahˇ mˇ-eu jeˬ oꞈ-eu meh” lehˇ, tsawˇ haˬ tiˬ gʼaˬ na ehˇ tehꞈ-a. Mˇ-eu shaˇ-eu jeˬ maˬ ahˇ-eu nawˬ-euˬ jah-eu jeˬ ngaˬ-ahˇ mehˬ nehˬ laꞈ sheˇ. Ngaˇ-aˬ, mˇ-eu shaˇ-eu laꞈ kʼoeˇ ngaˬ-euˬ jah-eu jeˬ nawˬ-ahˇ mehˬ nehˬ ma. 19Miˬyehˇ tiˬ gʼaˬ tehꞈ-ehˇ jawˇ-eu meh lehˇ nawˇ jah-eu miˇ neh maˬ gaˇ dzehˬ ma lehˇ noeˬ te loˇ. Nehꞈ deuˬ kʼawꞈ kʼoeˇ loꞈ-ehˇ jah-awˇ, guˆ guˆ-ehˇ yaw dzuˬ dzuˬ luꞈ meh. 20A dzawˬ aˇ gah deuˬ-oˇ, mˇ-eu shaˇ-eu jeˬ maˬ ahˇ-eu jah-eu jeˬ-aˬ yawꞈ ngehꞈ meh lehˇ bi mehˬ duˬ mawꞈ-eu nya loˇ. 21Aˬ dui-euˬ aˬ poeˬ Aˬbyaˬhaˬ aˬ joˆ-ehˇ jahˇ-awˇ Miˬyehˇ-ahˇ tsaˬ leˇ tsahˇ leˇ-euˬ ta. Aˬ yawꞈ-euˬ aˬ li Iˇtsaˆ-ahˇ lawˇ duˬ kʼoeˇ taˆ lawˇ-euˬ mˇ-eu shaˇ-eu kʼoeˇ baˬ da neh, aˬ yawꞈ Miˬyehˇ-ahˇ tsaˬ leˇ tsahˇ leˇ-euˬ maˬ ngeuˇ-a loˇ. 22Aˬ yawꞈ-euˬ jah-eu jeˬ hawˇ-eu aˬ yawꞈ neh mˇ-euˬ shaˇ-euˬ jeˬ tiˬ gaˇ taꞈ-eu kʼoeˇ, nawˇ maˬ haw mawˇ nya te loˇ. Aˬ yawꞈ-euˬ jah-eu jeˬ-aˬ, aˬ yawꞈ neh mˇ-euˬ shaˇ-euˬ jeˬ laꞈ kʼoeˇ byah laˇ-euˬ meh. 23Kʼoeˇ ngeh jawˇ, “Aˬbyaˬhaˬ Miˬyehˇ-ahˇ jah-awˇ, aˬ yawꞈ-euˬ jah-eu jeˬ baˬ da neh, Miˬyehˇ neh aˬ yawꞈ-ahˇ yaw tsaˬ yaw dawˇ tsawˇ haˬ lehˇ sawˇ nehˬ-euˬ meh” lehˇ ehˇ-eu Jaˇ liꞈ dawˬ kawˬ kʼoeˇ byah laˇ-euˬ meh. Kʼoeˇ miˇ neh, Aˬbyaˬhaˬ-ahˇ Miˬyehˇ-euˬ cawˬ lehˇ kuˇ-eu meh. 24Nymˬ-mˇ poˆ jawˇ-aˬ, tsawˇ haˬ tiˬ gʼaˬ Miˬyehˇ-ahˇ tsaˬ leˇ tsahˇ leˇ nya-eu-aˬ, jah-eu tiˬ jeˬ baˬ da neh tehꞈ-ehˇ maˬ ngeuˇ-ehˇ, mˇ-eu shaˇ-eu jeˬ kʼawꞈ ahˇ-eu baˬ da neh tsaˬ leˇ tsahˇ leˇ nya-eu meh lehˇ naw maꞈ-ahˇ siˬ duˬ laˇ miˇ-a loˇ.

25Meh maˬ laˇ Laˬhaˇ-euˬ gaˇ kawˆ kʼawꞈ, kʼoeˇ loꞈ-ehˇ meh. Miˇ kʼahˬ kʼoeˇ kʼahˬ-ahˇ kʼoeˬ sho haw leˇ-euˬ Iˇsaˬleˬlaˇ tsawˇ haˬ deuˬ-ahˇ aˬ yawꞈ ha geuꞈ-awˇ, gaˇ ma yawˬ kahˇ yawˬ mehˬ pyawˇ nehˬ-awˇ bi buˬ bi law-iˇ-euˬ meh. Aˬ yawꞈ kʼoeˇ loꞈ-ehˇ mˇ-euˬ shaˇ-euˬ miˇ neh, Miˬyehˇ-ahˇ tsaˬ leˇ tsahˇ leˇ-eu tsawˇ haˬ pyeuꞈ laˇ-euˬ meh.

26Kʼoeˇ baˬ da neh, saꞈ laˇ maˬ ahˇ-eu gʼawˇ mawˇ-aˬ, yaw shiˇ pyeuꞈ-eu loꞈ-ehˇ, mˇ-eu shaˇ-eu jeˬ maˬ ahˇ-eu jah-eu jeˬ kʼawꞈ, yaw shiˇ meh.

Currently Selected:

Yaˬkoˆ 2: AHK

Highlight

Copy